Imarisai

Imarisai

Kristumiut paarsisut ’uummatissinni neruttoritsi’!

Kristumiut paarsisut ’uummatissinni neruttoritsi’!

 Kristumiut paarsisut ’uummatissinni neruttoritsi’!

’JEHOVA paarsisigaara, sumik ajorsaateqanngilanga.’ Davidip oqaatsinik taakkuninnga Jehovamut tatiginnilluinnarnini oqaatigaa. Jehovamit ’narsanut qorsuusunut’ anersaakkut ittunut siulersorneqarpoq ’imeqarfinnullu qasuersaarfissanut’ tasissersuunneqarluni, taamaalillunilu ’aqqutaalluartut atuarlugit’. Akeqqaminit avatangerneqaraluarluni David tapersersorneqarlunilu kajumissaarneqarpoq, taamaattumillu Jehova oqarfigaa: „Siooragisaqanngilanga najoramma.“ David taama pitsaatigisumik Paarsisoqarami aalajangerluinnarpoq ’Jehovap ulluani ineqassalluni ullussamini tamani’. — Tussiaat 23:1-6.

Guutip ernituata Jehovap asannittumik isumassuinera aamma misigisimavaa, nunamiikkallaramilu isumassuineq tamanna nammineq ajoqersukkaminut iliorfiginninnermini malittarpaa. Taamaattumik Biibilimi taaneqarpoq ’paarsisoq ajunngitsoq’, ’savat paarsisuunerat’ aamma ’paarsisuuneq’. — Juánase 10:11; Eprîarit 13:20; 1 Pîtruse 5:2-4.

Jehova Jesus Kristusilu suli asasiminnut paarsisuupput. Paarsisutut suliaat ilaatigut asannillutik ilagiinni paarsisooqataasunik isumaginnissimanerisigut ersersinneqarpoq. Paulusip ilagiinni paarsisut ima allaffigai: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai nammineq aamminik pissarsiai paareqqullugit.’ — apustilit suliait 20:28.

Jehovap Jesus Kristusillu maligassiaat malillugu ilagiinnut paarsisuuneq ajornaatsuunngilaq, ullumikkulli qangarnit pingaarnerungaarpoq. Eqqarsaatigikkit ukiut pingasut kingulliit ingerlaneranni Nalunaajaasut 1 millionit sinnerlugit kuisissimasut! Kuiserlaat taakku ukiuni amerlasuuni kristumiutut kiffartornerup kingunerisaanik anersaakkut tunuliaqutaqanngillat. Eqqarsaatigikkittaaq Nalunaajaasut suli meeraasut inuusuttuusulluunniit. Taakku angajoqqaaminniinnaanngitsoq aammali ilagiit paarsisuinit soqutigineqarnissartik pisariaqartippaat.

Aap, kristumiut tamarmik avataanit tatineqarneq misigisarpaat, aamma ilagisartakkanit tatineqarneq. Tamatta silarsuarmi inooriaaseq nuannaarniutinut kajumissaarisoq namminissarsiortorlu ingalassimaniarlugu ilungersungaartariqarpugut. Nunat ilaanni Guutip naalagaaffianik oqaluussisartut tusarliussartik soqutigineqanngimmat nikallungalersinnaapput. Oqaluussisartut amerlasuut anigoruminaatsunik peqqiilliuuteqarput. Aningaasatigut ajornartorsiutit pissutigalugit allat immaqa Guutip naalagaaffiata salliutinniarnissaanut piumassuseerussinnaapput. Imaappoq tamatta — aamma ukiorpassuarni sallusuissummiissimasut — paarsisunit asannittunit ikiorneqarnissarput pisariaqartipparput, ikiorneqarneq tamatta pisassarput.

Eqqortumik pissutiginiagaqarneq

Kristumiut ukiuni hundredelinni siullerni inuusut ima kajumissaarneqarput:  ’Uummatissinni neruttoritsi.’ (2 Korintumiut 6:11-13) Kristumiut utoqqaanertat paarsisutut akisussaaffimminnik isumaginninnerminni unnersuussut tamanna maleruartariaqarpaat. Qanoq ilillutik taamaaliorsinnaappat? Ilagiinnimi kiffartortut, taakkumi ilarpassui kingusinnerusukkut paarsisunngortussapput?

