Imarisai

Imarisai

Guuti annaassiserput qiimmattaatigisigu

Guuti annaassiserput qiimmattaatigisigu

 Guuti annaassiserput qiimmattaatigisigu

„[Jehova] qiimmattaatigissavara, Guuti annaassisiga tipaatsuutigalugu.“ — Habakkuk 3:18.

1. Babylonip 539-mi u.n.s. uppinnera sioqqullugu Danielip takorruugaani suna siulittuutigineqarpa?

UKIUNIK qulinik amerlanerusunik Babylonip ukiumi 539-mi u.n.s. uppinnissaa sioqqullugu pruffiiti Daniel utoqqalisoq pissanganartumik takorruuisitaavoq. Takorruuilluni takuai Jehovap akeraasa kunnginngortitaatalu Jesus Kristusip sorsunnissaasa tungaanut silarsuarmi pisussat. Danielip tamakku qanoq qisuariarfigai? Ima oqarpoq: ’Uanga Daniel nukillaarpunga . . . takorluugarali annilaarutigeqaara.’ — Daniel 8:27.

2. Danielip takorruugaani akerleriinneq suna pineqarpa, eqquunnissaalu qanillisoq paasigutsigu qanoq qisuariassaagut?

2 Uagummi tamatuma kingunerujussuani inuusugut? Danielip takorruugaani akerleriinneq, Guutip Harmagedonimi sorsunnissaa, qanittuararsuusoq paasigatsigu qanoq qisuariassaagut? Guutiitsuuneq Habakkukip siulittuutaani ersersinneqartutut siammarsimatigimmat Guutip akerai piuneerunneqanngitsoorsinnaanngitsut paasigatsigu qanoq qisuariarpugut? Habakkukitut allakkamini siulittuutaasuni kapitali 3-mi allaatigisaatut misiginnginnerpugut?

Habakkukip Guuti nallittueqqullugu qinnuigaa

3. Kikkut sinnerlugit Habakkuk qinua, oqaasiilu uatsinnut qanoq pingaaruteqartigaat?

3 Habakkukip allagaani kapitali 3 qinnutaavoq. Hab 3 Versi 1 Ny Verden-Oversættelsen naapertorlugu upputitut qinnutaavoq. Pruffiiti imminut qinnuppaluppoq, kisiannili Habakkuk Guutip innuttai toqqakkat sinnerlugit oqaluppoq. Ullumikkut  qinnut tamanna Guutip innuttaanut, Naalagaaffianik oqaluussisartunut, pingaaruteqartorujussuuvoq. Tamanna eqqarsaatigalugu Hab kapitali 3 atuarutsigu siumut ilisimasaqartutut ilissaagut aammattaarli nuannaarnermik. Habakkukip upputitut qinnutaata Guutimik annaasisitsinnik qiimmattaatiginninnissatsinnut pissutissaqartingaarpaatigut.

4. Habakkukip suna annilaarutigaa, Jehovap pissaanerminik sumut atuinissaa pillugu suna qularissanngilarput?

4 Soorlu allaaserisani marlunni siulianiittuni allaatigineqartoq Habakkukip naalani Judami pissutsit ajuvissimapput. Jehovalli pissutsit taamaattut ilaginnaannarumanngilai. Siornatigut iliorsimanermisut akuliuteqqissaaq. Tupinnanngilaq pruffiiti oqarmat: „[Jehova], tusaavakkit naammassisallu pillugu mianerinnillunga.“ Habakkukip suna pivaa? Pruffiitip nalunngilai Guutip suliai angingaartut allassimasut, assersuutigalugu Immami Aappalaartumi, inoqajuitsumi Jerikomilu pisimasut. Suliat tamakku Habakkukip nalunngilluinnarpai, taamaattumillu mianerinnilerpoq paasigamiuk Jehovap akeqqaminut pissaanini atoqqissagaa. Ullumikkut inuit qanoq guutiitsuutigisut takugaangatsigit nalusanngilarputtaaq siornatigutut Jehova akuliuteqqissasoq. Tamanna siooragaarput? Soorunami! Taamaattorli Habakkukitut qinusarpugut: „Uagut nalitsinnissaaq taama ittunik naamassisaqarniarit ukiullu qaangiutinnginneranni saqqummersillugit. Kamaassigaluartillutit nallittuinissaq eqqaagiuk!“ (Habakkuk 3:2) Aap, ’ukiut qaangiutinnginneranni’ Jehovap piffissarititani nalliuppat pissaanini tupinnarluinnartoq atoqqikkiliuk! Asasiminullu nallittuinissaq eqqaaliuk!

