Imarisai

Imarisai

Guutip oqaasia siulittuutaasoq upperiuk!

Guutip oqaasia siulittuutaasoq upperiuk!

 Guutip oqaasia siulittuutaasoq upperiuk!

’Pruffiitit oqaasiat aalajaallivarput.’ — 2 PÎTRUSE 1:19.

1, 2. Siulittuut allanneqarsimasoq siulleq qanoq nipeqarpa, suullu tamatumunnga atatillugu apeqqutaalerpat?

SIULITTUUT allanneqartoq siulleq Jehovamit oqaatigineqarpoq. Adam Evalu ajortuliormata Guutip pulateriaarsuk ima oqarfigaa: „Akerariissikkumaarpassi illit arnarlu, illit kinguaassat taassumalu kinguaassai. Taassuma niaqqut aserortissavaa, illilli kimmiisigut keeriartarumaarpat.“ (1 Moses 3:1-7, 14, 15, NV) Aatsaat ukiut hundredelippassuit qaangiummata oqaatsit siulittuutaasut taakku tamakkiisumik paasineqalerput.

2 Siulittuut siulleq tamanna inuiannut ajortiliusunut neriuutissammik imaqarpoq. Kingusinnerusukkut nassuiarneqarpoq ’pulateriaarsutoqaq’ tassaasoq Satan Diaavulu. (sarĸúmersitat 12:9) Guutilli kinguaassaa neriorsuutigisaq kinaassava?

Kinguaassaq kinaava?

3. Abelip qanoq ililluni takutippaa siulittuut siulleq upperalugu?

3 Ataatani assiginagu Abelip Guutimik mianerinnilluni siulittuut siulleq tamanna upperaa. Paasisimagunarpaa ajortuliaq aatsaat aammik kuisinikkut matoorneqarsinnaasoq. Taamaattumik uppernerata uumasumik pilliuteqartippaa, pilliullu tamanna Guutip isaani iluarinarpoq. (1 Moses 4:2-4) Kinguaassalli neriorsuutigisap kinaanera suli isertugaavoq.

4. Guutip Abraham sumik neriorsorpaa, tamannalu kinguaassaq neriorsuutigisaq pillugu sumik ersersitsiva?

4 Ukiut 2000-t missaat Abelip inuunerata kingorna Jehovap ataataanerpaaq Abraham ima neriorsorpaa: „Pilluaqqussavakkit, kinguaassatillu qilaap ulloriaasut . . . amerlatigilersissavakka . . . Illillu kinguaassakkut nunarsuarmi inuiaqatigiit tamarmik pilluaqqunarsissapput.“ (1 Moses 22:17, 18) Oqaatsit taakkua takutippaat siulittuutip siulliup eqquunnissaa Abrahamimut atatinneqartoq. Paasitippaat kinguaassaq Satanip suliaanik suujunnaarsitsisussaq abrahamip kinguaavisigut saqqummerumaartoq. (1 Juánase 3:8) ’Guutip unnersuutaa uppinnginnermit [Abrahamip] qularnartinngilaa,’ Jehovamullu nalunaajaasut allat Kristus sioqqullugu inuusimasut aamma qularinngilaat, naak ’unnersuutigisaq pinngikkallaraluarlugu’. (Rûmamiut 4:20, 21; Eprîarit 11:39) Akerlianik Guutip oqaasia siulittuutaasoq upperiuarpaat.

5. Kina aqqutigalugu Guutip kinguaassamik neriorsuutaa eqquuppa? Nassuiaruk.

5 Apustili Paulusip nassuiarpaa kinguaassaq  Guutip neriorsuutigisaa kinaanersoq ima allakkami: ’Unnersuutit Abrahamimut kinguaassaanullu oqaaserineqarput. Ima oqanngilaq: „Kinguaassanullu“, qassiiutillugit, kisianni ataasiutillugu: „Kinguaassannullu“, tassa Kristus.’ (Galâsiamiut 3:16) Kinguaassamut nunarsuarmi eqqarleriit tamarmik pilluaqqunarsissutissaannik Abrahamip kinguaavii tamarmik pineqanngillat. Ernerata Ismaelip Keturamillu ernerisa kinguaavisigut inuiaat pilluaqqusaassanngillat. Ernerata Isakip erngutaatalu Jakobip kinguaavisigut pilluaqqussutissaq saqqummerumaarpoq. (1 Moses 21:12; 25:23, 31-34; 27:18-29, 37; 28:14) Jakob oqarsimavoq „inuiannut“ naalagaasussaq (Silo, NV) Judap kinguaavisigut takkuttussaq naalassagaat, kingusinnerusukkulli neriorsuut Davidip kinguaassaanut killilerneqarpoq. (1 Moses 49:10; 2 Samuel 7:12-16) Ukiuni hundredelinni siullerni juutit inuk ataasiinnaq, Messias imaluunniit Kristus, utaqqivaat. (Juánase 7:41, 42) Guutillu kinguaassamik siulittuutaa erneratigut, Jesus Kristusikkut, eqquuppoq.

