Jehovap nukinga pissaangaartoq

’Piginnaanera angingaarmat, nukingalu pissaangaarmat, maqaasinartoqanngillat.’ — JESAJA 40:26.

1, 2. (a) Nukissiorfissuaq suna tamatta pinngitsoorsinnaanngilarput? (b) Nassuiaruk sooq Jehova nukiit tamarmik pilerfituarigaat.

NUKIK ilarpassuatta taamaattussaannaasoraat. Assersuutigalugu kallerup innera qaamanermik kiammillu pilersuisoq, imaluunniit atortorissaarutit kallerup innitortut qanoq atoriaannaatiginerat eqqarsaatigivallaartanngilarput. Aatsaat kallerup inneerukkaangat eqqaasinneqartarpugut illoqarfiit kallerup inneqaratik unittuungajassinnaasut. Kallerup innerata atortakkatta annersaa toqqaannaanngikkaluamik nunarsuup nukissiorfianit tatiginarnerpaameerpoq — seqinermit. * Sekundit tamaasa nukissiorfissuup seqernup atomimik nukissiuutit tonsit 5 millionit ikuallatsittarpai nunarsuarlu inuunartumik seqinertarisarlugu.

² Seqernup nukii sumit pilerfeqarpat? Kia nukissiorfissuaq qilammiittoq tamanna pinngortissimavaa? Jehova Guutip. Tussiaat 74:16-imilu taanna pillugu allassimavoq: „Seqineq qaammallu inissippatit.“ Aap, Jehova nukiit tamarmik pilerfituaraat, soorluttaaq inuunerup pilerfigigaa. (Tussiaat 36:10) Pissaanera taamaattussaannaasorinngisaannassavarput. Pruffiiti Esajas aqqutigalugu Jehovap kajumissaarpaatigut seqineq, qaammat ullorissallu qiviaqqullugit eqqarsaatigeqqullugulu qanoq pinngortitaasut. „Qilaap tungaanut qiviaritsi, takussagissilu: Kia ullorissat pinngortippai? [Jehovap] kisittarpai sakkutoorpassuartut sorsukkiartortitassamisut, tamaasa immikkut atiisigut taasarlugit. Silatungaarlunilu pissaaneqangaarami ataasiinnarmilluunniit minitaqarsimanngilaq.“ — Jesaja 40:26; Jeremia 32:17.

3. Guutip pissaanerminik takutitsinera qanoq iluaqutigisinnaavarput?

³ Jehova taama pissaaneqartigimmat tatigisinnaavarput seqernup qaamanermik nukimmillu inuunitsinni pinngitsoorsinnaanngisatsinnik pilersortuassagaatigut. Timikkulli pisariaqartitavut tunngaviusut matussutissiinnarnagit Guutip pissaanera pinngitsoorsinnaanngilarput. Ajortimit toqumillu utertinneqarnissarput, siunissamut neriuuterput Jehovamullu tatiginninnerput taassumalu nukia pissaaneralu imminnut attuumassuteqarluinnarput. (Tussiaat 28:6-9; Jesaja 50:2) Biibilimi assersuutissarpassuaqarpoq Jehova pinngortitsinermut aniguisitsinermullu, innuttaminik annaassinermut akeqqaminillu suujunnaarsitsinermut, pissaaneqartoq.

Pinngortitarsuaq Guutip pissaaneranik nalunaajaavoq

4. (a) David unnuakkut qilak isiginnaaraangamiuk sumik paasisaqartarpa? (b) Ulloriarpassuit Guutip pissaanera pillugu sumik paasitippaatigut?

