Imarisai

Imarisai

Sooq ingasattumik isumalluartariaqanngilagut?

Sooq ingasattumik isumalluartariaqanngilagut?

 Sooq ingasattumik isumalluartariaqanngilagut?

ILIMAGISAT eqquuttut kissaatigisallu piviusunngortut nalerisimaarnermik misigilersitsisarput. Kisianni takorluukkatta isumalluarnittalu ilarpassui kissaatigisatsitut pineq ajorput. Inuunermi pakatsiuarnitta imminut allaallu allanut narrutsaassisimanermik misigilersissinnaavaatigut. Angut silatooq eqqorluartumik oqarsimavoq: „Utaqqivallaarneq tarnikkut anniaataalersarpoq.“ — Ussatit 13:12.

Suna pakatsissutaasinnaava? Isumalluarpallaannginnissarput qanoq sulissutigisinnaavarput? Qanorlu iluaqutigissavarput?

Isumalluarnerit pakatsinerillu

Inuunerup sukkavallaarnerata malinnaaniarsarigaluartilluta katataagaluttuinnartutut kinguaraluttuinnartutut misigilersissinnaavaatigut. Kipisuitsumik piffissarput nukivullu atorfissaqartinneqartarput, suliariniakkavullu suliarinngitsooraangatsigit imminut avoqqaarinermik kinguneqarajuppoq. Allaallu eqqarsarsinnaavugut allat pakatsisillugit. Cynthiap, ueqarlunilu meerallip, nalunngilaa angajoqqaat qanoq tamaviaartitaatigisinnaasut: „Ilaanni misigisarpunga meeqqannut perorsaanissannut piginnaassuseqarnanga, nikallussutigingaartarparalu.“ Inuusuttuaraq Stepfaniemik atilik ilinniartitaanini pillugu oqarpoq: „Iliuusererusutannut naammattumik piffissaqanngisaannarpunga, ugguartaqaangalu.“

Sualuttumik isumalluarnerit pitsaalluinnartuuniarnermik kinguneqariaannaasarput, tamannalu pakatsinartorujussuusinnaavoq. Angut inuusuttoq nulialik Benimik atilik nassuerpoq: „Iliuuserisakka, eqqarsaatikka misigissutsikkalu errarsaatigeqqissaraangakkit, ajunnginnerusumik iliuuserisimasinnaasaraluakka takusinnaajuaannarpakka. Pitsaalluinnartut anguniartuaannarpakka, kingunerisarpaalu ugguarneq, neriulussinnarneq pakatsinerlu.“ Gail, kristumiu arnaq uilik, oqarpoq: „Pitsaalluinartuuniarneq kukkussinnaatitsinngilaq. Kissaatigaarput anaanaassasugut nuliaallutalu nalissaqanngitsut. Nuannaarneq naammassisarpassuarnut atassuteqartipparput, taamaammat ilungersulussinnarneq uumitsaatigisarparput.“

Aamma peqqiilliortalernerup utoqqalilernerullu kingunerisaanik pakatsinerit misigineqarsinnaapput. Pisinnaasat nukiillu annikilligaangata sapigaqarnerulertarpugut, taamalu pakatsinerit amerlanerulertarlutik. Elizabeth misiarani oqarpoq. „Imminut uggoreqaanga napparsimalinngikkallarama sapernanngivissut suliarisinnaajunnaariataarakkit“.

Qulaani taaneqartut pissutsinut pakatsinarsinnaasunut assersuutaapput. Imminut sulissutiginngikkutta allaat eqqarsalersinnaavugut allat soqutiginngikkaatigut. Iliuuserisat inornanngitsut suut pakatsinerit anigornissaannut eqqortumillu ilimasunnissatsinnut ikiorsinnaavaatigut?

Qanoq inornanngitsumik isumalluartoqarsinnaasoq

Siullermik pingaarnerusumillu eqqarsaatigiuk Jehova ingasaassinianngitsuusoq paasinnittuullunilu. Tussiaat 103:14-imi allassimavoq: „Nalunngilaami qanoq pinngortitaasugut, eqqaamavaa pujualaannaasugut.“ Jehovap pisinnaasavut sapikkavullu ilisimavai, taamaallaallu sapinngisatsinnik ilimasuffigaluta. Jehovap ataatsimik piumasaqarfigaatigut, tassa „makitajuilluta Guuterput peqatigalugu inuussasugut“. — Mika 6:8.