Messias saqqummerpoq!

6. (a) ’Sabbatip akunneri’ 70-it pillugit siulittuut qanoq paasisariaqarpa? (b) Qanga qanorlu ililluni Jesusip ajortuliorneq ’soraarsippaa’?

6 Pruffiiti Danielip Messias pillugu siulittuut pingaartoq allassimavaa. Mediamiup Dariusip kunngiuffiisa ukiuani siullermi Danielip paasilerpaa ukiut 70-it Jerusalemip inoqanngiffissai qaangiutingajalersut. (Jeremia 29:10; Daniel 9:1-4) Daniel Guutimut qinutillugu inngili Gabriel tikiuppoq saqqummersillugulu ’ajortuliornerup soraarsitaanissaanut’ ’sabbatip akunneri 70-it aalajangigaasut’. Sabbatip akunnerisa 70-iata qeqqani Messias peersitaassaaq. ’Sabbatip akunneri’ ukiunngortitat ukiumi 455-imi u.n.s. aallartipput Persiamiut kunngiata Artaxerxes I-p ’Jerusalemip kingumut qarmarneqarnissaa peqqussutigimmagu’. (Daniel 9:20-27, takuuk Ny Verden Oversættelsen Qinerlerfissialik, quppernerup ataani ilanngussaq; Nehemja 2:1-8) Messias ’sabbatit akunneri’ arfineq-marluk 62-illu qaangiuppata saqqummissaaq. Ukiut taakku 483-it ukiumi 455-imi u.n.s aallartillutik ukiumi 29-mi u.n.k. naapput, Jesus kuisimmat Guutimillu Messiasitut Kristusitulluunniit tanitaammat. (Lúkarse 3:21, 22) Ukiumi 33-mi u.n.k. inuunini utertitsissutitut pilliutigigamiuk Jesusip ’ajortuliorneq soraarsippaa’. (Mákorse 10:45) Tamatuma Guutip oqaasianut siulittuutaasumut upperinninnissatsinnut pissutissaqarluartippaatigut! *

7. Biibili atorlugu Messias pillugu siulittuutit qanoq Jesusikkut eqquuttut takutiguk.

7 Guutip oqaasianut siulittuutaasumut uppernitta paasinnissinnaanngortissavaatigut Messias kinaasoq. Kristumiut Allagaataannik Griikerisuunik allattut Allakkani Hebriiarisuuni Messias pillugu siulittuutit assigiinngitsorpassuit Jesusimut tunngatippaat. Assersuutigalugu: Jesus Betlehemimi niviarsissamit erniuvoq. (Jesaja 7:14; Mika 5:1; Matîuse 1:18-23; Lúkarse 2:4-11) Egyptenimit qaaqquneqarpoq, inunngorneratalu kingorna meeraaqqat toqunneqarput. (Jeremia 31:15; Hosea 11:1; Matîuse 2:13-18) Jesusip nappaativut nanertuutigai. (Jesaja 53:4; Matîuse 8:16, 17) Siulittuutigineqartutut siutituup piaraa qimusserfigalugu Jerusalemimut iseriartorpoq. (Sakarja 9:9; Juánase 12:12-15) Jesus kikiattorneqareermat tussiaasiortup oqaasii eqquupput, sakkutuut atisai imminnut agguarpaat annoraavalu ilorleq immeraatigalugu. (Tussiaat 22:19; Juánase 19:23, 24) Jesusip sarngi ’napineqanngimmata’, ’kapineqarmallu’ Messias pillugu  siulittuutit aamma eqquupput. (Tussiaat 34:21; Sakarja 12:10; Juánase 19:33-37) Tassaapput Messias pillugu siulittuutit ilaannaat Biibilimik allattunit isumassarsisittaasunit Jesusimut tunngatinneqartut. *

Kunngi Messiasiusoq unnersiutigiuk!

