Imarisai

Imarisai

 ATUAQQISSAAGASSAQ 36

Harmagedoni qilanaarisassaavoq!

Harmagedoni qilanaarisassaavoq!

‘Katersor­paalu Harmagedonimut.’ – SAQQ 16:16.

ERINARSUUT 149 Ajugaanermi erinarsuut

QILANAARTUUT *

1-2. (a) Sooq Harmagedoni qilanaarisas­saava? (b) Al­laaserisami apeq­qutit suut sam­mis­savavut?

INUIT ilaasa oqaaseq “Harmagedoni” tusaraangamik­ku atombombinik sorsun­neq pin­ngor­titamiluun­niit ajunaar­nersuaq eq­qarsaatigisar­paat. Biibilili naaper­torlugu Harmagedoni qilanaarisas­saavoq nuan­naarutigisas­sar­put. (Saqq 1:3) Sorsun­neq Harmagedoni inun­nik tamanik piuneerutsitsif­fiunani an­nas­sutaas­saaq. Qanoq?

2 Biibilimi ersersin­neqar­poq sorsun­nermi Harmagedonimi inuit naalak­kersuinerisa atorun­naarsin­nerisigut inuit an­naan­neqas­sasut. Sorsun­nermilu tamatumani ajor­tut piuneerun­neqar­pata naaper­tuil­luar­tut aniguisin­nerisigut inuit an­naan­neqas­sap­put. Aam­ma nunarsuarmik aseruisut nungutin­nerisigut inuit an­naan­neqas­sap­put. (Saqq 11:18) Ilumoor­tut taak­ku paasil­luarumal­lugit apeq­qutit sisamat sam­meriar­tigit: Harmagedoni sor­piaava? Nal­liutingajaler­pat susoqas­sava? Harmagedonimi qanoq aniguisunut ilaasin­naavugut? Harmagedonilu qanil­liar­tor­til­lugu qanoq aalajaat­tuarsin­naavugut?

HARMAGEDONI SORPIAAVA?

3. (a) Oqaaseq “Harmagedoni” qanoq isumaqar­pa? (b) Saq­qum­mersitat 16:14, 16-imilu qanoq erser­pa Harmagedoni sumiif­fiun­ngitsoq?

3 Saqqummersitat 16:14, 16 atuakkit. Oqaaseq “Harmagedoni” Biibilimi ataasiaan­narluni eq­qaaneqar­poq, oqaatsimil­lu hebræerisuumit Megiddop qaq­qaanik isumaqar­tumit naggueqar­poq. Megiddo itsaq Israelimi il­loqarfiuvoq. (Jos 17:11) Harmagedonili sumiif­fim­mut nunarsuarmiit­tumut sumul­luun­niit in­nersuus­sutaan­ngilaq. Tas­saavorli ‘silarsuarmi tamarmi kun­ngit’ Jehovamut akerlilersuiniarlutik katersuun­nerat. (Saqq 16:14) Al­laaserisamili oqaaseq “Harmagedoni” silarsuarmi tamarmi  kun­ngit katersuun­nerisa kingor­na sorsun­nermut aam­ma in­nersuus­sutaas­saaq. Qanoq nalun­ngilar­put Harmagedoni sumiif­fim­mut as­sersuutaasumut in­nersuus­sutaasoq? Siul­ler­tut, Megiddomi qaq­qaqan­ngilaq. Aap­paat­tut, Megiddomi eq­qaanilu ‘silarsuarmi tamarmi kun­ngit’, taak­kua sak­kutuui sorsuutil­lu ataatsimut katersuun­nis­samut inis­saqan­ngil­lat. Pingajuat­tut, soorlu al­laaserisami sam­mis­sagip­put sorsun­neq Harmagedoni aal­lar­tis­saaq nunarsuarmi kun­ngit Guutip in­nut­taanik nunarsuarmi tamarmi siam­marsimasunik saas­sus­sip­pata.

