Imarisai

Imarisai

Sooq inuiaat ikiorneqartariaqartut

Sooq inuiaat ikiorneqartariaqartut

 Sooq inuiaat ikiorneqartariaqartut

’KANNGUTTAALLUNGA malersuisimavunga,’ angut siornatigut pingaarniartuullunilu nakuusertoq nassuerpoq. Peqqarniitsuulluni Guutimut mitallersutut naakkittaalluni Jesus Kristusip ajoqersugai Guutimik mianerinnittut malersorlugillu saassuttarsimavai. ’Nallittorneqarpungali,’ qujamasulluni allappoq. Tusarlugu uppernanngissinnaagaluartoq, ingasaattajaarluni malersuisoq taanna kristumiunngorpoq ilumoortoq apustili Paulus. — 1 Timûtiuse 1:12-16; apustilit suliait 9:1-19.

Soorunami tamarmik tamatumunnga assingusumik ilerasuuteqanngillat. Kisianni arlaannattaluunniit Guutip maligassiai maleqqissaarsinnaanngilai pissutigalugu ’tamatta ajortulioratta Guutimi nersornaammik ajorsarluta’. (Rûmamiut 3:23) Aammattaq neriuuteqanngissutip ’marulluanut’ kiviartortitaaneq ajornanngitsuararsuuvoq isumaqarlunilu Guutip naakkinnissusianik iluaqutiginninnissamut ajukkunnartuulluni. Paulusip ajortulioqqajaanini eqqarsaatigeqqissaaramiuk oqarpoq: ’Uanga inukuluusunga kia timimit matumannga toqup pianit annaatissavaanga?’ Apeqqut oqaatsinik ukunannga nammineq akivaa: ’Guuti qujanarsili Jesus Kristusikkut Naalakkatsigut.’ — Rûmamiut 7:24, 25

Pinngortitsisup naapertuilluartup ajortiliusut soqutiginissaanut suna aalajangiisuua? (Tussiaat 5:5) Malugiuk Paulus allammat: ’Guuti qujanarsili Jesus Kristusikkut Naalakkatsigut!’ Alla Guutip naakkinnittuuneranik iluaqutiginnissimasoq allappoq: ’Ajortuliortoqaraluarpallu Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat, uaguinnaanngitsummi silarsuarmiuttaaq tamarmik.’ — 1 Juánase 2:1, 2.

Sooq Jesus Kristus ’Ataatami illersuisumik’ taaneqarpa? Jesus ajortinut ’pilliut ajortaaruteqqussutaasoq’ qanoq isumaqarpa?

Sooq ikiorti pisariaqarpa?

Jesusip nunamukassutigaa ’inuunini akissatut tunniussallugu amerlasuut utertinneqaatissaannik.’ (Matîuse 20:28) ’Utertinneqaatissaq’ tassaavoq inummik arlaannilluunniit aniguisitsinermi imaluunniit utertitsinermi akiliut. Hebriiarit oqaasiat ’utertinneqaatissamik’ nutserneqartoq, ajortimik matoorisussamik imaluunniit ajortimut saammaassissutissamut atorneqartarpoq. (Tussiaat 78:38) Oqaatsip griikerisoornera assersuutigalugu Matîuse  20:28-mi atorneqartoq sorsunnermi tigusanik akiliutitut utertitsissutitulluunniit inussianillu inussiaajunnaartitsissutitut immikkut atorneqartarpoq. Najoqqutarisaq tassaavoq suulluunniit nalinganik akiliilluni taarsiineq naapertuilluarnerup piumasaqaataa naammassiniarlugu.

Inuit siulliit Guutimut pikititsinerat pissutaalluni inuiaat inussiaalerput. Soorlu 1 Moses kapitali 3-mi ersertoq, inuk naammalluinnartoq Adam, piaaraluni Jehova Guutimut naalanngilaq. Taamaalilluni tunissut inuuneq naammalluinnartoq annaavaa imminullu kinguaassanilu suli inunngorsimanngitsut ajortimut toqumullu inussiaalersillugit. — Rûmamiut 5:12, 18, 19; 7:14.

