Imarisai

Imarisai

Kingornussarput naleqangaartoq ilinnut qanoq pingaaruteqartigaa?

Kingornussarput naleqangaartoq ilinnut qanoq pingaaruteqartigaa?

 Kingornussarput naleqangaartoq ilinnut qanoq pingaaruteqartigaa?

’Qaagitsi Ataatama pilluaqqusai ukorsii, naalagaaffik silarsuup tunngavileqqaarneranit ilissinnut piareersimasoq kingornussarisiuk.’ — MATÎUSE 25:34.

1. Kingornussat sumik nassataqarsinnaappat?

INUIT tamarmik kingornussaqarput. Ilaasa immaqa nunap piisigut inuulluartitsisoq kingornupaat. Allat piitsutut inuuneq kingornuppaat. Siornatigut inuusut ilaasa misilittakkatik imaluunniit tusakkatik pissutigalugit naggueqatigiinnut allanut uumissuineq kingornussaritippaat. Tamattali matumuuna assigiippugut: Tamatta inummit siullermit Adamimit ajorti kingornupparput. Kingornussaq tamanna naggataatigut toqumik kinguneqassaaq. — Nalunaajaasup oqaasii 9:2, 10; Rûmamiut 5:12.

2, 3. Aallaqqaammut Jehovap Adamip Evallu kinguaavii qanoq ittumik kingornussassaqartikkaluarpai, sunalu pillugu kingornutinngilaat?

2 Ataatatut asannittutut qilammiusutut Jehovap aallaqqaammut inuiaat allaanerulluinnartumik kingornussassaqartissimagaluarpai — Paratiisimi naammalluinnartutut naassaanngitsumik inuuneq. Siuaasavut siulliit, Adam Evalu, aallaqqaammut naammalluinnarlutik ajorteqaratillu inuupput. Jehova Guutip Nunarsuaq inunnut tunissutigaa. (Tussiaat 115:16) Edenip Naatsiivia nunarsuup tamakkerluni qanoq issinnaaneranut najoqqutassatut pilersippaa, siuaasavullu siulliit nuannersumik imaannaanngitsumillu suliassillugit. Meeqqiortussaapput, nunarsuaq naasorpassuilu uumasorpassuilu assigiinngitsut paaralugit, nunarsuarlu tamaat Paratiisinngortillugu. (1 Moses 1:28; 2:8, 9, 15) Kinguaavi tamatumunnga suleqataasussaapput. Ila, kingornussap nuannissusia!

3 Adam, Eva kinguaavilu tamakku tamaasa nuannaarutigisinnaassagunikkik Guutimut ajunngitsumik attaveqartariaqarput. Jehova asasariaqarlugulu naalattariaqarpaat, Guutimilli pisimasatik pingaartinngilaat, inatsisaalu naalanagit. Angerlarsimaffitsik Paratiisiusoq Guutillu siunissamut neriorsuutai nuanningaartut annaavaat. Taamaattumik tamanna kinguassaminnut kingornussaritissinnaanngilaat. — 1 Moses 2:16, 17; 3:1-24.

4. Qanoq ililluta Adamip itigartissimasaanik kingornussaqarsinnaavugut?

4 Jehovap naakkinnilluni Adamip Evallu kinguaavi Adamip annaasimasaanik kingornutissinnaanngorpai. Qanoq ililluni? Guutip piffissarititaa nalliummat Guutip ernituata Jesus Kristusip inuunini naammalluinnartoq tunniuppaa Adamip kinguaavinut iluaqutaasumik. Taamaalilluni Kristusip tamaasa pisiarai. Pinngitsooratilli tamatuminnga kingornussisussaanngillat. Guutimit akuerineqartariaqarput, taamaanneqarsinnaappullu Jesusip pilliutaata saammaanneqaatissatut nalingata upperineratigut naalannermikkullu uppernertik takutikkunikku. (Juánase 3:16, 36; 1 Timûtiuse 2:5, 6; Eprîarit 2:9; 5:9) Inooriaasitta uppernarsarpaa periarfissaq tamanna ilumut pingaartikkipput?