4. Sooq Jehovap inaarutaasumik sorsun­nis­sani sumiif­fim­mut Megiddomut atas­suser­paa?

4 Sooq Jehovap inaarutaasumik sorsun­nis­saq Megiddomut atas­suser­paa? Itsaq Megiddomi tamatumalu ungasin­ngisaani, Jizre’elip narsar­taani, arlalip­pas­suariarluni sorsut­toqar­tarsimavoq. Jehova ilaatigooriarluni in­nut­tani sumiif­fin­ni taak­kunani sorsut­tut ajugaasit­tar­pai. As­sersuutigalugu “Megiddop kuuisa eq­qaan­ni” Guutip eq­qar­tuus­sisoq Baraki ikior­paa Kana’anik­kut sak­kutuui Siseramit aqun­neqar­tut ajugaaf­figeq­qul­lugit. Barakip Deboral­lu pruf­fiitiusup tupin­nar­tulior­nik­kut ajugaasin­neqar­nermin­nut Jehova qutsavigaat. Ima erinarsor­put: “Ul­loris­sat qilam­miit ... Sisera sorsuf­figaat. Kuugup­paa kuun­nguup Kishonip.” – Eqq 5:19-21.

5. Sorsun­neq Harmagedoni Barakil­lu nalaani sorsun­neq qanoq pingaarutilim­mik as­sigiin­ngis­suteqar­pat?

5 Barakip Deboral­lu erinarsor­ner­tik ima naggaser­paat: “Taamatut nungutitaas­sap­put akeq­qatit tamarmik, Naalagaq. Ilin­nil­li asan­nit­tut ik­kumaar­put seqiner­tut pis­saaneqangaarluni nuilersutut.” (Eqq 5:31) Aam­ma Harmagedonimi Guutip akerai nungutitaas­sap­put Guutimil­lu asan­nit­tut aniguisin­neqarlutik. Sorsun­nerli Harmagedoni Barakil­lu nalaani sorsun­neq pingaarutilim­mik as­sigiin­ngis­suteqar­put. Harmagedonimi Guutip in­nut­tai sorsoqataas­san­ngil­lat. Al­laam­mi sak­kulersor­navian­ngil­lat! Jehovamik taas­sumalu sak­kutuuinik qilam­miusunik ‘utaq­qil­luaan­nar­ner­tik tatigin­nin­ner­til­lu nakuus­sutigis­savaat’. – Es 30:15, Testamentitoqaq; Saqq 19:11-15.

6. Harmagedonimi Jehovap akeq­qani im­maqa qanoq ajugaaf­figis­savai?

6 Harmagedonimi Guutip akeq­qani qanoq ajugaaf­figis­savai? Iliuuserisin­naasai arlaqar­put. As­sersuutigalugu nunamik sajutsitsisin­naavoq, nataq­qor­nar­titsil­luni in­naal­latsitsil­lunilu. (Job 38:22, 23; Ez 38:19-22) Akeq­qani im­min­nut akiuutsilersin­naavai. (2 Nal 20:17, 22, 23) Aam­ma in­ngilini aq­qutigalugit ajor­tut toqutaatis­sin­naavai. (Es 37:36) Qanorluun­niil­li ik­kaluar­pat Guuti ajugaas­saaq! Akerai tamarmik nungutin­neqas­sap­put, Jehovamil­lu iluarisaasut tamarmik aniguisin­neqarlutik. – Uss 3:25, 26.

HARMAGEDONI NALLIUTINGAJALERPAT SUSOQASSAVA?

7-8. (a) Thes­salonikamiunut al­lak­kat siul­liit 5:1-6 naaper­torlugit nunarsuarmi naalak­kersuisut qanoq nalingin­naan­ngitsumik nalunaaruteqas­sap­pat? (b) Sooq taman­na sal­luliuutaas­sava ajoqutaasoq?

