Imarisai

Imarisai

Siunertaqarnerusumik inuulersinnaavutit

Siunertaqarnerusumik inuulersinnaavutit

 Siunertaqarnerusumik inuulersinnaavutit

IMAATTUMIK ussatitoqaqarpoq: „Pisuunngorniarneq noqqaassutigeqinagu pigisarpassuaqarnissarlu pingaartippallaarnagu. Pisuussutimmi imaaliallannerinnakkut peerutereersimassapput, sulunittutut ilillutik nattoralittut qullarsareersimassapput.“ (Ussatit 23:4, 5) Allatut oqaatigalugu pisuunngorniarluni suleruloorpallaarneq silatusaarnerunngilaq, pigissaarneq nattoralittut sulunilluni qimagussinnaammat.

Biibilimi oqaatigineqartutut nunap piisigut pisuussutit pinngortitami ajunaarnersuaqarneratigut, aningaasarsiornerup ingerlanerliorneratigut allanilluunniit ilimaginngisanik pisoqarneratigut ullormit ullormut tammarsinnaapput. Pigissaalersimasut eqqarsaatimikkut isumalluartuugajunngillat. Assersuutigeriartigu John politikerinut, timersortartunut kunngikkormiunullu sassaallertartuusimasoq.

John oqaluttuarpoq: „Suliannut nukikka tamaasa atorpakka. Aningaasarsiorluaqaanga, hotelini kusanartorsuarni najugaqartarpunga allaallu ilaannikkut suliannut atatillugu timmisartumik attartorlunga angalasarlunga. Aallaqqaammut nuannareqaara, piffissalli ingerlanerani nuannariunnaariartorpara. Inuit iluarusutsinniakkakka qalliinnarsiortoorpasipput. Inuunera imaqanngilaq.“

Soorlu Johnip paasigaa inuuneq anersaakkut eriaginartortaqanngitsoq naammaginanngilaq. Jesus Kristusip qaqqami oqaluutsimini tusaamasaasumi ersersippaa ataavartumik pilluarneq qanoq anguneqarsinnaasoq. Oqarpoq: ’Pilluarput anersaakkut pisariaqartitaqarmerminnik miserratiginninngitsut qilammiup naalagaaffia pigigamikku.’ (Matîuse 5:3 NV) Taamaammat inuunermi anersaakkut ittunik pingaarnerutitsineq silatusaarneruvoq. Aammali allat pingaaruteqartut inuunermik isumaqarnerulersitsisinnaapput.

Ilaquttat ikinngutillu pingaarutaat

Ilaquttatit attaviginngikkukkit ikinngutinnaaqanngikkuilluunniit inuuneq nuannaarutigisinnaaviuk? Ilimananngilaq. Pinngortitsisup asaneqartariaqartutut asannittariaqartutullu pinngortissimavaatigut. Tamanna pissutaasut ilagaat Jesusip  ’tullermik immisut asanninnerup’ pingaaruteqassusianik erseqqissaaneranut. (Matîuse 22:39) Ilaqutariittut aaqqissuussaaneq Guutimit tunissutaavoq namminissarsiorata asanninnissatsinnut periarfissiilluartoq. — Evfisumiut 3:14, 15.

Qanoq ililllutik ilaquttatta inuunerput siunertaqarnerulersissinnaavaat? Ilaqutariilluartut naatsiivimmut kusanartumut ulluinnarni naqisimaneqarnermit ulapippallaarnermillu qimaaffissamut assersuunneqarsinnaapput. Ilaqutariit iluanni kiserliorluni misigisimanermik pinngitsoortitsisinnaasoq qanittumik ineriartornartumillu ataatsimooqatigiinneq nuannaarutigineqarsinnaavoq. Taamatut ilaqutariittut toqqissilluni inuuneq soorunami nammineq takkunneq ajorpoq. Ilaqutariittulli qilerutit sakkortusiartuaarnerat ilutigalugu, qaninnerusumik ataqatigiittoqalertarpoq, inuunerlu imaqarnerulerluni. Assersuutigalugu piffissaq soqutiginninnerlu aappariit asaqatigiinnerminnut ataqqeqatigiinneminnullu atortagaat ullut tamaasa ileqqaarneruvoq siunissami iluanaarutaangaartussaq. — Evfisumiut 5:33.