Abraham aqqutigalugu kingornussaq

5. Abrahamip Jehovamut attaveqarnini pingaartillugu qanoq takutippaa?

5 Nunarsuarmik siunertami naammassineqarnissaanut atatillugu Jehovap Abraham immikkut soqutigaa. Angut aalajaatsoq taanna nunagisaanit aallaqquaa nunamullu Guutip takutitassaanut nooqqullugu. Abrahamip pitseriarluni naallappaa. Tassunnga apuummat Jehovap oqarfigaa  kinguaavi, Abraham namminiunngitsoq, nunamik tunineqarumaartut. (1 Moses 12:1, 2, 7) Abraham qanoq qisuariarpa? Kinguaassani kingornussisinnaaqqullugit Jehova sumiluunniit piumasaatullu kiffartorfigiumavaa. Ukiuni 100-ni toqussi tikillugu Abrahamip nunaginngisamini Jehova kiffartorfigaa. (1 Moses 12:4; 25:8-10) Illittaaq taamaaliorsimassagaluarpit? Jehovap Abraham ’ikinngutimisut’ taavaa. — Jesaja 41:8.

6. (a) Abrahamip ernerminik pilliutiginneriaannaanermigut suna takutippaa? (b) Naleqangaartoq suna Abrahamip kinguaassaminut kingornussaritissinnaavaa?

6 Abrahamip ukiorpassuarni Isakimik asangaakkaminik ernertaarnissani utaqqivaa. Nukappiaraq inuusuttuaraagunartoq Jehovap Abraham oqarfigaa Isak toqullugu pilliutigissagaa. Abrahamip naluaa tamanna Guutip ernituaminik utertitsissutissatut pilliuteqarnissaanut nammineq iliuuseriumaagaanut assersuutaasoq. Taamaattorli Jehovap inngilianit unitsinneqarami naalalluni Isak pilliutigingajaannarpaa. (1 Moses 22:9-14) Jehova oqareerpoq Abrahamimut neriorsuutini Isak aqqutigalugu piviusunngortinneqassasut. Ersarippoq Abrahamip upperigaa pisariaqassappat Jehovap Isak toqusunit makitissinnaagaa, naak taamaattoqarsimanngisaannaraluartoq. (1 Moses 17:15-18; Eprîarit 11:17-19) Abraham allaat ernerminik erliguussinngimmat Jehova oqarpoq: „Illit kinguaassakkut nunarsuarmi inuiaqatigiit tamarmik pilluaqqunarsissapput.“ (1 Moses 22:15-18) Tamatuma takutippaa kinguaassaq Mosesimik allakkat siulliit 3:15-imi eqqaaneqartoq, aniguisitsisussaq Messias, Abrahamip kinguaaviniissasoq. Kingornussap naleqassusia!

7. Abrahamip, Isakip Jakobillu qanoq kingornussaminnik pingaartitsinertik ersersippaat?

7 Taamani Jehovap iliuusiata pingaaruteqarnera Abrahamip paasisimanngilaa, erneratalu Isakip erngutaataluunniit Jakobip aamma paasisimanngilaat, naak tamarmik ’unnersuummik taassuminnga kingornusseqataagaluarlutik’. Tamarmilli Jehova tatigaat. Nunami illoqarfik ataaserluunniit attaveqarfiginngilaat, pitsaanerusumimmi neriuuteqarput — ’illoqarfik tunngavilersugaq Guutip illuliaa suliarisaa’. (Eprîarit 11:8-10, 13-16) Abrahamilli kinguassaasa tamakkeratik paasivaat Abraham aqqutigalugu qanoq naleqangaartigisumik kingornussaqarsinnaallutik.