Jehova saassussilerpoq

5. ’Guuti Temanimit aggersoq’ qanoq paasisariaqarpa, tamannalu Harmagedon pillugu sumik takutitsiva?

5 Jehovap nallittuinissamik qinnuterput tusarpagu qanoq pisoqassava? Habakkuk 3:3, 4-mi ima akissuteqarpoq: „Guuti aggerpoq Temanimit, illernartoq aggerpoq Paranip qaqqaanit.“ Israelikkut Mosesip nalaani inoqajuitsukkut Kana’animut ingerlatillutik Teman Paranilu aqqusaarpaat. Inuiaqatigiissuit taakkua angalanerat Jehovap nammineq ingerlaneratut ippoq, kimilluunniillu unitsinneqarsinnaanngilaq. Toqunissani sioqqutitsiarlugu Moses oqarpoq: „[Jehova] Sinajimit tikiuppoq, Seʹirimit nuivoq qinngorluni. Qaamangaarluni Paranip qaqqaanit saqqummerpoq ilagalugit iluartut [inngilit] tusinderpassuit, tikiussortut talerpiatungaaniillutik.“ (5 Moses 33:2) Tamatumunnga assingusumik Jehovap pissaanini ajugaaffigineqarsinnaanngitsoq Harmagedonimi akeqqani saassutilerunigit takutissavaa.

6. Guutip naalannassusiata saniatigut kristumiut suna ’takusinnaavaat’?

6 Habakkuk ima nangippoq: „Naalannassusiata qilak tamakkerpaa, takorannissusiata nunarsuaq ulikkaarpaa. Akisunneq avatangiisigisaa innaallagissatut ippoq.“ Takorannissusia! Jehova Guutimik takunnittut inuuginnarsinnaanngillat. (2 Moses 33:20) Guutilli kiffaasa aalajaatsut taassuma angingaassusia eqqarsaatigigaangamikku ’uummataasa isaat’ inngiasuttarput. (Evfisumiut 1:18) Kristumiullu Jehovap naalannassusia kisiat isiginngilaat. Habakkuk 3:4 ima nangippoq: „Assaanit qinngornerit akisugupput; tassani pissaanera isertugaavoq.“ Aap, paasivarput Jehova iliuuseqarnialersoq talerpini pissaanermut nukimmullu assersuutaasoq atorlugu.

7. Guutip ajugaanissaa tassunga pikitsitsisunut qanoq kinguneqassava?

7 Guutip ajugaanissaa taassumunnga pikititsisunut ajunaarutaassaaq. Habakkuk 3:5-imi allassimavoq:  „Toqorarneq siuleraa nappaalanerillu kinguleralugit.“ 1473-imi u.n.s. Israelikkut nunap neriorsuutigisap killeqarfiata eqqaaniitillutik ilarpassui allasiornermikkut guutipilussiornermikkullu pikitsitsipput. Tamatuma kingunerisaanik 20.000-t sinnerlugit perluk Guutimeersoq toqussutigaat. (4 Moses 25:1-9) Jehova qanittukkut ’Guutip ajugaqanngitsup ullussarsuani sorsukkiartorpat’ taassumunnga pikitsitsisut aamma ajortuliat pillarneqaatigissavaat. Ilaasa immaqa nappaalanersuit toqussutigissavaat. — sarĸúmersitat 16:14, 16.

8. Habakkuk 3:6 naapertorlugu Jehova Guutip akeraasa suna ilimagisinnaavaat?

8 Maanna pruffiitip katersaarsuit Jehovaata iliuuseqarnissaanik takorluuinartumik allaatiginninnera malugiuk. Habakkuk 3:6-imi ima atuarpugut: „Alloriarnerisa nuna sajutsippaat, isiginninnerata inuiaat uulilersippai. Qulloorput qaqqat itsarsuarli pinngortut, nungujartorput qattorngit qangarsuarli atasut; [Jehova] ingerlaarpoq itsarsuarli aqqutaasut atuarlugit.“ Jehova uninngaqqaarpoq sakkutuut naalagaattut sorsuffissaq qimerloorlugu. Akerai annilaanganermit uulipput. Takuaat kina akerarigitsik annilaarutigaallu; ersinermit uulilerput. Jesusip siulittuutigaa ’nunami naggueqatigiit tamarmik nimaarumaartut’. (Matîuse 24:30) Kingusinaarlutik paasissavaat Jehovamut pikitsitsisoqarsinnaanngitsoq. Nunarsuarmi aaqqissuussinerit — allaat ’qaqqatut itsarsuarli pinngortutut’ aamma ’qattunertut qangarsuarli atasutut’ qajannaatsigerpasikkaluartut — qulloorlutillu sequmissapput. Jehova ’itsarsuarli aqqutaasut atuarlugit’ ingerlaarpoq, soorlu taamanikkut akuliukkami.

