Imarisai

Saqqaata tullia

Imai

Jehovap Nalunaajaasui

Kalaallisut

Uppersusiat maliguk

 KAPITALI 18

Oqaaserineqartut ‘eqqarsaatigai’

Oqaaserineqartut ‘eqqarsaatigai’

1, 2. Mariap angalanera ip­pigusun­neranul­lu pis­sutaasoq oqalut­tuarik­kit.

MARIA nalunaaqut­tap-akun­neri arlal­lit siutituup qaavaniis­simagami is­siakatap­poq. Josefi Betlehemimut ungasis­sumut angalanermi siulersuil­luni pisorusaar­poq. Mariap ilumiuni pikeriar­toq malugisin­naavaa.

2 Mariap er­ninis­saata nal­liutingajaler­nera oqalut­tuamit ersersin­neqar­poq. (Luk 2:5, 6) Im­maqa naasoris­saasut as­sal­latserisut siaruar­terisul­luun­niit aap­pariit narsaatit saneq­qual­lugit ingerlasut takul­lugit ar­nap er­ningajalersup angalanera eq­qumiigivaat. Sooq Maria Nazaretimi angerlarsimaf­fim­minit taama ungasitsigisumut angalava?

3. Maria sumik sulias­sin­neqar­pa, taan­nalu pil­lugu suna misis­sus­savar­put?

3 Qaam­mater­paaluit tamatuma sior­na ar­naq juuteq inuusut­toq taan­na inuit oqalut­tuarisaaneran­ni as­seqan­ngil­luin­nar­tumik sulias­sin­neqar­poq. Mis­siarsin­ngor­tus­samik, Guutip er­neranik, meerar­taar­tus­saavoq! (Luk 1:35) Marial­li er­nin­ngin­nerani aal­lar­tariaqar­put. Angalanermi Maria up­per­nik­kut misilin­neqaatigisaminik nalaataqar­poq. Anersaak­kut nukit­tujuar­nis­saminut suut iluaqutiginerai misis­soriar­tigu.

Betlehemimut angalaneq

4, 5. (a) Sooq Josefi Marialu Betlehemimukar­pat? (b) Kaasarip peq­qus­sutaa pis­sutigalugu siulit­tuut suna eq­quup­pa?

4 Josefi Marialu kisimik angalan­ngil­lat. Kaasarip Augustusip nunami inuit kisin­neqar­nis­saat peq­qus­sutigim­magu inuit il­loqarfim­mut inun­ngorfigisamin­nut al­latsik­kiar­tor­tus­san­ngor­put. Josefimi? Biibilimi ima al­las­simavoq: “Aam­ma Josefi majuar­poq il­loqarfim­mit Nazaretimiit Galilæamiit­tumit Judæamut, Daavip il­loqarfianut Betlehemimik atilim­mut, Daavip inoqutai eq­qarleriis­sor­taalu nagguigigamigit tas­sani al­latsis­sal­luni.” – Luk 2:1-4.

5 Taamaalinerani kaasarip peq­qusinera nalaatsor­nik­kut pin­ngilaq. Ukiut 700-t mis­siliorlugit tamatuma sior­na Mis­siarsip  Betlehemimi inun­ngor­nis­saa siulit­tuutigineqar­poq. Il­loqarfik Betlehemi Nazaretimit taamaal­laat 11 kilometerisut ungasitsigisumiip­poq. Siulit­tuum­mili al­las­simavoq ‘Betlehemimi, Efratami,’ Mis­siarsi inun­ngus­sasoq. (Mika 5:1 atuaruk). Nazaretimit angalasut tas­sunga il­loqarfeeq­qamukarumal­lutik Samaria aq­qusaarlugu 130 kilometerit mis­siliorlugit qat­tunerasaar­tuk­kut angalasariaqar­put. Kun­ngip Daavip siuaasai – taamatut­taarlu Josefip nuliatalu siuaasai – Betlehemimi tas­sani najugaqarsimam­mata Josefi tas­sunga al­latsik­kiar­tor­tus­saavoq.

