Imarisai

Imarisai

„Kristumiussuseq“ allanngortitaq — Guutip akueraa?

„Kristumiussuseq“ allanngortitaq — Guutip akueraa?

 „Kristumiussuseq“ allanngortitaq — Guutip akueraa?

TAKORLOORIARUK qalipaasumut assit qalipatsikkit suliaalu iluarisimaarit. Takorloorpat meeqqavit, ernguttavit kinguaavillu allat assiliaq tulluussimaarutigiumaaraat.

Takorlooriaruk siunissami kinguaassavit ilaasa nutsatit saagaluit qalipallugit torsunerulersikkai. Allap qinngavit ilusia iluarinngilaa, taamaattumillu taanna aamma allanngortippaa. Kinguaariinnilu tulliuttuni assiliaq ’kusassarneqartuarpoq’, naggataatigullu ilisarsaajunnaarputit. Tamanna eqqarsaatigalugu qanoq misigissavit? Qularnanngitsumik ajuallassaatit.

Ajoraluartumik tamanna ilagiit kristumiuunerartut oqaluttuarisaanerannut assersuutaalluarpoq. Oqaluttuarisaanerup takutippaa Kristusip apustiliisa toqunerata kingorna „kristumiussuseq“ allanngoriartulersimasoq, soorlu Biibilimi siulittuutigineqarsimasoq. — Matîuse 13:24-30, 37-43; apustilit suliait 20:30. *

Soorunami najoqqutassiat Biibilimeersut kulturinut piffissanullu assigiinngitsunut naleqquttunngorsarneqarsinnaapput. Biibililli ajoqersuutai iluarineqarnerusunut naapertuusarniaraanni allaalluinnarpoq. Tamanna ilumut pisimavoq. Assersuutigalugu pingaaruteqartuni ataqatigiinnerni allanngortitsinerit malugeriakkit.

Oqaluffik naalagaaffimmut atalerpoq

Jesusip ajoqersuutigaa naalakkersuinini naalagaaffiniluunniit qilamminngaanniissasoq, piffissanngorpallu inuit naalagaaffii tamaasa suujunnaarsillugit nunarsuaq tamakkerlugu naalakkersuilissasoq. (Daniel 2:44; Matîuse 6:9, 10) Politikkikkut aaqqissuussinerit inuit pilersitaat aqqutigalugit naalakkersuinerussanngilaq. ’Naalagaaffiga silamit matumannga pinngilaq,’ Jesus oqarpoq. (Juánase 17:16; 18:36) Taamaattumik Jesusip ajoqersugai inatsisinut naalakkaluarlutik politikkimut akuliukkumanngillat.

Ukiuni 300-kkunni Romamiut kaasariata Konstantinip nalaani kristumiuunerartut amerlasuut Kristusip uteqqinnissaa Guutillu naalagaaffiata pilersinneqarnissaa utaqqikatassimavaat. Politikkimut isiginneriaasiat allanngoriartuaalerpoq. Atuakkami Europa — A History-mi allassimavoq: „Konstantin sioqqullugu kristumiut soqutigisatik siuarsarniarlugit [politikkikkut] pissaaneqarniartarsimanngillat. Konstantip kingorna kristumiussuseq politikkernerlu ataqatigiilersimapput.“ Kristumiussuseq allanngortinneqarsimasoq upperisarsiorneq Romamiut naalagaaffissuannit aalajangigaq ’naalagaaffimmut tamarmut’ ’katuuliusutsimullu’ tunngasoq.

Qinerlerfissiami Great Ages of Man-imi allassimavoq oqaluffiup naalagaaffiullu qanimut ataqatigiinnerat pissutigalugu „ukiumi 385-imi, kristumiunik malersuinersuaqarnermit kingullermit ukiut 80-it qaangiutiinnartut, oqaluffeqarfimmit allamik isumallit toqutsinneqartalerput, palasiilu kaasarit pissaaneqarsimanerannut assingungajattumik pissaaneqalerput.“ Taamaalilluni oqaatsit atorlugit allamik isumataartitsiniaasarneq pannamit taarserpoq, palaseqatigiinnillu taaguutigissaartunit pissaaneqarusuttunillu ukiuni hundredelinni siullerni oqaluussisartut maniguuttut inangerneqarsimapput. (Matîuse 23:9, 10; 28:19, 20) Oqaluttuarisaanermik ilisimatuup H. G. Wellsip eqqartorpai ukiuni 300-kkunni kristumiussuseq „Jesus Kristusillu ajoqersuutai“ „qanoq assigiinngissuteqartigisut“. ’Assigiinngissutit’ tamakkua allaat Guuti Kristusilu pillugit ajoqersuutinut tunngaviusunut sunniuteqarput.

