Imarisai

Imarisai

’Jehova ornissiuk pissarsuummat’

’Jehova ornissiuk pissarsuummat’

 Jehova ornissiuk pissarsuummat’

„[Jehovammi] nunarsuarmiittut tamaasa takusinnaavai, uummatimikkut iluunngarlutik imminik tunaarinnittut pissaanermigut ikiorsinnaallugit.“ — 2 ISRAELIKKUT 16:9.

1. Pissaaneq sunaava, inuillu pissaanertik qanoq atortarsimavaat?

OQAASEQ pissaaneq arlalinnik isumaqarsinnaavoq. Qinerlerfissiaq naapertorlugu oqaaseq pissaaneq atorneqartarpoq ’pissutsit timikkut nukeqangaarneq, sakkutooqarnikkut imaluunniit allatigut pissaaneqarneq, anersaakkulluunniit pissaaneqarneruneq pissutigalugu . . . piumasamik iliorsinnaatitsisut, allanik peqqusisinnaatitsisut, naalakkiisinnaatitsisut imaluunniit annertuumik sunniuteqarsinnaatitsisut’ pillugit. Inuit pissaanerminnik atuillaqqippallaanngillat. Oqaluttuarisaanermik ilisimatooq lord Acton politikerit pissaaneqarnerat pillugu oqarsimavoq: „Pissaaneqarneq innarliigajuttarpoq, killeqanngitsumillu pissaaneqarneq innarliilluinnartarluni.“ Ullumikkut oqaluttuarisaanerup takutilluarpaa lord Actonip oqaasiisa ilumoorluinnarnerat. Ukiut 1900-kkut ingerlaneranni aatsaat taama ingasatsigisumik ’inuit ilaat inoqatiminnut ajoqutaasumik pissaaneqarpallaalersimapput’. (Nalunaajaasup oqaasii 8:9) Kisermaassillutik naalakkersuisut ileqqorluttut pissaanertik atornerlungaarsimavaat inuillu millionilikkuutaat toqullugit. Pissaaneq asanninnermik, ilisimassutsimik naapertuilluarnermillu oqimaaqatigiissinneqanngikkaangata navianangaartarpoq.

2. Nassuiaruk Jehovap pissusii allat pissannerminik atuineranut sunniuteqartartut.

2 Inunnit amerlasuunit allaanerulluni Guutip tamatigut pissaanini ajunngitsumut atortarpaa. „[Jehovammi] nunarsuarmiittut tamaasa takusinnaavai, uummatimikkut iluunngarlutik imminik tunaarinnittut pissaanermigut ikiorsinnaallugit. Tamatumuunali silatusaarsimanngilatit; maannamiit sorsuttualissaatit.“ (2 Israelikkut 16:9) Jehova pissaaneqarnini naalakkersimaartarpaa. Kamagittarnerata utaqqisinnaassuseqartippaa guutiitsut suujunnaarsinnissaannut allamik isumataarnissaannut periarfissillugit. Asanninnerata seqineq inunnut tamanut — naapertuilluartunut naapertuilluanngitsunullu — seqinertittarpaa. Naapertuilluartuunerata naggataatigut pissaanerminik killeqanngitsumik atuisissavaa ’toqumik pissaatilik sapersisissagamiuk, tamassa Diaavulu’. — Matîuse 5:44, 45; Eprîarit 2:14; 2 Pîtruse 3:9.

3. Sooq Guutip pissaanerata killeqanngitsup pissutissaqartippaatigut taassumunnga tatiginninnissatsinnut?

3 Ataatatta qilammiusup pissaanerata ataqqinangaartup neriorsuutaanut illersuineranullu isumalluarnissatsinnut tatiginninnissatsinnullu pissutissaqartilerpaatigut. Meeraaraq takornartat akornanniilluni ataatani tasioruniuk toqqissisimasarpoq, meeqqammi nalunngilaa ataatami ajortunut tamanut illersussagaani. Tamatumunnga assingusumik Ataatatta qilammiusup annaassinissamut piginnaaneqangaartup ataavartumik  ajoquserneqarnissatsinnut illersussavaatigut saqeqatigigutsinni. (Jesaja 63:1; Mika 6:8) Ataataalluartutulli Jehovap neriorsuutini tamatigut eqquutitittarpai. Pissaanerata killeqanngitsup uppernarsarpaa ’oqaasiata suliareqqusai suliarissagai naammasseqqusaalu naammassissallugit’. — Jesaja 55:11; Títuse 1:2.