9, 10. Habakkuk 3:7-11-mi sumik eqqaasinneqarpugut?

9 Jehovap akeqqani ’kamaappai’. Sorsunnissarsuarmini sakkut suut atussavai? Pruffiitip ima allaatigai: „Pisissit uleerlugu saqqummiuppat noqartaa qarsunik qaarsillartillugu. Kuussuaqalersitsillutit nuna qulloorpat. Qaqqarsuit uulluserput takuleramitsit, nuissat sialussuarmik kuisipput, itinersuup nipini anippaa. Seqineq qaammallu iniminni uninngaannarput. Taavali qimaapput qarsuit qaamassusiat qalugiusavillu innaallattarneri pillugit!“ — Habakkuk 3:7-11.

10 Josuap nalaani Jehovap pissaanermik takutitsilluni tupinnartuliorluni seqineq qaammallu unitsippai. (Josva 10:12-14) Habakkukip siulittuutaata eqqaasippaatigut Jehovap Harmagedonimi pissaaneq tamanna atoqqissagaa. 1513-imi u.n.s. Jehovap ’itinersuaq’  pissaaneqarfigalugu takutippaa Immami Aappalaartumi Faraop sakkutuui piuneerukkamigit. Ukiut 40-t tamatuma kingorna Jordanip kuussua qarsutsisoq Israelikkut nunamut neriorsuutigisamut isernissaminnut akornutigisimanngilaat. (Josva 3:15-17) Pruffiitip Deborap nalaani kuussuup Israelikkut akeraata Siserap qamutai kuuguppai. (Eqqartuussisut 5:21) Nukiit tamakkua, qassutsinersuit, kuussuit erngillu, Jehovap aamma Harmagedonimi atorsinnaavai. Kallerit innaallannerillu aamma atorsinnaavai, sakkutuup qarsuatut qalugiusaatullu.

11. Jehovap pissaanini angingaartoq nunujunnaarpagu qanoq pisoqassava?

11 Jehovap pissaanini angingaartoq nunujunnaarpagu mianernangaassaaq. Habakkukip oqaasii malillugit unnuaq ullunngussaaq, ullorlu seqinnarinnerpaamit qaamanerussalluni. Harmagedonimik allaatiginninneq siulittuutaasoq isumassarsiarititaasorlu piviusutut assersuutaasutulluunniit paasisariaqaraluarpat, ataaseq qularinngilarput — Jehova ajugaassaaq, akeqqamilu ilaat ataaserluunniit aniguisissanngilaa.

Guutip innuttaasa annaanneqarnissaat qularnanngilaq!

12. Guutip akeqqani qanoq iliorfigissavai, kikkulli annassappat?

12 Pruffiitip nangilluni allaatigaa Jehovap akeqqani qanoq piuneerukkai. Habakkuk 3:12-imi ima atuarpugut: „Uumitsassimallutit nunarsuaq ingerlavigaat inuiaat tullaaralugit kamanninni.“ Jehovalli piuneerutaassai nalaatsornikkut eqqugaassanngillat. Annattoqarumaarpoq. „Aallarputit innuttatit annaakkiartorlugit, tanitat aniguisikkiartorlugu,“ Habakkuk 3:13-imi allassimavoq. Aap, Jehovap kiffani tanitat aalajaatsut annaatissavai. Taamanikkussaq Babylon Angisooq, eqqunngitsumik upperisarsiornerup silarsuarmi tamarmi naalagaaffissua, piuneerunneqareersimassaaq. Ullumikkulli inuiaqatigiit pallorfiginninneq minguitsoq piuneerunniartarpaat. Qanittukkut Jehovap kiffai Gogip Magogimeersup sakkutoorpassuinit saassunneqassapput. (Hesekiel 38:1–39:13; sarĸúmersitat 17:1-5, 16-18) Satanip saassussinissaa iluatsissava? Naamik! Saassussilerpat Jehovap kamalluni akeqqani ’tullaarissavai’. Anersaakkulli ittumik ilumoortumillu pallorfiginnitsini annaatissavai. — Juánase 4:24.