Meeraqaraanni avatangiisini peqqinnartuni peroriartornissaat anguniarneqartariaqarpoq. Piffissaqarfiginerat, attavigilluarnerat anersaakkullu ittumik siunnersornerat unamminiarnartuusinnaagaluarpoq. Taamatulli iliuuseqarnerup angajoqqaat nalerisimaangaalersissinnaavai. Angajoqqaajulluartut qitornatik pilluaqqussutitut isigaat, Guutimit kingornussatut paarilluagassatut. — Tussiaat 127:3.

Ikinngutaalluartuttaaq naammaginartumik siunertaqarnerusumillu inuunermut tapersiisarput. (Ussatit 27:9) Misiginneqataaneq ikinnguterpassuaqalersitsisinnaavoq. (1 Pîtruse 3:8) Orlugaluarutta ikinngutaalluartut nikuiteqqissavaatigut. (Nalunaajaasup oqaasii 4:9, 10) Aap, „ikinngut . . . qatanngutaavoq annikilliornartussaq pillugu erniarititaasoq.“ — Ussatit 17:17. NV

Ilumoortumik ikinnguteqarneq nuanneqaaq. Ikinngut ilagalugu seqernup tarrilernera tupinnarnerusarpoq, nerisassat mamarnerusarlutik nipilersuullu tusarnaagaq tusarnernerusarluni. Soorunami ilaqutariit ataqatigiilluinnartut ikinngutillu tatiginartut inuunermut siunertaqarnerulersitsisunit marluinnaapput. Inuunitsinnik siunertaqalersitsisumik allamik sumik Guuti iliuuseqarsimava?

Anersaakkut ittumik pisariaqartitavut

Taaneqareersutut Jesus Kristusip anersaakkut ittunik pisariaqartitsinermik miserratiginninnginneq pilluarnermut atassuteqartippaa. Anersaakkut ileqqussatigullu pissusilerluta pinngortitaavugut. Taamaattumik Biibilip oqaatsit ’[inuk] anersaamut atasoq’ aamma ’[inuk] isertugaq uummatip pia’ atorpai. — 1 Korintumiut 2:15; 1 Pîtruse 3:3, 4.

An Expository Dictionary of New Testament Words W.E. Vinep atuakkiaa malillugu uummammut assersuutaasoq tassaavoq „inuup sianissutsimigut ileqqussatigullu pissusii, eqqarsaatigilluakkat misigissutsikkullu pilersittagai“. W. E. Vinep itisilerpaa oqarlunilu: „Allatut oqaatigalugu uummat inuttut kinaassutsip puilaffianut isertortumut assersuutitut atorneqarpoq.“ Qinerlerfissiami tassani oqaatigineqarpoq „uummat ilorpiatsinniittoq, ’inuusoq isertugaq’, . . . inuup kinaassusivia“.

Qanoq ililluta ’inuup anersaamut atasup’, tassa ’inuup isertukkap uummatip piata’, pisariaqartitai matussusersinnaavavut? Anersaakkut pisariaqartitatta matussusernissaannut alloriarneq pingaartoq tassa tussiaasiortup isumassarsisinneqarluni allagaani oqaatsit eqqortuusut akueralugit: „Misiginiaritsi [Jehova] Guutiummat. Taassuma pinngortippaatigut, taassumalu pigaatigut. Tassaavugut innuttai, savaatit paarisai.“ (Tussiaat 100:3) Taamatut misiginitta tunngavissaqarluartumik eqqarsalersissavaatigut inerniliisilluta Guutimut akisussaaffeqartugut. „Innuttaanut, savaatinut pigisaanut“ ilaanissarput kissaatigigutsigu oqaasii Biibilimi allassimasut maleruartariaqarpavut.