4, 5. (a) Kunngi Asap Jehova tatigilluinnaramiuk qanoq ingerlava? (b) Ajornartorsiutitsinnut inuit aaqqiissutissaatitaat tatigigutsigik qanoq pisoqarsinnaava?

4 Sooq taama pingaaruteqartigaa Ataatatta qilammiusup illersuisinnaanerata eqqaamajuarnissaa? Atukkatta artornartut puigortissinnaammatigut sumi piviusumik illersorneqarsinnaasugut. Assersuutigalugu kunngi Asamut Jehovamik tatiginnissimagaluartumut taama pisoqarsimavoq. Asa kunngiutillugu Juda Etiopiamiut sakkutuuinit 1 millioninit saassunneqarpoq. Asap akeqqat sakkutooqarnikkut pissaaneqarnerunerat takusinnaagamiuk ima qinuvoq: „[Jehova], ikiorumassagutsigut assigiippoq ikittunnguugaluarutta amerlagaluaruttaluunniit. [Jehova] Guuterput, ikiortigut illit tassaagavit tunaarisarput, illillu atikkut uku sakkutoorpassuit pissarsuit sorsuffiginialeratsigit. [Jehova], illit Guutigaatsigit. Takutiguk inoqanngimmat ilinnik sapersisitsisinnaasumik!“ (2 Israelikkut 14:11) Jehova Asap qinnutaanut tusarnaarpoq saassussinermilu ajugaatillugu.

5 Asap ukiorpassuit aalajaalluni kiffartorsimagaluarluni Jehovap pissaanerata annaassisinnaanera tatigiunnaarpaa. Inuiaqatigiit Israelikkut avannaamiut sakkutooqarnikkut sioorasaarinerat pinngitsoortinniarlugu Aramimut ikiortissarsiorpoq. (2 Israelikkut 16:1-3) Aramæerit kunngiat Ben-Hadad peqquserluttuliorluni akilermagu Israel Judamut sioorasaariunnaarpoq, tamatumali aamma takutippaa Asa Jehovamut tatiginnippallaanngitsoq. Pruffiiti Hananip sukannersumik aperaa: „Etiopiamiut Libyamiullu sakkutoorpassuunnginnerpat, qamutinik sorsuuterpassuaqarlutik sorsuttartorpassuaqarlutillu qamutiniittussanik? Kisianni taamani [Jehova] tatigigakku ilinnut tigusaritippai.“ (2 Israelikkut 16:7, 8) Asap avoqqaarinninneq tamanna tusarumanngilaa. (2 Israelikkut 16:9-12) Ajornartorsiuteqaleraangatta Guutimut tatiginninnermut taarsiullugu aaqqiissutissat inuit pilersitaat tatigisariaqanngilavut. Inuit pissaaneqarnerannik tatiginninneq pakatsinaannartarpoq. — Tussiaat 146:3-5.

Jehovap nakussatsitsinissaa noqqaassutigiuk

6. Sooq ’Jehova pissarsuusoq ornittariaqarparput’?

6 Jehovap kiffani illersuinnartanngilai, aammali nakussatsittarpai. Biibilip kajumissaarpaatigut ’Jehova orneqqullugu pissarsuummat’. (Tussiaat 105:4) Guutimit nakussatsinneqarluta iliuuseqaraangatta pissaanerput nukivullu allat iluaqutissaannut, ajoqutissaanuunngitsoq, atortariaqarpavut. Taamaaliornermigut Jesus Kristus maligassiuilluarnerpaavoq, ’Jehovap pissaaneratigut’  tupinnartuliarpassuaqarluni. (Lúkarse 5:17) Jesusip pisuunngornissaannaq tusaamasanngornissaannarlu imaluunniit kunngitut pissaaneqarnissaannaq ilungersuutigisimasinnaagaluarpaa. (Lúkarse 4:5-7) Akerlianilli Guutimit pissaaneqartitaanini ilinniartitsinermut, ikiuinermut ajorunnaarsitsinermullu atortarpaa. (Mákorse 7:37; Juánase 7:46) Taamaalilluni uatsinnut maligassaalluarpoq.

7. Pissuseq pingaartoq suna ineriartortittarparput Guutip nakussatsitsinerata ikiuineratigut namminerlu nukivut pinnagit iliuuseqaraangatta?

