Imarisai

Imarisai

Kristumiutut ’inerluarsimasuuit’?

Kristumiutut ’inerluarsimasuuit’?

 Kristumiutut ’inerluarsimasuuit’?

’MEERAAGALLARAMA meeqqatut oqaluttarpunga meeqqatullu isumaliortarlunga meeqqatullu eqqarsartarlunga.’ Apustili Paulus taamatut allappoq. Aap, tamatta meeraasimavugut ikiortariaqartut. Taamaattuaannanngilavulli. Soorlu Paulus nangiiluni allattoq: ’Meeraajunnaaramali meerarpaluttut atorunnaarpakka.’ — 1 Korintumiut 13:11.

Taamatulli kristumiut tamarmik anersaakkut ittumik meeqqatut aallartittarput. Piffissalli ingerlanerani angusinnaavaat ’uppeqatigiinneq Guutillu anersaavanik ilisarsiqatigiinneq, angut inersimasoq nallersimallugu, Kristusip tamakkigaasa angissusiat nallersimallugu’. (Evfisumiut 4:13) 1 Korintumiut 14:20-mi imaattumik kajumissaaruteqarpoq: ’Qatanngutikka, silaqarsutsissigut merlertunngornaveeritsi, kisianni ajorsutsissigut merlertuugitsi, silaqarsutsissigulli inersimasunngoritsi.’

Pingaartumik nutaat amerlaqimmata, kristumiut inerlluarsimasut ullumikkut Guutip innuttaanut pilluaqqussutaapput. Kristumiut inerluarsimasut ilagiit aalajaassuseqalersittarpaat. Ilagiit ilaaffigisamik anersaavannut iluaqutaasumik sunniuteqarput.

Timikkut ineriartorneq annerusumik minnerusumilluunniit imminik pisartoq, anersaakkut ineriartorneq taamaallaat naammassisaqarnikkut pisarpoq. Tupinnanngitsumik Paulusip nalaani kristumiut ilaat naak ukiorpassuit Guuti kiffartorfigisimagaluarlugu ’inersimasumut ingerlasimanngillat’. (Eprîarit 5:12; 6:1) Ilinnummi qanoq ippa? Ukiut ikittuinnaat amerlasuulluunniit Guuti kiffartorfigisimagaluarukku, pissusissamisuussaaq  ilumoortumik imminut misilikkuit. (2 Korintumiut 13:5) Inersimasut kristumiutut inerluarsimasutut taaneqarsinnaasut ilagaatsit? Taamaanngippat qanoq ilillutit taamaalisinnaavit?

’Silassorissutsikkut inerluarsimasut’

Anersaakkut meeraaqqat ajornanngitsumik ’mallisut aalaterneqartutut angalatinneqartarput ajoqersuummit nalinginnarmit anorlersumit, inuit immeraattarnerinit, qoqassiisut tammartitsisut peqqusersuunerannit’. Taamaattumik Paulus oqarpoq: Asanninnikkulli ilumoorluta niaqorisamut tamatigut alliartoqqulluta, tamassa Kristusimut.’ (Evfisumiut 4:14, 15) Qanoq Ililluni? Eprîarit 5:14-imi imatut allassimasoqarpoq: ’Inersimasut nerisassamik mattusuumik pisariaqarput, tassa misigisaqartarnermit sungiusagaasunit sianissutillit ajunngitsorlu ajortorlu immikkoorsusiisigut ilisarisinnaallugit.’

