Imarisai

Imarisai

Imminut qanoq isigivit?

Imminut qanoq isigivit?

 Imminut qanoq isigivit?

TULLUUSIMAARPOQ. Naalagaaffimmi qaffasinnerusumik atorfinitsitaagami qujanarniarfigineqarnini nersorneqarninilu nuannaarutigaa. Puffassutigisaanilli atorfillip allap ataqqiumanngilaa. Angut puffassimaartoq akiniaaniarluni ajuallatsitsisoq naggueqataalu naalagaaffimmiittut tamaasa nungutinniarlugit pilersaalerpoq. Ilumullimi imminut kukkusumik nalilerneq!

Angut taanna peqqusersooq Hamanimik ateqarpoq, Persiallu kunngiani Ahasverusimi qaffasissumik atorfeqarluni. Akeqqersimaarfigisaalu juutiuvoq Mordokajimik atilik. Hamanip naggueqatigiinnik nungutitsiniarneranik assersuut ingasakkaluarpoq takutippaali makitanerup suut ulorianaatigisinnaagai suullu kingunipilugisinnaagai. Makitanerata allat ajornartorsiortiinnanngilai, aammattaarli tamanit nikagisaatilerpaa naggataatigullu toqutaatillugu. — Ester 3:1-9; 5:8-14; 6:4-10; 7:1-10.

Ilumoortumik pallorfiginnittut makitanermik sunnertissinnaapput

Jehovap piumasaraa ’makitajuilluta Guuterput peqatigalugu inuussasugut’. (Mika 6:8) Biibilimi assigiinngitsunik oqaluttuaqarpoq anneruniajukkunnaarsimasunik, ajornartorsiulersitsisunik aliasulersitsisunillu. Assersuutit tamakku ilaannik misissuineq iluaqutigalugu oqimaaqatigiinngitsumik isiginnittaaseqarneq sianiilliornerusoq ulorianartorlu takusinnaalissavarput.

Guutip pruffiitia Jonas peqquneqarami inuit ajortut Ninevemiut Jehovap eqqartuussinissaanik mianersoqqujartussagai imminut oqimaaqatigiinngitsumik isigilerluni qimaavoq. (Jona 1:1-3) Kingusinnerusukkut Ninevemiut oqaluussinermi allamik isumataartimmagit, Jonas narrappoq. Pruffiititut tusaamaneqarnini pingaartingaaramiuk, Ninevemiut tusindilikkuutaat inuuneri soqutigerpianngilai soqutiginngivillugilluunniit. (Jona 4:1-3) Ittuujuilluta imminut pingaartippallaarutta, kinaassusersiunnginnissarput allanullu eqqatsinnilu pisunut eqqortumik isiginnittaaseqarnissarput ajornakusuussaaq.

Assersuut alla aamma eqqaaneqarsinnaasoq tassavoq Uzzija Judami kunngiulluarsimasoq. Oqimaaqatigiissitsisinnnaajunnaarami palasit pisinnaatitaaffiinik makitalluni arsaarniaraluarpai. Ittuujuilluni assuarnartuliorninilu pillarneqaatigalugit nappaammik eqqorneqarpoq Guutimillu iluarisaajunnaarluni. — 2 Israelikkut 26:3, 16-21.

Aammattaaq Jesusip apustiliisa imminut oqimaaqatigiinngitsumik isigineq akiortariaqarsimavaat. Ataqqineqarusuttorujussuupput oqaasissaqartitaarusoqalutillu. Misilinneqaleramilli Jesus qimappaat qimaallutillu. (Matîuse 18:1; 20:20-28; 26:56; Mákorse 9:33, 34; Lúkarse 22:24) Imminut angisuutinnermik anneruniajuinnerlu amigaatigigamikku Jehovap siunertaa tassanilu inissisimaffitsik puiungajappaat.

Imminut angisuutinnerup kingunipilui

Oqimaaqatigiissumik imminut isiginngikkutta ajortumik kinguneqarsinnaavoq allanullu attaveqarnerput ajoquserlugu. Assersuuteqariarta. Inimi marluk imminnut isussuullutik illartut maluginiarnartarput. Imminuinnaq eqqarsaatigisuugaanni kukkusumik isumaqarluni imminut illaruaatigisorisinnaavoq, taakkumi isussullutik imminnut oqaluummata. Pissusaannummi allamik patsisissaqarsinnaanersut takorloorneqarsinnaanngilaq. Kinami alla oqaluuserissagamikku? Immaqa narrassinnaavugut aalajangerlutalu taakku atassuteqarfigeqqissanagit. Taamatut naleqarnermik oqimaaqatigiinngitsumik isigineq paatsuuinermik  kinguneqarsinnaavoq allaat ikinngutinut, ilaquttanut allanullu attaveqarneq ajoqusersinnaallugu.