7 ’Guutip nakussatsitsinera missiliorlugu’ iliuuseqartarutta maniguuttuarnissatsinnut iluaqutaassaaq. (1 Pîtruse 4:11) Inuit pissaaneqarnerorusuttuartut makitasuujugajupput. Assersuutigalugu taaneqarsinnaavoq Assyriamiut kunngiat Asarhaddon usorsitsaarluni ima oqartoq: „Nukittuvunga, nakuarujussuullunga, sapiitsuullunga, naalannartuullunga pissarsuullungalu.“ Tamatuma akerlianik Guutip ’silamiuni sanngiitsut qinerpai nakuusut pakatsisarumallugit’. Kristumiu ilumoortoq usorsitsaarumaguni Guuti usorsitsaatigisariaqarpaa, nalunnginnamiuk nammineq saperluni. ’Nikanartikkutta Guutip assai pissarsuit atangerlugit’ akitsisinneqassaagut. — 1 Korintumiut 1:26-31; 1 Pîtruse 5:6.

8. Jehovamit nakussatsinneqarumalluta pingaartumik qanoq iliortariaqarpugut?

8 Qanoq ililluta Guutimit nakussatsinneqarsinnaavugut? Siullermik pingaartumillu tamanna qinnutigisariaqarparput. Jesusip ajoqersukkani neriorsoqqissaarpai Ataatap imminut qinusut anersaamik illernartumik tuniumagai. (Lúkarse 11:10-13) Eqqarsaatigiuk Kristusip ajoqersugai qanoq ilillutik nakussatsinneqartut upperisarsiornikkut siuttut Jesus pillugu oqaluussiunnaaqqusisut naalakkumanagit Guuti naalakkumanerugamikku. Jehova ikioqqullutik qinnuigigamikku qinnutaat ilumoortut akineqarput, anersaallu illernartup ’Guutip oqaasianik siooranatik’ oqaluussiuarnissaannut nakussatsippai. — apustilit suliait 4:19, 20, 29-31, 33.

9. Anersaakkut nakussatsinnartoq alla eqqaajuk, tamatumalu sunniuteqarluarneranik assersuut Biibilimeersoq innersuussutigiuk.

9 Aappassaatut Biibili aqqutigalugu anersaakkut nakussatsinneqarsinnaavugut. (Eprîarit 4:12) Guutip oqaasiata pissaanera kunngi Josiasip nalaani erseqqissarneqarpoq. Judap kunngiata taassuma Guutimik nalusut guutipilui nunamit piiareersimavai, Jehovalli inatsisai naalaffimmi nassaarineqariataarmata nunamik minguiaarsuarnissaminut kajumississutigai. * Josiasip nammineerluni Inatsisit nipituumik inuiannut atuffassissutigereermagit, inuiaqatigiit tamarmik Jehova angerfigeqatigeqqippaat, guutipilussiortoqarunnaarnissaanik suliniarneq sukumiinerusoq aallarteqqinneqarluni. Josiasip iluarsaasseqqinneri kinguneqarluarput: „Josia inuutillugu [Israelikkut Jehova] siuaasamik Guutiat tununngilaat.“ — 2 Israelikkut 34:33.

10. Pingajussaatut qanoq Jehovamit nakussatsinneqarsinnaavugut, tamannalu sooq immikkut pingaaruteqarpa?

10 Pingajussaatut Jehovamit nakussatsinneqarsinnaavugut kristumioqativut katerisimaaqatigalugit. Paulusip kristumiut kajumissaarpai ataatsimiinnerni katerisimaaqatigeeqqullugit ’asanninnermut ajunngitsuliornermullu kajumissaaqatigeeqqullugit’. (Eprîarit 10:24, 25) Peter tupinnartuliornikkut parnaarussivimmit aniguisitaagami qatanngutini ilagerusukkamigit, Johannes Markusip anaanaata illuanukarpoq tassaniimmata ’ikinngitsut katisimasut qinusullu’. (apustilit suliait 12:12) Soorunami angerlarsimaannarlutik tamarmik immikkut qinusinnaasimagaluarput. Ullunili artornartuni  tamakkunani ataatsimoorusussimapput qinoqatigiillutillu kajumissaaqatigiinniarlutik. Paulus Romaliarnermini sivisuumi navianartorsiornartumilu apuutingajalerluni Puteolimi qatanngutit ilaat naapippai, kingusinnerusukkullu allattaaq parsiarpaat. Qanoq qisuariarpa? ’Taakku Paulusip takugamigit Guuti qutsavigaa tuppallerlunilu.’ (apustilit suliait 28:13-15) Uppeqatimi ataatsimooqatigeqqissinnaanerat nakussatsissutigaa. Uaguttaaq uppeqatitta ilaginissaat nakussatsissutigisinnaavarput. Katerisimaartarnitsinnut kiffaanngissuseqarallartilluta periarfissaqarallartillutalu aqqummi ameqisumi inuunartumukartumi kisimiinniartariaqanngilagut. — Ussatit 18:1; Matîuse 7:14.