Uagutsinnut ajoqutaava? Naamik, paasigutsigu qanoq iliornerput Guutimut pingaaruteqartoq inuunerput imaqarnerulissaaq. Inuttut pitsaanerusunngornissatsinnut kajumissisissavaatigut, tamatuma anguniarnissaa imminut akilersinnaalluarpoq. Tussiaat 112:1-imi allassimavoq: „Pilluarpoq [Jehovamik] mianerinnittoq inassutaanullu kajumilluartoq.“ Guuti mianerigutsigu uummatitsigullu inassutai maleruarlugit inuunerput siunertaqarnerulissaq.

Sooq Guutimut naalannerup nalerisimaarnerulersissavaatigut? Nalunngeqatiginnissuseqarnerput pissutaavoq, tunissut Guutip inunnut tamanut tunniussimasaa. Nalunngeqatiginnissuseq ileqqorissuunissamut ilitsersuisigaarput iliuuserisimasatsinnik iliuuseriniakkatsinnilluunniit  iluarinnittoq iluarinninngitsorluunniit. Tamatta ilerasuuteqangaarneq misiginikuuarput. (Rûmamiut 2:15) Nalunngeqatiginnissuserpulli aamma iluaqutigisinnaavarput. Namminissarsiorata Guutimut inoqatitsinnullu iliuuseqaraangatta nuannaarluta nalerisimaarlutalu misigisarpugut. Paasisarparput ’tunisineq tigusinermit pilluarnarnerusoq’. (apustilit suliait 20:35) Taamaannera pingaaruteqartumik tunngaveqarpoq.

Pinngortitsisup pinngortissimavaatigut inoqatitta kissaatigisaannik pisariaqartitaannillu killinneqartussatut. Allanik ikiuigaangatta nuannaartarpugut. Biibilimi neriorsorneqarpuguttaaq pisariaqartitsisunik ikiuigaangatta imminut iliuuserineqartutut Guutip isigisarai. — Ussatit 19:17.

Qamannga pisumik nalerisimaalissaagut anersaakkut pisariaqartitavut isumagigutigik, tamannali aamma inuunitsinni iluaqutigisinnaavarput? Niuertoq Kangia Qiterlermeersoq Raymondimik atilik taamatut isumaqarpoq. Oqarpoq: „Anguniagara tassaaginnarsimavoq aningaasarsiornissara. Kisianni uummatikkut paaseriarakku Guuteqartoq Biibilimilu oqaluttuunneqartugut suna piumasaralugulu siunertarigaa, inuttut allanngorluinnarpunga. Inuutissarsiornera inuuninni pingaarnerpaajunnaarpoq. Guutimit iluarisaajumallunga ilungersuutima ineriartornanngitsumik uumissuisumillu isumaqarnissamut illersorsimavaannga. Ataataga akerleriissuteqarnerup nalaani toqusimavoq, tamatumunngali akisussaasunut akiniaanissamik kissaateqanngilanga.

Soorlu Raymondip paasigaa ’[inuup] anersaamut atasup’ pisariaqartitaanik matussusiinerup misigissutsikkut ikilerneqangaarnerit ajorunnaarsissinnaavai. Inuunerli naammaginarluartuussappat ajornartorsiutit ulluinnarni atortakkavut anigorsinnaasariaqarpavut.

Eqqissineq Guutip pia pisinnaavarput

Silarsuarmi maani ajorluinnalersimasumi ullualunnguaannaat misigisarpavut suut tamarmik pissusissamissut ingerlasut. Ajunaartoqartarpoq, pilersaarutit piviusunngunngitsoortarput inuillu pakatsisittarpaatigut. Tamakkorpassuit pissutigalugit nuannaarunnaarsinnaavugut. Kisianni Biibilimi neriorsuuteqarpoq Jehova Guutimut kiffartortut qamuuna nalerisimaarneq — ’eqqissineq Guutip pia’ angujumaaraat. Qanoq ililluta eqqissinermik taamaattumik pissarseqataasinnaavugut?