7 “Naalak­kap [Jehovap, NW] ul­lus­saa” sioq­qul­lugu ‘aar­lerinar­toqan­ngin­neraaneq’. (1 Thes­salonikamiut 5:1-6 atuak­kit). Jehovap ul­lus­saa Thes­salonikamiunut al­lak­kat siul­liit 5:2-mi eq­qaaneqar­toq ‘an­nikil­lior­titaangaar­nermut’ in­nersuus­sutaavoq. (Saqq 7:14) Qanoq ilisimasin­naavar­put an­nikil­lior­nar­tus­sarsuaq aal­lar­tingajalersoq? Biibilimi al­laatigineqar­poq nalingin­naan­ngitsumik nalunaaruteqar­toqarumaar­toq. Taman­na an­nikil­lior­nar­tus­sarsuup aal­lar­tin­neranut nalunaaqutaas­saaq.

8 Nalunaarutigineqar­tus­saq tas­saavoq ‘aarlerinar­toqan­ngin­neraaneq’. Nunarsuarmi naalak­kersuisut sooq taama nalunaaruteqas­sap­pat? Qulak­keerlugu ilisiman­ngilar­put. Up­perisarsior­nik­kut siut­tut peqataas­sap­pat?  Ilimanar­poq. Nalun­ngilar­pul­li nalunaarut taman­na sal­luliuutaas­sasoq anersaapilun­nit pisoq. Sal­lu taan­na ajoqutaangaas­saaq, inun­nim­mi misigilersitsis­sagami aarlerinar­toqan­ngitsoq, uf­fa inuit oqalut­tuarisaaneran­ni an­nikil­lior­nar­tuni an­ner­paaq aal­lar­tilersoq. Aap, “perlus­sap tas­san­ngaan­naq tikik­kumaar­pai er­nilersup nal­lisitsisar­neratut”. Jehovam­mi kif­fai aalajaatsut? Imaas­sin­naavoq Jehovap ul­lus­saata tas­san­ngaan­naq aal­lar­tin­nera tupaal­laatigis­sagaat, piareersimas­sap­pul­li.

9. Saatanip silarsuaa Jehovap ataatsik­kut suujun­naarsis­savaa? Nas­suiaruk.

9 Jehova Noap nalaani iliorsimanermisut Saatanip silarsuaanik ataatsik­kut suujun­naarsitsis­san­ngilaq. Im­mik­koor­toq ataaseq piuneeruteriarlugu sin­nera kingor­natigut suujun­naarsis­savaa. Siul­ler­tut suujun­naarsitas­saa tas­saavoq Babylonersuaq, nunarsuarmi tamarmi up­perisarsior­neq eq­qun­ngitsoq. Taava sorsun­nermi Harmagedonimi Saatanip silarsuaata sin­nera, tas­sa politik­kik­kut, sak­kutooqar­nik­kut niuer­nik­kul­lu aqutsinera, suujun­naarsis­savaa. Pisus­sat pingaarutil­lit taak­ku marluk maan­na sukumiisumik sam­meriar­tigit.

10. Saq­qum­mersitat 17:1, 5, 6-ilu aam­ma 18:24 naaper­torlugit sooq Jehovap Babylonersuaq suujun­naarsis­savaa?

10 “Ar­nar­suup ator­tit­tar­tup ... eq­qar­tuun­neqar­nera.” (Saq­qum­mer­sitat 17:1, 5, 6; 18:24 atuak­kit). Babylonersuup Guutip aq­qa kan­ngunarsangaarsimavaa. Guuti pil­lugu sal­luliuutinik ajoqersuisimavoq. Jehova ilumoorfiginagu nunarsuarmi naalak­kersuisunik tapersersuivoq taamaalil­lunilu im­minut anersaak­kut ator­tit­tar­tun­ngor­til­luni. Pis­saaneqar­nermini im­minik malin­nit­tut naqisimal­lugil­lu ator­nerlus­simavai. Aam­ma inup­pas­suar­nik, al­laam­mi Guutip kif­faanik, toqutsisimavoq. (Saqq 19:2) Jehovap Babylonersuaq qanoq suujun­naarsis­savaa?