⁴ Apustili Paulus nassuiaavoq Pinngortitsisup  ’pissaanera ittuinnartoq . . . suliaanit paasinartoq’. (Rûmamiut 1:20) Ukiut hundredelikkuutaat tamatuma siorna tussiaasiortup Davidip savanik paarsisutut unnuakkut qilak isiginnaarajussimassagamiuk paasisimavaa silarsuaq qanoq tupinnartigisoq Pinngortitsisorlu qanoq pissaaneqartigisoq. Ima allappoq: „Takugaangakkit qilak pigisat, assappit pinngortitaat, qaammallu ullorissallu tassani ivertitatit — taava inuk suummat eqqaasarpiuk? Inuup qitornaa suummat isumagisarpiuk?“ (Tussiaat 8:4, 5) Ullorissat pillugit paasisakikkaluarluni Davidip paasivaa silarsuarmik Pinngortitsisumut naleqqiulluni pingaaruteqarpallaarnani. Ullumikkut ulloriarsiortut silarsuup isorartungaarneranik pissaanermillu allanngujuitsumik paasisimasaqangaarput. Assersuutigalugu paasissutissiipput seqineq sekundit tamaasa trotylip 100.000 millionit megatonsit qaartoorneranut assingusunik nukiliortartoq. * Nukiup tamatuma ilaminiinnanngua nunarsuarmut annguttarpoq, tamannali nunarsuarmi inuuginnartoqarsinnaaneranut naammappoq. Seqinerli tassaanngilaq silarsuarmi tamarmi ullorissat sakkortunersaat. Ullorissat ilaat sekundi ataasiinnaq seqernup ulloq tamaat nukiliorneratut nukiliortarput. Tamatuma paasitippaatigut ullorissanik Pinngortitsisup qanoq pissaaneqartigineranik! Elihu eqqortumik oqarsimavoq: „Ajugaqanngitsoq paasisinnaanngilarput. Pissarsuuvoq.“ — Job 37:23.

5. Jehovap pinngortitaani pissaaneranik suna nalunaajaataava?

⁵ Daviditut ’Guutip suliarisai eqqarsaatigeqqissaarutsigik’ sumi tamaani pissaaneranut ersiutit takussavavut — anorimi malinnilu, kallerni kallerullu innerani, kuussuarni qaqqarsuarnilu alutornangaartuni. (Tussiaat 111:2; Job 26:12-14) Jehovap Job paasitippaa uummasuttaaq pissaanera nalunaajaatigigaat. Taakkua ilagaat Behemot imaluunniit imermiutarsuaq. Jehovap Job oqarfigaa: „Malugikkit makisiata nukissui . . . avatai saviminertut ulamertutut [ipput].“ (Job 40:10-13) Aamma ussigit nujuartat nukeqangaaramik ersinartut Biibilip nalaani ilisimaneqarput, Davidilu qinuvoq: „Annaannga løvet qarninit, ussigit nujuartat nassuinit!“ — Tussiaat 22:22; Job 39:12-14.

6. Biibilimi ussik sumut assersuutaava, aamma sooq? (Quppernerup ataani ilanngussaq takuuk.)

⁶ Nukini pissutigalugit ussik Biibilimi Jehovap pissaaneranut  assersuunneqarpoq. * Apustili Johannesip Jehovap issiavissaarsuanik takorruukkami uumasut sisamat, kerubit, takuai, taakkualu ilaat ussittut anguteralattut niaqoqarpoq. (sarĸúmersitat 4:6, 7) Kerubip taassuma nukik imaluunniit pissaaneq, Jehovap pissusiisa pingaarnerit sisamaasut ilaannut, assersuutaagunarpoq. Pissusii allat tassaapput asanninneq, ilisimassuseq naapertuilluarnerlu. Pissaaneq Guutip kinaassusianut taama pingaaruteqartigimmat, nukimminik pissaanermilluunniit atuineranik paasisaqarnerugutta taassumunnga qaninnerulissaagut. Tamatuma aamma malinniarnissaanut ikiussavaatigut nukitta pissaanittaluunniit pitsaanerpaamik atornissaanut. — Evfisumiut 5:1.