Apustili Paulus allappoq: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Ajornartorsiutivut kisimiilluta anigorniarnagit ilungersorluta Guutimut qinusinnaavugut nanertuutigisavullu tamaasa tassunga tunniullugit. (Tussiaat 55:23) Ernera Jesus Kristrus aqqutigalugu ’torlorfigigutsigu’ akisinissaanik upperinninnerput nakussatsinneqassaaq anersaakkut ineriartortilluta Guutillu qanoq ikiortaraatigut takusartillugu. — Juánase 14:6, 14; 2 Tásalûníkamiut 1:3.

Jehova Guuti ’qinnutinik tusartartoq’ tatigilersimagutsigu, misilinneqaatit soorlu nappaat, utoqqalineq toqusoqarneralu anigorluarsinnaanerussavavut. (Tussiaat 65:3) Siunertaqarluartumilli inuulerumallutta siunissaq aamma eqqarsaatigisariaqarparput.

Neriugisanni tipaatsugit

Biililimi ’qilassat nutaat nunassarlu nutaaq’ neriorsuutigineqarput, imaappoq naalakkersuisut naapertuilluarlutillu asannittut qilammiittut inunnut Guutimut naalakkumasunut naalakkersuisussat. (2 Pîtruse 3:13) Silarsuarmi nutaami Guutip neriorsuutigisaani sorsunneq naapertuilluannginnerlu eqqissinermik naapertuilluarnermillu  taarserneqassapput. Sinnattuinnaanngilaq, qulannginneruvorli piffissap ingerlanerani sakkortusigaluttuinnarsinnaasoq. Tusagassaavoq nuannerluinnartoq nuannaarnissamullu pissutissaasoq. — Rûmamiut 12:12; Títuse 1:2.

John, aallaqqaammut eqqaaneqartoq maanna misigisimavoq inuunini siunertaqarnerulersimasoq. „Upperisamut tunngasunik soqutigisaqanngisaannarpunga, Guutili upperiuaannarsimavara,“ oqarpoq. „Jehovap Nalunaajaasuinilli pulaarneqarnissama tungaanut tamanna uannut pingaaruteqarpallaarsimanngilaq. Apeqquterpassuarnik soorlu imaattunik apersorpakka: ’Sooq maani nunamiippugut? Siunissami qanoq pisoqassava?’ Biibilimik tunngavilinnik akissutaasa naammaginartut inuuninni aatsaavik misigitippaannga inuuneq siunertaqartoq. Tamannalu aallaqqaataannaavoq. Nutaalluinnartumik eriagisamik najoqqutassaqalersitsisumik sallusuissummik paasinnikkusuttorujussuanngorpunga. Pigisatigut pisuujujunnaarpunga, anersaakkulli millioneeritut misigalunga.“

Johnitulli immaqa ukiorpassuarni anersaakkut pisariaqartitatit sumiginnarsimavatit. Kisianni ’uummatikkut ilisimalernitta’ alliartortinnerata soqutiginninnerulerseqqissinnaavaatit. (Tussiaat 90:12) Pisariaqartumik iliuuseqarniarlutit aalajangeruit nuannaalivinnissannut isumakkut eqqissinermut siunissamullu neriuuteqarnermut iluaqutigissavat. (Rûmamiut 15:13) Aap, inuunerit siunertaqarnerulersinnaavoq. (wE 15/7 2000)

[Qupp. 6-mi assiliartaq]

Qinuneq iluaqutigalugu ’eqqissineq Guutip pia’ angusinnaavarput

[Qupp. 7-mi assiliartat]

Nalunngiliuk suup ilaqutariittut inuuneq nuannernerulersissinnaagaa?