Imarisai

Imarisai

Qarasaasiakkut pinnguaatit ineriartupiloortut

Qarasaasiakkut pinnguaatit ineriartupiloortut

 Qarasaasiakkut pinnguaatit ineriartupiloortut

„Qarasaasiakkut pinnguaat ukioq kingulleq tunineqarnerpaaq tassaavoq Grand Theft Auto 3,“ atuagassiaq „Newsweek“ ilisimatitsivoq. Pinnguaatip siunertaraa pinerlunniaqatigiinni qaffakkiartornissaq, soorlu atortittartoqarfimmik ingerlatsinermi toqutsisarnermilu. „Iliuuserisatit tamarmik kinguneqassapput,“ atuagassiaq allappoq. Biili tillitaq atorlugu pisuinnartoq aporneqarpat politiit malersuissapput. Politiit ilaat aallaaneqarpat FBI akuliutissaaq. FBI-milu paasiniaasartoq toqunneqarpat sakkutuut toqutsiniaassapput. Pinnguaat inunnut 17-init qummullu ukiulinnut naatsorsuussaavoq, ukiukinnerusunulli tunineqartareerluni. Oqaatigineqarpoq allaat aqqaneq-marlunnik ukiullit pinguaatigerusuttaraat.

QARASAASIAKKUT pinnguaat siulleq, Spacewar, 1962-imi pilersinneqarpoq. Pinnguaatip siunertaraa ujaqqanik silaannarsuarmeersunik akeqqanillu silaannarsualiartaatinik aallaallugit nakkaatitsinissaq. Tamatuma kingorna pinnguaatit tassunga assingusorpassuit pisiassaalerput. Inuit amerliartuinnartut 1970-ikkunni 1980-ikkunnilu sukkanerusunik qarasaasiartaartorneri ilutigalugu, qarasaasiakkut pinnguaatit aamma nalinginnaagaluttuinnarput. Pinnguaatit pisimasulersaarutit, eqquiniutit, pilersaarusiorfiit pissanganartuliallu ineriartortinneqarsimapput. Assersuutigalugu illoqarfinnik inoqarfinnillu aqutsinissamut pilersaarusiornernik alliartornerinullu aqutsinernik pinnguaateqarpoq. Pinnguaatit ilarpassui timersuutinik ilaarsinerupput, soorlu ishockey aamma golf.

Pinnguaateqarpoq nersualaarneqartorujussuarnik ilinniarfigineqartarnitik aliikkutaasarnitillu pissutigalugit. Pinnguaatit ilaanni timmisartorujussuaq nunnitsinniarneqarsinnaavoq, biilinik sukkanniuuttoqarsinnaalluni, qimuttuitsortoqarsinnaalluni, snowboardertoqarsinnaalluni nunarsuarluunniit tamaat angalaffigineqarsinnaalluni. Pinnguaatilli sakkortuut ilaat, soorlu igeriarit-toqutsigillu-mik taaneqartartut, nakuusertortaqarneri pissutigalugit isornartorsiorneqakkajuttarput. Pinnguaatinik pinnguartoq sakkussaminik toqqaasarpoq, taamaaleriarluni akeqqat assigiinngitsut aallaallugit toqorartarlugit, inuit uumasulluunniit.

Onlinespil — nuannarineqartoq nutaaq

Nuna Britannia 230.000-inik assigiinngitsorpassuarnik inoqarpoq, ilaatigut sakkutuunik, atisaliortunik, saffiuunik nipilersortartunillu. Sorsuttarput, illoqarfiliortarlutik, niuertarfinnik ammaasarlutik, katittarlutik, toqusarlutik. Britanniali piviusuunngilaq. Ukiuni akullerni illoqarfiuvoq piviusuunngitsoq — qarasaasiakkut interneti aqqutigalugu pinnguartut tamarmik imminnut ataatsikkut unammisarfiat, aamma onlinespilimik taaneqartartoq. Pinnguaatit taamaattut nuannarineqaraluttuinnarput, qarasaasiakkullu pinnguaatini nuannarineqarnerpaanngussasut ilimagineqarpoq. Ultima Online, 1997-imi internetikkut pinnguaatigineqarsinnaasoq siulleq saqqummersinneqarpoq, tassanilu nuna takorluugaannaq Britannia ilaavoq. Tamatuma kingorna onlinespilerpassuit takkussuupput, sulilu allat takkutingajalerlutik.

Pinnguaatit taamaattut allaassutigaat pinnguaammi inuit uumasulluunniit atorneqartut qarasaasiamit aqunneqanngimmata, internetimilli atuisunit pinnguaqataasunit aqunneqarmata. Pinnguaatigineqartumi ataatsimi inuit tusindillit arlallit peqataasinnaapput. Isumaqartoqarpoq Ultima Online ilaanni nunaniit 114-ineersunit ataatsikkut peqataaffigineqarsimasoq. Pinnguaatit tamakkua nuannarineqarnerujussuinut pingaartumik peqataasut allat attaveqarfigineqarsinnaanerinik pissuteqannguatsiarpoq. Peqataasut imminnut qarasaasiakkut oqaloqatigiissinnaapput, taamaaliornermikkullu misigilersinnaallutik nunarsuarmioqatigiinnut ataatsimoortunut tamanut ilaallutik.

Iluanaarnartoq

Qarasaasiakkut pinnguaatiliortartut siunissaq isumalluarfigeqaat. 1997-imi Amerikami qarasaasiakkut pinnguaatiliortartut ukiumut 5,3 milliardit dollarit kaaviiaartippaat, nunarsuarlu tamakkerlugu  minnerpaamik 10 milliardit dollarit nalinginik pinnguaatinik tunisisoqarluni. Appariartorpasinngillat. Ilimagineqarpoq qarasaasiakkut pinnguaatinik tunisisarneq ukiuni tulliuttuni tallimani 50-75 procentit tungaanut amerleriaateqassasoq.

Teknikkikkut atortunik misissueqqissaartarfik Forrester Research naapertorlugu inuit millionit sinnerlugit internetikkut pinnguaatinik assigiinngitsunik pinnguaqataasarput, isumaqartoqarporlu internetikkut sukkanerusumik atassuteqarasuartitsisartumik, bredbåndsnetimik taaneqartartumut, attaveqaasertartut amerliartortillugit onlinespilinik taaneqartartut soqutigineqaraluttuinnassasut. Meeqqat mikinerminiilli qarasaasiamik pinnguartarsimasut ukioqqortusigaangamik pinnguaatinik pinnguarnissaq kajumigiunnaariartortanngilaat. Ukiorpassuarni qarasaasiakkut pinnguaatinik pinnguartartoq oqarpoq: „Ikinngutit sumiikkaluartulluunniit attaveqatiginissaannut qarasaasiakkut pinnguaatinik pinnguarneq periarfissiisimavoq.“

Qarasaasiakkut pinnguaatit tamarmik pinnguaataappat ajoqutaanngitsut, imaluunniit sianigisassaqarpat? Apeqqut taanna samminerulaariartigu.