Kingornussamik asissuisut

8. Esauip qanoq takutippaa kingornussassani naleqangaartoq pingaartinnagu?

8 Esauip, Isakip ernerata angajulliup, angajulliussutsini soqutiginngilaa. Illernartut pingaartinngilai. Ilaanni kaaqigami angajulliussutsi qatanngumminut Jakobimut akigaa. Suna piniarlugu? Eertaasat uutat iffiarlu! (1 Moses 25:29-34; Eprîarit 12:14-17) Inuiaqatigiit Guutip Abrahamimut neriorsuutaanik kingornussisut Jakobip, Jehovap Israelimik atsersimasaata, kinguaarai. Kingornussap immikkut ittup tamatuma Israelikkut sunik periarfissippai?

9. Jakobip, imaluunniit Israelip, kinguaavi qanoq ilillutik kingornussartik anersaakkut ittoq pissutigalugu aniguisinneqarpat?

9 Kaannersuaqartillugu Jakob ilaqutaalu Egyptenimut nuupput. Tassani meeqqiorlutik amerlipput, aammali inussiaalerput. Jehovalli Abrahamimut angerutsini puigunngilaa. Piffissanngormat Israelikkut inussiaajunnaarsippai oqaluttuullugillu ’nunamut immummik tungusunnitsuummillu kuuttumut’ Abrahamimut neriorsuutigisimasaminut siulersussallugit. — 2 Moses 3:7, 8; 1 Moses 15:18-21.

10. Israelikkut kingornussassaannut atatillugu Sinajip Qaqqaani sunik immikkut ittunik pisoqarpa?

10 Israelikkut nunamut neriorsuutigisamut ingerlaartillugit Sinajip Qaqqaata ataani katersuummata Jehovap ima oqarfigai: „Oqaatsikka naalalluarussigit angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi. Nunarsuaq tamaat uanga pigaara! Uannut tassaalissaasi palaseqatigiit kunngiuffigisakka, inuiaqatigiit illernartut.“ (2 Moses 19:5, 6) Inuit kajumillutik isumaqatigiillutillu tamanna angerfigimmassuk, Jehovap inatsisini tunniuppai. Inuiaqatigiit allat taamaaliorfiginngisaannarsimavai. — Tussiaat 147:19, 20.

11. Israelikkut anersaakkut ittumik kingornussaannut tunngasut naleqangaartut ilaannik taasaqarit.

11 Israelikkut maanna inuiaqatigiissuanngortut anersaakkut ittumik nuannersumik kingornussaqarput. Guuti ilumoortutuaq pallorfigaat. Taassumannga Egyptenimit aniguisinneqarput, Sinajillu  Qaqqaani Inatsisinik tunineqaramik mianernangaartunut takkunnittuullutik. Pruffiitit aqqutigalugit ’Guutip oqaasiinik’ amerlanerusunik tunineqaramik kingornussaat allivoq. (Rûmamiut 3:1, 2) Jehovap qinerpai nalunaajaasussamisut imaluunniit ilisimannittussamisut. (Jesaja 43:10-12) Kinguaassaq Messias inuiaqatigiinni taakkunani saqqummersussaavoq. Inatsisit taanna siulittuutigaat, kinaassusersissallugu Israelikkullu taassuminnga pisariaqartitsinerannik paasitillugit. (Galâsiamiut 3:19, 24) Aammattaaq palaseqatigiittut, kunngiuffittut inuiaqatigiittullu illernartutut kinguaassap Messiasip kiffartorfiginissaannut periarfissinneqassapput. — Rûmamiut 9:4, 5.

12. Israelikkut nunamut neriorsuutigisamut iseraluarlutik suna misiginngilaat, aamma sooq?

12 Neriorsuisimanermisut Jehovap Israelikkut nunamut neriorsuutigisamut siulersorpai. Apustili Paulusilli kingusinnerusukkut nassuiarpaa upperumannginnertik pissutigalugu nuna taanna ’uninngaviginngikkaat’. Inuiaqatigiittut isigalugit Israelikkut Guutip ’uninngavigeqqusaanut’ isinngillat, Guutimmi ’uninngaviata’, Adamip Evallu pinngortinneqarnerata kingorna aallartittup, siunertaa paasisimanngilaat siunertaalu naapertorlugu iliuuseqaratik. — Eprîarit 4:3-10.

