Imarisai

Imarisai

Nikallunganera oqaluttuarisariaqarpara?

Nikallunganera oqaluttuarisariaqarpara?

 Inuusuttut aperipput:

Nikallunganera oqaluttuarisariaqarpara?

„Nikallungagaangama aallaqqaammut oqaluttuarineq ajorpara, inuit isumaliuleqimmata perorsaruminaatsuusunga. Paasisarparali ikiorneqassaguma oqaloqateqartariaqarlunga.“ — Alejandro, 13-nik ukiulik.

„Nikallunganera ikinngutinnut oqaatigineq ajorpara ilimaginnginnakku ikiorsinnaagaannga, Illaruaatigiinnassavaannga.” — Arturo, 13-inik ukiulik.

KINALUUNNIIT piffissap ilaatigut nikallortarpoq. * Inuusuttuugaanni misilittagaqarpallaarnanilu piumaffigineqarpallaartutut misiginarsinnaavoq. Angajoqqaat, ikinngutit ilinniartitsisullu piumasaat; inuusuttunngulernermi timikkut misigissutsikkullu allanngulernerit; piginnaasat killeqarneri pissutigalugit imminut annikigineq — tamakkorpassuit nikallussutaasinnaapput aliasuutaasinnaallutillu.

Taamaattoqartillugu oqaloqateqarsinnaaneq pitsaassaaq. „Ajornartorsiutikka pillugit oqaloqatissaqanngikkuma sapilissaanga,“ Beatriz 17-nik ukiulik oqarpoq. Ajoraluartumilli inuusuttuararpassuit anniaatitik nammineq pigiinnartarpaat — isumatsassimaneruliinnartarlutillu. María de Jesús Mardomingo, Madridimi nakorsassatut ilinniartunut professorip oqaatigaa inuusuttut imminornissamik eqqarsaatillit kiserliortuugajuttuusut. Inuusuttuaqqat imminoriaraluarnerminnik iluatsitsisimanngitsut oqartarput inersimasumik ataasiinnarmilluunniit tatigalugu oqaloqatissarsisimanatik.

Illimmi? Nikallungagaangavit oqaloqatissaqartarpit? Taamaanngippat qanoq iliussavit?

Angajoqqaatit oqaloqatigikkit

Alejandro aallarniutaani eqqaaneqartoq aliasuuteqaraangami qanoq iliortarnerminik oqaluttuarpoq: „Anaanaga oqaloqatigisarpara, meeraaninniilli tapersersortarmanga imminullu tatiginerulersittarlunga. Ataataga aamma oqaloqatigisarpara, uattulli nalaataqarsimammat. Ajoraangama oqaloqateqarnangalu ajorsigaluttuinnartarpunga.“ Rodolfo 11-nik ukiulik oqaluttuarpoq: „Ilinniartitsisuma nikassarlungalu naveeraanganga aliasuutigisaqaara, anartarfiliartarpunga qiajartorlunga. Anaanagali oqaluttuukkakku ajornartorsiutinnik ikiorpaanga, oqaloqatigisimanngikkaluarukku aliasuutiginerungaarsimassagaluarpara.“

 Eqqarsaatiginikuuiuk angajoqqaatit allamut oqaatigisassaanngitsunik oqaloqatigisinnaalugit? Immaqa eqqarsarputit ajornartorsiutinnik paasinnissinnaanngitsut. Ilumulli taamaappa? Imaassinnaavoq ullutsinni inuusuttut tatineqarnerat tamakkiisumik paasisinnaanngikkaat, ataatsimulli isigalugu ilinnik taama ilisarisimannitsigisoqanngilaq. Alejandro oqarpoq: „Ilaatigut angajoqqaannut ajornaatsuinnaaneq ajorpoq misiginneqatiginnissallutik qanorlu misigisunga paasissallugu, nalunngilarali uummammioqaraangama tusarnaarusuttuaannartut.“ Ilaatigut inuusuttut tupigusuutigisarpaat angajoqqaamik ajornartorsiutitik paasilluarsinnaammatigit. Utoqqaanerugamik misilittagaqarnerullutillu iluaqutaasunik siunnersuuteqarajupput — ingammik najoqqutassanik Biibilimeersunik atuinissartik sungiussimagunikku.