11. Pissutsit ilaat ’pissaanermik angingaartumik’ immikkut pisariaqartitsiffivut taakkit.

11 Qinuneq, Guutip oqaasianik atuaqqissaarneq uppeqatitsinnillu katerisimaaqateqarneq ileqquliulluarutsigik ’Naalakkami nakuussusiatalu pissaaneqarnersuani nakussatsinneqarsinnaavugut’. (Evfisumiut 6:10) Qularutissaanngivippoq tamatta Jehovamit nakussatsinneqartariaqartugut. Ilaat nappaateqarput sanngiillisitsisunik, allat utoqqalinerup innarluuteqalersitsinera akiortariaqarpaat, allat aapparisimasat maqaasillugit inuusariaqarlutik. (Tussiaat 41:4) Allat aapparminnit uppinngitsumit assortorneqarnerminni naammagittartariaqarput. Angajoqqaanut, ingammik kisermaanut, ulloq naallugu suleruluutigaluni meeqqanik isumaginnittariaqarneq, qasunarsinnaavoq. Kristumiut inuusuttut ilagisartakkaminnit tatineqarnertik akiortuassagunikku ikiaroornartunut kanngunartuliornernullu naaggaasinnaassagunik nakussatsinneqartariaqarput. Tamatta nangaanata Jehova ’pissaanermik angingaartumik’ qinnuigisariaqarparput pissutsit ajornartorsiorfiusut taamaattut anigussagutsigik. — 2 Korintumiut 4:7.

„Qasusoq nakussatsittarpaa“

12. Jehovap qanoq ililluni kristumiutut kiffartornitsinni tapersersortarpaatigut?

12 Aammattaaq Jehovap kiffani kiffartuussineranni nakussatsittarpai. Esajasip siulittuutaani allassimavoq: „Qasusoq nakussatsittarpaa, nukillaangasoq pissatsittarpaa. . . . [Jehovamik] neriuffiginnittut nukineqqissapput, sulunissapput  nattoralittut. Arpassapput nukillaarnatik, ingerlassapput qasussanatik.“ (Jesaja 40:29-31) Apustili Paulus kiffartornissaminut nakussatsinneqartarpoq. Taamaattumik angusaqarluartarpoq. Kristumiut Thessalonikamiittut ima allaffigai: ’Iivangkiiliu pigisarput ilissinnut oqaasiinnalluni pinngimmat, pissaallunili anersaakkut illernartukkut pisarluni nakimajunnaarsitsilunilu.’ (1 Tásalûníkamiut 1:5) Oqaluussinerata ajoqersuineratalu inuit eqqortuliorusuttut inuunerat allanngortingaarsimavaat.

13. Jeremias assortorneqaraluarluni sumit nikallujuittuarnissaminut nakussatsinneqarpa?

13 Oqaluussinitsinni inuit soqutiginninngikkaangata nikallornarsinnaavoq. Immaqa ukiuni arlalinni oqaluussisimavugut soqutiginninnerusumik naammattoorsinata. Jeremiasittaaq assortorneqarneq, illaruaatiginninneq soqutiginninnginnerlu nikalluutigisimavai. „[Jehova] eqqaaqqissanngilara, aqqani oqaloqqinnianngilanga,“ imminut oqarfigaaq. Nipangersimasinnaanngilarli. Tusarliussaa ’iluani innertut ikumasutut ilerpoq, soorlu saarngi ikuallanneqartut’. (Jeremia 20:9) Akerlilersuinerujussuaq ajugaaffiginiarlugu sumit nakussatsinneqaqqippa? Allappoq: „[Jehovap] pissarsuartut ilagaanga.“ (Jeremia 20:11) Jeremiasip paasigamiuk tusarliussaq suliassanilu Guutimeersut qanoq pingaaruteqartigisut Jehovap kajumissaarutai tusarnaarpai.