13. Israelikkut inuiaqatigiittut isigalugit suna annaavaat kingornussartik anersaakkut ittoq pingaartinnginnamikku?

13 Palaseqatigiittut kunngiuffittut inuiaqatigiittullu illernartutut Messiasip naalakkersueqatissai tamarmik uinikkut juutiusinnaagaluarput. Kingornussartilli naleqangaartoq pingaartinngilaat. Messias saqqummermat uinikkut Israelikkuusut ikittuinnaat ilassivaat. Taamaattumik ikittuinnaat palaseqatigiinnut kunngiuffimmut siulittuutigineqartumut ilaasinnaapput. Uinikkut Israelikkut Guutip naalagaaffianik arsaarneqarput naalagaaffillu ’inuiannut allanut tunniunneqarluni inerititaanik naammatsitsisunut’. (Matîuse 21:43) Inuiannut kikkunnut?

Qilammi kingornussaq

14, 15. (a) Jesusip toqunerata kingorna inuiaqatigiit qanoq ilillutik Abrahamip ’kinguaassaatigut’ pilluaqqunarsippat? (b) ’Israelimut Guutip pianut’ ilaasut Guutip sumik kingornussaqartippai?

14 Inuiaat Guutip naalagaaffianik tunineqartut tassaapput ’Israel Guutip pigisaa’, Israelikkut anersaakkut ittut Jesus Kristusip ajoqersugai 144.000-iusut anersaakkut kinguaassiarianeqartut. (Galâsiamiut 6:16; sarĸúmersitat 5:9, 10; 14:1-3) 144.000-t taakkua ilaat uinikkut juutiupput, amerlanersaalli inuiaqatigiinnit juutiunngitsuneerlutik. Taamaalilluni Jehovap Abrahamimut inuiaqatigiit tamarmik ’kinguaassaatigut’ pilluaqqunarsinnissaannik neriorsuutaa eqquukkiartulerpoq. (apustilit suliait 3:25, 26; Galâsiamiut 3:8, 9) Siullermik eqquunnerani tamatumani inuit inuiaqatigiinneersut anersaamik illernartumik taninneqarput Jehova Guutillu anersaakkut ernerisut akuerineqarlutik; Jesus Kristusimut qatanngutaalerlutik. Taamaalillutik taakkuattaaq ’kinguaassap’ pingaannginnerusortaanut ilaalerput. — Galâsiamiut 3:28, 29.

15 Jesusip toqunera sioqqullugu juutit inuiannut nutaanut taakkununnga ilaasussat angerusisaamut, aavata kuineratigut atulersinneqartumut, ilanngunneqarput. Jesusip pilliutaanut uppernertik tunngavigalugu angerusisaamut ilaasut ’naassaanngitsumik inersimatinneqassapput’ imaluunniit ’naammalluinnartunngortinneqassapput’. (Eprîarit 10:14-18) ’Iluartuutitatut’ nalunaarutigineqarsinnaapput ajortuliaallu isumakkeerfigineqarlutik. (1 Korintumiut 6:11) Tamanna eqqarsaatigalugu Adam ajortuliunngikkallarmat inissisimaffiatulli inissisimaffeqarput. Nunarsuarmili paratiisimi inuussanngillat. Jesus oqarpoq qilammi inissiorumallugit. (Juánase 14:2, 3) Nunarsuarmi inuusinnaanertik iperarpaat ’kingornussassaq qilammi imminnut toqqorneqarsimasoq’ piumallugu. (1 Pîtruse 1:4) Tassani sumik suliassinneqassappat? Jesus nassuiaavoq: „Angerfigeqatigaassi, soorlu Ataatama uanga angerfigeqatigigaanga, naalagaaffik pillugu.“ — Lúkarse 22:29, NV.

