Imarisai

Imarisai

Navianartorsiorfiusumeeqinak!

Navianartorsiorfiusumeeqinak!

 Navianartorsiorfiusumeeqinak!

QAQQANIK innermik anitsisartunik ilisimasallit suliassaasa ilagaat alaatsinaannissaq, ilisarnaatinik naliliineq taavalu qaqqap innermik anitsingajalerneranik mianersoqqusineq. (Qaqqaq innermik anitsisartoq Fugen anitsilluni aallartimmat, politiit inuit ulorianartorsiorfiusumut pisinnaveersaartariaqarsimavaat.) Taamatuttaaq Biibilimik misissueqqissaartartut, ’silarsuup matuma naggatissaanut’ nalunaaqutaasut alaatsinaappaat, allallu navianartumut nalliulluinnalersumut mianersoqqullugit. — Matîuse 24:3.

Biibilimi kapitalimi tassani nunarsuaq tamakkerlugu ajunaarnersuaqarnissaanik mianersoqqusisumi, pisimasunik tamatuminnga pisoqalersitsisunik allaatigisaqarneq atuarsinnaavarput: Inuiaat pikitsitsiumaarput inuiaqatiminnut, naalagaaffillu naalagaaffeqatiminut. Kaannersuarlu nalliuttarumaarpoq, nunalu tamatigut tamaana sajuttarluni. . . . Pruffiitioqqusersullu amerlasuut saqqummerumaarput amerlasuut tammartillugit. Iluaatsuliornerillu amerliumaarmata asanninneq amerlasuuni nillertunngormaarpoq. . . . Naalagaaffimmik iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ — Matîuse 24:7-14.

Siulittuutip tamatuma eqquutilernerata takunissaanut nutaarsiassanik tusarliussisartuunissaq pisariaqanngilaq. Siulittuutip eqquunnera pingaartumik 1914-imiilli misigivarput. 1900-kkunni silarsuarmi sorsunnersuit marluk, naalagaaffimmi innuttaasut sorsuunneri amerlaqisut, nunagisami sakkulersorluni akerleriinnerit kiisalu upperisarsiornermi akerleriinnerit naggueqatigillu eqqisiviilliorneri ilisimannittuuffigisimavavut. Sorsunnerit taamaattut kingunerisaannik nerisassaaleqilluni atugarliorneq kisiat inuiaat misigisimanngilaat, aammattaarli ajunaarnersuit pinngortitat pilersitaat atugarliuutigisimavaat. Nunap sajunneri inuppassuit inuunerannik akeqarsimapput. Upperisarsiortut assigiingitsorpassuit uppernanngitsunit aqunneqartut ingasaassiniartunillu malitseqartut pilersinneqarsimapput. ’Iluaatsuliornerit amerlinerisa’ aammattaaq kingunerisimavaa inuit asanninnermik takutitsinngitsoortarnerat, najukkamilu saniliulluarneq ileqqujunnaarsimavoq.

Aammattaaq ilisarnaatip ilaa alla, silarsuaq tamakkerlugu oqaluussissutiginninneq naammassineqangajalerpoq.  Atuagassiap uuma saqqaa takuinnarsinnaavat, malugissavallu oqaatsit ukua „Jehovap naalagaaffianik tusarliussisoq“ taaguutaanut ilaasut. Napasuliaq Alapernaarsuiffik, ’Naalagaaffik pillugu tusagassamik nuannersumik’ oqaluussissutiginnittut sakkuisa pingaarnerit ilagaat, oqaatsinut 132-nut saqqummersinneqartartoq 22 millionillu sinnerlugit naqinneqartarluni. Tusagassap nuannersup ilagaa tusarliussaq silarsuarmik avataaniittunillu Pinngortitsisup, Jehova Guutip, qilammi naalagaaffik pilersissimagaa aaqqissuussaanermik matuminnga ajortumik nungutitsisussaq nunamilu paratiisimik pilersitsisussaq. Aap, erniinnaq Guutip akulerunnissaanut ilisarnaatit maannakkut takuneqarsinnaapput, takutillugulu maannakkut aaqqissussaanermi inuit navianartorsiornerat nalliulluinnalersoq. — Naleqqiutikkit 2 Timûtiuse 3:1-5; 2 Pîtruse 3:3, 4; sarĸúmersitat 6:1-8.

Jehovap ullussarsua siooranartoq

Jehovap eqqartuussutiminut naammassinniffissaa nalliuppat qanoq pisoqassava? Nammineq qanoq pisoqarnissaanik allaatigisaa paatsuugassaanngitsoq atuariaruk: „Nalunaaqutinik saqqummersitsiumaarpunga qilammi nunarsuarmilu — aammik innermillu putsunillu napasunik. Seqineq allanngussaaq taarnerinnaalerluni, qaammallu aanngorluni, [Jehovap] ullussaa pingaaqisoq siooranangaaqisorlu nalliutinngikkallartillugu.“ — Joel 3:3, 4.