8. ’Ittuinnartoq’ kinaava, siulittuullu Daniel 7:9-14-miittoq qanoq ililluni eqquuppa?

8 Kunngi Belsazzarip Babylonimi kunngiuffiisa ukiuani siullermi Jehovap pruffiitini Daniel sinnattortippaa maluginiarnartunillu takorruuisillugu. Pruffiitip nersutit angisuut sisamat takuai. Guutip inngiliata nassuiarpaa taakku ’kunnginut sisamanut’, silarsuarmi naalagaaffissuassanut assersuutaasut. (Daniel 7:1-8, 17) Tamatuma kingorna Danielip takuaa Jehova, ’Ittuinnartoq’ issiavissaarsuarminut naalannartumut ingittoq. Nersutit eqqartuunneqarput, naalagaassutsiminnik arsaarneqarlutik, nersutillu sisamaat toqunneqarpoq. Taava naalagaaffik ataavartussaq ’inuiannut, naggueqatigiinnut immikkullu oqaasilinnut tamanut’ ’inuup erneratut isikkoqartumut’ tunniunneqarpoq (Daniel 7:9-14) Tassaavoq Inuup Ernerata, Jesus Kristusip 1914-imi qilammi kunnginngortinneqarneranik siulittuut nuanningaartoq! — Matîuse 16:13.

9, 10. (a) Inuusaliap avatai assigiinngitsut sunut assersuutaappat? (b) Daniel 2:44-p eqquunnissaa qanoq nassuiassaviuk?

9 Danielip nalusimanngilaa Guuti ’kunnginik soraarsitsisartoq ivertitsisarlunilu’. (Daniel 2:21) Jehova ’isertukkanik saqqummersitsisartoq’ upperfigalugu pruffiitip Babylonip kunngiata Nebukadnezarip inuusaliarujussuarmik sinnattugaa nassuiarpaa. Avatai assigiinngitsut silarsuarmi naalagaaffissuarnut assigiinngitsunut, soorlu Babylonimut, Medo-Persiamut, Grækenlandimut Romamullu, takkuttarlutillu peeruttartunut assersuutaapput. Guutip aamma Daniel eqqartuisippaa ullut inuuffigisavut tikivillugit, aap, allaat siunissami ungasinnerusumi, silarsuarmi pisussanik. — Daniel 2:24-30.

10 Siulittuutimi allassimavoq: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ (Daniel 2:44) 1914-imi ’inuiaat ullussaat aalajangersagaasut’ naammata Guutip naalagaaffik qilammiittoq pilersippaa Kristusimik kunngilik. (Lúkarse 21:24, NV; sarĸúmersitat 21:1-5) Guutip pissaaneratigut ’ujarak’, naalagaaffimmut Messiasikkoortumut assersuutaasoq, ’qaqqamit’, Guutip silarsuarmi kisimi oqartussaaneranut assersuutaasumit, kaanngarpoq. Harmagedonimi ujaqqap tamatuma inuusaliaq eqqussavaa sequmisilluinnarlugulu. Ujarak ’qaqqarsuanngortoq nunarsuaq tamakkerlugu’ assigalugu naalagaaffik Messiasikkoortoq nunarsuaq tamakkerlugu naalagaassaaq naassanngitsumillu atassalluni. — Daniel 2:35, 45; sarĸúmersitat 16:14, 16. *

11. Jesusip allatut isikkoqalernera sumut qilarnaartuutaava, takorruugarlu Peterimut qanoq sunniuteqarpa?

11 Naalagaaffini eqqarsaatigalugu Jesusip ajoqersukkani ima oqarfigai: ’Ukua maaniittut ilaasa Inuup Erneranik naalagaalluni aggersumik takutinnatik toqu misigissanngilaat.’ (Matîuse 16:28) Ullut arfinillit qaangiummata Jesusip Peter, Jakob Johannesilu qaqqarsuarmukaappai, tassanilu isigitillugit allatut isikkoqalerluni. Nuiamik qaamasumik apustilit ulissimatillugit Guuti nalunaarpoq:  ’Tassa ernera asanartoq nuannarisara; taanna tusarsiuk.’ (Matîuse 17:1-9; Mákorse 9:1-9) Tassa Kristusip Naalagaaffimmi pissaaneqarluni naalannassusissaanik takusaqarput! Tupinnanngilaq Peter kingusinnerusukkut takorruugaq alutornangaartoq tamanna innersuussutigalugu oqarmat: ’Pruffiitit oqaasiat aalajaallivarput.’ — 2 Pîtruse 1:16-19. *