Ajoqusiisinnaasoq katsorsaasinnaallunilu

14. (a) Oqaq qanoq pissaaneqartigaa? (b) Oqqap ajoqusiisinnaaneranut assersuutit ilaat eqqaakkit.

14 Pissaanerput tamakkerani toqqaannartumik Guutiminngaanneerpoq. Assersuutigalugu oqaq ajoqusiisinnaallunilu katsorsaasinnaavoq. „Oqaq inuunermut toqumullu naalagaavoq,“ Salomon mianersoqqusilluni allappoq. (Ussatit 18:21) Satanip Evamik oqaloqateqalaarnerata takutippaa oqaatsit qanoq ajunaarutaasinnaatigisut. (1 Moses 3:1-5; Jâko 3:5) Uaguttaaq oqatsinnik ajoqusiingaarsinnaavugut. Niviarsissap oqimaassusia isornartorsiorutsigu anoreksilertissinnaavarput (nappaatigalugu neriumannginneq). Eqqarsaatiginagu oqaatissuaaneq ingerlateqqikkutsigu ikinngutigiilluarneq aserorneqarsinnaavoq. Erseqqippoq oqarput naalakkersinnaasariaqaripput.

15. Oqaq atorlugu qanoq ililluta ineriartortitsisinnaallutalu katsorsaasinnaavugut?

15 Oqarli aamma ineriartuutaasinnaavoq. „Eqqarsariaqqaarnani oqaaserisat panatut kapisisarput, sianisuulli oqaasii katsorsaataasarput.“ (Ussatit 12:18) Kristumiut ilisimassusillit oqqamik pissaanerat nikallungasunik asasaminnillu toqusoorsimasunik tuppallersaanermut atortarpaat. Inuusuttut ajoqusiisumik ilagisartakkaminnit tatineqartut misiginneqataalluni oqaatsit qiimmassaatigisinnaavaat. Qajassuussilluni oqaaserisat qatanngutit utoqqalisimasut asaneqartut sulilu atorfissaqartinneqartut qularunnaarsisinnaavaat. Inussiarnersumik oqaaserisat inuuneq napparsimasunut oqinnerulersissinnaavaat. Tamanillu pingaarnerpaamik oqaq atorlugu Guutip naalagaaffia pillugu tusarliussaq kimittooq tusarusuttunut tamanut oqaluussissutigisinnaavarput. Guutip oqaasiata oqaluussissutiginissaanut nukissaqarsinnaavugut  uummaterput ilaatikkutsigu. Biibilimi allassimavoq: „Ajorsartut ajunngitsuliorfigikkit, sapinngikkuit ikiuiumanngitsooqinak!“ — Ussatit 3:27.

Pissaanerup eqqortumik atornissaa

16, 17. Utoqqaanertat, angajoqqaat uiusut nuliaasullu qanoq ilillutik Jehova malinniarsinnaavaat oqartussaanertik Guutimeersoq atoraangamikku?

16 Jehova ajugaqanngitsuuvoq, ilagiilli asannittumik siulersortarpai. (1 Juánase 4:8) Nakkutilliisut kristumiut Guuti malittarpaat savaatai asannittumik isumaginerisigut oqartussaassusertik atornerlunnagu. Ilumoorpoq nakkutilliisut ilaannikkut ’inerterillutillu oqaaqqissaarisariaqartut’, tamatigulli ’kamajuillutik ajoqersuiniarlutillu’ taamaaliortarput. (2 Timûtiuse 4:2) Ilagiinni utoqqaanertat apustili Peterip ilagiinni oqartussaassusilinnut oqaasii eqqaamajuartariaqarpaat: ’Guutip savaatai ilissinniittut paarisigik, misissuisuullusi pinngitsaalinermit pinnasi piaarinermilli, assuarnartumik akissarsiniarnasi kajumillusili, paarisassanulluunniit naalagaaniartutut pinnasi savaatinulli maligassanngorlusi.’ — 1 Pîtruse 5:2, 3; 1 Tásalûníkamiut 2:7, 8.