Ullup sumiiffimmi qaqqap innermik anitsineranit nunalluunniit sajunneranit amiilaarnarnerungaartup siuninnguaniippugut. Pruffiitip Zefaniasip oqaatigaa: „Qanillivoq [Jehovap] ullussarsua; qanilliartulertoqaaq. . . . Nunarsuaq tamarmi nungutinneqarumaarpoq taassuma ilungersorneranit innertut ittumit, nunarsuarmi ineqartut tamaasa nungutikkumaarmagit tassanngaannaq nungutilluinnarlugit.“ ’Sølviutitik kuultiutitillu annaanneqaatigisinnaanngikkaluaraat ullormi [Jehovap] kamaffissaani’, ullormi tassani siooranangaartumi annannissamut periarfissaqarpoq. — Sefanja 1:14-18.

Zefaniasip imatut siunnersorpaatigut: „[Jehovap] kamanneranit innertut ittumit eqqorneqanngikkallartillusi, ullussaq [Jehovap] uumitsaffissaa ilissinnut nalliutinngikkallartillugu. [Jehova] ujarsiuk nunap inuini makitajuitsortaasusi, . . . Iluarsuseq nuqqaassutigisiuk, makitajuissuseq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ (Sefanja 2:2, 3) ’Jehova ujarutsigu, naapertuilluarneq ujarlugu makitajuitsuunerlu ujarlugu’ qimarnguissarsisinnaavugut. Kikkut ullumikkut Jehova ujarpaat?

Ilimanarpoq oqaaseq „Jehova“ Jehovap nalunaajaasuisa oqaluussisarnerat pillugu atassuteqartikkit. Atuagassiaq manna immaqa taakkua arlaannit pisimavat. Innuttaasutut assuarnaallutik inuusutut ilisimaneqarput. ’Inuttaaq’ atiniarlugu sulissutigaat, tamanna anguniaraanni qanilaartuuneq anguniaqqissaartariaqarpaat. (Kulorsamiut 3:8-10) Nalunngilaat Jehovap peqatigiissortaani takussaasuni silarsuaq tamakkerlugu Jehovap nalunaajaasuisa ilagiivinit sinniisuuffigineqartuni ilinniartinneqarnerup kingunerigaa. Aap, silarsuaq tamakkerlugu Jehovap nalunaajaasui ’silarsuarmi qatanngutigisatit tamaasa’ peqatigalugit qimarnguissarsisinnaavutit. — 1 Pîtruse 5:9.

Maannakkut qimarnguissarsigit

Jehovami qimarnguissarsiniarutta ikinngutigisariaqarparput. Sumik nassataqarpa? Biibilimi akineqarpoq: ’Uersartusi ukorsii-aa, ilisimanngilisiuk silap piinik asanninneq Guutimut akerartuutaasoq? Taamaammat silap piinik asannikkumaannartoq Guutimut akerartortigitittaraaq.’ (Jâko 4:4) Guuti ikinngutigerusukkutsigu, silarsuarmut guutiitsuuffiusumut maannakkut atuuttumut, Guutimut akerliuniarpasissumik pissuseqarnermik ilisarnaateqartumut, atassuteqarnerit misigissutsinut tunngassuteqartut tamaasa unitsittariaqarpavut.

Biibilimi imatut oqaaqqissaarneqarpugut: ’Silarsuarluunniit silarsuulluunniit pii asaqinasigik. Silarsuarmik asannittoq Ataatap asanninneranik ilumiugisaqanngilaq. Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput. Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassaaq.’ (1 Juánase 2:15-17) Ullumikkut amerlanerit timip kissataanit aqunneqartipput — kinguaassiuutitigut pilerissuseq nunusinnaanngisartik, aningaasanik piumatussuseq pissaanermillu atornerluineq. Jehovamulli isumaqataassagutta taamaattunik kissaatigisaqarunnaartariaqarpugut. — Kulorsamiut 3:5-8.