„Katersaarsuit [Jehovaat], Israelip Pissaasua“

7. Qanoq qulakkeersinnaavarput ajunngitsoq ajortumut ajugaajumaartoq?

⁷ Biibilimi Jehova „Guuti ajugaqanngitsoq“-mik taaneqarpoq, taaguutillu tamatuma eqqaasippaatigut pissaanera suusupagissanngikkipput akeqqaminullu ajugaasinnaanera qularisariaqarnagu. (1 Moses 17:1; 2 Moses 6:3) Satanip aaqqissuussinera ajortoq qajannaappasikkaluarpoq, Jehovalli isaani inuiaat ’kuseriarnertut ipput, qiviutut oqimaalutaavimmiittutut naatsorsuutassaallutik’. (Jesaja 40:15) Guutip pissaaneqarnerata qularunnaarsippaatigut ajunngitsoq ajortumut ajugaajumaartoq. Nunarsuarmi piffissami ajussuseqangaartumi tuppallersaatigisinnaavarput „katersaarsuit [Jehovaata], Israelip Pissaasuata“ ajussuseq tamaat naassaanngitsumut  suujunnaarsissagaa. — Jesaja 1:24; Tussiaat 37:9, 10.

8. Katersaarsuit qilammiusut kikkut Jehovap naalakkersugarai, taakkualu pissaaneqarnerat pillugu qanoq ilisimasaqarpugut?

⁸ Oqariaaseq „katersaarsuit [Jehovaat]“ Biibilimi 285-eriarlugit atorneqartut Guutip pissaaneranik eqqaasitsipput. ’Katersaarsuit’ tassaapput pinngortitarpassuit anersaajusut imaluunniit inngilerpassuit taassuma naalakkersugai. (Tussiaat 103:20, 21; 148:2) Unnuami ataasiinnarmi inngilit taakkua ilaata Assyriamiut sakkutuui 185.000-t Jerusalemimut saassussilersut toqorarpai. (2 Kunngit 19:35) Jehovap katersaarsui qilammiittut qanoq pissaaneqartigisut paasigutsigu, assortuisut annilaarutigissanngilagut. Assersuutigalugu pruffiiti Elisap sakkutoorpassuit tigusariniarluni ungugaluarmanni soqutiginngilaa. Ikiortimi takusinnaanngisai Elisap uppernerup isaanik katersaarsuit qilammiusut tapersersoraanni ’takusinnaavaa’. — 2 Kunngit 6:15-17.

9. Sooq Jesusitut pissutissaqarluarpugut Guutip illersuinissaa tatigissallugu?

⁹ Jesusittaaq nalunngilaa Naatsiivimmi  Getsemanemi inuppassuit panalisartut unataasisartullu tikimmanni inngilinit ikiorneqarsinnaalluni. Jesusip Peterip panaa inaanut manngoqqugamiuk eqqaavaa pisariaqarpat Ataatani qinnuigisinnaallugu ’inngilinik aqqaneq-marlunnik legionilinnit amerlanerusunik’ aallartitsivigeqqulluni. (Matîuse 26:47, 52, 53) Taamatulli takorloorsinnaatigigutsigu katersaarsuit qilammiittut Guutip naalakkersugai qanoq pissaaneqartigisut, tatigilluinnarsinnaavarputtaaq Guutip ikiorlutalu tapersersorumaaraatigut. Apustili Paulus allappoq: ’Tamanna pillugu qanormi taava oqassaagut? Guuti ilagigutsigu kia assortussavaatigut?’ — Rûmamiut 8:31.