12. Sooq maanna Guutip oqaasianut siulittuutaasumut uppernermik ersersitsinissamut piffissanngorpa?

12 ’Pruffiitit oqaasiat’ tassaaginnarunanngilaq Allakkani Hebriiarisuuni Messias pillugu siulittuutit, tassaavortaaq Jesusip ’pissarsuulluni naalannartorsuullunilu aggernissaminik’ oqaasii. (Matîuse 24:30) Allatut isikkoqalerneq Kristusip naalannartorsuulluni Naalagaaffiup pissaanerani aggernissaanik siulittuutinut uppernarsaataavoq. Ungasinngitsukkut taassuma naalannartorsuulluni saqqummernissaa uppinngitsunut aserugaanermik kinguneqassaaq, uppertunullu pilluaqqusaanermik kinguneqassalluni. (2 Tásalûníkamiut 1:6-10) Biibilip siulittuutaasa eqquunnerisa takutippaat maannakkut ’ullut kingulliit’ inuufigigivut. (2 Timûtiuse 3:1-5, 16, 17; Matîuse 24:3-14) Jehovap eqqartuussutaanik naammassinnittussatut pingaarnerpaatut Mikael, tassa Jesus Kristus, ’naalliunnartoqangaarnissami’ pissutsit aaqqissuussaat maanna atuuttoq suujunnaarsissallugu piareerpoq. (Matîuse 24:21; Daniel 12:1) Taamaattumik maanna Guutip oqaasianut siulittuutaasumut uppernermik ersersitsinissamut piffissanngorpoq.

Guutip oqaasia siulittuutaasoq upperiuaruk

13. Suut iluaqutigalugit Guutimut asannittuaannarsinnaavugut oqaasianullu uppertuaannarsinnaalluta?

13 Qularnanngitsumik Guutip oqaasiata siulittuutaasup qanoq eqquussimanera tusaqqaaratsigu qiimmaallaatigingaarparput. Tamatumali kingorna uppernerput sanngiinnerulersimanerpa asanninnerpullu nillunganerulersimanerluni? Kristumiutut Efesusimiittutut innaveerta taakkua ’asanninnertik  siulleq soraarummassuk’. (sarĸúmersitat 2:1-4) Qanorluunniit sivisutigisumik Jehova kiffartuussimagaluarutsigu upperneq annaasinnaavarput ’Guutip naalagaaffia iluarnerlu taassuma pia piniaqqaartuanngikkutsigik’ taamaalillutalu ’pequutinik qilammi katersuilluta’. (Matîuse 6:19-21, 31-33) Biibilimik peqqissaartumik atuaqqissaartarneq, kristumiut ataatsimiinnerinut aalajaatsumik peqataasarneq Guutillu naalagaaffianik aallussilluarluta oqaluussisarneq iluaqutigalugit Jehovamut, erneranut Biibilimullu asannittuaannarsinnaavugut. (Tussiaat 119:105; Mákorse 13:10; Eprîarit 10:24, 25) Taamaaliornerup aamma Guutip oqaasianut uppernerput nakkussatsissavaa. — Tussiaat 106:12.

14. Kristumiut tanitat Jehovap oqaasianut siulittuutaasumut uppernerminnut qanoq akilerneqarpat?

14 Soorlu Guutip oqaasiata siulittuutaasup itsaq eqquussimanera tatigisinnaagipput siunissaq pillugu siulittuutit aamma eqquussapput. Assersuutigalugu Kristusip maanna Naalagaaffiup pissaanerani najuunnera piviusunngorpoq, kristumiullu tanitat toqumut aalajaassimasut neriorsuutip matuma siulittuutaasup eqquunnera misigisimavaat: ’Ajugaasoq orpimmit inuunartumit Guutip paratiisianiittumit nerisikkumaarpara.’ (sarĸúmersitat 2:7, 10; 1 Tásalûníkamiut 4:14-17) Ajugaasut taakku Jesusip immikkut pisinnaatippai qilammi ’orpimmit inuunartumit Guutip paratiisianiittumit nerisillugit’. Makikkunik Jesus Kristusip pissaaneratigut Jehovamit, ’naassaanngitsumik kunngiusumit aserujuitsumit takussaanngitsumit kisimi Guutiusumit’, toqujuissummik aserujuissummillu tunineqassapput. (1 Timûtiuse 1:17; 1 Korintumiut 15:50-54; 2 Timûtiuse 1:10) Aalajaallutik Guutimut asanninnerminnut oqaasianullu siulittuutaasumut malartaallutik uppernerminnut akissarsiassap nuanningaassusia!