Guuti pillugu ajoqersuutit nutaat

Kristusip ajoqersugaasalu ajoqersuutigaat ’ataasiinnarmik Guuteqartoq, tassa Ataataq’, namminerisaminik ateqartoq, Jehova, ateq Biibilimi allassimaqqaarfiini 7000-eriarluni allanneqarsimasoq. (1 Korintumiut 8:6; Tussiaat 83:19) Jesus Guutimit pinngortinneqarpoq; ’pinngortitat tamarmik siornatigut erniusoq’ Biibilimi Kulorsamiut 1:15-imi allasimavoq. Jesusip nammineq pinngortitaanini paatsuugassaanngitsumik oqaatigaa: ’Ataataq uannit anneruvoq.’ — Juánase 14:28.

Ukiunili 200-kkunni palasit sunniuteqarnerusut ilaasa griikerip isumaliutersortartup Guutimik nalusup Platonip Guutip ataasiullunilu pingasuusumik ajoqersuutaanik nuannarinnittut, Guuti allatut nassuiartalerpaat ataasiullunilu pingasuussutsimik ajoqersuummut naleqquttunngortinniarlugu. Ukiuni hundredelinni tulliuttuni ajoqersuutip Biibilimik tunngaveqanngitsup Jesus Jehovamut naligitippaa, Guutillu anersaava illernartoq imaluunniit pissaanera sulissutiginnittoq kinaassuseqarnerarlugu.

Guutip ataasiullunilu pingasuussusianik ajoqersuummik Guutimik nalusuneersumik oqaluffiup akuersisimanera pillugu New Catholic Encyclopedia-mi allassimavoq: „Oqariartaaseq ’Guuti ataaseq kinaassutsini pingasuni’ ukiut 300-kkut naalernerat sioqqullugu suli aalajangiunneqarsimanngilaq, kristumiullu inuunerannut upperisamillu nassuerutiginninnerannut ilaatinneqarsimanani. Kisianni oqaatsit taakkorpiaat aallaaviusimapput Guutip ataasiullunilu pingasuuneranik ajoqersuummik aalajangersakkamut. Ilagiinni ajoqersuisuunerit siulliit akornanni taamaatut eqqarsartoqartanngilaq isumaqartoqarnaniluunniit.“

Tamatumunnga assingusumik The Encyclopedia Americana-mi allassimavoq: „Ukiuni 300-kkunni Guutip ataasiullunilu pingasuuneranik ajoqersuut kristumiut siulliit Guutip qanoq ittuussusianik ajoqersuutigisaannut assingunngilaq, akerlianilli tassannga qimatsiartuaarneruvoq.“ The Oxford Companion to the Bible-imi eqqaaneqarpoq Guutip ataasiullunilu pingasuuneranik ajoqersuut tassaasoq ’upperisamik ilinniartitaanermi ajoqersuutit nutaanerusut’ ilaat. Guutilli ataasiullunilu pingasuuneranik ajoqersuut tassaavoq Guutimik nalusut ajoqersuutigisaasa oqaluffimmit akuerineqartut ilaannaat.

Tarneq pillugu ajoqersuutit nutaat

Ullumikkut nalinginnaasumik isumaqartoqarpoq inuk toqujuitsumik tarneqartoq timip toqunerata kingorna ingerlaqqittartumik. Ilisimaviulli aamma oqaluffiup ajoqersuutigisaa tamanna aatsaat kingusinnerusukkut atulersinneqartoq? Jesusip Biibilimi oqaatsit uppernarsarpai: „Toqungasut sunguamilluunniit ilisimasaqanngillat.“ Aap, sinippullusooq. (Nalunaajaasup oqaasii 9:5; Juánase 11:11-13) Biibilip ajoqersuutigaa toqungasut makititaanermikkut inooqqilissasut — iterneqartutut ’makitinneqarlutik’. (Juánase 5:28, 29) Toqujuitsumik tarneqaraluarpat makititsisoqartariaqanngikkaluarpoq, toqujuitsormi toqusinnaanngilaq.

Allaat Jesusip Biibilip makinnissamik ajoqersuutaata isumaa takutippaa toqungasunik makititsinermigut. Assersuutigalugu eqqaaneqarsinnaavoq Lazarus ulluni sisamani toqungasoq. Taanna Jesusimit makitinneqarami ilivermit inuttut uumasutut anersaartorluni anivoq. Taanna toqumit makimmat tarnermik toqujuitsumik pilluarluni qilammiikkaluartumik Lazarusip timaanut utertoqarsimanngilaq. Taamaakkaluarpat Jesusip ikiorniarlugu makitissimassanngikkaluarpaa! — Juánase 11:39, 43, 44.

