Imarisai

Imarisai

Arnanut nakuuserfigineqartartunut iluaqutissat

Arnanut nakuuserfigineqartartunut iluaqutissat

 Arnanut nakuuserfigineqartartunut iluaqutissat

ARNAT nakuuserfigineqartartut ikiorniarlugit qanoq iliortoqarsinnaava? Siullermik atugarliungaarnerat paasineqartariaqarpoq. Amerlasuutigut nuliamik nakuuserfiginittarneq timikkut ajoqusiinerinnaasanngilaq. Aammattaaq uiusoq sioorasaarisarpoq qunusaarillunilu arnamik atorsinnaanngitsutut ikiortissaqanngitsutullu misigititsisumik.

Roxana allaaserisami siullermi eqqaaneqartoq assersuutigeriartigu. Ilaannikkut uiata oqaatsit sakkugisarpai. „Oqaatsit atorlugit nikanarsartarpaanga,“ oqaluttuarpoq. „Soorlu oqartarpoq: ’Atuarnerit naammassinikuunngilat. Uangaqarnak qanoq ilillutit meeqqat isumagisinnaagakkit? Eqiasuttuuvutit anaanatullu atorsinnaanak. Qimassagaluarumma ilumut isumaqarpit meeqqat tigunissaannut oqartussaasut akuerissagaatsit?’“

Roxanap uiata aningaasat nakkutigeqqissaarnerisigut aamma naqisimavaa. Biili atoqqunngilaa, sulerinersorlu paasiniarlugu ullormut arlaleriarluni sianerfigisarlugu. Suna piumanerunerlugu oqaaseqarpat kamarujussuartarpoq. Taamaattumik Roxanap isummami oqaatiginnginnissaa ilikkarpaa.

Paasinarpoq nuliamik nakuuserfiginninneq ajornartorsiutaasoq assigiinngitsorpassuarnik katitigaasoq. Arnaq nakuuserfigineqartartoq tapersersorniaraanni pingaaruteqarpoq misiginneqataasumik paasinnittumillu tusarnaarnissaq. Eqqaamasariaqarpoq atugarliuutini oqaluttuariuminaatsissinnaammagit. Siunertaasariaqarpoq nammineq sapinngisaminik iliorniarnerani tapersersornissaa.

Ilaannikkut arnat nakuuserfigineqartartut oqartussaasunut ikiortissarsiortariaqartarput. Ilaannikkut pissutsit najummassimanarneruleraangata — soorlu politiit akulerukkaangata — uisup nakuusertartup iliuuserisimasami  ilungersornarneri paasisinnaalertarpai. Ajoraluartumik navianartorsiorunnaarniariarluni allannguerusukkunnaartarpoq.

Arnap nakuuserfigineqartartup uini qimattariaqarpaa? Biibilimi averuserneq soqutaanngitsutut isigineqanngilaq. Arnalli uini peqqiilliortitsisoq immaqalu allaat inuunerminik navianartorsiortitsisoq najuinnassagaa inassutigineqanngilaq. Apustili Paulusi kristumiu allappoq: „Qimassimaguniuk aappaqanngitsuujuassaaq uiniluunniit isumaqatigalugu uterfigissallugu.“ (1 Korinthimiut 7:10-16) Ajortoqavitsillugu averuserneq Biibilimi inerteqqutaanngimmat tamatumunnga tunngatillugu qanoq iliornissani arnap inuttup nammineq aalajangigassaraa. (Galatiamiut 6:5) Arnaq uiminik qimatseqqullugu kialuunniit kajumissaartariaqanngilaa, aammali nuliaasoq uiminik peqqiilliortitsisinnaasumik, inuunerminik anersaakkullu atukkaminik navianartorsiortitsisinnaasumik najuinnaqqullugu tatiniarneqassanngilaq.

Uiusoq nakuusertartoq allanngorsinnaava?