10. Kikkut iluaqutissaannut Jehovap pissaanini atortarpaa?

¹⁰ Taamaattumik pissutissaqarluarpugut Jehovap illersuinissaanik tatiginninnissatsinnut. Pissaanini nukinilu siunertamut ajunngitsumut pissutsini allat — naapertuilluarneq, ilisimassuseq asanninnerlu — naapertorlugit atortuaannarpai. (Job 37:23; Jeremia 10:12) Inuit oqartussaassuseqartut piitsut nikanarnerusullu iluaqutissarsiffigisinnaasatik asissorajuttarpaat, Jehovalli ’nikanartoq pujualanit makitittarpaa’ ’annaassinissamullu piginnaaneqangaarluni’. (Tussiaat 113:5-7; Jesaja 63:1) Jesusip arnaata Mariap maniguuttup anneruniajuitsullu paasivaa ’Sapinngitsup’ pissaanini namminissarsiornani mianerinnitsimi iluaqutissaannut atortaraa. Makitasuut makitanaveersartarpai nikanartullu akitsisittarlugit. — Lúkarse 1:46-53.

Jehovap pissaanini kiffaminut saqqummiuttarpaa

11. Ukiumi 1513-imi u.n.s. Israelikkut Guutip pissaaneranut nalunaajaataasunik sunik takusaqarnikuuppat?

¹¹ Jehovap arlaleriarluni kiffaminut pissaanini saqqummiuttarsimavaa piffinni arlalinni, ilaatigut Sinajip Qaqqaani 1513-imi u.n.s. Ukiup tamatuma ingerlanerani Israelikkut Guutip pissaaneranut nalunaajaataasunik tupinnartunik arlalinnik takoreersimapput. Perluit qulit aseruisut takutissimavaat Jehovap assaa pissaaneqangaartoq Egyptenimiullu guutiisa iliuuseqarsinnaannginnerat. Tamatuma kinguninnguatigut Guutip pissaanera erserpoq Israelikkut tupinnartuliornikkut Imaq Aappalaartoq ikaarmassuk Faraollu sakkutuui piuneerussaammata. Qaammatit pingasut qaangiummata Sinajip Qaqqaata ataani Jehovap Israelikkut kajumissaarpai ’inuiaqatigiinnit tamanit immikkoortillugit imminut pigisassanngoqqullugit’. Israelikkullu neriorsuipput ’[Jehovap] oqaasii tamaasa malillugit iliorumallutik’. (2 Moses 19:5, 8) Taava Jehovap pissaanini erseqqarissumik takutippaa. Sinajip Qaqqaa pujorpoq sajullunilu, kallilerporlu innaallattalerlunilu sulluartaassuullu nipersua tutsiulluni. Israelikkut ungasiartumi ittut annilaaqaat. Mosesip oqarfigai tamatuma Guutimik mianerinninnermik, Ajugaqanngitsumut, Guutimut ilumoortutuamut Jehovamut naalakkusulersitsisumik, ilinniartissagaatik. — 2 Moses 19:16-19; 20:18-20.

12, 13. Suna pillugu Elias suliassaminit qimaava, qanorlu illuni Jehovamit nakussatsinneqarpa?

¹² Ukiut hundredelikkuutaat tamatuma kingorna Eliasip nalaani, Jehovap aamma Sinajip Qaqqaani pissaanini takuteqqippaa. Pruffiitip takoreersimavaa Guutip pissaanerata sunniuteqarsinnaanera. Ukiut pingasut affarlu Guutip ’qilak matusimavaa’ Israelikkut tunussisimanerat pissutigalugu. (2 Israelikkut 7:13) Panernersuaqarnerup nalaani kuunnguup Kritip saniani tulukkat Elias nerisassaanik isumagisarpaat, kingusinnerusukkullu uillarnerup qajuusaatimininngui uuliaatimininngualu  tupinnartuliornikkut nungutsaalineqarput Elias nerisinnaaniassammat. Jehovap allaat Elias pissaaneqartippaa uillarnerup erneranik makititsinissaanut. Kiisalu Karmelip Qaqqaani pissaaneqarneqqissaarnermi ilungersornartumi qilammit innermik nakkartoqarpoq Eliasillu pilliutissaa ikuallanneqarluni. (1 Kunngit 17:4-24; 18:36-40) Taamaattorli tamatuma kinguninnguatigut Elias annilaangalerlunilu nikallorpoq Jesabelip toqunniarluni sioorasaarmani. (1 Kunngit 19:1-4) Nunamit qimaavoq isumaqarami pruffiititut suliassani naammassisoq. Eqqissisarniarlugu nakussatsinniarlugulu Jehovap asannilluni pissaanerminik takutitsivigaa.