11. ‘Nersut an­noraas­satut aap­pal­laris­sutut aap­palutsigisoq’ suua, Babylonersuarmul­lu tun­ngatil­lugu Guutimit qanoq ator­neqas­sava?

11 ‘Nersutip an­noraas­satut aap­pal­laris­sutut aap­palutsigisup’ ‘nas­sui qulit’ aq­qutigalugit Jehovap ‘ar­narsuaq ator­tit­tar­toq’ piuneerutis­savaa.  Nersut taan­na Naalagaaf­fin­nut Peqatigiin­nut, tas­sa FN-imut, as­sersuutaavoq. Nas­suit qulit tas­saap­put peqatigiif­fim­mik tamatumin­nga naalagaaf­fiit tapersersuisut. Guutip pif­fis­sarititaani politik­kik­kut pis­saanil­lit taak­kua Babylonersuaq saas­sutis­savaat. Pisuus­sutaanik arsaar­neratigut qanorlu ajor­tiginerata qulaajar­neratigut ‘suerul­lugulu tamataarutitis­savaat’. (Saqq 17:3, 16) Suujun­naarsin­neqariasaar­nera “ul­lormi ataatsimi” pisutut is­saaq. Taman­na taas­sumin­nga tapersersuisimasunut tupaal­laataas­saaq, sivisuumim­mi pingaakujul­luni ima oqar­tarsimavoq: “Dron­ningiul­lunga is­siavis­saarsuan­ni is­siavunga uil­lar­nerunangalu, aliasun­nar­tunil­lu misigisaqan­ngisaan­nas­saanga.” – Saqq 18:7, 8.

12. Jehovap in­nut­taminut tun­ngatil­lugu suna akuerinavian­ngilaa, aam­ma sooq?

12 Jehovap in­nut­tami suujun­naarsin­neqar­nis­saat akuerinavian­ngilaa. Taak­kua Guutip aq­qanik taaguuteqar­ner­tik tul­luusimaarutigaat, Babylonersuarmiil­lu aneq­quneqar­ner­tik naalas­simavaat. (ApS 15:16, 17; Saqq 18:4) Aam­ma al­lat Babylonersuup qiman­nis­saanut ikior­niarlugit ilungersorsimap­put. Taamaat­tumik Jehovap in­nut­tai Babylonersuup ‘perluutaanik eq­qor­neqas­san­ngil­lat’. Up­per­nermik­kul­li misilin­neqas­sap­put.

Guutip in­nut­tai sumiik­kaluar­tul­luun­niit saas­sun­neqarunik Jehova tatigis­savaat (Im­mik­koor­toq 13 takuuk) *

13. (a) Gogi sunut as­sersuutaava? (b) Ezekieli 38:2, 8, 9-lu naaper­torlugit sooq Gogi Guutip in­nut­taanik saas­sus­sis­sava?

13 Gogip saas­sus­sinera. (Ezekieli 38:2, 8, 9 atuak­kit). Up­perisarsior­nerit eq­qun­ngitsut tamarmik suujun­naarsin­neqareer­pata Guutip in­nut­tai kisiar­taal­lutik nunarsuarmi up­perisarsior­tuus­sap­put. Saatani soorunalimi kamat­torsuus­saaq. Kaman­nini ersersil­lugu “anersaat mingut­tuut” aq­qutigalugit inuiaat eqimat­tat sal­loqit­tas­savai Jehovap in­nut­taanik saas­sus­silersil­lugit. (Saqq 16:13, 14) Inuiaat eqimat­tat taak­ku tas­saap­put ‘Gogi Magogimi nunaqar­toq’. Inuiaat saas­sus­siler­pata sorsun­neq Harmagedoni aal­lar­tis­saaq. – Saqq 16:16.