15. Kikkut ’nunamut nutaamut’ tunngaviuppat, kikkullu taakkua suleqatigaat?

15 Tanitat aalajaatsut toqusimasut ’Guutip paratiisianut’ qilammiittumut makititaalernerata kinguninnguat, Israelikkut anersaakkut ittut nunamiittut sinneri ’Babylon Angisuumit’, eqqunngitsumik upperisarsiornerup silarsuarmi tamarmi naalagaaffissuanit, aniguisinneqarput. (sarĸúmersitat 14:8; Galâsiamiut 6:16) Taakku ’nunamut nutaamut’ tunngaviupput. (sarĸúmersitat 21:1) Taamaalilluni ’nuna’ pilersinneqarpoq, tamannalu anersaakkut paratiisimut maanna nunarsuaq tamakkerlugu atuuttumut ineriartortinneqarpoq. (Jesaja 66:8) Savarpassuit assersuutaasut, Israelikkut anersaakkut ittut suleqataat, maanna ’ulluni kingullerni’ anersaakkut paratiisimut tamatumunnga isaapput. — Jesaja 2:2-4; Sakarja 8:23; Juánase 10:16; sarĸúmersitat 7:9.

Inuiaat siunissaat Guutip oqaasiani siulittuutaasumi siulittuutigineqarpoq

16. Tanitat suleqataat ilumoortut siunissamut qanoq neriuutissaqarpat?

16 Tanitat suleqataat ilumoortut siunissamut qanoq neriuutissaqarpat? Taakkuattaaq Guutip oqaasia siulittuutaasoq upperaat, nunarsuarmilu paratiisimi inuunissamik neriuuteqarlutik. (Lúkarse 23:39-43) Tassani ’kussuarmit inuunartumik imilimmit’ imissapput kuussuullu sinaani ’orpiit pilutaat’ katsorsaatigissallugit. (sarĸúmersitat 22:1, 2) Neriuut nuanningaartoq tamanna pigigukku Jehovamut qamannga pisumik asanninnerit ersersittuartariaqarpat oqaasialu siulittuutaasoq upperiuarlugu. Taamaalioruit paratiisimi nunarsuarmi naassaanngitsumik inuunissamut atatillugu nuannaarneq oqaatigineqarsinnaanngitsoq nammineq misigiumaarpat.

17. Nunarsuarmi paratiisissami inuunermut atatillugu pilluaqqussutissat suut atuutissappat?

17 Inuit naammalluinnanngitsut nunarsuarmi paratiisissami inuunissamik naammassisitsisussaq  oqaatigisinnaanngilaat, Guutilli oqaasiani siulittuutaasumi pilluaqqussutissat Guutimut naalakkumasut nuannaarutigiumaagaat eqqartorneqarput. Naalagaaffia akerlilersorneqarnani naalagaalerpat taassumalu piumasaa nunarsuarmi qilammisut pilerpat, inunnik ajortunik — uumasunilluunniit — ’ajortumik iliortoqarnanilu ajoqusiisoqassanngilaq’. (Jesaja 11:9; Matîuse 6:9, 10) Qanilaartut nunarsuaq pigilissavaat ’pilluangaarlutillu inuussallutik’. (Tussiaat 37:11) Kaannersuaqarunnaassaaq, ’karrimmi naammangaartut nunami naasimassapput, qaqqat qaanni aalataarumaarput’. (Tussiaat 72:16) Aliasunnermit qiasoqassanngilaq. Nappaatit atorunnaassapput; allaat toqusoqartarunnaassaaq. (Jesaja 33:24; sarĸúmersitat 21:4) Eqqarsaatigeriaruk — nakorsaqanngilaq, nakorsaateqassanani, napparsimmaveqassanani, tarnikkut napparsimasunut napparsimmaveqassanani ilisisoqassananilu. Siunissaq nuannerluinnartoq!