Jehovap kajumissaarpaatiguttaaq qinnuigisaqqulluni. (Rûmamiut 12:12; 1 Tásalûníkamiut 5:17) Qanoq iluaqutigisinnaavarput? Qinuneq  eqqarsartaatitsigut aalajasuunnginnissatsinnut oqimaaqatigiissaarinissatsinnullu iluaqutigaarput. Ilungersorluni qinuneq ikiorneqarnissamik pisariaqartitsinitsinnik miserratiginninnginneruvoq — anneruniajuissusermut maniguunnermullu ersiutaavoq. Jehovap qinnutivut akinasuartarpai anersaaminik illernartumik soorlu asanninnermik, avaaginninnermillu, qanilaarnermillu piitaajuinnermillu inerititaqartumik tunisinermigut. (Lúkarse 11:13; Galâsiamiut 5:22, 23) Aamma qinunerup annilaanganeq pakatsisitaanerillu annikillisittarpai. Elizabeth oqarpoq „tuppallersaammik allani pisinnaasatsinnit allaanerujussuarmik“ tunisisoq. Kevin isumaqataalluni oqarpoq: „Ajornartorsiutikka anigorsinnaajumallugit uummatikkut eqqissisimasuunissara eqqarsarluarsinnaanissaralu qinnutigisarpakka. Jehovap puigunngisaannarpaanga.“ Apustili Paulusip qinunerup erlinnangaassusia nalunngilaa. Taamaammat siunnersuivoq: ’Nungullugilli kissaatigisasi Guutimut nalunarsigik . . . eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Aap, Jehovamik oqaloqateqarnitta imminut allanullu inornanngitsumik isumalluartuutissinnaavaatigut.

Ilaanneeriarlutali massakkorpiaq qiimmassarneqarnissaq pisariaqartittarparput. Piffissaasukkut oqaaserisaq ajunngeqaaq. Ikinngummik inersimalluartumik tatigisamik oqaloqateqarneq pakatsissutigisatsinnut ernumassutigisatsinnulluunniit allatut isiginnilernissatsinnut iluaqutigissavarput. (Ussatit 15:23; 17:17; 27:9) Inuusuttut pakatsisitaanernik anigorniagaqartut, paasisimavaat siunnersorneqarumallutik angajoqqaaminnut saaffiginninnitik, oqimaaqatigiissitsinissaminnut iluaqutigalugit. Kandi pingaartitserpaluttumik nipeqarluni oqarpoq: „Angajoqqaama asannittumik siunnersuutaat isumatusaarnerunissannut oqimaaqatigiissaarinerunissannut ilakkuminarnerulernissannullu iluaqutigisimavakka.“ Aap, Ussatit 1:8, 9-lu piffissaasukkut oqaasiupput: „Ernera, ataatavit oqaaqqissaarutai naalattarniakkit anaanannillu ilikkakkatit puigornagit! Tamakku tassaapput nigaliliaq kusanartoq niaqormiussaq ujamiullutillu qungatsimut pinnersaatit.“

Pitsaalluinnartuuniarluni eqqarsariaaseqarnerup kinguneri oqariaatsimi eqqorluartumik oqaatigineqarput: „Inuuneq kissaatigisatut ingerlanneqarsinnaasoq ilimagigaanni, ilimasulussinnarnerussaaq.“ Tamanna pinngitsoortinniarlugu eqqarsariartaaseq allanngortittariaqarpoq. Pissusivut maniguunneq anneruniajuissuserlu — pisinnaasatta killeqarnerinut piviusorsiortumik isumaqalissutigisinnaasavut — qularnanngivissumik ilimagisatta oqimaaqatigiissaarnissaannut silatusaartuunissaannullu iluaqutigissavavut. Rûmamiunut agdlagkat 12:3-mi naleqquttumik mianersoqquneqarpugut ’imminut isumassaq sinnerlugu isumaqarfigeqqunata’. Aamma Filípimiunut agdlagkat 2:3-mi kajumissaarneqarpugut maniguulluta ilavut immitsinnit annerutequllugit.