Malugiuk ’misigisaqartarnertigut’, tassa Biibilip najoqqutassiaasa malinnerisigut, inersimasutut sungiusagaasunik misigissuseqalersimasut. Tassa ullormit ullormut inersimasunngortoqarneq ajorpoq. Piffissap ingerlanerani anersaakkut ineriartorneq pisarpoq. Namminerli atuaqqissaartarnikkut sukkasuumik anersaakkut ineriartornissamut annertuumik iliuuseqartoqarsinnaavoq, pingaartumik Guutip oqaasiani sammisassani itinerusuni. Piffissami kingulliunerusumi Napasuliaq Alapernaarsuiffik-mi sammisassat itinerusut amerlasuut allaatigineqarsimapput. Inerissimasunit allaaserisat taamaattut ’paasineq ajornartunik ilaqarnerat’ pissutigalugu tunuartinneqarneq ajorput. (2 Pîtruse 3:16) Akerlianilli kajumillutik ’nerisassatut mattusuutut’ aalluttarpaat.

Oqaluussisartut ilinniartitsisullu aallussilluartut

Jesusip ajoqersukkani peqquai: ’Taamaattumik aallaritsi, inuiaqatigiillu tamaasa ajoqersuganngortissigik Ataatap Ernerullu anersaallu illernartup aqqanut kuillugit; ajoqersorsigillu ilissinnut peqqusakka tamaasa maleruaqqullugit.’ (Matîuse 28:19, 20) Aamma eqiasuilluni oqaluussinermut peqataaneq anersaakkut siuariartortitseqatassaaq. Soormi periarfissatit atorlugit sapinngisamik annertunerpaamik oqaluussinermut peqataanisat anguniagarigukku? — Matîuse 13:23.

Ilaanneeriarluni inuunermi piumasarineqartut oqaluussinermut piffissaqarnissaq ajornakusoortittarpaat. Kisianni ’assoruunnikkut’ ersersinneqartarpoq ’iivanngkiiliu’ assut pingaartillugu. (Lúkarse 13:24; Rûmamiut 1:16) Taamaalilluta ’uppertunut maligassanngorsinnaavugut’. — 1 Timûtiuse 4:12.

Assuarnaatsut

Inersimalluartunngorniaraanni assuarnaatsuujuarniarluni iliuuseqartariaqarpoq. Tussiaat 26:1 naapertorlugu David oqarpoq: „Pinngitsuutinnga [Jehova]. Assuarnaatsumik inuuseqarama.“ Hebriiarit oqaasiat assuarnaassusermut atorneqartartoq ileqqussatigut peqqissusermut, tamarmiussusermut, tamakkiisumik assuarnaassusermullu eqqarsaammik imaqarpoq. Taamaattorli oqartoqarsinnaanngilaq naammalluinnartuulluni. David arlaleriarluni ilungersornartunik ajortuliorsimavoq. Perorsagaanermili ilitsersorneqarnermilu ilassinerisigut takutippaa uummammigut ilumoorluni Jehova Guuti suli asallugu. (Tussiaat 26:2, 3, 6, 8, 11) Assuarnaatsuuneq imaapportaaq uummatikkut tamakkiisumik Jehovamut tunniulluinnarsimaneq. David ernerminut Salomonimut ima oqarpoq: „Ataatavit Guutia ilisariniaruk! Kajumillutit naalanniaruk.“ — 1 Israelikkut 28:9.

Aammattaaq assuarnaassuseqartuarneq isumaqarpoq ’silarsuup inuinut ilaannginneq’, imaappoq politikkimut akuliunnaveersaarluni  naalagaaffiillu sorsuunnerinut peqataanani. (Juánase 17:16) Aamma inooriaatsip minguttuup ajortunngorsimasullu soorlu kannguartuliornerup, allasiornerup ikiaroorniutinillu atornerluinerup akuersaannginnerat pisariaqarpoq. (Galâsiamiut 5:19-21) Taakkunanngali isumaqarneruvoq. Salomon mianersoqqusivoq: „Niviukkap toqungasup tarnusiortup tarnusiaa tippatsissinnaavaa, taamatullu aamma sianiilliorneq ilisimassutsimit ataqqisaanermillu annerusumik malunniuttarpoq.“ (Nalunaajaasup oqaasii 10:1) Aap, „sianiilliornerup annikitsunnguulluunniit“ soorlu assersuutigalugu naleqqutinngitsunik quiasaarluni oqalunnerup imaluunniit angummut arnamulluunniit qaninniarujoornerup „silatussutsimigut pingaartinneqartoq“ assuarnartunngortissinnaavaa. (Job 31:1) Taamaattumik inerissimalluartuunerit uppernarsarlugu inooriatsikkut ’ajorpaluttullu suut tamaasa ingalannerisigut’ maligasaalluarit. — 1 Tásalûníkamiut 5:22.