Tarnermik toqujuitsumik isumaliutersuut sumit aallaaveqarpa? The Westminster Dictionary of Christian Theology-mi allassimavoq ajoqersuut tamanna ’griikerit isumaliutersuutaannik tunngaveqarnerusoq Biibilimit isumassarsiarititaasuninngarnit’. The Jewish Encyclopedia-mi nassuiarneqarpoq: „Timip toqunerata kingorna tarnip inooqqittarneranik isuma isumaliutersuutinik imaluunniit upperisarsiornermik ilisimatuut eqqarsaataannik tunngaveqarpoq, upperisamik paasiuminartumik tunngaveqarnani, taamaattumillu Allakkani Illernartuni erseqqissumik ajoqersuutigineqarnani.“

Amerlanertigut salluneq ataaseq sallunik allanik kinguneqartarpoq, tarnillu toqujuissusianik ajoqersuut aamma taamaappoq. Anniarfimmi ikualasumi naassaanngitsumik anniartitaanissamik ajoqersuummut Guutimik nalusut ajoqersuutaannut aqqutissiuivoq. * Biibilimili erseqqissarneqarpoq ’ajortip akissarsiarititaa tassaasoq toqu’ — tassaanani naassaanngitsumik anniartitaaneq. (Rûmamiut 6:23) Taamaattumik makinnissamik Biibilimi nassuiaateqarpoq: ’Immap toqusut imminiittut tunniuppai, toqullu toqusullu inaata toqusut imminniittut tunniuppaat.’ Assingusumik King James Version-imi allassimavoq: „Immap . . . toqullu anniarfiullu toqusut imminniittut tunniuppaat.“ Aap, toqusut inaannittut, imaluunniit nutsikkat ilaat naapertorlugit ’anniarfimmiittut’ toqungapput, imaluunniit Jesusip oqarneratut ’sinillutik’. — sarĸúmersitat 20:13.

Naassaanngitsumik anniartitaanissamik ajoqersuut Guutip qanoq ittuuneranik eqqortumik ersersitsiva? Naamik. Inunnut naapertuilluarnermik asannittunut eqqarsaat taanna kajuminnarnavianngilaq! Biibilimili ajoqersuutigineqarpoq Guuti ’asassutaasoq’, allaallu uumasunut naakkittaassuseq assuarigaa. — 1 Juánase 4:8; Ussatit 12:10; Jeremia 7:31; Jona 4:11.

Allaaserisaq ullumikkut allanngortitaq

Ullumikkuttaaq Guuti kristumiussuserlu pillugit ajoqersuutit allanngortinneqartuarput. Ungasinngitsukkut upperisarsiornermik professoriusup oqaatigaa upperisarsioqatigiiinni naaggaartuusuni ilaasortaaffigisamini makku akerleriissutigineqartut: „Allakkat upperisamillu nassuerutiginninneq isumaliutersuutillu oqaluffiup avataaneersut oqartussaassusiat, oqaluffiup Kristusip oqartussaaneranut ilumoornera kristumiussutsillu ullutsinnut naleqqussangaarnissaa. Una apeqqutaavoq: Suna oqaluffiup pilersaarutaanut aalajangiisuussava . . . Allakkat illernartut imaluunniit ullumikkut eqqarsariaatsit nalinginnaasut?“

Ajoraluartumik ’ullumikkut eqqarsariaaseq nalinginnaasoq’ amerlanertigut pingaartinneqartarpoq. Assersuutigalugu naluneqanngilaq oqaluffeqarfiit amerlasuut apeqqutinut assigiinngitsunut isummatik allanngortittaraat siuarsimarpasinniarlutik paqumisuppasinniaratillu. Soorlu allaaserisami siulianiittumi eqqaaneqartoq oqaluffiit isumaat killeqannginnerujartuinnarput, ingammik ileqqussanut tunngasut pineqaraangata. Biibilimili ersarissumik oqaatigineqarpoq kanngunartuliorneq, allasiorneq anguteqatinoornerlu Guutip ingasattumik ajortuliornertut isigigai, taamaaliortartullu ’Guutip naalagaaffia kingornussarissanngikkaat’. — 1 Korintumiut 6:9, 10; Matîuse 5:27-32; Rûmamiut 1:26, 27.

Apustili Paulusip qulaani taaneqartut allammagit griikerit Romamiullu silarsuaat assigiinngitsorpassuartigut ajortunngorluinnarsimavoq. Paulus ima eqqarsarsinnaagaluarpoq: ’Guutip Sodoma Gomorralu suujunnaarsikkaluarpai ingasattumik kanngunartuliortarnerat pissutigalugu, tamannali ukiut 2000-t matuma siorna pisimavoq. Ullutsinni qaamaassaqarneruffiusuni tamanna atorsinnaanngilaq.’ Paulusili utoqqatsissutissarsiorluni nassuiaanianngilaq. Biibilip oqaasertai kimikillisinnianngilai. — Galâsiamiut 5:19-23.