13. Habakkuk 3:13 qanoq ililluni eqquutissava?

13 Guutiitsut piuneerusaalluinnarnissaat ima siulittuutigineqarpoq: „Aallarputit [Jehova] innuttatit annaakkiartorlugit, tanitat aniguisikkiartorlugu. Sequmisippat guutiitsup illuata qarmaa teqeqquusoq illup tunngavia qaarsoq nuisillugu.“ (Habakkuk 3:13) ’Illu’ taanna tassaavoq aaqqissuussaaneq ajortoq Satanip sunniineratigut ineriartortinneqarsimasoq. Nungutinneqarluinnassaaq. ’Illup qarmaa teqeqquusoq’ imaluunniit siulersuisut guutiitsut piuneerunneqarluinnassapput. Aaqqissuussaaneq tunngavianut allaat piuneerunneqassaaq. Piujunnaassaaq. Ila, eqqissiallannassaqaaq!

14-16. Habakkuk 3:14, 15 naapertorlugu Jehovap innuttai taassumalu akerai qanoq atugaqassappat?

14 Harmagedonimi Jehovap ’tanitaanik’ nungutitsiniartut paatsiveerutissapput. Habakkuk 3:14, 15 naapertorlugu pruffiitip Guuti ima oqarfigaa: „Qarsunnik putuatit akeqqavit naalagartaasa niaqui taakku pitoraammata qimaatinniarluta, nuannaapilulermata sanngiitsunik isertorsimasunik nungutitsiniartutut. Hestinnik immakkut qimusseravit imarsuaq ittuppoq.“

15 Habakkuk oqarami ’akeqqavut pitoraammata qimaatinniarluta’ Jehovap kiffai tanitat sinnerlugit oqaluppoq. Aqqusinerni ujajaaniat assigalugit inuiaqatigiit Jehovamik pallorfiginnittut piuneerunniarlugit terlinganeerniassavaat. Guutip akerai taakkualu innuttai ’nuannaapilussapput’ iluatsitsilersoralutik. Kristumiut ilumoortut ’sanngiippasipput’. Guutilli akerai saassussilerpata, imminnut sorsulernissaat Jehovap isumagissavaa. Sakkutik, imaluunniit ’qarsutik’, namminneq sakkutuuminnut atulissavaat.

16 Allanik suli pisussaqarpoq. Jehovap anersaat inunnit pissaaneqarnerusut atussavai akeqqani  piuneerutilerunigit. Katersaarsuit qilammiusut assersuutaasumik hestit Jesus Kristusimit siulersorneqartut atorlugit ’immakkut’ ’imarsuakkullu’, tassa inuiaat guutiitsut imarsuatigut mallersukkut, ajugaassaaq. (sarĸúmersitat 19:11-21) Tamatuma kingunerisaanik guutiitsut nunarsuarmiikkunnaassapput. Guutip pissaaneranik naapertuilluassusianillu tupinnartumik takutsineruvoq!

Jehovap ullua nalliutissaaq!

17. (a) Sooq qularinngilarput Habakkukip siulittuutaa eqquutissasoq? (b) Jehovap ullussarsua utaqqitillugu qanoq ililluta Habakkuk malinniarsinnaavarput?

17 Qularisariaqanngilarput Habakkukip allagai qanittukkut eqquutissasut. Kingusinnaassanngillat. Siumut ilisimatinneqarneq tamanna qanoq qisuariarfigaarput? Eqqaamajuk Habakkuk Guutimit isumassarsisitaalluni allassimasoq. Jehova akuliutissaaq, nunarsuarmilu aseruinerit annertussaqaat. Taamaattumik tupinnanngilaq pruffiiti allassimammat: „Tamanna tusarakku timiga sajuppoq, qanngulunneranit allerulaarpunga. Saanikka aasutut ilerput, patajallungalu pisuttalerpunga. Utaqqivara ulloq annikilliorfissaq, inuiaat uatsinnik ujajaaffiginnittut annikilliorfissaat!“ (Habakkuk 3:16) Tupinnanngilaq Habakkuk ersisorujussuummat. Uppernikilliva? Naamerluinnaq!  Jehovap ullussarsua eqqissilluni utaqqiumavaa. (2 Pîtruse 3:11, 12) Uaguttaaq taamaaliortariaqannginnerpugut? Uffami! Habakkukip siulittuutaata piviusunngornissaa tatigilluinnarparput. Naammagittarluta utaqqissavarput.

