Imarisai

Imai

Jehovap Nalunaajaasui

Oqaatsit toqqakkit Kalaallisut

Inngilipiluit Guutimut pikitsitsinissamut kajumissaarisarput

Inngilipiluit Guutimut pikitsitsinissamut kajumissaarisarput

Ileqqulersuutit ilaat toqusimasut uatsinnik takunnissinnaanerannik sallumik tunngaveqarput

Sunali pillugu Satan inngilipiluilu taama ilungersortigisumik inunnik salloqittaaniarpat? Pikitsitsisimanerminnut peqataalersinniarsarigamisigut. Pallorfigineqarnissartik kissaatigaat. Kissaatigaat salluliutitik upperissagivut Jehovallu iluarinngisaanik iliussasugut. Iliuutsit tamakku ilaatigut tassaapput ileqqut toqusimasunut attuumassuteqartitaasut.

Asasamik toqusoqaraangat misigissutsikkut nanertisimanartaqaaq, aliasunnerlu takutissallugu pissusissamisoorluinnarpoq. Ikinngunni Lazarus toqummat Jesus ‘qullilisimavoq’. — Juánase 11:35.

Toqumut atatillugu silarsuaq tamakkerlugu ileqqulersuuterpassuaqarpoq. Tamakkua ilarpassui Biibilip najoqqutassiaanut akerliunngillat. Ileqqulersuutilli ilaat toqusimasut inuunerannik inuusunillu takunnissinnaanerannik isumamik tunngaveqarput. Toqusunik unnuakkut piggassisarneq, aliasorujussuarnerit ilisinermullu tunngatillugu ileqqulersuutit pisariulluinnartut tamarmik anersaat iluarinngisaannik iliuuseqartoornissamik mianerinninnermik tunngaveqarput. Toqungasulli ‘sunnguamilluunniit ilisimasaqanngimmata’ ileqqulersuutinik tamakkuninnga malinnittut Satanip salluliornera  siuarsartarpaat. — Nalunaajaasup oqaasii 9:5.

Ileqqulersuutit allat toqusimasut uatsinnit ikiorneqartariaqarnerannik sallumit tunngaveqarput

Ileqqulersuutit allat pinngorsimapput isumaqartoqarmat toqusimasut inuusunit ikiorneqartariaqartut saammarsarneqanngikkunillu inuusunik ajoqusiissasut. Nunat ilaanni ullut 40-t imaluunniit ukioq ataaseq inuup toqunerata kingorna nalliuttorsiorneqartarpoq pilliuteqartoqartarlunilu. Inuit taamaaliortarput toqusimasut anersaat silarsuaannut ‘isersinnaanissaannut’ ikiorniarluginngooq. Aamma nerisassat imigassallu toqusimasunut pilliutigineqartarnerat nalinginnaasuuvoq.

Tamakku eqqunngitsuliornerupput Satanip toqusimasut pillugit salluliorneranut siuarsaataagamik. Ileqqut inngilipiluit ajoqersuutigisaannik tunngaveqartut peqataaffigigutsigik Jehovap akuerissanerpaa? Naamerluinnaq! — 2 Korintumiut 6:14-18.

Guutip ilumoortup kiffaasa Satanip salluliorneri tapersersornavianngivippaat. Akerlianik asannillutik inuusut ikiorumallugit tuppallersarumasarpaat. Nalunngilaat inuk toqoreersimasoq Jehovap kisimi ikiorsinnaagaa. — Job 14:14, 15.

 Anersaarsiorneq Guutip assuaraa

Inuit ilaasa inngilipiluit toqqaannartumik imaluunniit inuk anersaarsiortoq aqqutigalugu attaveqarfigisarpaat. Taamaaliorneq anersaarsiornermik taaneqartarpoq. Voodoolerineq, ilisiinneq, angakkuarneq siulittuineq toqusimasunillu apersuineq tamarmik anersaarsiornerupput.

Guutip ajortut tamakku assuarai. Imminut tunniusimalluinnarnissamik peqquaatigut. — 2 Moses 20:5

Biibilimi tamakku ima assuarineqarput: „Ilissi akornassinni ... naasaanik nassuiaasartoqassanngilaq, pisussanik eqquiniartartoqassanani, siulittuisartoqassanani angakkuartartoqassananiluunniit. Serrasoqartassanngilaq, timaajagarsiortunik anersaanillu siulittuisartunik siunersiuisoqartassanani toqoreersunillu apersuisoqartassanani. Inerteqqutinik tamakkuninnga unioqqutitsisut tamaasa [Jehovap] maajugai. — 5 Moses 18:10-12.

Sooq Jehovap tamakkulerinermut taama ilungersortigisumik mianersoqquaatigut?

 Iluaqutissatsinnut Jehovap anersaarsioriaatsinut tamanut mianersoqquaatigut. Inuit asavai isumassorlugillu, nalunngilaa inngilipilunnut attaveqartut pinngitsooratik naalliuuteqalerumaartut.

Nildap, anersaarsiortuusimasup Brasiliameersup, tamanna misigisimavaa. Inngilipiluit erloqinartumik inuuneqartissimavaat. Ima oqaluttuarpoq: „Anersaanit ... pulaneqarlunga naalakkersorneqartarpunga. Ilisimmartarlungalu ilisimajunnaartarpunga, eqqarsartaatsikkullu ajornartorsiuteqalerlunga napparsimmavimmut pisinneqarlunga. Inngilipiluit ima sakkortutigisumik malersorpaannga allaat sianiutilulerlunga. Iisartagartortarpunga imertualerlunga pujortartualerlungalu. Ukiuni arlalinni taamatut ingerlavunga.“

Anersaarsiortartut ajornartorsiortitaagajupput. Angerlarsimaffitsik, kiffaanngissusertik allaallu inuunertik annaasinnaavaat

Kiisami, Jehova taassumalu najunaajaasui ikiortigalugit, Nilda inngilipiluit sunniinerannit aniguisimavoq maannakkullu pitsaasumik peqqinnartumillu inuulluni. Ima oqarpoq: „Kinaluunniit mianersoqquniarpara anersaapiluit ataasiaannarluniluunniit attaveqarfigeqqunagit.“