Ilumoortut

Kristumiutut inerluarsimasut amma ilumoortuupput. Soorlu Paulusip kristumiut Evfisumiunut agdlagkat-ni 4:24-mi imatut kajumissaarai: ’Inuttaarlu Guuti assilillugu pinngortitaq atissagissi iluartillugu illernartillugulu ilumoornikkut’. Allakkani Griikerisuuni oqaaseq „ilumuussusermut“ atorneqartoq isumaqartinneqartarpoq illernassuseq, naapertuilluassuseq, Guutimik mianerinninneq piuaassuserlu. Ilumoortup Guutimut pisussaaffini tamaasa naammasisarpai.

Ilumoorneq taamaattoq qanoq ineriartortinneqarsinnaava? Ilaatigut ilagiinni utoqqaanertat suleqatiginerisigut. (Eprîarit 13:17) Kristumiut inerissimasut akuerivaat Kristus ilagiit kristumiut niaqorigaat, tamatumalu kingunerisaanik ’Guutip ilagiissaanut paareqqusaanut’ paarsisunut ilumoorlutik. (apustilit suliait 20:28) Utoqqaanertanut toqqakkanut ilumuungitsuliornerungaassaaq oqartussaatitaanerat qularigaanni ajortumeerniaraanniluunniit. Aammattaaq ’ilumoorlunilu silaqarlunilu kiffaasumut’ ilumoorniarput atortussanullu agguaattagaannut anersaakkut ’neriffissaat nalliuttaraangat’. (Matîuse 24:45) Napasuliaq Alapernaarsuiffik-mi naqitikkanilu allani Napasuliaq Alapernaarsuiffiup Peqatigiiffiata naqitertitaani paasissutissat nanineqarsinnaasut atuarniapallattarpaat atorlugillu.

Asanninnerup sulissutiginera

Paulus kristumiunut Thessalonikamiittunut allappoq: ’Tamassilu immikkut asaqatigiinnersi naammattikkiartormat.’ (2 Tásalûníkamiut 1:3) Asanninnerup alliartornera anersaakkut ineriartornerup ilagaa pingaaruteqartorujussuaq. Juánase 13:35-mi allassimasutut Jesus oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ Qatanngutigiittut asaqatigiinneq imaaginnanngilaq ajunngitsunik misigissuseqarfigeqatigiinneq. Vine’s Expository Dictionary of Old and New Testament Words-imi allassimavoq: „Asanninneq taamaallaat ilisarineqarsinnaavoq suliatigut pilersitaasigut.“ Aap, tamatumani inerissimanermut siumukapallattoqartarpoq asanninnerup suliatigut ersersinneratigut.

Assersuutigalugu Rûmamiut 15:7-imi allassimavoq: ’Ilasseqatigiinniaritsi.’ Asanninnerup ersersinnissaanut periaaserineqarsinnaasut ilagaat uppeqatit soqutiginnilerlaallu ataatsimiinnerni nuannersumik ilassineri. Inuttut ilisariniartariaqarput soqutiginninnermillu ersersitsivigalugit. (Filípimiut 2:4) Aamma immaqa inoroorsaartoqarsinnaavoq angerlarsimaffimmullu qaaqqullugit. (apustilit suliait 16:14, 15) Allat naammalluinnanngitsuussutaat ilaanneeriarluni asanninnermut misilinneqaataasinnaavoq, qatanngutinulli ’asanninnerup kamaginninnerullu’ ilikkariartuaarnerani inerluarimasunngulerluni takutinneqassaaq. — Evfisumiut 4:2.