Nuliamik nakuuserfiginnittarneq Biibilimi najoqqutassianik unioqqutitsineruvoq sualuttoq. Efesosimiunut allakkat 4:29, 31-mi ima allassimavoq: „Oqaatsinik mikiarsimasunik qanissinnit aniatitaqarniaqinasi . . . Narrutsatsitsinerit, puffajanerit, kamannerit, nipiliornerit mitalliinerillu, tassami ajorsutsit suulluunniit, eqqaasassanngilasiluunniit.“

Uiusup kialuunniit Kristusimut ajoqersugaanerartup nuliani naalliutsittaruniuk asallugu oqarsinnaanngilaq. Nuliani nakuuserfigisaruniuk, ajunngitsuliarisimasarpassui allat qanoq naleqartigissappat? ’Nakuuserniartartoq’ kristumiut ilagiivini immikkut pisinnaatitaaffeqarnissamut piukkunnaateqanngilaq. (1 Timotheusi 3:3; 1 Korinthimiut 13:1-3) Kristumiuunerartoq, arlaleriarlunili peqqissiminani kamattartoq kristumiut ilagiivinit anisitaasinnaavoq. — Galatiamiut 5:19-21; 2 Johannesi 9, 10.

Angutit nakuusertartut pissuserinnerulersinnaappat? Ilaat iluatsittarput. Angulli nakuusertartoq allanngorneq ajorpoq (1) iliuutsini ajortuusut nassuerutiginngikkunigit, (2) nakuusertarunnaarusunngikkuni aamma (3) ikiortissarsiunngikkuni. Jehovap Nalunaajaasuisa misigisimavaat Biibilip allanngortilluarsinnaagaatsik. Biibilimik atuaqqissaaqatigisartagarpassuisa Guutimut iluarisaarusungaarneq ineriartortissimavaat. Biibilimik atuaqqissaartaleqqaartorpassuit taakku ilinniartarpaat Jehovap ’nakuusernermik iluarisaqartoq uumigigaa’. (Tussiaat 11:5) Angut nakuusertartoq allanngorusukkuni, soorunami unataasarunnaarnissaa naammanngilaq. Aammattaaq nuliaminut allatut isiginnittaaseqalernissani ilikkartariaqarpaa.

Angutip Guutimik ilisarsigaangami nuliani ’ikiortitut’ ’ataqqisassatut’ isiginissaa ilikkartarpaa, inussiaatitut nikanarnerusutuluunniit pinnagu. (1 Mosesi 2:18; 1 Petrusi 3:7) Aammattaaq nuliami isumaanut tusarnaarnissami misiginneqataanissamilu pingaaruteqarnerat ilikkartarpaa. (1 Mosesi 21:12; Oqaluussisartup oqaasii 4:1) Jehovap Nalunaajaasuisa Biibilimik atuaqqissaaqaserinnittarnerat aappariippassuarnut iluaqutaasimavoq. Naalliutitsisartoq, qunusiarinnittartoq naqisimannittartorluunniit ilaqutariinni kristumiuni inissaqanngilaq. — Efesosimiut 5:25, 28, 29.

„Guutip oqaasia uumavoq sunniisinnaassuseqarlunilu.“ (Hebræerit 4:12) Taamaattumik ilisimassuseq Biibilimiittoq aappariit ajornartorsiutiminnik paasiniaanerminni iluaqutigisinnaavaat, iluarsinissaannullu sapiillissutigalugu. Aammattaaq Jehovap qilammi kunnginngortitaa naalatsiminut tamanut naalakkersuilerpat silarsuarmik nakuuserfiunngitsumik qularnaatsumik tuppallernartumillu neriuutissaqartippaatigut. Biibilimi allassimavoq: „Annaatissavai piitsoq ikioqqulluni suaartartoq annikilliortitarlu ikiortissaaleqisoq. Aniguisissavai qunutitaanermit nakuuserfigisaanermillu.“ — Tussiaat 72:12, 14. (gE 11/8 01)

[Qupp. 12-mi issuagaq]

Naalliutitsisartoq, qunusiarinnittartoq naqisimannittartorluunniit ilaqutariinni kristumiuni inissaqanngilaq

 [Qupp. 8-mi ungalusaq]

Arnanut nakuuserneq pillugu salluliuutit ilumoortullu

Arnat uiminnit nakuuserfigineqartartut nammineq pisuupput.