6, 7. (a) Sooq Betlehemimut angalaneq Mariamut unam­miniar­narsimas­sava? (b) Josefimut nulian­ngorami Mariap aalajangeeriaasia qanoq al­lan­ngor­pa? (Aam­ma qup­per­nerup ataatungaani ilan­ngus­saq takuuk).

6 Josefip peq­qus­sum­mut naalan­niarluni aalajanger­nera Mariap tapersersus­savaa? Tas­sami angalaneq Mariamut imaan­naan­ngitsuusus­saavoq. Ukialer­nerani angalasus­saagamik sial­lilaar­tar­nis­saa ilimanar­poq. Tamatuma saniatigut Betlehemi im­mamit 760 meterit sin­nerlugit por­tus­susilim­miim­mat – ul­luni arlalin­ni angalanerup kingor­na sivingangaatsiar­tumik majoriaqarmat – oqaatsit “majuar­poq il­loqarfim­mit Nazaretimiit” naleq­qup­put. Mariap naar­tunera pis­sutigalugu uneqat­taar­tus­saas­sagamik angalaneq pisar­nermit sivisunerus­sagunar­poq. Ar­nap inuusut­tup er­ningajalersup ilaqut­tani ikin­ngutinilu er­nisuleruni ikiuerusut­tut najorlugit angerlarsimanis­sani kis­saatiginerusimas­savaa. Taamatut angalajumal­luni sapiis­suseqar­tariaqar­poq.

Betlehemi­mut angalaneq imaan­naan­ngitsuuvoq

 7 Taamaak­kaluar­torli Lukasi al­lap­poq Josefi ‘al­latsis­sal­luni nuliani Maria ilagalugu’ aal­lar­toq. (Luk 2:4, 5) Josefimut nulian­ngorami Mariap aalajangeeriaasia al­lan­ngor­poq. Uini ilaqutariin­ni it­tuusutut isigamiuk aalajangius­saanik tapersersuinermigut ikior­titut Guutimit akisus­saaf­filer­neqar­nini eq­qor­tip­paa. * Mariap uiminut naalan­nermigut up­per­nini ersersip­paa.

8. (a) Mariap Josefi ilagalugu Betlehemimukar­nis­saminut aam­ma suna kajumis­sis­sutigigunar­paa? (b) Sooq Mariap maligas­siuinera qiim­mas­saatigingaar­par­put?

8 Mariap naalan­nis­saminut aam­ma suna kajumis­sis­sutigigunar­paa? Mis­siarsip Betlehemimi inun­ngorumaar­neranik siulit­tuut nalun­ngilaa? Taman­na Biibilimi al­las­siman­ngilaq. Siulit­tuul­li up­perisarsior­nik­kut siut­tunit inuin­nar­nil­lu ilisimaneqarmat ilimanar­poq Mariap siulit­tuut ilisimagaa. (Matt 2:1-7; Joh 7:40-42) Mariap Al­lak­kat Il­ler­nar­tut ilisimal­luar­pai. (Luk 1:46-55) Uiminut, kaasarip peq­qus­sutaanut imaluun­niit Jehovap siulit­tuutaanut naalan­nis­saq pis­sutigalugu – taak­kualuun­niit tamaasa pis­sutigalugit – angalaqataaniarluni Maria aalajanger­nersoq naluar­put, angalaqataanermigul­li as­sut maligas­siuil­luar­poq. Jehovap angutit ar­nal­lu maniguut­tut naalat­tul­lu pingaar­tingaar­pai. Nalitsin­ni inuit  amerlanerit naalatsigitik­kumasan­ngim­mata Mariap maligas­siuinera qiim­mas­saatigingaar­par­put.

Kristusip inunngornera

9, 10. (a) Mariap Josefil­lu Betlehemimut qanil­liar­tor­til­lutik suna eq­qarsaatigigunar­paat? (b) Sumi aam­ma sooq Josefi Marialu un­nuisariaqar­pat?