Imaassinnaavoq ilaanneeriarlutit atuagassiaq manna atuartarit Biibilillu siulittuutaanik nassuiaanera isumaqatigalugu. Taamaakkaluartoq alloriarnissaq tulliuttoq immaqa nangaassutigivat, tassa  Jehovap Nalunaajaasuinut ilanngunnissat. Kisianni ajunaarnersuaq siuninnguatsinniippat mianersoqqussutip tusaaginnarnissaa naammappa? Soorlu Japanimi qaqqap innermik anitsinerani pisimasumi takusinnaagipput, mianersoqqussut qisuariarfigisariaqarpoq. Eqqaamajuk minnerpaamik aviisiliortut assiliisullu 15-it tusagassamik pissanganartumik pissarsinissaminnik siunertaqartut, inuunertik annaagaat. Tassami assiliisut ilaat assiliissutip naqittaataa inussaminik naqissimallugu toqusimavoq. Innermik anitsisartunik ilisimasallit ilaat imatut oqarnikuusimavoq: „Ullut ilaanni toqussaguma, qaqqap innermik anitsisarfiata killerpiaani toqorusunneruvunga.“ Kissaatigisani eqqoqqissaarlugu toquvoq. Tamarmik inuutissarsiutertik inuunerminni pingaarnerpaatippaat. Kisianni inuunertik akigisariaqarsimavaat — mianersoqqussummik sumiginnaanerup akia.

Aqqissuussaanermik ajortumik maanna atuuttumik Guutip nungutitsiniarluni aalajangersimaneranik tusarliussaq amerlasuut ullumikkut tusartarpaat, ilaatigullu miserratiginngilaat mianersoqqussut tunngavissaqarluartoq. Ima eqqarsarput: ’ Immaqa siusinnerusukkut kingusinnerusukkulluunniit pissaaq, kisianni ullumikkuunngitsoq.’ Jehovap ullussaa kingusinnerusumut kinguartiinnarpaat, namminneq maannakkorpiaq pingaarnerutitaminnit allamut sangutinneqarumanatik.

Baruk tamatumunnga assingusumik ilaanni ajornartorsiuteqarsimavoq. Baruk pruffiitip Jeremiasip allaatsigisimavaa sapiilluni Israelikkunnik Jerusalemip piuneerussaanissaanik mianersoqqusisoq. Taamaakkaluartoq suliassani qatsussimavaa taamaattumillu Jehovamit avoqqaarineqarluni: „Illit atugarissaarutaannarnik iliorfigeqquvutit! Taamaalioqinak!“ Pisuussutit, ataqqisaaneq, pigisatigulluunniit toqqissisimaneq pineqaraluarpata, Baruk ’atugarissaarutaannarnik iliorfigeqqussanngilaq’. Ataaseq soqutigissavaa, tassalu Jehovap peqqusaatut iliornissaq inuit Jehovamut isumaqataalernissaannut ikiorlugit. Tamatumalu kingunerissanik ’inuuinnartinneqassaaq’. (Jeremia 45:1-5) Uaguttaaq taamatut ’atugarissaarutaannarnik iliorfigeqqunermut’ taarsiullugu Jehova ujartariaqarparput, taamaalilluta inuunerput annaassinnaagatsigu.

Politiit qulit sinneqartut angutillu kajumissutiminnik qatserisartuneersut sulipput tassanngaannaq kinertissimasup sakkortoorujussuarmik kissassuseqartup qaqqakkut kuuinnavissup tamakkermatik. Inuit navianartorsiortut ikiorlugillu illersorniaraluarpaat. Arnatut angutitullu ajunngitsumik isumaqarlutik silarsuaq manna pitsaanerulersinniarlugu suliniuteqartut assigaat. Kisianni „sangungasoq narlorsinnaanngilaq“ — pissutigisaat qanorluunniit ajunngitsigigaluarpata. (Nalunaajaasup oqaasii 1:15) Aaqqissuussaaneq maanna atuuttoq ’sangungasoq’ narlortinneqarsinnaanngilaq. Taava silatusaarnerussava ’silap piinik asannissalluni’ silarsuarmi aaqqissuussaanermik Guutip nungutissallugu aalajangersimasaanik annaassiniaraluarnikkut.

Qimaareeraanne uternaveersaartariaqarpoq

Aaqqissuussaanermit navianartorsiortumit qimaaneq allaavoq — allaalluinnarporli illersuutaasumik soqutigineqarnerup ’qatanngutigiinni’ nanisatta pigiinnarniarnera. (1 Pîtruse 2:17) Puigoqinatigit nunaatillit qimaatitaareerlutik narsaatitik qaqqap innermik anitsisartup Fugenip eqqaaniittut takusarniarlugit utertut. Ilimanarpoq inuunermut „nalinginnaasumut“ uternissartik erinigisimassagaat. Kisianni soorunami uterneq sianiilliorneruvoq. Immaqa assiaqutsiussamik qaangiinerat siullermeerluni qaangiinerunngilaq. Siullermik immaqa sivikitsuinnarmik ulorianartumiimmata pisoqarfiusimanngilaq. Aappassaanik immaqa sivisunerulaartumik tassaniissimapput, suli pisoqarfiunngitsumik. Immaqa assiaqutsiussamik illersuutaasumik qaangiineq sungiutipallassimavaat, tamannalu sapiillissutigisimavaat navianartorsiorfiusumiiginnarlutillu.

