Imarisai

Saqqaata tullia

Imai

Jehovap Nalunaajaasui

Kalaallisut

Meeqqatit ilinniartikkit

 OQALUTTUAQ 1

Isertugaq nuannersoq paasivarput

Isertugaq nuannersoq paasivarput

Isertukkamik oqaluttuunneqarnikuuit? — * Biibilimi isertugaq immikkut ittoq eqqaaneqarpoq. Aamma ‘anngigisamik’ taaneqartarpoq. Immikkut ittuuvoq Guutimeersuugami. Itsaq inuit nalummassuk isertukkamik taaneqartarpoq. Allaat inngilit isertugaq taanna paaserusuppaat. Illimmi, isertugaq taanna paaserusuppiuk? —

Inngilit paaserusutaat sunaasoraajuk?

Qangarsuaq Guutip inuit siulliit angut arnarlu pinngortippai. Taakku Adamimik Evamillu ateqarput. Guutip naatsiivimmi nuannersumi Edenimik taaneqartumi najugaqartippai. Adamip Evallu Guuti naalassimasuugunikku qitornatillu nunarsuaq tamaat naatsiivittut Edenitut paratiisinngortikkiartuaassagaluarpaat tassanilu naassaanngitsumik inuullutik. Kisianni Adami Evalu qanoq iliornersut eqqaamaviuk? —

Adamip Evallu Guuti naalanngilaat, taamaattumik ullumikkut paratiisimi inuunngilagut. Guutili oqarpoq nunarsuaq tamaat nuannersunngortikkumaarlugu aamma inuit tamarmik nuannaarlutik naassaanngitsumik inuujumaartut. Guuti qanoq taamaaliorniarami? Tamanna ukiorpassuarni isertugaammat inuit tamarmik naluaat.

Nunamiikkallarami Jiisusip isertugaq taanna pillugu inuit ilinniartippai. Jiisusi oqarpoq isertukkami Guutip naalagaaffia pineqartoq. Jiisusip inuit oqarfigai qinusassasut Naalagaaffik tikiuteqqullugu taanna nunarsuarmik paratiisinngortitsiumaarmat.

Isertugaq nuannersoq taanna paasillugu nuannerpa? — Eqqaamajuk Jehovamut naalattut kisimik paratiisimi inuujumaartut. Biibilimi Jehovamut naalattorpassuit oqaluttuarineqarput. Angutit arnallu taakku pillugit paasisaqarusuppit? — Taakkua ilaat kikkuunersut aamma qanoq ilaarsinnaanerivut paasiniariartigu.

BIIBILINNI UKU ATUAKKIT:

  • Markusi 4:11

  • 1 Petrusi 1:12

  • 1 Mosesi 1:26-28; 2:8, 9; 3:6, 23

  • Matthæusi 6:9, 10

  • Tussiaat 37:11, 29

^ par. 3 Quppersakkami matumani apeqqutit ilaat kingorna kittoraateqaraangat (—) unitsiarnissamut meeqqallu akinissaanut periarfissaasarpoq.