18. Annikilliussamaaraluarluni Habakkuk qanoq isiginnittaaseqarpa?

18 Sorsunnerit tamatigut annikilliornernik nassataqartarput, aamma ajugaasunut. Nerisassaaleqisoqarsinnaavoq. Pigisanik annaasaqartoqarsinnaavoq. Immaqa inuit pissarissaarpallaarunnaassapput. Uagut eqqorneqarutta qanoq qisuariassaagut? Habakkukip isiginnittaasia ilinniarfigisinnaavarput, ima oqarmat: „Orpik figeneqartartoq inerititaqanngikkaluarpalluunniit viinneqqullu viinnissanik naatitsinani, orpik oliveneqartartoq inerititaqanngikkaluarpalluunniit narsaatillu nerisassarsiffigineqaratik, savaatit ungaluliamit piiagaagaluarpataluunniit nersutaatillu inaanni ussinnik amiakkuerulluni — taamaakkaluartoq [Jehova] qiimmattaatigissavara, Guuti annaassisiga tipaatsuutigalugu.“ (Habakkuk 3:17, 18) Habakkuk piviusorsiorpoq — nalunngilaa annikilliornartoqarsinnaasoq, allaallu kaannersuaqarsinnaasoq. Taamaattoq Jehova nuannaarutigiuaannarpaa, taanna annaassisigigamiuk.

19. Kristumiorpassuit annikilliuutinik sunik eqqorneqartarpat, inooriaasitsinnilu takutikkutsigu Jehova salliutillugu suna qulakkeersinnaavarput?

19 Ullumikkut, Jehovap guutiitsut suli sorsuffigilinngikkai, inuppassuit annikilliornangaartumik eqqorneqartarput. Jesusip siulittuutigaa ilaatigut sorsunnerit, kaannersuit, nunap sajuttarneri nappaalanersuillu kunngitut ’najuunnissaminut nalunaaqutaassasut’. (Matîuse 24:3-14; Lúkarse 21:10, 11) Uppeqatitta ilarpassui Jesusip oqaasiisa eqquunnerinit nunani eqqugaangaartuni inuupput, taamaattumillu annikilliortaqaat. Siunissami Guutip kiffaasa ilaat allat immaqa aamma taamatut eqqorneqassapput. Naggatissaq nalliutsinnagu immaqa ilarpassuatta ’orpiup figeneqartartup inerititaqanngitsoornera’ misigiumaarpaat. Nalunngilarpulli sooq taama pisoqartartoq, tamatumalu nakussatsittarpaatigut. Aammattaaq kisimiinngilagut. Jesusip ima neriorsorpaatigut: ’Guutilli naalagaaffia iluarnerlu taassuma pia piniaqqaarsigik, taava tamakku tamaasa ilanngullugit piumaarpasi.’ (Matîuse 6:33) Tamanna isumaqanngilaq ajornartorsiuteqarata inuussasugut. Neriorsuutaavorli inooriaasitsinni takutikkutsigu Jehova salliutillugu paarissagaatigut. — Tussiaat 37:25.

20. Qanorluunniit ajornartorsiuteqarallaraluarluta suna aalajangiulluinnartariaqarparput?

20 Taamaattumik qanorluunniit ajornartorsiuteqallaraluarluta Jehovap annaassisinnaanera qularilertariaqanngilarput. Qatannguterpassuatta Afrikami Europallu kangiani allanilu inuusut annikilliornartorpassuit atortariaqarpaat, sulili ’Jehova qiimmattaatigisarpaat’. Uaguttaaq taamaaliorta. Eqqaamajuk Naalagaq Jehova kisimi oqartussaasoq ’pissassaatigigipput’. (Habakkuk 3:19) Pakatsisinngisaannassavaatigut. Harmagedonissasoq qularutissaanngilaq, taavalu Guutip neriorsuineratut silarsuassaq nutaaq kingunerissavaa. (2 Pîtruse 3:13) Taamanikkussaq ’Jehovap naalannassusianik ilisarsinerup nuna tamakkissavaa soorlu ermit matoqqagaat immap naqqa’. (Habakkuk 2:14) Taama pisoqartinnagu Habakkukip maligassaalluarnera malinniartigu. Tamatigut ’Jehova qiimmattaatigisigu, Guuti annaassiserput tipaatsuutigalugu’. (wE 1/2 2000)

Eqqaamavigit?

Habakkukip qinnutaa uatsinnut qanoq pingaaruteqarsinnaava?

Suna pillugu Jehova saassussiva?

Habakkukip siulittuutaata annaanneqarnissaq pillugu sumik paasitippaatigut?

Jehovap ullussarsua utaqqitillugu qanoq isiginnittaaseqartariaqarpugut?

[Atuaqqissaarnermi apeqqutit]

[Qupp. 23-mi assiliartaq]

Nalunngiliuk pissaanerit suut Guutip Harmagedonimi guutiitsunut atussagai?