9 Betlehemi takusin­naan­ngoramiuk Maria eq­qis­sial­las­simas­saaq. Qat­tunik­kut qum­mukarlutik olivenequteqarfiit – olivenit inerit­tuni kingul­lersaat ilaat­tut katersor­neqar­tar­tut – sanioq­quatil­lugit Mariap Josefil­lu il­loqarfeeq­qap taas­suma oqalut­tuas­sar­taa im­maqa eq­qarsaatigaat. Pruf­fiitip Mikap al­lan­neratut Judap il­loqarfiisa ilaat­tut naatsorsuus­saanis­samut mikival­laar­poq; taamaat­torli ukiut 1.000-t sin­nerlugit tamatuma sior­na il­loqarfeeq­qami tas­sani Boazi, No’omi kingusin­nerusuk­kul­lu Daavi inun­ngor­put.

10 Maria Josefilu apuum­mata il­loqarfeeraq inun­nik ulik­kaar­poq. Al­lat al­latsik­kiar­torlutik tikereersimam­mata un­nuisarfin­ni inis­saqan­ngil­lat. * Nersutaasivim­mi un­nuisariaqar­put. Takorloorsin­naavar­put nuliani aatsaat taama an­niar­tigilersoq takul­lugu Josefi er­numatsat­toq. Nersutaasivim­mi tujorminar­tumi Maria er­nisuler­poq.

11. (a) Sooq ar­nat sumiik­kaluar­tul­luun­niit Maria paasisin­naavaat? (b) Jiisusi sutigut ‘per­naava’?

11 Ar­nat sumiik­kaluar­tul­luun­niit Maria paasisin­naavaat. Ukiut 4.000-t mis­siliorlugit tamatuma sior­na ar­nat tamarmik ajor­timik kingor­nus­sineq pis­sutigalugu er­ninermin­ni an­niar­tar­nis­saat Jehovap siulit­tuutigaa. (1 Mos 3:16) Qular­nan­ngitsumik aam­ma Maria an­niar­poq. An­niar­nera al­laatiginagu Lukasi ima al­laan­nar­poq: ‘Per­naam­minik er­ner­taar­poq.’ (Luk 2:7) Aap, Mariap ‘per­naava’ qatan­ngutigiip­pas­suar­ni, ikin­ner­paamik arfineq-marluusuni, angajul­lersaavoq. (Mark 6:3) Taan­nali al­lanit al­laaneruvoq. Mariap angajul­liliariin­nan­ngilaa, Jehoval­li ‘pin­ngor­titaani tamani er­niusut siul­lersaraat’ – Guutip er­nituaraa. – Kol 1:15.

12. Mariap naalungiaq sumut ilivaa, taman­nalu juul­limi isigin­naar­titsisar­ner­nit, as­silis­sanit takutitsisar­ner­nil­lu qanoq al­laanerutigaa?

12 Maan­na oqalut­tuami pisoq ilisimaneqarluar­toq al­laatigineqar­poq: ‘Im­mul­lugu nersutaatit nerisarfian­nut ilivaa.’ (Luk 2:7) Taman­na juul­limi isigin­naar­titsisar­ner­ni, as­silis­sani takutitsisar­ner­nilu tujorminan­ngil­luin­nar­tutut piviusorsiun­ngitsumil­lu takus­sutis­siarineqar­tar­poq. Pis­sutsil­li piviusut eq­qarsaatigik­kit. Eq­qaamajuk ilaqutariit nersutaasivim­mi, taamanik­kut nalitsin­nilu  silaan­nalut­tutut iper­tuutul­lu isigineqar­tumi, un­nuim­mata. Angajoq­qaat al­lamik periarfis­saqar­tuugunik er­ninerup nalaani nersutaasivim­miin­navian­ngil­lat. Angajoq­qaat amerlanerit qitor­natik pitsaaner­paamik kis­saat­tar­paat. Mariap Josefil­lu Guutip er­nera suli pitsaanerungaar­tumik kis­saas­simas­savaat!

13. (a) Maria Josefilu qanoq naam­magit­tar­niarsarip­pat? (b) Angajoq­qaat Josefitut Mariatul­lu qanoq pingaar­nersiuisin­naap­pat?