16. Suliassat nuannersut suut kristumiut tanitat qilanaarutigisinnaavaat?

16 Kristusip naalakkersueqatai qilamminngaanniit Jehovap kisimi oqartussaaneranut pikititsisimanerup kingunerisaasa nunarsuarmi peerneqarluinnarnerini ilaatigut ikiuutaassapput. (sarĸúmersitat 2:26, 27) Abrahamip anersaakkut kinguaavisut pingaannginnerusutut inuit inuiaqatigiinnit tamaneersut inuunermut naammalluinnartumut atasunik pilluaqqusaatissavaat. (Rûmamiut  8:17-21) Kingornussap naleqangaassusia! — Evfisumiut 1:16-18.

17. Kristumiut tanitat nunarsuarmiitillutik kingornussamik ilaat suna nuannaarutigisinnaavaat?

17 Jesusip ajoqersugaasa tanitat kingornussaat siunissamuinnaq attuumassuteqanngillat. Allap kialuunniit sapigaanik Jesusip Jehovamik, Guutimik ilumoortutuamik, ilisarsitippai. (Matîuse 11:27; Juánase 17:3, 26) Oqaatsimigut iliuutsimigullu ilinniartippai ’Jehovap tatiginissaa’ qanoq paasisariaqartoq, naalannissaalu sumik nassataqartoq. (Eprîarit 2:13; 5:7-9) Jesusip Guutip siunertaanik ilumoortumik ilisarsitippai neriorsorlugillu anersaap illernartup paasisaqarnerulersillugit siulersorumaarai. (Juánase 14:24-26) Guutip naalagaaffia qanoq pingaaruteqartigisoq isumaannut uummataannullu paasitippaa. (Matîuse 6:10, 33) Jesusip aamma Jerusalemimi, Judæami, Samariami nunarsuullu isua tikillugu oqaluusseqquai inuillu ajoqersuganngorteqqullugit. — Matîuse 24:14; 28:19, 20; apustilit suliait 1:8.

Amerlangaartut naleqangaartumik kingornussaat

18. Jehovap Abrahamip ’kinguaassaatigut’ inuiaqatigiit tamarmik pilluaqqunarsinissaannik neriorsuutaa ullumikkut qanoq eqquuppa?

18 Anersaakkut Israelimut, Naalagaaffimmik kingornussisussanut, ’savarpannguanut’ ilaasut tamarmik toqqarneqareerunarput. (Lúkarse 12:32) Maanna ukiuni qulikkuutaani Jehovap katersat allat, amerlangaartut inuiaqatigiinnit tamaneersut, katersorneqarnerat sammisimavaa. Taamaalilluni Abrahamip ’kinguaassaatigut inuiaqatigiit tamarmik pilluaqqunarsinissaannik’ Jehovap Abrahamimut neriorsuutaa annerusumik eqquuppoq. Pilluaqquneqartut taakkua nuannaarutigaat Jehova illernartumik kiffartorfigisinnaagamikku, nalunngilaallu Guutip savaataanut, Jesus Kristusimut, uppernertik annannissamut aalajangiisuusoq. (sarĸúmersitat 7:9, 10) Amerlangaartunut pilluartunut ilaanissannik Jehovap asannittumik qaaqqussutaa ilassiviuk?

19. Inuiaqatigiinneersut maanna pilluaqquneqartut kingornussassaq suna neriuutigaat?

19 Savarpannguanut ilaanngitsut Jehovap kingornussassamik sumik neqeroorfigai? Tassaanngilaq qilammi kingornussassaq. Tassaavorli Adamip kinguaaminut kingornussaritissinnaasaralua — nunarsuarmi paratiisiusumi naassaanngitsumik naammalluinnartumillu inuulersinnaaneq. Silarsuarmi tamatumani ’toqu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq’. (sarĸúmersitat 21:4) Taamaattumik Guutip oqaasiani isumassarsiaasumi ima kajumissaarneqarputit: „Tunaarisaruk [Jehova] ajunngitsuliorlutillu, inuusinnaaqqullutit eqqissisimallutit nunami, [Jehovalu] qiimmattaatigalugu, taassuma tunisarumaarmatit uummativit kissaatigisaanik. Guutiitsoq erniinnaq peeruttussaavoq . . . Kisianni qanilaartut nuna kingornutissavaat, pilluangaarlutillu inuussapput. Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:3, 4, 10, 11, 29.

