Imarisai

Imarisai

Tiingasulersaarutit taama uloriarnartigippat?

Tiingasulersaarutit taama uloriarnartigippat?

 Tiingasulersaarutit taama uloriarnartigippat?

SOORLU takoreeripput meeqqat inersimasullu tiingasulersaarutinik isiginnaarsinnaanerat Internetip ajornaallisikkaa. Isumakulutitsiva? Ilumut tiingasulersaarutit taama ulorianartigippat?

Amerlasuut isumaqarput nalaatsornerinnakkut tiingasulersaarutinik isiginnaarneq ajoqutaanngitsoq. Piviusulli allamik takutitsipput. Aappariinnik aappariinnerminni pilluarpasissunik assersuutissaqarpoq. Aningaasatigut isumannaapput angalanerlu nuannaralugu. Ikinngutimik isaanni imminnut qanittumik asannittumillu attaveqatigiipput — amerlasuutigullumi taamaapput.

Uiusoq tiingasulersaarutinik isiginnaartalermat ajornartorsiuteqalerput. Nuliata aviisimi aaqqissueqataasumut tusaamasamut isumakuluutini ima allaatigai: „[Uima] unnuakkut ullaaralaakkullu qarasaasiaq atortorujussuanngoramiuk paasiniaaffissarsioqattaarnerarpoq, ’research-ernerarpoq’. Ullaat ilaanni [tiingasulersaarutinik] isiginnaartoq naammattoorpara. . . . Alapernaaginnarnerarpoq. Isiginnaagai takulluarnerugakkit qamuuna ajortippunga. Kanngutsippoq taamaalioqqikkumananilu neriorsuilluni, upperaaralu. Ileqqorittuujuaannarsimavoq — angut oqaatsiminik eqqortitsisartoq.“

Amerlasuut angutitut taassumatut alapernaanneq pissutigalugu tiingasulersaarutinik sammisaqartalersarput. Paasineqarnissartik annilaangassutigigamikku unnukkut ullaaralaakkulluunniit  Internet atortarpaat. Takuneqartooraangamik sallunermikkut, soorlu angut siuliani taaneqartoq, paasineqatsaalisarput. „Sukisaarsaat“ „angummik oqaatsiminik eqqortitsisartumik“ unnuakkut malunnaarsaartitsisoq ilaquttaminullu sallutitsisoq ilumut ajoqutaanngitsutut taaneqarsinnaava?

Tiingasulersaarutinik isiginnaartarneq inuttut ilaqutariittullu ajornartorsiortitsingaarsinnaavoq. Ilaasa nassuerutigisimavaat allanut qanittumik attaveqarniarnerminni ajoqutigisimallugu. Tiingasulersaarutinik isiginnaarluarnialeraangamik kisimiikkusunnerusarput. Tiingasulersaarutinik isiginnaartilluni eqqarsaatersoqqajaanartarpoq, eqqarsaatersornerlu allanut qanimut attaveqarniarnermi silarsuarmiluunniit piviusumi imminut napatinniarnermi iluaqutaanngilaq. Aliikkutaq qaniginerpaasanut allanarsisitsisoq uloriananngitsutut oqaatigineqarsinnaava?

Tiingasulersaarutinik isiginnaartartut atuartartulluunniit ilaasa aappaminnik kinguaassiuutitigut atoqateqartarnertik nuannaarutigerpiarsinnaanngilaat. Sooq taamaannersoq paasiniarlugu Guutip aappariinnermut aallaqqaammut siunertaa eqqarsaatigisariaqarpoq. Isumassuilluni Guutip uiusup nuliaasullu atoqatigiinnermi ileqqorissumi asanninnerminnik ersersitsisinnaatippai. Ussatit 5:18, 19 naapertorlugu uisup nuliaasullu kinguaassiuutitigut atoqatigiinneq nuannaarutigingaassavaat nalerisimaarutigingaarlugulu: „Tipaatsuutigiuk inuusunninni nuliarilikkat . . . Pakkusimasarnera nuannaarutigiuk, asajuaruk suut allat tamaasa sussakkeerlugit.“

Malugiuk kinguaassiuutitigut atoqatigiinneq asanninnermik tunngaveqassammat. Tiingasulersaarutinik isiginnaartartut aappaminnut tatigeqatigiilluni asanninnermik ineriartortitsisarpat? Naagga, nammineq kinguaassiuutitigut illigussutsini naammassisarpaa — amerlanertigut kisimiilluni. Angutip aappallip tiingasulersaarutinik isiginnaartartup nuliani atortutut, imminut nalerisimaartitsisussatuinnaq, immaqa isigilersinnaavaa. Tamanna Pinngortitsisup kissaatigisaanut ungaseqaaq: angutip arnaq ataqqissavaa. (1 Pîtruse 3:7) Ileqqoq aappariinni allat susassarinnginnerpaasaannut ajoqutaasoq kissaatiginartutut isigineqarsinnaava?

Aammattaaq nalaatsornerinnakkut aliikkutariligaq sivisuumik pinngitsuuisinnaanngitsunngortitsisinnaavoq. Atuakkiortoq oqarpoq: „Ikiaroortartutut ikiaroorniarlutik ikiaroornartunik sakkortusiartuinnartunik pisariaqartitsisutulli, tiingasulersaarutinik isiginnaartartut assinganik nuannaarutiginiarlugit misigisat sakkortusiartuinnartut pisariaqartippaat.“

Allaaserisami siusinnerusukkut eqqaaneqartumut angummut taama pisoqarsimagunarpoq. Tiingasulersaarutinik isiginnaartarunnaarniarluni neriorsuinerata qaammaterpaaluit kingorna unnuit ilaanni nulia angerlarsimavoq uini qarasaasiap saani issiasoq. Pissusilersorneratigut takusinnaavaa ajortoqartoq. „Eqqissiveqarpasinngilaq,“ nulia allappoq. „Qarasaasiap tungaanut qiviarpunga, ilumummi, kanngunarluinnartut isiginnaarsimavai. Tiingasulersaarutinik isiginnaartarunnaarniarluni neriorsuigami ilumuuvissimanerarpoq, isiginnaartarunnaarsinnaananili.“

Tiingasulersaarutit ajoqusiisinnaanerat pissarsiariuminarnerilu eqqarsaatigalugit, mianersornissamut pissutissaqarluarpoq. Imminut qitornanullu Internetimi tiingasulersaarutinut qanoq illersortoqarsinnaava? Apeqqut tamanna allaaserisat ataqatigiit uku kingullersaanni sammineqassaaq.

[Qupp. 6-mi assiliartaq]

Tiingasulersaarutit ileqqorluttunngortitsisarput