13 Pis­sutsil­li tujorminar­tut eq­qarsaatiginagit naam­magit­tar­niarsarip­put. As­sersuutigalugu maluginiaruk Mariap naalungiarsuk nam­mineq isumagim­magu. Toq­qis­sil­luni qiiananilu sinin­nias­sam­mat im­muteriarlugu qajas­suul­lugu nersutaatit nerisarfian­nut ilivaa. Pis­sutsit tujorminaraluar­tut Mariap sapin­ngisamik pitsaaner­paamik er­nini isumagaa. Mariap Josefil­lu aam­ma nalun­ngilaat meeq­qamik anersaak­kut isumas­suineq sunit tamanit pingaar­ner­paasoq. (5 Mosesi 6:6-8 atuakkit). Ul­lumik­kut angajoq­qaat silarsuarmi Guutimut kif­far­tor­nermik pingaar­titsif­fiun­ngitsumi taak­kunatut pingaar­nersiuigunik silatusaas­sap­put.

Qiimmaallaataasumik pulaarneqarneq

14, 15. (a) Sooq savanik paarsisut naalungiaq takorusungaar­paat? (b) Savanik paarsisut Jiisusi nersutaasivim­mi takoreerlugu sup­pat?

14 Nersutaasivim­mi ilimagin­ngisamik pisoqariasaar­poq. Savanik paarsisut ilaqutariit ingam­mil­lu meeraq takorusul­lugit nersutaasivim­mut iseriasaar­put. Angutit tipaatsungaarmata nuan­naar­nerat kiinaasigut takuneqarsin­naavoq. Qat­tunermi savat paarisatik qimal­lugit tuaviin­naq nersutaasivim­mukarsimap­put. * Misigisimasatik tupin­nangaar­tut pil­lugit angajoq­qaat tupaq­qasut oqalut­tuup­paat. Un­nuak­kut qat­tunermi savanik paarsitil­lutik tas­san­ngaan­naq in­ngilimit saq­qum­merfigineqar­put. Jehovap naalan­nas­susianit qaam­marfigineqarlutil­lu Kristusip, imaluun­niit Mis­siarsip, Betlehemimi inun­ngoq­qam­mer­neranik in­ngilimit oqalut­tuun­neqar­put. Ilisimatin­neqar­put naalungiaq im­mus­simal­luni nersutaatit nerisarfian­ni in­nangasoq nas­saariumaaraat. Taava suli tupin­nar­nerusumik pisoqar­poq – in­ngiler­pas­suit saq­qum­meriasaar­put Guutimil­lu un­nersiutigin­nilerlutik. – Luk 2:8-14.

15 Tupin­nan­ngilaq angutit taak­ku maniguut­tut tuaviorlutik Betlehemimukarmata. In­ngilimit oqarfigineqar­nermis­sut inoorlaaq in­nangasoq takul­lugu nuan­naarsimas­saqaat. Tusagar­tik  nuan­nersoq al­lanut oqalut­tuaraat. “Im­min­nut oqaatigineqar­tut oqalut­tuariler­paat, tusar­tul­lu tamarmik savanik paarsisut oqalut­tuarisaat tupigusuutigaat.” (Luk 2:17, 18) Taamani up­perisarsior­nik­kut siut­tut savanik paarsisut nikagisar­paat. Jehoval­li angutit maniguut­tut aalajaatsul­lu taak­ku pingaar­tik­kai ersarip­poq. Marial­li taamatut pulaar­neqar­nini qanoq isumaqarfigaa?