14. Gogip suna paasis­savaa?

14 Gogip ‘talini’, tas­sa sak­kutooqar­nik­kut pis­saanini, tatigis­savaa. (2 Nal 32:8) Uagut  Jehova Guuter­put tatigis­savar­put, taman­nali inuit isaan­ni sianiitsulior­nerus­saaq. Sooq? Babylonersuaq pis­saaneqarsimasoq ‘nersum­mit’ ‘nas­sun­nil­lu qulinit’ saas­sun­neqarami guutiminit an­naan­neqarsiman­ngim­mat. (Saqq 17:16) Taamaat­tumik Gogip ajugaariaan­naanini ilimagis­savaa. “Nuis­satut major­tutut” Jehovap in­nut­tai saas­sutis­savai. (Ez 38:16) Gogil­li paasis­savaa ajugaasin­naanani. Im­mami Aap­palaar­tumi Faraop pisimaneratut Jehovamut unam­mil­lersimanini Gogip paasis­savaa. – 2 Mos 14:1-4; Ez 38:3, 4, 18, 21-23.

15. Harmagedonimi Jiisusi sus­sava?

15 Qilam­mi katersaarsuit Kristusimit siulersor­neqarlutik Guutip in­nut­taanik il­lersuis­sap­put Gogil­lu sak­kutuuinik suujun­naarsitsil­lutik. (Saqq 19:11, 14, 15) Jehovamum­mi akeraaner­paasoq, Saatani, inuiaat sal­loqit­tarlugit Harmagedonimi Guutip in­nut­taanik saas­sus­silersitsisoq qanoq pineqas­sava? Taas­suma in­ngilipilui ilan­ngul­lugit Jiisusip itinersuarmut nak­kar­tis­savai ukiul­lu 1.000-t par­naarul­lugit. – Saqq 20:1-3.

HARMAGEDONIMI QANOQ ANIGUISINNAAVIT?

16. (a) ‘Guuti ilisimal­lugu’ qanoq ersersis­savar­put? (b) Harmagedonimi ‘Guutimik ilisiman­nit­tut’ qanoq pineqas­sap­pat?

16 Ukior­pas­suar­ni sal­lusuis­sum­miis­simaner­put apeq­qutaatin­nagu Harmagedonimi aniguiumal­luta ‘Guuti ilisimal­lugu’ ‘naalak­kamil­lu Jiisusimik iivangkiiliumut naalal­luta’ ersersit­tariaqar­par­put. (2 Th 1:7-9) Guutip nuan­narisai, nuan­narin­ngisai najoq­qutas­siaalu ilisimagutsigit ‘Guuti ilisimas­savar­put’. Aam­ma asaneratigut, naalan­neratigut taan­nalu kisiat pal­lorfigineratigut ersersis­savar­put Jehova ilisimal­lugu. (1 Joh 2:3-5; 5:3) Guuti ilisimal­lugu ersersik­kutsigu ‘taas­suman­nga ilisimaneqas­saagut’, tas­sa akuerisaas­saagut. (1 Kor 8:3) Taman­na Harmagedonimi aniguis­sutigis­savar­put.

17. ‘Naalak­kamik Jiisusimik iivangkiiliumut’ naalan­neq qanoq paasisariaqar­pa?

17 ‘Naalak­kamik Jiisusimik iivangkiiliumut’ ilaap­put sal­lusuis­sutit Jiisusip ajoqersuutigisai tamarmik Biibilimi atuar­neqarsin­naasut. Taak­ku naalat­tar­pavut inuunitsin­nut sun­niuteqar­tin­nerisigut.  Naalan­nermut ilaap­put Jehovamut kif­far­tor­nermik pingaar­ner­paatitsineq, Guutip najoq­qutas­siaanik naaper­tuil­luar­tunik naalan­neq naalagaaf­fialu pil­lugu oqaluus­sineq. (Matt 6:33; 24:14) Kiisalu Kristusip qatan­ngutaasa tanitat pingaarutilim­mik suliaqar­neran­ni tapersersor­nerisigut naalat­tar­pugut. – Matt 25:31-40.