Elizabeth siusinnerusukkut taaneqareersoq, nappaatini pissutigalugu imminut naammagittarfigisinnaanngilaq. Taassuma pissutsinik Jehovatut isiginnittaaseqalernissaanut, kiffartornitsinnillu puiguinngitsoq paasinissaanut tuppallersaatiginissaanullu piffissangaatsiaq ingerlasimavoq. Colin nikissinnaanngissutigisaminik nappaateqarpoq. Aallaqqaammut misigisimavoq kiffartornini peqqikkallarami pisinnaasaminut naleqqiullugu naleqanngingajattoq. Allassimaffiit soorlu Korintumiunut agdlagkat aipait 8:12 eqqarsaatigeqqissarnerisigut misigissutsit taamaattut qaangersinnaalerpai. Tassani allassimavoq: ’Kajumittoqaraangammi sapinngisai missiliorlugit ilassiuminartarpoq, sapigai missiliorlugit pinnagu.’ Colin oqarpoq: „Naak maanna tunniussinnaasakka annikinnerungaaraluartut, taamaattoq suli tunniussassaqarpunga, Jehovallu nuannaraa.“ Eprîarinut agdlagkat 6:10-mi eqqaasinneqarpugut: ’Guutimi iluaatsuunnginnami sulinersi asanninnersilu aqqa pillugu ileqqorisarsi puiussanngilai.’

Qanoq ililluta nalilersinnavarput isumalluarnivut inornartuunngitsut? Imminut aperigit: ’Isumalluarnikka Guutip naatsorsuutigisaanut naleqquttuuppat?’ Galâsiamiunut agdlagkat 6:4-mi allassimavoq: ’Kialuunniit nammineq suliani misililliuk, taava imminuinnaq usorsitsaatissaqassavoq aapparminullu pinnani.’ Jesusip oqaasii eqqaamakkit: ’Nammaatarami iluaqaaq, nammakkiussaralu oqeqaluni.’ Aap, kristrumiutut nammatarput ’iluaqaaq’ ’oqeqalunilu’, Jesusilu neriorsuivoq eqqortumik atorsinnaalerutsigu nukissaqaleqqissasugut. — Matîuse 11:28-30.

 Inornanngitsumik isumalluarnerit pilluaqqussutaapput

Guutip oqaasia tusarnaarutsigu siunnersuutaalu atorlugit isumalluarpallaannginnissarlu ilinniarniarutsigu maanna naassaanngitsumillu pilluaqqusaassaagut. Timikkut peqqissuunissatsinnut sunniuteqarsinnaavoq. Jenniferip Jehovap eqqaasitsisarneri iluaqutigisimavai oqarporlu: „Nukissaqarnerulersillungalu nuannaarnerulersissimavaannga.“ Ussatit 4:21, 22-mi kajumissaarneqarpugut isivut uummaterpullu Jehovap oqaasiinut saateqqullugit. „Tamakkumi nanisisiminnut inuussutaapput timimullu tamarmut peqqissaataallutik.“

Pilluaqqusaaneq alla tassaavoq eqqarsaatikkut misigissutsikkullu nalerisimaarneq. „Nuannaalertuaannarpunga eqqarsaatikka uumatigalu Guutip oqaasianik sunnerneqartikkaangakkit“, Theresa oqarpoq. Soorunami pakatsiuarallassaagut Kisianni anigorluarsinnaanerussavavut. Jâkup agdlagai 4:8-mi kajumissaaruteqarpoq: ’Guutimut palligunniaritsi, taava ilissinnut palligutissavoq.’ Guuti aamma neriorsuivoq inuunermi unamminiarnartut anigornissaannut nakussatsikkumalluta eqqissinermillu pilluaqqujumalluta. — Tussiaat 29:11.

Isumalluarpallaannginnitta anersaakkut oqimaaqatigiissitsiuarsinnaatippatigut. Tamanna immini aamma pilluaqqusaaneruvoq, inuunermi pingaaruteqarnerusunik tamaviaaruteqarsinnaalersikkamisigut. (Filípimiut 1:10) Taava anguniakkavut piviusorsiornerussapput angujuminarnerullutillu, nuannaarnerullutalu nalerisimaanerussaagut. Kajuminnerulluta Jehovamut paareqqussaagut, nalunagu pisussat pitsaanerpaamik kinguneqartikkumaarai. ’Taamaattumik nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi.’ (1 Pîtruse 5:6) Jehovamit ataqqineqarnermit annerusumik akissarsisoqarsinnaanerpa? (wE 1/8 2000)

[Qupp. 27-mi assiliartaq]

Isumalluarpallaannginnerup neriulussinnarnernit pakatsinernillu qaangiitissinnaavaatigut