20. ’Savat allat’ qanoq ilillutik kristumiut tanitat kingornussaannut annertuumik peqataasinnaappat?

20 Jesusip ’savaatai allat’ qilammiup naalagaaffiata ataani nunarsuarmi kingornussassaqarput. (Juánase 10:16a) Naak qilammi inuusussaanngikkaluartut tanitat anersaakkut ittumik kingornussaasa ilaa annertooq taakkununnga ingerlateqqinneqassaaq. Tanitat, ’inussiaq ilumoorlunilu silatooq’-mik taaneqartut, aqqutigalugit neriorsuutit erlinnartut Guutip oqaasianeersut ’savat allat’ paasivaat. (Matîuse 24:45-47; 25:34) Tanitat ’savallu allat’ tamarmik Guuti ilumoortutuaq Jehova nalunngilaat pallorfigalugulu. (Juánase 17:20, 21) Ataasiussuseqarlutik Guuti ajortuliat isumakkeerfigineqaatissaannik Jesusip pilliutaa pillugu qutsavigaat. Savaatitut ataatsitut ataatsimik,  Jesus Kristusimik paarsisoqarlutik, kiffartoqatigiipput. (Juánase 10:16b) Tamarmik silarsuaq tamakkerlugu qatanngutigiissuarnut asaqatigiittunut ilaapput. Jehova naalagaaffialu pillugit nalunaajaasuuneq tamarmik assigiimmik immikkut pisinnaatitaaffigaat. Aap, Jehovamut nalunaajaasuuguit tunniulluinnarsimasoq kuisissimasorlu, illittaaq tamakku tamaasa kingornussaraatit.

21, 22. Tamatta qanoq ililluta takutissinnaavarput anersaakkut kingornussarput pingaartillugu?

21 Kingornussaq anersaakkut ittoq tamanna qanoq erligitigaajuk? Ima pingaartitsigaajuk Guutip piumasaa inuuninni pingaarnerpaatillugu? Tamanna takutittarpiuk ilagiit ataatsimiinnerinut tamanut najuuttarnissaq pillugu oqaasia peqatigiissortaalu aqqutigalugit ajoqersorneqarnitta maleruarneratigut? (Eprîarit 10:24, 25) Kingornussaq tamanna ilinnut ima naleqartigaa ajornakusoortitsisut soqutiginagit Guuti kiffartorfigiinnarsinnaallugu? Kingornussaq ima pingaartitsigaajuk tamanna nakuussutigalugu kingornussamik annaatitsisinnaasumik ussernartorsiornerit tamaasa assortorsinnaallugit?

22 Qanortoq tamatta Guutimit anersaakkut ittumik kingornussarput sernigisigu! Paratiisissap siunnerfigiuaannarneratigut immikkut pisinnaatitaaffiit Jehovap uatsinnut tunniusai tamakkiisumik peqataaffigisigik. Jehovamut attaveqarneq inuunitsinni pingaarnerpaatillugu takutissavarput kingornussaq Guutimeersoq qanoq pingaartitsitigigipput. Ima oqartut akornanniittuarta: „Naalannartissavakkit, Guutiga kunngiga, aqqillu unnersiutigalugu naassaanngitsumut.“ — Tussiaat 145:1. (wE 1/9 2000)

Uku qanoq nassuiassavigit?

Adam Guutimut aalajaattuarsimagaluaruni sumik kingornussitissinnaagaluarpaatigut?

Abrahamip kinguaavisa kingornussinnaasaraluartik qanoq pivaat?

Kristusip ajoqersugaasa tanitaasut kingornussassaat suuppat?

Amerlangaartut suna kingornutissavaat, qanorlu ilillutik takutissinnaavaat ilumut pingaartillugu?

[Atuaqqissaarnermi apeqqutit]

[Qupp. 23-mi assiliartaq]

Anersaakkut kingornussat pingaartippiuk?