Imminut pingaartittut usorsitsaarumatuunngortarput piginnaanitik, angusatik imaluunniit pigisatik nammineq nersortariaqartutut isigisatik malugeqqusaartuaannarlugit. Imaluunniit oqaloqatigiinnermi qalliuniarlutik imminut eqqartorniartuaannarlutik. Taamatut oqaluttarnerup ersersippaa asanninnermik piviusumik amigaateqarneq paaminnartorujussuusinnaallunilu. Imminuinnaq eqqarsaatigisut allanik ajuallatsisigajupput. — 1 Korintumiut 13:4.

Jehovap nalunaajaasuitut oqaluussigaangatta illaruaatigineqarsinnaasarpugut imalunniit itigartinneqarluta. Eqqaamasariaqarparpulli uagut pinnata Jehova oqariartuussarput itigartittaraat. Pingaaruteqarnermik kukkusumik isiginnittaaseqarneq ajuissumik kinguneqarsinnaavoq. Ukiualuit matuma siorna qatanngut pulaarfigisaminit oqaatsikkut saassunneqarami inuttut ajuallaatigigamiuk kamalluni akisimavaa. (Evfisumiut 4:29) Qatanngut taamatut misigisaqareernermi kingorna illumit-illumut oqaluusseqataaqqinngisaannarpoq. Aap, oqaluussitilluta makitanerup imminut aqussinnaajunnaartissinnaavaatigut. Taamatut pisoqanngisaannarnissaa ilungersuutigisariaqarparput. Kristumiutut oqaluusseqataanerup immikkut pisinnaatitaaffiunerata pingaartittuarnissaanut Jehovap ikiuinera maniguulluta piniartuartigu. — 2 Korintumiut 4:1, 7; 10:4, 5.

Aammattaaq imminut pingaartippallaarutta pisariaqartumik ajoqersorneqarnerup ilassinissaa akornusissavarput. Amerika qiterlermi ukiualuit matuma siorna ilagiinni kristumiuni nukappiaraq inuusuttuaraq Teokratimik Atuarfimmi saqqummiussaqarpoq. Atuarfimmi nakkutilliisumit toqqaannartumik naqqinneqarami inuusuttoq narralluni Biibiliutini natermut igillugu Naalagaaffilersaarfimmit aniartorpoq uteqqinngisaannassallunilu aalajangerluni. Ullualuilli qaangiummata makitanini nunuvaa, nakkutilliisorlu saammaallugu, maniguullunilu naqqinneqarnini ilassillugu. Piffissap ingerlanerani inuusuttoq taanna kristumiutut inersimalluartunngorpoq.

Ittuujuikkutta imminullu pingartippallaarutta Guutimut attaveqarnerput ajoqusersinnaavarput. Ussatit 16:5-imi mianersoqquneqarpugut: „Makitasuut tamaasa [Jehovap] maajunnarai.“

Oqimaaqatigiissumik imminut isigineq

Tassa imminut pingaartippallaartariaqanngilagut. Kristumiut ittuujuinneq oqimaaqatigiissumillu imminut isigineq qanoq ilillutik ineriartortillugulu attatiinnarsinnaavaat?

Biibili imminut oqimaaqatigiissumik isiginnittaaseqartunik assersuutinik kajumissinartorpassuarnik imaqarpoq. Jesus Kristus maniguunnerup tungaatigut maligassaalluarsimavoq. Ataatami piumasaa naammassiumallugu inuiaallu annaakkumallugit nunarsuarmi inunngorumalluni Guutip ernerata qilammi inissisimaffini kajumilluni qimassimavaa. Ajuallatsinneqaraluarluni, anniartitaagaluarluni nikanarsaataasumillu toqutaagaluarluni imminut naalakkersinnaassuseqarpoq naleqassutsinilu attatiinnarlugu. (Matîuse 20:28; Filípimiut 2:5-8; 1 Pîtruse 2:23, 24) Taamaaliornissaanut suup Jesus ikiorpaa? Jehova tatigilluinnarpaa piumasaalu naammassiniarlugu aalajangersimalluni. Jesusip Guutip oqaasia eqiasuilluni misissoqqissaartarsimavaa, qamannga pisumik qinusarluni kiffartornerminilu ilungersuussilluni imminut tunniusimalluni. (Matîuse 4:1-10; 26:36-44; Lúkarse 8:1; Juánase 4:34; 8:28; Eprîarit 5:7) Jesusip maligassiaanik malinninnerput imminut oqimaaqatigiissumik isiginnitta ineriartortinnissaanut attatiinnarnissaanullu iluaqutigissavarput. — 1 Pîtruse 2:21;

Aammattaaq kunngip Saulip ernerata Jonatanip maligassiaa eqqaariaruk. Saulip naalannginnera pissutigalugu Jonatan kunnginngorsinnaajunnaarpoq. (1 Samuel 15:10-29) Jonatan tamanna pillugu kamappa? Inuusuttoq David taarserluni kunngiulersoq sinngagilerpaa? Jonatan Davidimit utoqqaanerungaatsiarpoq qularnanngitsumillu misilittagaqarnerulluni, kisianni anneruniarnani maniguullunilu Jehovap aalajangigaanut naalatsigitippoq Davidilu ilumoorluni tapersersorlugu. (1 Samuel 23:16-18) Guutip siunertaa eqqumaffigalugu kajumissuseqarlutalu tassunga naalatsigitikkutta ’immitsinnut isumassaq qaangerlugu  isumaqarfiginnginnissatsinnut iluaqutigissavarput. — Rûmamiut 12:3.