Pallorfiginninnerup minguitsup siuarsarneranut pigisaminnik atuisut

Itsaq Guutip innuttaasa akornanni tamarmiunngitsoq Jehovap naalaffianut tapersersuillutik tapiissuteqarnikkut akisussaaffimminnik naammassinnittarput. Tamanna pillugu Guutip pruffiitit Haggaj Malakiasilu taakkununnga aallartippai tamatumunnga tunngasumik iliuuseqarnissamut kajumilersinniarlugit. (Haggaj 1:2-6; Malaki 3:10) Ullumikkut kristumiut inerissimasut pigisatik Jehovamik pallorfiginninnerup tapersersorneranut nuannaarlutik atortarpaat. Ilaarsinnaavavut tamatigut najoqqutassap  1 Korintumiut 16:1, 2-miittup malinneratigut, ilagiinnut Jehovap nalunaajaasuisalu silarsuaq tamakkerlugu oqaluussinerannut tapersiissutissanik immikkoortitsilluta. Guutip oqaasiani neriorsuuteqarpoq: ’Pilluaqqusaasumillu siaruarterisoq pilluaqqusaasumittaaq katersiumaarpoq.’ — 2 Korintumiut 9:6.

Pigisanit atorneqarsinnaasut allat soorlu ukuupput, piffissaq nukiillu. ’Piffissaq pisiarineqarsinnaavoq’ suliassanit pingaaruteqannginnerusunit. (Evfisumiut 5:15, 16; Filípimiut 1:10) Piffissap atorluarnerunissaa ilinniarneqarsinnaavoq. Immaqa naalagaaffilersaarfiliornermut aserfallatsaaliinermullu assigisaannilluunniit pilersaarusiornermut Jehovap pallorfigineqarnerata siuarsarnerani peqataanissamut periarfissaqassaaq. Pigisanik taamatut atuineq suli annerusumik takussutissaassaaq kristumiutut inerluarsimasunngulernermut.

Inerinnissannut siumukapallagit!

Angutit arnallu misissueqqissaarnissamut piffissamik atuisut ilisimassuseqarluartullu, oqaluussinermi peqataalluartut, assuarisassaanngitsut, ilumoorfiginnittut asannillutillu Guutip naalagaaffiata sulineranut suliassatigut aningaasatigullu tapersersornissaanut piumassuseqartut pilluaqqussutaangaarput. Taamaattumik Paulus imatut kajumissaarimmat eqquminngilaq: ’Taamaattumik Kristusimik ajoqersuutaasut aallaqqaataat qaangiinnarlugit inersimasumut ingerlaniarta’ — Eprîarit 6:1.

Kristumiutut inersimalluartuuit? Imaluunniit suli anersaakkut merlertunnguuit? (Eprîarit 5:13) Qanorluunniilli pisoqassagaluarpat misissueqqissaartarniarlutit aalajangiusimajuk, oqaluussinermi peqataaniarlutit qatanngutinnullu asanninneq ersersillugu. Inerilluarsimasut perorsaatissiinerata ilitsersuineratalu maleruarnissaat piareersimaffigiuk. (Ussatit 8:33) Kristumiutut akisussaaffiit tamakkerlugu nammaguk. Taamaaliortup piffissap ingerlanerani angussavaa ’ataasiussuseq, uppeqatigiilluta Guutillu erneranik ilisarseqatigiilluta, angut inersimasoq nallersimallugu, Kristusip tamakkigaasa angissusiat nallersimallugu’. — Evfisumiut 4:13. (wE 15/8 2000)

[Qupp. 28-mi issuagaq]

Kristumiut inerluarsimasut ilagiinnik aalajaassuseqartitsisarput. Ilagiit anersaavannut iluaqutaasumik sunniuteqarput.

[Qupp. 30-mi assiliartat]

Inerissimasut allanik soqutiginninnermikkut ilagiit ajunngitsumik anersaaqarnissaannut peqataapput