Kristumiut utoqqaanertat ilagiinnut pilluaqqussutaassagunik akisussaaffimmik misiginerinnaq killinneqaatigisariaqanngilaat. Ima kajumissaarneqarput: ’Guutip savaatai ilissinniittut paarisigik, misissuisuullusi pinngitsaalinermit pinnasi piaarinermilli, assuarnartumik akissarsiniarnasi kajumillusili.’ (1 Pîtruse 5:2) Taamaattumik paarsisutut angusaqarluassagaanni allat kiffartuunnissaannut kajumissuseqarneq ilungersornerlu pisariaqarput. (Juánase 21:15-17) Paarsisut savaatit pisariaqartitaat eqqumaffigisariaqarpaat iliuuseqapallannissamullu piareersimasariaqarlutik. Allanut pissusilersornermikkut takutittariaqarpaat Biibilip anersaap inerititaanik taasai pigalugit. — Galâsiamiut 5:22, 23.

Paarsisutut sulinerup ilagaa qatanngutit angerlarsimaffiinut pulaarnissaat. * Paarsisulli ’uummatiminnik neruttuillutik’ iliuuseqarnerupput. Paarsisutut ilaannikkuinnaq pulaartarneq naammaginngilaat. Periarfissat tamaasa atorlugit ilagiinniittunut paarsisuupput.

Allat paarsisunngornissaminnut sungiusarneqarput

Qatanngutip angutip qanoq utoqqaatigigaluaruniluunniit ’ilagiinnik paarsisuuniartup suliaq pingaartoq suliariniarpaa’. (1 Timûtiuse 3:1) Ilagiinni kiffartortut amerlasuut takutissimavaat pisinnaatitaaffeqarnerunissaminnik noqqaassuteqarlutik. Utoqqaanertat nuannaarutigisarpaat qatanngutit angutit piumassusillit taakku ’ilagiinnik paarsisunngornissaannut’ ikiorsinnaagamikkik. Taamaaliorsinnaapput paarsisuulluartunngornissaannut sungiusarnerisigut.

Guutip najoqqutassiaasa qutsissut maleruaqqissaarnerisigut Jehovap ilagiissai kristumiut paarsisunit ilumuunngitsunit, soorlu Hesekiel 34:2-6-imi eqqaaneqartunit, sanngiillisinneqarsimanngillat. Jehovap paarsisuuniaraluartut taakku eqqortumik narrunartutut isigai. Savaatit nerisinnagit, imminnuinnaq isumagisarput. Sanngiitsut nakussatsinnagit, napparsimasut katsorsarnagit, ikiligaasut mattusersornagit tammarsimasullu siammagaasullu katersunngilaat. Paarsisutut iliornatik amaqqutut iliornerupput, savaatit naakkittaatsuliorfigalugit. Savaatit isumakkiigaasut siammarsimapput paarsisoqaratillu angalaannartitaapput. — Jeremia 23:1, 2; Nahum 3:18; Matîuse 9:36.

Paarsisut ilumuunngitsut taakku assiginagit kristumiut paarsisut Jehova malinniartarpaat. ’Narsanut qorsuusunut’ anersaakkut ittunut ’imeqarfinnullu qasuersaarfissanut’ savaatit siulersortarpaat. ’Aqqutaalluartukkut’ naapertuilluartukkut siulersorniartarpaat Jehovap oqaasiata eqqortumik paasinissaanut nammineerlutillu maleruarnissaannut ikiorlugit. Taamaaliorluarsinnaapput ’ajoqersuineq sapinnginnamik’. — 1 Timûtiuse 3:2.

Utoqqaanertat ajoqersuinerisa annertunersaat ilagiit ataatsimiinnerini oqaluttarfimmit pisarpoq. Aamma utoqqaanertat inuit ataasiakkaarlugit ajoqersortarpaat. Ilaasa ataasiakkaanut ajoqersuillaqqinerusarput, allallu oqalugiallaqqinnerusarlutik. Ajoqersueriaatsimut aalajangersimasumut piukkunnaateqannginneruneq ima paasisariaqanngilaq ’ajoqersuineq sapersoq’. Utoqqaanertat ajoqersuisarput periarfissatik tamaasa  atorlugit, paarsisutut pulaarneq ilanngullugu. Paarsisutut pulaarnerit ilaat pilersaarusiugaasarput. Aammali pilersaarutaanngitsumik paarsisutut pulaarnerit iluaqutaasorujussuusinnaapput.