18. Kristusip qatan­ngutaasa tanitat ajun­ngisaarfigineqar­neran­nik qujamasun­ner­tik qanoq ersersis­savaat?

18 Guutip kif­faasa tanitat ‘savanit al­lanit’ ajun­ngisaarfigineqar­neran­nik qujamasun­ner­tik qanit­tuk­kut ersersis­savaat. (Joh 10:16) Qanoq? Sorsun­neq Harmagedoni aal­lar­titsin­nagu tanitat 144.000-t tamarmik toqujuis­suseqalersin­neqarlutik anersaajusutut qilaliar­titaasimas­sap­put. Taava qilam­mi katersaarsuar­nut ilaal­lutik Gogimik suujun­naarsitseqataas­sap­put taamatul­lu Jehovap in­nut­tai ‘amerlangaar­tut’ il­lersorlugit. (Saqq 2:26, 27; 7:9, 10) Taamanik­kus­samut ‘savat al­lat’ nuan­naangaas­sap­put tanitat nunarsuarmiik­kal­larmata tapersersorsimagamik­kit!

NAGGATISSAP QANILLIAR­TORNERANI QANOQ AALAJAAS­SIN­NAAVUGUT?

19-20. Qanorluun­niit misilin­neqaraluarut­ta Harmagedonip qanil­liar­tor­nerani qanoq aalajaas­sin­naavugut?

19 Ul­lut kingul­liit inuuf­figisavut Jehovamut kif­far­tor­tunut amerlasuunut misilin­neqaataap­put. Taamaak­kaluar­toq nuan­naarluta piner­tusaarsin­naavugut. (Jaak 1:2-4) Qaman­nga pisumik qinusar­neq iluaqutaangaar­poq. (Luk 21:36) Qinunerli naam­man­ngilaq. Guutip oqaasiani al­las­simasunik, soorlu nalitsin­ni pisus­sanik siulit­tuutinik, ul­lut tamaasa atuaq­qis­saar­neq eq­qarsaatigin­neq­qis­saar­nerlu pisariaqar­put. (Tuss 77:13) Taamaalior­tarut­ta oqaluus­sinermilu sapin­ngisatsin­nik iliuuseqar­tarut­ta up­per­ner­put nakus­satsil­lugulu neriuutigisat­ta piviusun­ngor­nis­saat up­perinerulis­savar­put.

20 Takorlooruk Babylonersuaq suujun­naarsin­neqareer­pat Harmagedonilu qaangiup­pat qanoq nuan­naar­tigis­sanersutit! Pingaar­ner­tul­lu Guutip aq­qa qutsis­sisin­neqareer­pat Jehoval­lu kisimi oqar­tus­saanerata eq­qor­tuunera up­per­narsar­neqareer­pat pil­luangaar­nis­sat takorlooruk! (Ez 38:23) Aap, Guutimik ilisiman­nit­tunut, Er­neranik naalat­tunut naggatis­samul­lu aalajaatsunut Harmagedoni qilanaarisas­saavoq! – Matt 24:13.

ERINARSUUT 77 Silarsuarmi taar­tumi qaamaneq

^ imm. 5 Jehovap in­nut­taasa Harmagedoni sivisuumik utaq­qisimavaat. Harmagedoni sor­piaanersoq, nal­liutingajaler­nerani susoqas­sanersoq naggatis­sal­lu qanil­liar­tor­nerani qanoq aalajaat­tuarsin­naanerluta al­laaserisami sam­mis­savavut.

^ imm. 71 ASSIMI MALUGISASSAT: Pisus­sat pis­sanganar­tut misigiumaar­pavut. (1) Pif­fis­saatil­lugu oqaluus­siuas­saagut, (2) aalajangersimasumik atuaq­qis­saar­tuas­saagut aam­ma (3) Guutip il­lersuinera tatigiuarlugu.

^ imm. 85 ASSIMI MALUGISASSAT: Politiit angerlarsimaf­fim­mut tamaviaarus­sil­lutik isaalersut. Nalunaajaasul­li tas­sani najugal­lit Jiisusimit in­ngilinil­lu malin­naaf­figineqar­ner­tik tatigaat.