Angut inuusuttoq angaaminik annaassisoq pillugu ilinniarta. Angutip inuusuttup Paulusi angaarivaa. Taanna qanoq ateqarnersoq naluarput, nalunngilarpulli sapiitsuliortoq. Qanoq sapiitsuliorsimanersoq paaserusuppiuk? —

Paulusi Jerusalemimi parnaarussaaqqavoq. Jiisusi pillugu oqaluussigami tigusarineqarpoq. Angutit ilaat Paulusi uumigigamikku pilersaarutipiluliorput. Ima oqarput: ‘Sakkutuut naalagaat aperiniartigu sakkutuuisa Paulusi eqqartuussivimmukaassinnaaneraat. Taava aqqutaani toqqorluta utaqqissavarput, saneqquppallu toqussavarput!’

Paulusip soraluaata pilersaarutipiluk pillugu Paulusi sakkutuullu naalagaat oqaluttuuppai

Paulusip soraluaata angutit pilersaarutaat paasivaa. Qanoq iliorpa? Paulusi parnaarussivimmiittoq tusakkaminik oqaluttuukkiartorpaa. Paulusip angutit pilersaarutipiluat tusaramiuk ingerlaannaq soralussani sakkutuut naalagaannut oqariartortippaa. Isumaqarpit Paulusip soraluaata sakkutuut naalagaat taamatut oqarfigissallugu sapernartissimassagaa? — Aap, sakkutuut naalagaat angutaammat pingaarutilik sapernartissimassavaa. Kisianni sapiitsuugami sakkutuut naalagaat pilersaarutipiluk pillugu oqaluttuuppaa.

Sakkutuut naalagaata qanoq iliussanerluni nalunngilluinnarpaa. Sakkutuut 500-ngajaat Paulusimik illersuisussanngortippai. Sakkutuullu taakku peqquai Paulusi unnuakkut Cæsareamukaatissagaat. Paulusi ajoquserneqarpa? — Naamik, Paulusi illersorneqarmat angutit ajortut taanna saassussinnaanngilaat! Pilersaarutipiluat iluatsinngilaq.

Oqaluttuaq tamanna qanoq ilinniarfigisinnaaviuk? — Illittaaq Paulusip soraluaatut sapiitsuusinnaavutit. Inuit allat Jehova pillugu oqaluttuukkaangatsigit sapiitsuusariaqarpugut. Jehova pillugu oqaluussiuarlutit sapiitsuussavit? — Taamaalioruit inuit allat annaassinnaavatit.