Jehovap savanik paarsisunik maniguut­tunik aalajaatsunil­lu pingaar­titsinera ersarip­poq

16. Sooq Maria up­perluar­tuar­pa?

16 Er­ninermi kingor­na qular­nan­ngitsumik qasungaaraluarluni Mariap oqaaserineqar­tut tamaasa tusar­naaq­qis­saar­pai. Tusar­naagin­nan­ngilarli. “[Mariap] tamak­ku tamaasa uum­mam­minut toq­qor­pai eq­qarsaatigalugil­lu.” (Luk 2:19) Ar­naq inuusut­toq taan­na eq­qarsaatigin­neq­qis­saar­tar­poq. Nalun­ngilaa in­ngilip oqariar­tuutaa pingaaruteqangaar­toq. Guutiata, Jehovap, er­nermi kinaas­susianik pingaaruteqas­susianil­lu Mariap paasin­nin­nis­saa kis­saatigaa. Taamaat­tumik Mariap tusar­naagin­nar­nani oqaaserineqar­tut qaam­matini ukiunilu tul­liut­tuni eq­qarsaatigeq­qis­saar­tar­nias­sagamigit uum­mam­minut toq­qor­pai. Taman­na up­perluar­tuar­nis­saminut iluaqutigingaar­paa. – Hebræerit 11:1 atuaruk.

Mariap savanik paarsisut tusar­naaq­qissaar­lugillu oqaa­serisaat uum­mam­minut toq­qorpai

17. Sal­lusuis­sutinut tun­ngatil­lugu Maria qanoq ilaarsin­naavar­put?

17 Maria ilaas­saviuk? Jehovap sal­lusuis­sutit pingaarutil­lit oqaatsiminut al­latsip­pai. Sal­lusuis­sutil­li taak­ku iluaqutigiumal­lugit iliuuseqar­tariaqar­pugut. Taamaaliorsin­naavugut ul­lut tamaasa Biibili atuak­katut atuaan­nar­nagu Guutip oqaasiatut isumas­sarsiarititaasutut atuar­tarutsigu. (2 Tim 3:16) Marial­lu pisimaneratut anersaak­kut it­tut uum­matitsin­nut toq­qor­tariaqarlugil­lu eq­qarsaatigisariaqar­pavut. Biibilimi atuak­kavut Jehoval­lu siun­nersuutaanik qanoq pitsaanerusumik maleruaasin­naanerluta eq­qarsaatigeq­qis­saar­tarutsigit up­per­ner­put ineriar­tor­tis­savar­put.

Oqaaserineqartut allat uummamminut toqqorpai

18. (a) Jiisusi naalungiaasoq Maria Josefilu Mosesip inatsisai naalal­lugit sup­pat? (b) Pil­liutaat aningaasaqar­nik­kut atugaat pil­lugit sumik ersersitsip­pat?

18 Mosesip inatsisaani peq­qus­sutigineqar­tutut Mariap Josefil­lu naalungiaq ul­lunik arfineq-pingasunik ul­loqalermat kipineqar­tip­paat oqarfigineqar­nermis­sul­lu Jiisusimik aterlugu.  (Luk 1:31) Jiisusi 40-nik ul­loqar­toq Jerusalemimi naalaf­fim­mukaak­kumal­lugu Betlehemimit 10 kilometerit mis­siliorlugit ungasitsigisumut angalap­put. Tas­sani Inatsisit malil­lugit piitsut minguersaam­mik pil­liutigisas­saat – tuit quluar­tar­tut marluk imaluun­niit tuit piaq­qat marluk – pil­liutigaat. Angajoq­qaatut al­latut savamik tuimil­lu quluar­tar­tumik pil­liuteqar­nis­samut akis­saqan­ngin­ner­tik im­maqa kan­ngusuutiginaveersaar­paat. Qanorluun­niit ik­kaluar­pat naalaf­fim­mi nuan­naarutis­sin­neqangaar­put. – Luk 2:21-24.

19. (a) Sim­miuup oqaaserisai suut Mariap uum­mam­minut toq­qor­pai? (b) Jiisusi takugamiuk An­na sua?