18. (a) Daniel sumik neriorsorneqarpa? (b) Daniel sumik ’pissarsiaqassava’?

18 Inuiaat ilerrat imaarutissaaq toqusoorneq makititsinermik taarserneqarpat. Angut naapertuilluartoq Job makinnissamik neriuuteqarsimavoq. (Job 14:14, 15) Pruffiiti Danielittaaq aamma taama neriuuteqarsimavoq, Jehovap inngilanit ima neriorsorneqarami: „Illilli naggatissannut ingerlaannarit, ilivermilu qasuersaareeruit makikkumaarputit ullut naggatissaanni pissarsiassat pissarsiarissallugu.“ (Daniel 12:13) Danielip toqussi tikillugu Guuti aalajaalluni kiffartorfigaa. Maanna toqungalluni qasuersaarpoq, ’makikkumaarlunili’ ’iluartut makiffianni’ Kristusip ukiuni tusindini naalakkersuinerani. (Lúkarse 14:14) Daniel sumik ’pissarsiaqassava’? Ezekielip siulittuutaani paratiisissamik allaatiginninneq naapertorlugu ilimanarpoq Guutip innuttai tamarmik Paratiisimi sumiiffissaqassasut — imaluunniit inissaqassasut, nunamillu agguaaneq aaqqissuussaalluartumik naapertuilluartumillu naammassineqassasoq. (Hesekiel 47:13–48:35) Taamaattumik Daniel Paratiisimi inissaqassaaq, tassanili pissarsiassaa nunaminiinnaassanngilaq. Aamma tassaassaaq Jehovap siunertaani inissisimaffissaa.

19. Nunarsuarmi paratiisimi inuussagutta suna piumasarineqarpa?

19 Illilli sumik pissarsiaqassavit? Guutip oqaasia Biibili upperigukku nunarsuarmi paratiisissami inuunissamik neriuuteqarunarputit. Takorloorsimagunarpat Paratiisimi qanoq inuusoqassanersoq, pilluaqqussutissanik nuannaarutiginninnissaq, nunamik naggorissaanissaq toqusimasunillu inuunermut tikilluaqqusinissat. Tassami, Paratiisimi inuit angerlarsimassapput. Guutip inuit siulliit marluk paratiisimi inuunissamut pinngortissimavai. (1 Moses 2:7-9) Imminullu naalattut naassaanngitsumik Paratiisimi inuunissaat kissaatigaa. Biibilimi unnersuussutit maleruassavigit taamaalillutillu inuit milliardilikkuutaat nunarsuarmi Paratiisimi inuujumaartut akornanniilissallutit? Taama periarfissaqarputit Ataatarput qilammiusoq Jehova ilumoorlutit asagukku Guutillu oqaasia siulittuutaasoq aalajaallutit upperalugu. (wE 15/5 2000)

[Quppernerup ataani ilanngussat]

^ imm. 6 Takuuk atuakkami Giv agt på Daniels profeti!-mi kapitali 11, aamma Indsigt i Den Hellige Skrift, immikkoortoq „Halvfjers uger“, tamarmik Jehovap Nalunaajaasuinit naqitertitat.

^ imm. 7 Takuuk „Hele Skriften er inspireret af Gud og gavnlig“, quppernerit 343-44, Jehovap Nalunaajaasuinit naqitertitaq.

^ imm. 10 Takuuk atuakkami Giv agt på Daniels profeti!-mi kapitalit 4 aamma 9.

^ imm. 11 Takuuk Vagttårnet 1. apriili 2000-imoortumi allaaserisaq „Giv agt på Guds profetiske ord“.

Uteqqiineq

Siulittuut siulleq qanoq nipeqarpa, kinguaassarlu neriorsuutigisaq kinaava?

Messias pillugu siulittuutit ilaat Jesusimut eqquuttut taakkit.

Daniel 2:44, 45 qanoq ililluni eqquutissava?

Guutip oqaasia siulittuutaasoq naapertorlugu inuit Guutimut naalakkumasut sumik siunissaqassappat?

[Atuaqqissaarnermi apeqqutit]

[Qupp. 17-mi assiliartaq]

Nunarsuarmi Paratiisimi inuunissaq neriuutigaajuk?