17 Angajoqqaattaaq uiusullu Guutimit killilimmik oqartussaatitaapput, pissaanertillu atortariaqarpaat ikiuinermut, perorsaanermut isumaginninnermullu. (Evfisumiut 5:22, 28-30; 6:4) Jesusip maligassiaata takutippaa oqartussaassuseq asannittumik atorneqarsinnaasoq. Oqimaaqatigiissumik aalajangersimaqqissaartumillu perorsaatissiisoqarpat meeqqat nikallussanngillat. (Kulorsamiut 3:21) Uiusoq kristumiu asannittumik siulersuippat nuliaasullu uini niaqqumisut ataqqilluinnaruniuk naalagaaffiginiaraluarlugu piumasaniluunniit piniarlugu oqartussaaffini Guutimeersut qaangerniaannanngikkunigit, aappariinneq nakussatsinneqassaaq. — Evfisumiut 5:28, 33; 1 Pîtruse 3:7.

18. (a) Qanoq ililluta kamannitta nununeratigut Jehova ilaartariaqarparput? (b) Oqartussaasusillit oqartussaaffigisatik sumik ineriartortitsiniartariaqarpaat?

18 Ingammik ilaqutariinni ilagiinnilu oqartussaasut kamannertik nunusariaqarpaat, kamannermi siooralersitsisarpoq, asannilersitsinani. Pruffiiti Nahum oqarsimavoq: „[Jehova] kamagittartuugaluarpoq; pissaanerali angeqaaq.“ (Nahum 1:3; Kulorsamiut 3:19) Kamannini nunusinnaaguniuk nakuussutsimut ersiutaavoq, nunusinnaannginnerli sanngiissutsimut ersiutaalluni. (Ussatit 16:32) Ilaqutariinni ilagiinnilu Jehovamut, tullermut aamma najoqqutassianut eqqortunut asannilersitsinissaq siunertaavoq. Asanninneq ’iluarluinnassutsip nimeraa’, tassaavorlu eqqortuliorusulissutaanerpaaq. — 1 Korintumiut 13:8, 13; Kulorsamiut 3:14.

19. Jehova tuppallernartumik sumik neriorsoqqissaarpaatigut, taamaattumillu qanoq iliortariaqarpugut?

19 Jehovamik ilisarsineq pissaaneranik akuersineruvoq. Esajas aqqutigalugu Jehova ima oqarpoq: „Naluiuk, tusarsimanngiliuk [Jehova] naassaanngitsumut Guutiusoq, nunarsuaq tamaat pinngortissimagaa? Qasussananilu nukillaarneq ajorpoq.“ (Jesaja 40:28) Jehova pissaaneerutinngisaannassaaq. Taanna tatigigutsigu imminut tatiginata pakatsisinnavianngilaatigut. Ima neriorsoqqissaarpaatigut: „Siooraqinak ilagigakkit, erseqinak uangaagama illit Guutit! Assannik annatsitsisumik pissatsippakkit, ikiorpakkit najummillutillu.“ (Jesaja 41:10) Asannittumik isumassuinera qanoq qisuariarfigisariaqarparput? Jesusitut pissaaneq nukillu taassumannga pisavut ikiuinermut ineriartornartunullu atortuartariaqarpavut. Oqarput aqunniartigu ajoqusiinani katsorsaataaqqullugu. Anersaakkut eqqumajuarniarta, uppernikkut aalajaattuarluta — Pinngortitsisuttalu Jehova Guutip ikiuineratigut — nukittujuarluta. — 1 Korintumiut 16:13. (wE 1/3 2000)

[Quppernerup ataani ilanngussaq]

^ imm. 9 Juutit nassaavi Mosesip inatsisaasa allassimaqqaatigigunagaat, ukiut hundredelikkuutaat tamatuma siorna naalaffimmut toqqorneqarsimasut.

Makku nassuiarsinnaavigit?

Jehovap qanoq ililluni pissaanini atortarpaa?

Qanoq ililluta Jehovamit nakussatsinneqarsinnaavugut?

Oqarput qanoq atortariaqarparput?

Oqartussaassuseq Guutimeersoq qanoq ililluni iluaqutaava?

[Atuaqqissaarnermi apeqqutit]

[Qupp. 23-mi assiliartaq]

Jesusip allat ikiortarpai Jehovap pissaanera ikiortigalugu

[Qupp. 25-mi assiliartaq]

Guutip oqaasiata oqaluussissutiginissaanut nukissaqarsinnaavugut uummaterput ilaatikkutsigu