Israelitoqqami Guutip aalajangerpaa inuit ajortaasa saammaannartitsissutissaattut matoorneqaatissaatullu uumasut assigiinngitsut pilliutigineqassasut. (3 Moses 1:4; 4:20, 35) Uummasup pilliutaasup uumassutaa ajortillip inuuneranut assersuutaasumik taartaavoq. (3 Moses 17:11) Taamaalilluni“ulloq saammaannartitsivik“ aammattaaq ’ullormik utertitaaffimmik’ taaneqarsinnaavoq. — 3 Moses 23:26-28.

Uumasut inunnit nalikinnerummata ’ussigit savaasallu aavisa ajortit piiarneq saperluinnarpaat’. (Eprîarit 10:1-4) Taamaallat pilliutip ataatsip Adamip annaasaata naleqataata ajortit naassaanngitsumik saammaannarsitsisinnaavai imaluunniit peersissinnaavai. Naapertuilluassuseq malinneqassappat inuk naammalluinnartoq (Jesus) inummut allamut naammalluinnartumut (Adamimut) naligitinneqartariaqarpoq. Adamip kinguaavi nagguimminnit inussiaataanermut tunisaasimanerannit allap nalikinnerusup akiliilluni utertissinnaanngilai. Naapertuilluarnerup piumasaqaataa naammassissaaq „inuuneq inuunermik“ akilerneqarpat. — 2 Moses 21:23-25.

Adam ajortuliormat toqumullu eqqartuunneqarluni, kinguaassai suli inunngorsimanngitsut timaaniipput taamaattumillu toquqatigalugu. Inuup naammalluinnartup Jesusip, „Adamip kingulliup“, kajumilluni ilaqutsiulinngilaq. (1 Korintumiut 15:45) Inuunini naammalluinnartoq pilliutigigamiuk kinguaassaa timaaniippoq. Ilaatigut oqaatigineqarsinnaavoq kinguaariit inunngorsinnaasimagaluartut toqoqatigigaat. Jesusip silarsuarmi qitornartaarsinnaanerminut periarfissani atunngilaa, taarsiulluguli Adamip kinguaavi ajortillit toqujartortut qitornarsiartaarai. Inuunermi naammaalluinnartup pilliutigineratigut Jesusip inuiaat silarsuarmiut tamaasa, Adamip kinguaavi tamaasa utertippai, taakkulu periarfissillugit tassunga kinguaanngornissaannut, taanna ’naassaanngitsumik Ataatagissavaat’ . — Jesaja 9:6, 7.

Jesusip ajortit matoorneqaatissaanik pilliutaata inunnut naalattunut ajornarunnaarsippaa Guutip naakkinnissusianik iluaqutiginnillutik inuunermik naassaanngitsumik angusaqarnissat. Tassunga atasumik apustili Paulus allappoq: ’Ajortip akissarsiarititaa tassa toqu, Guutilli saammaannermit tunissutaa tassa inuuneq naassaanngitsoq Kristus Jesusimi Naalakkatsinni. (Rûmamiut 6:23) Pissusissamisoortumik qisuariarnerput unaavoq, Jehova imminut ernerminullu asangaakkaminut akisusimaqisumik asannissutsimigut naakkinnissutsimigullu utertitsissummik pilersitsisoq unnersiutigissallugu. (Juánase 3:16) Jesusillu assortugassaanngitsumik uppernarsarpaa ’Ataatamini ikiortitut’ qilammi inuunermut makititaalluni utertitsissutitullu pilliutimi nalinga Guutimut sassaallugu. * (Eprîarit 9:11, 12, 24; 1 Pîtruse 3:18) Qanorli ililluni Jesus ullumikkut qilammi uatsinnut ikiortaava?

[Quppernerup ataani ilanngussaq]

^ imm. 12 Takuuk kapitali 4 aamma 7 atuakkami Ilisarsineq inuunermut naassaanngitsumut sammisoq-mi, Jehovap Nalunaajaasuisa naqitigaanni.

[Qupp. 4-mi assiliartaq]

Jesusip inuttut inuunera naammalluinnartoq tassaalerpoq Adamip kiguaavinut utertitsissut