Anneruniajuissutsip maniguunnerullu pingaaruteqassusianik Jesusip allat ilinniartippai. Assersuusiorluni oqarpoq ajoqersukkami katittorsiortunut qaaqqusaagunik ’sallernut’ ingissanngitsut, taakkunannga ataqqisaanerusoq takkuteratarsinnaammat nikanarsagaallutik tunorlernut ingikkiartortitaasinnaammata. Isumaa ersersinniarlugu Jesus nangippoq: ’Akitsiniartormi nikanarsissaaq, nikanartittorlu akitsissaaq.’ (Lúkarse 14:7-11) Jesusip unnersuussutaa malillugu ’nikanartinneq atigutsigu’ silatusaassaagut. — Kulorsamiut 3:12; 1 Korintumiut 1:31.

Imminut oqimaaqatigiissumik isiginerup iluaqutissartai

Anneruniajuikkaangamik maniguukkaangamillu Jehovap kiffai kiffartornerminni piviusumik nuannaarsinnaasarput. Ilagiinni utoqqaanertat saaffigiuminarnerusarput maniguullutik ’savarpannik qajassuussigaangamik.’ (apustilit suliait 20:28, 29) Ilagiinniittut tamarmik oqaloqatigiuminarnerutittarpaat ikiortiseriuminarnerutittarlugillu. Taamaallilluni ilagiit imminnut ataqatigiinnerulertarput, asaqatigiissappullu tatigeqatigiillutillu.

Imminut pingaartippallaanngikkutta ajornannginnerusumik ikinngutissarsisinnaassaagut. Anneruniajuissutsip maniguunnerullu unammillerajunnermik ineriartortitsineq allaninngaannillu angusaqarneruniarneq imaluunniit pigissaarneruniarneq akornusissavaa. Guutip pissusiitut ittut taamaattut innimisunnerunisatsinnut iluaqutigissavavut, taamaattumillu pisariaqartitsisut tuppallersarsinnaallugit ikiorsinnaallugillu (Filípimiut 2:3, 4) Inuit asanninneq inussiarnernerlu ajunngitsumik qisuariarfigigajuppaat. Taamatut namminissarsiunnginneq ikinngutigiillualernissamut tunngavissaannginnerpa? Imminut pingaartippalaannginnerup akissarsiassartarujussua. — Rûmamiut 12:10

Aammattaaq imminut oqimaaqatigiissumik isigigutta allanik ajuallatsitsisimagutta kukkunitta nassuerutiginissaanut iluaqutigissavarput. (Matîuse 5:23, 24) Allanut attaveqarnerput ajunnginnerulissaaq, isumakkeerfigeqatigiinnermullu ataqqeqatigiinnermullu ilasaataassalluni. Assersuutigalugu utoqqaanertat kristumiut, nakkutilliisut anneruniajuillutillu maniguukkunik allanut iluaqutaangaassapput. (Ussatit 3:27; Matîuse 11:29) Aammattaaq maniguuttumut ajortuliorfigitittumut isumakkeerfiginninnissaq ajornannginnerussaaq. (Matîuse 6:12-15) Nammineq ajuallannartitani ingasaallugit qisuariarfigisanngilai allatullu aaqqinneqarsinnaanngitsut Jehovap aaqqikkumaarai tatigilluinnassavaa. — Tussiaat 37:5; Ussatit 3:5, 6.

Anneruniajuilluni maniguullunilu imminut isiginerup pitsaaqutiginerpaasaa tassaavoq Jehovamut iluarisaaneq. ’Anneruniartut Guutip akerartorpai, nikanartittulli saammaattarlugit.’ (1 Pîtruse 5:5) Imminut pitsaanerusutut isiginerup napiarniutaanut napitinngisaannarta. Jehovap aaqqissuussaani inissisimaffipput maniguulluta akueriinnartigu. Guutip piumasaanik iliortut tamarmik nalunngilaat ’makitajuilluni Guuti peqatigalugu inuusoq’ pilluaqquneqangaassasoq. (wE 15/1 2000)

[Qupp. 27-mi assiliartaq]

Jonatanip maniguulluni David tapersersorpaa