Allaaserisaq allanngortitaqanngitsoq misissoruk

Nalimini upperisarsiornikkut siuttut Jesusip oqarfigai guutisiornerat ’asuliinnaasoq, ajoqersuutit inuinnaat inatsisigisaat ajoqersuutigisarmatigik’. (Matîuse 15:9) Qanga palasit Jehovap inatsisaanik Mosesikkut tunniunneqartunik atuisarnerattut kristumiuuneraqatigiit palasii Kristusip ajoqersuutaanik ullumikkut atuisarput. Taakkua Guuti pillugu eqqortoq ileqqutoqqanik taarsersimavaat. Inuilli eqqortuliorusuttut iluaqutissaannut Jesusip eqqunngitsut tamaasa peerpai. (Mákorse 7:7-13) Jesus ilumoortumik oqaluppoq, naak iluarineqanngikkaluarluni. Tamatigut Guutip oqaasia uppernarsaatigisarpaa. — Juánase 17:17.

Jesusip isiginnittaasia ajoqersuutaalu kristumiuunerartut amerlanersaasa isumaannit allaanerulluinnarput. Biibilimi siulittuutigineqarpoq inuit ullumikkut ’ajoqersuut peqqissinartoq ajorilerumaaraat pilerigisaminnillu ajoqersortigisarpassuarsiorumaarlutik siutimik nuannarisaat missiliorlugit; siutitillu sallusuissummik tunussisillugit oqaluttuapalaanut saakkumaartut.’ (2 Timûtiuse 4:3, 4) ’Oqaluttuapalaat’ taakkua ilaat misissorpavut, paasivarpullu anersaakkut ineriartornartuunngitsut, Guutilli oqaasia ineriartornartuuvoq inuunermullu naassaanngitsumut sammilluni. Tamatuma misissornissaanut Jehovap Nalunaajaasuisa allat kajumissaartarpaat. — Juánase 4:24; 8:32; 17:3. (wE 1/6 2000)

[Quppernerup ataani ilanngussat]

^ imm. 4 Jesusip naatsiassarissunik naatsiassapilunnillu assersuusiaani aamma aqqummik sileqisumik aqqummillu amitsumik assersuusiaani (Matîuse 7:13, 14) paasinarpoq oqaluttuarisaanerup ingerlanerani ikittuinnaat kristumiussuseq ilumoortoq ingerlatissagaat. Taakkuli amerlanerussuseqartunit naatsiassapiluttut ittunit kristumiuunerartunit malunnannginnerulersimapput, taakkumi ajoqersuutitik kristumiussutsitut ilumoortutut saqqummiuttarpaat. ’Kristumiussuseq’ tamanna allaaserisami matumani allaaserineqarpoq.

^ imm. 19 Oqaaseq ’anniarfik’ hebriiarit oqaasiannit Sheol-imit griikerillu oqaasiannit Hades-imit nutserneqarpoq, tamarmik isumaqaannartut ’iliveq’. Taamaattumik tuluit King James Version-imik nutserisut oqaaseq Sheol 31-riarlutik ’anniarfimmik’ nutserpaat, aammali 31-riarlutik ’ilivermik’ nutserlugu pingasoriarlutillu ’itinermik’ nutserlugu, taamaalillutik takutillugu oqaatsit taakku assigiimmik isumaqartut.

 [Qupp. 7-mi ungalusaq/assiliartaq]

Taaguut ’kristumiu’ sumik pilerfeqarpa?

Jesusip toqunerata kingorna minnerpaamik ukiuni qulini oqartoqartarpoq ajoqersugai ’aqqutikkut tassuuna ingerlasut’. (apustilit suliait 9:2; 19:9, 23; 22:4) Taamaappoq Jesus Kristusimut ’aqqutaasumut, sallusuissutaasumut inuussutaasumullu’ upperneq inuuneranni qitiummat. (Juánase 14:6) Ukiup 44-p kingorna Kristusip ajoqersugai Guutip siulersuineratigut ’kristumiunik taaneqaleqqaarput’. Tamanna Syriami illoqarfimmi Antiochiami pisimavoq. (apustilit suliait 11:26) Taaguut taanna erniinnaq atorneqalerpoq, aamma atorfillit akornanni. (apustilit suliait 26:28) Allamilli taaguuteqaleraluarlutik kristumiutut inooriaasiat allanngunngilaq, Kristusimi malittuaannarpaat. — 1 Pîtruse 2:21.

[Qupp. 7-mi assiliartaq]

Oqaluussinermikkut Jehovap Nalunaajaasuisa Biibilimik Guutip oqaasianik inuit uparuuppaat

[Suminngaanneernera]

Saamiup tungaaniit assit pingajuat: FN-ip assiutaa Saw Lwin-imit