Jesus Kristusip pisimasumut assingusoq ’silarsuup matuma naggatissaani’ pisussaq unnersuussutigaa. Oqarpoq: ’Soorlumi ulluni taakkunani ulersuup siornagut iliortut nerillutillu imerlutillu nuliarlutillu uinillutillu ulloq taanna Noap umiarsuarmut iserfia tikillugu paasinagulu, aatsaalli ulersuaq nalliummat tamaasa nungutillugit, taamattaaq ikkumaarpoq inuup ernerata tikiuffissaani.’ — Matîuse 24:3, 38, 39.

Malugiuk Jesusip taammagit nerineq, imerneq nuliarnerlu. Taaneqartut arlaannaalluunniit immini Jehovap isaani ajortuunngilaq. Sunaliuna eqqunngitsuusoq? Noap nalaani inuit ’mianersoqquneqarnertik’ paasinngilaat ulluinnarni inuuneq ulapputigigamikku. Navianartumit nalliulluinnalersumit navianartorsiortinneqaraanni, nalinginnaasumik inuusoqarsinnaanngilaq. Silarsuarmit maannakkut  atuuttumit nungutaasussaasumit qimaareersimagaanni avissaarsimagaanniluunniit, iluaqutissanik suugaluartunilluunniit pissarsiviginiarlugu uterusunnerit tamaasa akiorniarneqartariaqarput. (1 Korintumiut 7:31) Immaqa malugineqanngivillutit anersaakkut navianartorsiunnginnissamut killigititap avataanut pisinnaavutit ajornallu uteqqillutit. Ilimanarporlu sapiillissutigissagit kingunerissagaalu silarsuarmut uteqqinnerit sivisunerulaartumik tassaniinniarlutit. Erniinnarlu isumaqalersinnaavutit: „Naggatissaq ullumi tikiunnavianngilaq.“

Eqqarsaatigikkittaaq taxartartut pingasut inuunerminnik annaasaqartut. Anngaq imerpalasoq sivinganikkut kuulermat, aviisiliortut assiliisullu utaqqillugit uninngapput. Ullumikkut ilaasa allat sapiillisaarlutik silarsuarmut utersimasut maliinnarsimavaat. Pissutaasorli sunaagaluarpalluunniit navianartorsiorfiusumut uternissamut akuersiinnarneq imminut navianartorsiortinnerujussuuvoq.

Qaqqap Fugenip innermik anitsinerani ajunaartut navianartorsiorfiusumut killigititaq ilummut qaangersimavaat. Ullut ilaanni qaqqaq innermik anitsilissasoq ilimagisimavaat, arlaannaataluunniilli ulloq taannarpiaq pinissaa ilimagisimanngilaat. Amerlasuut aaqqissuussaanerup naggatissaanut ilisarnaatit arajutsinaveersaarpaat ilimagalugulu Jehovap ullussaa ilaanni nalliutissasoq, isumaqaratilli erniinnaq pissasoq. Allaat ilaat isumaqarput ulloq taanna takkutinngisaannassasoq. Taamatut isumaqartut navianartorsiortorujussuupput.

Apustili Peter mianersoqqusilluni oqarpoq ’[Jehovap] ullussaa tillittutut nalliukkumaartoq’. Misissuilluartuusariaqarpugut ’Guutip ullussaata nalliuffissaa ilimagalugu qilanaaralugu’ utaqqinitsinni, aamma ’ilungersortariaqarpugut taassumunnga naapeqqulluta innarluilluta assuarnaallutalu eqqissilluta,’ (2 Pîtruse 3:10-14) Aaqqissuussaaneq maanna atuuttoq suujunnaarsitaareerpat, Guutip naalagaaffiata ataani paratiisi nunamiittoq pilersinneqassaaq. Qaquguluunniit navianartorsiorfiusumukarnissatsinnut ussernartorsiortitaanngisaannartariaqarpugut, suulluunniit utoqqatsissutitut atorniaraluarutsigit, ulloq taanna assiaqutsiussaq qaangerutsigu silarsuatoqqamullu uteqqilluta, ulloq taannarpiaasinnaavoq Jehovap ullussaa.

Jehovap kiffai peqatigalugit qimaaffissarsiorit, ilagiinnarlugillu. (wE 15/2 2000)

[Qupp. 7-mi assiliartaq]

Jehovap kiffai peqatigalugit qimaaffissarsiorit, ilagiinnarlugillu

[Suminngaanneernera]

Iwasa/Sipa Press