„Angajoqqaakka oqaloqatigigaangakkit ajornartorsiutima aaqqinnissaanut qiimmassarneqarlungalu atoriaannaasunik siunnersorneqartarpunga,“ Beatriz siuliani issuarneqartoq oqarpoq. Taamaattuminguna Biibilimi inuusuttunut ima siunnersuuteqartoq: „Ernera, ataatavit inassutai maleruarniakkit anaanannillu ilinniakkatit asiginnarnagit.“ — Ussatit 6:20; 23:22.

Angajoqqaani qanimut attaviginngikkunigit soorunami oqaloqatigiuminaatsissavai. Dr. Catalina González Fortezap inuusuttut atuartut angajulliit akornanni misissuinermini takutippaa imminoriarsimasut nalikitsutut misigisimasut angajoqqaaminnullu attaveqarnerlussimasut. Akerlianilli inuusuttut isummamikkut aalajaannerusut „anaanaminnut ataataminnullu attaveqarluakkajunnerusarput.“

Taamaattumik silatusaarnerussaaq angajoqqaannut ajunngitsumik attaveqarnissat sulissutigigukku. Oqaloqatigisarnerat pissuserilerniaruk. Inuuninni susoqarnersoq oqaluttuariuk. Apersukkit. Angajoqqaatit oqaloqatigiuaannarukkit ilungersunartumik ajornartorsiuteqaleruit oqaloqatiginiarnissaat ajornannginnerussaaq.

Ikinngutinnut oqaluttuaraangavit

Ajornartorsiutilli pillugit peqatinik oqaloqateqarnissaq ajornannginerunngila? Immaqa. Tatigisinnaasanik ikinnguteqarluni ajortanngeqaaq. Ussatit 18:24-mi allassimavoq ’ikinngutaasoqartartoq qatanngummit tatiginarnerusunik’. Peqatit misiginneqataasinnaagaluarlutik tapersersuisinnaagaluarlutillu, siunnersuisutut pitsaanerpaajuaananngillat. Ilittulli misilittagakitsigaat. Rehabeam eqqaamaviuk? Biibilip nalaani kunngiuvoq. Misilittagaqarnerusut inersimalluartullu siunnersuutaat malinnagit peqatini tusarniarneruai. Tamannalu kingunerlutseqaa. Innuttami amerlanersaanit tapersersorneqarunnaaginnarani aamma Guutip iluarinninnera annaavaa. — 1 Kunngit 12:8-19.

Peqatinut oqaluttuarnermi ajornartorsiutaalersinnaasoq alla tassaavoq isertugaatinik ingerlatitseqqinneq. Arturo aallaqqaasiummi eqqaaneqartoq oqarpoq: „Nukappiaqqat nalunngisama amerlanersaat aliaasuuteqaraangamik ikinngutitik oqaluttuuttarpaat, kingornali oqaatigisimasaat tamaasa ikinngutaasa allamut ingerlateqqittarpaat illaruaatissanngorlugulu.“ Gabriela 13-inik ukiulik assingusumik misigisaqarsimavoq. Oqarpoq: „Ullut ilaanni paasivara ikinngutinnaama ikinngutini allat inuuninnik oqaluttuusimagai, taava oqaluttuarfigissaarpara. Soorunalimi inuusuttut peqatikka oqaloqatigisarpakka, oqaluttuareqqinneqarpatali uannut ajortumik sunniuteqarsinnaasut  oqaatiginaversaartarpakka.“ Ikiortissarsioraangavit pingaaruteqarpoq ’allat isertugaataannik tamanut ilisimalersitsinngitsumik’ oqaloqateqarnissat. (Ussatit 25:9) Ilimanaateqarneruvoq ilinnit angajulliusoq taama ittuussasoq.