¹³ Elias qaarusummi toqqorsimatilluni Jehovap pissaaneqarfigisaminik mianernangaartumik takutitsinera takuaa: anorersuarmik, nunap sajunneranik naggataatigullu innermik. Jehovalli tamatuma kingorna Elias oqaluffigigamiuk ’anoraannguup siorsulaarneratut’ nipeqaannarpoq. Suliasseqqippaa oqaluttuullugulu suli nunamiittoqartoq aalajaatsunik 7000-inik Jehovamik pallorfiginnittunik. (1 Kunngit 19:9-18) Uagut Eliasitut ilaannikkut oqaluussinitsinni angusaqarpallaarnata nikallorutta, Jehova qinnuigisinnaavarput ’pissaanermik angingaartumik’ nakussatseqqulluta — taamaalilluta nutaarsiassamik nuannersumik oqaluussissutiginnittuaannarsinnaaqqulluta. — 2 Korintumiut 4:7.

Jehovap pissaanera neriorsuutaasa piviusunngornissaannut qulakkeerutaavoq

14. Ateq Jehova qanoq isumaqarpa, pissaaneralu qanoq aqqanut attuumassuteqarpa?

¹⁴ Jehovap pissaanera aamma aqqanut piumasaminillu naammassinninnissaanut attuumassuteqarluinnarpoq. Atip asseqanngitsup Jehovap ’Pilersitsivoq’-mik isumaqartup takutippaa imminut neriorsuutiminik piviusunngortitsisunngortittoq. Guuti siunertaminik piviusunngortitsiniarnermini kimmilluunniit sumilluunniillu akornuserneqarsinnaanngilaq, naak qulartut upperiuminaatsissinnaagaluaraat. Soorlu Jesusip ilaanni apustilini oqarfigigai: ’Guutimi ajornartoqanngilaq.’ — Matîuse 19:26.

15. Abraham Saralu qanoq ilillutik eqqaasinneqarpat Jehovamut ajornartoqanngitsoq?

¹⁵ Assersuutigalugu Jehovap Abraham Saralu neriorsorpai kinguaassaat inuiassuanngortikkumaarlugit. Ukiorpassuilli Abraham Saralu meeraqarsimanngillat. Jehovap inngili aqqutigalugu oqarfigimmagit neriorsuut qanittukkut piviusunngussasoq tamarmik utoqqalisimapput. Tamanna pillugu Sara illarpoq, inngilili akivoq: „[Jehovamut] ajornartoqanngilaq!“ (1 Moses 12:1-3; 17:4-8; 18:10-14) Ukiut 400-t qaangiummata Mosesip Moabip narsaataani Abrahamip kinguaavi inuiassuanngorsimasut katersortikkamigit eqqaasippai Guutip neriorsuutini piviusunngortissimagaa. Moses ima oqarpoq: „[Jehovap] siuaasasi asagamigit taakkualu kinguaavi qinigarigamigit nammineq Egyptenimit aniguisippai pissaanersuani atorlugu. Ilissi pillusi qimaatikkumaarpai inuiaat ilissinnit pissaaneqarnerusut amerlanerusullu, isertikkumallusi nunagisassassinnut nunalu taanna ilissinnut pigisassanngortikkumallugu, soorlu taamatut pisoqareersimasoq.“ — 5 Moses 4:37, 38.