Anguterpassuit nakuusertartut iliuutsitsik akisussaaffigerusunngilaat oqarlutik nuliamik kamassaartaraatik. Allaat ilaqutariinnut ikinngutaasut isumaqarsinnaapput nuliaasoq iluarusutsikkuminaatsuummat tupinnanngitsoq uia ilaannikkut imminut aqussinnaajunnaartarmat. Assigiinnarpaali nakuuserfigineqartoq pisuutikkaanni saassussisorlu pinngitsuutillugu. Arnat nakuuserfigineqartartut uiminnik ilorrisimaartitsiniarlutik ilungersuuteqartarput. Aammattaaq aapparmik unataaneq eqqortutut isigineqalersinnaanngisaannarpoq. Atuakkami The Batterer — A Psychological Profile-mi allassimavoq: „Angutit nuliaminnik nakuuserfiginnittartutut eqqartuussivik aqqutigalugu katsorsagassanngortitaasut nakuuserneq pinngitsoorsinnaanngillat. Nakuusernikkut kamannertik isumalunnertillu anittarpaat, nakuusertarput naalagaaniarlutik aaqqiagiinngissutinillu aaqqiiniarlutik sukangannginnerulerniarlutillu. . . . Ajornartorsiuteqarnertik tamatigut nassuerutigisanngilaat pissutsilluunniit ilumoorunnagit.“

• Imigassap aalakoornartup uiusut nuliaminnik unataatittarpai.

Ilumoorpoq angutit ilaat imersimatillutik nakuusernerusartut, imigassalli pisuutinnissaa tunngavissaqarluarpaa? Uiusoq nakuusertoq imminut pisuutinnani imertarnini iliuutsiminut utoqqatsissutigigajuppaa,“ K.J. Wilson atuakkiamini When Violence Begins at Home-mi allappoq. Nangipporlu: „Aalakoortoq angerlarsimaffimmi nakuuseraangat soorluuna ullumikkut inuiaqatigiinni paasineqartartoq. Arnap nakuuserfigineqartartup aappani imernikkaatut imerajuttutulluunniit isumaqarfigeqqajaasinnaavaa nakuusertartutut isiginagu.“ Atuakkiortup uparuarpaa taamatut eqqarsartarnerup arnaq piviusorsiunngitsumik neriuuteqalersissinnaagaa tassa „angut imertarunnaaruni nakuusertarunnaassasoq“.

Misissueqqissaartartorpassuit imerajuttuuneq nuliamillu nakuuserfiginnittarneq ajornartorsiutitut immikkoortutut marluttut ullumikkut isigaat. Una ilumoortuugami angutit ikiaroortartut imerajuttullu amerlanersaasa nuliartik unatarneq ajoraat. Atuakkamik When Men Batter Women-imik atuakkiortut ima allapput: „Eqqortumik oqaatigissagaanni nuliamik nakuuserfiginnittarneq ingerlaannartarpoq uiusup manna tikillugu arnaq naalagaaffigisinnaammagu, annilaangatissinnaammagu naqisimasinnaammagullu. . . . Imerajunneq ikiaroortarnerlu angutip nakuusertartup inooriaasianut ilaavoq. Kukkunerussaarli isumaqassalluni atornerluineq tamanna nakuusernermut pissutaasoq.“

Uiusut nakuusertartut tamanut sukangasuusarput.

Angut nuliaminut nakuusertartoq allat ilagigaangamigit pitsaasarpoq ilakkuminarlunilu. Marlunnik assigiinngilluinnartunik inuttut pissuseqarpoq, pissusii allanngorluinnartarput. Taamaattumik ilaqutariit ikinngutaasa upperiuminaatsittarpaat arnap uini nakuusertartuunerarpagu. Ilumoortorli tassaavoq naalliutsitsisup peqqarniinnikkut nuliaminik naqisimannittarnera.

• Arnat unatarneqartarnertik ajorinngilaat.

Taamatut isumaqarneq arnap sumunnarfissaqarngitsup neriuuteqarani inuuneranik paasisimasaqannginnermik pissuteqarunarpoq. Arnaq nakuuserfigineqartartoq immaqa sapaatip-akunnerani ataatsimi marlunniluunniit ikinngummini najugaqarsinnaavoq, tamatumali kingorna sumunnassava? Qitornaminik isumaginniitigaluni suliffissarsiornissani inissarsiornissanilu inornartissinnaavaa. Immaqalu aamma meeqqat qimarngunnissaat inerteqqutaavoq. Ilaat misiliisimapput, nanisaallutilli pingitsaalillugillu neriorsoqqissaarlugilluunniit utertinneqarlutik. Avataaniittut kukkusumik isumaqarsinnaapput arnap unatarneqartarnini ajorinngikkaa.