Imarisai

Imarisai

„Biibili pillugu ilisimasaqangaarassi“

„Biibili pillugu ilisimasaqangaarassi“

Guutip Naalagaaffianik Oqaluussissutiginninnermit Nutaarsiassat

 „Biibili pillugu ilisimasaqangaarassi“

JESUS 12-inik ukioqarluni Jerusalemimi upperisarsiornikkut siuttunut saaffiginnimmat ’tusartaasa tamarmik sianissusiagut akisarnerisigullu tupigingaarpaat’. (Lúkarse 2:47) Ullumikkuttaaq Jehovap kiffaasa inuusuttut amerlasuut sapiillutik ilinniartitsisutik atuaqatitillu Guuti Biibililu pillugit oqaloqatigisarpaat, tamannalu akuttunngitsumik nuannersumik kinguneqartarpoq.

Tiffany 14-inik ukioqarpoq. Klassiani Biibilimi Daniel 9:24-27-mi sapaatit-akunneri ukiunngortitat 70-it pillugit siulittuut oqaloqatigiissutigineqarpoq. Ilinniartitsisup versit qarsupittumik eqqartorpai allamullu saapallalluni.

Tiffany nappaanissaminut nangaagaluarpoq. „Suna pinerlugu versit nassuiarluarneqannginnerat ajuusaarutigaara,“ oqarpoq. „Tassanngaannarli nappaavunga.“ Ilinniartitsisup tupigusuutigaa oqaaseqartoqarniarmat, tassami atuartut amerlanersaasa eqqartorneqartoq paasiuminaatsippaat.

Tiffany qaqinissaminut akuerineqarpoq piareersaasimanngikkaluarlunilu siulittuut pillugu ilisimasaminik oqaluttuarluni. Naammassimmat ini atuarfiat nipeqanngivippoq. Tiffany annilaangalaalerpoq. Taavali atuartut tamarmik ersaartaatilerput.

„Ajunngeqaaq, Tiffany, ajunngilluinnarpoq“ ilinniartitsisoq oqaqattaarpoq. Nassuerutigaa allassimaffiit taakku ilisimasaminit imaqarnerusut, Tiffanylu allanit tamanit siulliulluni nassuiaassilluarnerpaasoq. Tiimi naammat aperaa qanoq ililluni Biibilimik taama ilisimasaqartiginersoq.

„Jehovamut nalunaajaasuugama,“ akivoq. „Angajoqqaama siulittuummik nassuiaateqqeqattaarmannga aatsaat paasivara.“

Tiffanyp atuaqataasa aamma Biibilimik ilisimasaqarnera tupigusuutigisorujussuuaat. Ilaat oqarpoq: „Maanna paasivara sooq ilissi Jehovap Nalunaajaasui illumiit illumut angalaartartusi; Biibili pillugu ilisimasaqarluarassi.“ Allat neriorsuipput upperisaanik qinngasaaqqinnaviarnagu.

Tiffany angajoqqaaminut misigisimasaminik oqaluttuarmat siunnersuutigaat ilinniartitsisuni atuakkamik Ilisarsinermik inuunermut naassaanngitsumut sammisoq-mik nassaatissagaa. Taamaaliormat immikkoortorlu Danielip siulittuutaanik nassuiaasoq takutimmagu, ilinniartitsisup nangaanani atuagaq tiguaa qujallunilu.

Kristumiut inuusuttut angajoqqaamik Guuti Biibililu pillugit ilinniartitsissutigisaat sapiillutik oqaluttuarigaangamikkik, Jehova unnersiutigisarpaat ataqqinartillugulu namminnerlu nuannaarutigingaartarpaat. — Matîuse 21:15, 16. (wE 1/4 2000)