Arlaannik pissuteqarlutit angerlarsimaffinni tapersersortissaqanngikkuit, immaqa ikinngutissarsiorsinnaavutit oqaloqatissannik, qulakkiissavalli inuunermi misilittagaqartuussammat Biibilillu najoqqutassiaanik ilisimannilluartuulluni. Qularnanngitsumik Jehovap Nalunaajaasuisa ilagiivini taama ittoqassaaq. Liliana 16-inik ukiulik oqarpoq: „Uanga kristumiunut qatanngutinut arnanut oqaluttuarama assut iluaqutigaara. Uannit angajulliunerugamik silatusaartunik siunnersorsinnaavaannga, uannullu ikinngutaalersimapput.“

Taavami anersaakkut ittunik pingaartitsineq innarlerneqalersimappat? Immaqa nikallungaaravit qinuneq Biibilimillu atuaqqissaarneq tunulliuttalersimavatit. Jâko 5:14, 15-imi Biibilimi ima unnerssuuteqarpoq: ’Napparsimasumik ilaqarussi ilagiit utoqqaanertaat qaaqquligit, qinnussavaallu uuliamik tanillugu, [Jehovap] aqqani. Uppertullu qinnutaagut napparsimasoq annassaaq, [Jehovallu] makitissavaa.’ Jehovap Nalunaajaasuisa ilagiivini misilittagalinnik utoqqaanertaqarpoq isumatsassimasunik anersaakkullu napparsimasunik ikiuisinnaasunik. Oqaloqatigissallugit tunuarsimaaqinak. Biibilimi allassimavoq angutit taamaattut ’assigissagaat anorersuarmut oqquiffik sialussuarmullu oqqiffik’. — Jesaja 32:2.

’Nungullugit kissaatigisasi Guutimut nalunaarsigik’

’Guutimut tamanik tuppallersaasumut’ ikiortissarsiorneq pitsaanerpaavoq. (2 Korintumiut 1:3) Aliasukkuit nikallungaguilluunniit Filípimiut 4:6, 7-imi siunnersuut maliguk: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ Jehovap tusarnaarusuttuaannarpaatit. (Tussiaat 46:2; 77:2) Ilaatigut ajunnginnerulerumallutit qinuinnarsinnaavutit.

Aliasullutilluunniit nikallungagaangavit eqqaamassavat inuusuttorpassuit taama misigisimammata. Qaangiuteqqittarpoq qaangiutinnginnaranili nipaatsumik atortariaqanngilat, allat paasitikkit ajorlutit. Ussatit 12:25-mi atuarparput: „Isumakulunnerup inuk artorsartittarpaa, inussiarnersumilli oqaaserisat nuannaalersittarpaat.“ ’Inussiarnersumik oqaatsit’ qanoq ’nuannaalersitsisinnaappat’? Misilittagalimmik Guutimeersumillu ilisimassusilimmik pisariaqartitamik tuppallersaasinnaasumik ikiuisinnaasumillu — oqaloqateqarnikkut. (gE 22/10 2000)

[Quppernerup ataani ilanngussaq]

^ imm. 5 Nikallunganeq taamaaginnarpat tuaviortumik nakorsamut misissortinnissaq siunnersuutigineqarpoq. Napasuliaq Alapernaarsuiffik-mi 1. januaari 1991-moortumi qup. 28-mi allaaserisaq „Nikallungarujussuarneq ajugaaffiginiaruk,“ takuuk.

[Qupp. 25-mi issuagaq]

„Angajoqqaakka oqaloqatigigaangakkit kajumissaarneqartarpunga atoriaannaasunillu siunnersorneqarlunga“

[Qupp. 26-mi assiliartaq]

Angajoqqaat Guutimik mianerinnittut amerlanertigut peqatinnit siunersuilluarnerusinnaasarput