Tamatigut paarsisuullutillu ajoqersuisut

Nakorsap suliassani naammassissaguniuk ilisimasaqarneq misilittagaqarnerlu pisariaqartippai. Napparsimasulli ikiugassaasa aamma pingaartissavaat inussiarnersuulluni, misiginneqataalluni, isumaginnillunilu soqutiginnittuunissaa. Inuttut pissusiinut taakku ilaasariaqarput. Ajoqersuilluartup paarsisuulluartullu aamma taakku pissuserisariaqarpai, kinaassutsiminut ilaatillugit. Ilinniartitsisuulluartoq pisariaqaraangat avatangiisimi ajoqersornissaannut piareersimasariaqarpoq. „Ila ajunngittassusia oqaasissat piffissaasigut anillugit,“ Ussatit 15:23-mi allassimavoq. Oqaluttarfimmit oqalugiaraanni, illumiit illumut oqaluussigaanni, Naalagaaffilersaarfimmi telefonikkulluunniit oqaloqateqaraanni tassaasinnaavoq oqaaseqarnissamut ’piffissaalluartoq’. Paarsisuulluartup anguniartarpaa sukkulluunniit ajunngitsumik inoqatinut paasinnittumik pissuseqarnissani, paarsisutut pulaarnerinnarniunngitsoq. ’Uummammini neruttorami’ periarfissat tamaasa atorlugit savaatit pisariaqartitaat naapertorlugu piffissamilu eqqortumi isumagissavai. Taamaalioruni savaatinit asaneqangaalissaaq. — Mákorse 10:43.

Wolfgangip, maannakkut utoqqaanertaasup, eqqaamavaa ilaquttanilu ilagiinni kiffartortumit nulianillu pulaarneqaramik. Ima oqarpoq: „Meeqqatta soqutigineqarnertik nuannersumillu ataatsimooqatigiinneq nuannareqaat. Suli eqqartortarpaat.“ Aap, ilagiinni kiiffartortup taassuma soqutiginninnini takutippaa; ’uummammini neruttorami’.

Aamma napparsimasut pulaarnerat, kajumissinartunik allaffiginerat sianerfigineralluunniit — allaniluunniit iliuuseqarneq soqutiginninnermik ersersitsiviginninneruvoq — ’uummatitta neruttornissaanut’ periarfissaavoq. Pisariaqarpat ikiuinissat neqeroorutigiuk. Oqaloqatiginnikkusuppata soqutiginnillutit tusarnaakkit. Jehovamik asannittut siunissaannik nuannersumik pingaartitsilernissaannut ikiukkit. — 2 Korintumiut 4:16-18.

Paarsisutut pulaarnerit saniatigut

Qatanngutit angerlarsimaffiinut pilersaarusiukkamik paarsisutut pulaartarneq pingaaruteqarpoq. Eqqarsaatigilluaraannili paarsisutut sulinerup siunertaa, paasinarpoq tassannga annertunerujussuaq pineqartoq. Paarsisoq asannittoq ’uummammini neruttussaaq’ tamatigut saaffigiuminartuuguni. Qatanngumminut qanittumik attaveqarnermik ineriartortitsigami qularunnaarsissavai allaat ajornartorsiortillutik ajortumik pisoqarnissaanut sioorasariaqannginnertik nalunnginnamikku qatanngumminit asannittumit, paarsisumit kristumiumit, isumassorneqarlutik. — Tussiaat 23:4.

 Aap, ilissi paarsisut kristumiut tamassi, ’uummatissinni neruttoritsi’. Qatanngutisi ilumoortumik asasigik — kajumissaarsigik iliuuserisinnaasassigut tamatigut anersaakkut ittunik ineriartortissigik. Uppernikkut aalajaattuarnissaannut ikiorsigik. (Kulorsamiut 1:23) ’Uummammigut neruttortunik’ kristumiunik paarsisoqarunik savaatit amigaateqassanngillat. Daviditut aalajangiulluinnassavaat ’Jehovap illuani ullussaminni tamani ineqassallutik’. (Tussiaat 23:1, 6) Paarsisoq asannittoq allamik kissaateqassinnaanerpa? (wE 1/7 2000)

[Quppernerup ataani ilanngussaq]

^ imm. 10 Paarsisutut pulaarnissamut siunnersuutit atuarneqarsinnaapput Vagttårnet-imi 15. septembari 1993-imoortumi quppernerit 20-23 aamma Napasuliaq Alapernaarsuiffik-mi 1. apriili 1996-imoortumi quppernerit 20-23.

[Qupp. 31-mi ungalusaq]

Paarsisut kristumiut

Kajumillutik ilungersorlutillu kiffartorput

Savaatit anersakkut ittunik nerisittarlugillu isumagisarpaat

Allat paarsisunngornissamut noqqaassuteqarnissaannut ikiortarpaat

Napparsimasut pulaartarpaat isumagisarlugillu

Tamatigut qatanngutimik ikiornissaat eqqumaffigaat

[Qupp. 32-mi assiliartat]

Oqaluussinermi, ataatsimiinnerni sunngiffimmiluunniit katerisimaarnerni utoqqaanertat tamatigut parsisuupput