19 Angutip ukioq­qor­tuup Sim­miuumik atil­lip or­nip­pai. Taas­sumalu oqaaserisai Mariap uum­mam­minut toq­qor­pai. Sim­miuut toqun­ngin­nermini Mis­siarsimik takun­nik­kumaar­nerminik neriorsor­neqarsimagami Jehovap anersaavanit il­ler­nar­tumit ilisimatin­neqar­poq Jiisusi naalungiaq tas­saasoq An­naas­sisoq siulit­tuutigisaq. Sim­miuup aam­ma Maria an­niangaarumaar­neranik ilisimatip­paa. Oqarfigaa tar­nimigut panamik kapineqar­tutut misigis­sasoq. (Luk 2:25-35) Mariap ajor­tumik pisoqar­nis­saanik ilisimatin­neqar­nini ukiut 33-t qaangium­mata piner­tusaar­nis­samut iluaqutigisimas­savaa. Sim­miuut oqaaseqareersoq pruf­fiitip ar­nap An­namik atil­lip naalungiaq takugamiuk Jerusalemip aniguisitaanis­saanik utaq­qisut tamaasa Jiisusi pil­lugu oqalut­tuutiler­pai. – Lukasi 2:36-38 atuakkit.

Jerusalemimi Jehovap naalaf­fiani Maria Josefilu qiim­mas­sarne­qarput

20. Jiisusip Jerusalemimukaan­nis­saanik Josefip Marial­lu aalajanger­nerat sooq pitsaasuua?

 20 Naalungis­sap Jerusalemimi Jehovap naalaf­fianukaan­nis­saanik Josefip Marial­lu aalajanger­nerat pitsaasuuvoq. Taamaalil­luni Jiisusip aalajaal­luni Jehovap naalaf­fianukar­tar­nermik inuunermi sin­nera ileq­qulius­sinera aal­lar­ner­neqar­poq. Josefi Marialu naalaf­fim­miin­nermin­ni pigisamin­nik pitsaaner­paanik Jehovamut pil­liuteqaramik ilitsersor­neqarlutil­lu qiim­mas­sar­neqar­put. Ul­loq taan­na Mariap naalaf­fik qimak­kamiuk qular­nan­ngitsumik up­per­nik­kut nakus­satsil­lunilu sal­lusuis­sutit pingaarutil­lit eq­qarsaatigeq­qis­saar­tagas­sani al­lanul­lu oqalut­tuarisin­naasani uum­mam­minut toq­qor­pai.

21. Mariap misigineratut qanoq up­per­ner­put ineriar­tor­tis­sin­naavar­put?

21 Ul­lumik­kut angajoq­qaat taak­kua maligas­siuineran­nik ilaarsisut takul­lugit nuan­ner­poq. Angajoq­qaat Jehovamik Nalunaajaasuusut aalajaal­lutik qitor­natik kristumiut ataatsimiin­nerinut ilagisar­paat. Angajoq­qaat sapin­ngisamin­nik, soorlu up­peqatimin­nik qiim­mas­saasar­nermik­kut, ikiuisar­put. Ataatsimeereerlutik angerlaraangamik nakus­satsin­neqarlutil­lu nuan­naar­nerul­lutil­lu nuan­nersor­pas­suar­nik oqalut­tuas­saqaler­tar­put. Taak­kua Jehovamik kif­far­toqatiginerat nuan­naringaar­par­put! Mariap misigineratut ataatsimiin­ner­ni up­per­ner­put nakus­satsin­neqar­tarlunilu ineriar­tor­tar­poq.

^ par. 7 Maluginiaruk angalanerup matuma siuliatalu as­sigiin­ngis­sutaat: Elisabethi tikeraar­niarlugu “Maria aal­lar­poq”. (Luk 1:39) Tamatuma nalaani uis­sani Josefi isumasioq­qaar­nagu Maria iliuuseqarsimasin­naavoq. Katereeramil­li Josefip angalanis­sar­tik aalajanger­paa.

^ par. 10 Taamani il­loqarfiit angalasunut un­nuisarfeqar­tar­nerat nalingin­naavoq.

^ par. 14 Savanik paarsisut silami savaatimin­nik paarsinerat Biibilimi pif­fis­salersuinermut naaper­tuup­poq: Kristusi decembarimi, pif­fis­sami savat savanik paarsisup inaata eq­qaani nersutaasivim­miif­figisar­tagaan­ni, inun­ngor­nani oktobarip aal­lar­tin­nerani inun­ngor­poq.