16. Saddukæerit sooq toqusut makinnissaat upperinngilaat?

¹⁶ Ukiut hundredellit tamatuma kingorna Jesusip saddukæerit makiffissaqannginneraasut avoqqaarai. Sooq Guutip toqusunik makititsinissaminik neriorsuutaa upperinngilaat?  Jesusip oqarfigai: ’Allakkat nalugassigik Guutillu pissaanera nalullugu.’ (Matîuse 22:29) Allakkani imaluunniit Biibilimi neriorsoqqissaarneqarpugut ’iliverniittut tamarmik Inuup Ernerata nipaa tusarumaaraat; anillutillu makissasut’. (Juánase 5:27-29) Biibilimi makinnissaq pillugu qanoq allassimasoqartoq nalunngikkutsigu, Guutip pissaaneranut tatiginninnerup qularunnaarsissavaatigut toqusut ilumut makitinneqarumaartut. Guutip „toqu nungutissavaa piujunnarsivillugu. . . . Taamaapput [Jehovap] oqaasii“. — Jesaja 25:8.

17. Qaqugu Jehovamut tatiginninnerput immikkut ittoq pisariaqarluinnassava?

¹⁷ Qanittukkut tamatta takutittariaqarparput Guutip annaassisinnaanermut pissaaneqarnera immikkut ittumik tatigigipput. Satan Diaavulup Guutip innuttai illersorneqarsorinanngitsut saassutissavai. (Hesekiel 38:14-16) Taava iluaqutissatsinnik Guutip pissaanersuani takutissavaa, tamarmillu ilisimassavaat tassaasoq Jehova. (Hesekiel 38:21-23) Maannakkut Guutimut Ajugaqanngitsumut uppernerput tatiginninnerpullu ineriartortittariaqarparput, piffissami pingaartumi tamatumani aalajaanniassagatta.

18. (a) Qanoq ililluta Jehovap pissaaneranik eqqarsaatiginninnerput iluaqutigissavarput? (b) Apeqqut suna allaaserisap tulliani sammineqassava?

¹⁸ Aap, Jehovap pissaanerata eqqarsaatiginissaanut pissutissarpassuaqarpoq. Eqqarsaatigigutsigu qanoq iliorsimasoq, maniguulluta kajumissaarneqarlutalu misigisarpugut Pinngortitsisorsuatta unnersiutiginissaanut qutsaviginissaanullu pissaanini taama pitsaatigisumik asannitsigisumillu atortarmagu. Katersaarsuit Jehovaat tatigigutsigu annilaartinneqarnavianngilagut. Neriorsuutai upperilluinnassavavut. Eqqaamasariaqarparpulli Guuti assilillugu pinngortitaasugut. Taamaattumik uaguttaaq pissaaneqarpugut — killilimmilli. Qanoq ililluta pissaanitta atornerani Pinngortitsisoq ilaarsinnaavarput? Tamanna allaaserisap tulliani misissussavarput. (wE 1/3 2000)

[Quppernerup ataani ilanngussaq]

Apeqqutit makku akisinnaavigit?

• Pinngortitat qanoq ilillutik Jehovap pissaaneranik nalunaajaappat?

• Katersaarsuit kikkut Jehovap innuttaminut tapersersuitissinnaavai?

• Pissutsinik Jehovap pissaanerminik takutitsiffigisaasa ilaannik taasaqarit.

• Jehovap neriorsuutiminik piviusunngortitsinissaanut suna qulakkeerutaava?

[Atuaqqissaarnermi apeqqutit]

[Qupp. 18-mi assiliartaq]

„Qilaap tungaanut qiviaritsi, takussagissilu: Kia ullorissat pinngortippai?“

[Suminngaanneernera]

Foto: Malin, © IAC/RGO 1991

[Qupp. 21-mi assiliartaq]

Jehovap neriorsuutaanut upperneq ineriartortissinnaavarput eqqarsaatigigutsigu qanoq ililluni pissaanini takutissimagaa