Imarisai

Saqqaata tullia

Imai

Jehovap Nalunaajaasui

Kalaallisut

Ilaqutariittut pilluarsinnaavusi

 IMMIKKOORTOQ 5

Qanoq ilaquttasi eqqissiveqatigisinnaagisi

Qanoq ilaquttasi eqqissiveqatigisinnaagisi

“Atiniarsigit ... ajunngissuseq, nikanartinneq, qanilaarneq naammagittassuserlu.” — Kolossemiut 3:12

Aappariit katikkaangamik ilaqutariinngortarput. Naak angajoqqaatit ataqqillugillu asajuaannassagaluaritit aappartaat katinnermi nunarsuarmi ilinnut pingaarnerpaanngorpoq. Tamannalu ilaquttavit ilaasa paasiuminaatsissinnaavaat. Katerlaatut aappannut attaveqarlualernissat sulissutigiitigalugu angajoqqaannik, sakinnik ilaquttavillu sinneranik eqqisseqateqarnissannut Biibilimi najoqqutassiat iluaqutigisinnaavatit.

 1 ANGAJOQQAASSINNUT EQQORTUMIK ISIGINNITTAASEQARTUARITSI

BIIBILIMI QANOQ ALLASSIMASOQARTOQ: “Ataatat anaanallu ataqqikkit!” (Efesosimiut 6:2) Qassinilluunniit ukioqaraluaruit angajoqqaatit ataqqiuartussaavatit. Aamma aappavit angajoqqaaminik piffissaqarfiginnittussaanera paasiuk. “Asanninneq sinngasarinngilaq”, taamaattumik aappavit angajoqqaaminut attaveqarnera aarleqqutiginngisaannaruk. — 1 Korinthimiut 13:4; Galatiamiut 5:26.

SIUNNERSUUTIT:

  • Ingasattajaarlutit ima oqarnaveersaartarit: “Ilaquttavit nikanarsartuarpaannga.” Aamma ima: “Anaanavit suliakka iluarinngisaannarpai”

  • Aappavit isiginnittaasiatut isiginnittaaseqarniarsarigit

 2 PISARIAQARTILLUGU AALAJANGERSIMASUUGITSI

BIIBILIMI QANOQ ALLASSIMASOQARTOQ: “Angutip ataatani anaananilu qimallugit nuliani attavigissavaa, uiniulissappullu ataaseq.” (1 Mosesi 2:24) Katikkuit angajoqqaatit misigisinnaapput suli akisussaaffigalutit killissartillu qaangerlugu aappariinnissinnut sunniuteqarusussinnaallutik.

Ilaquttassinnut qanoq killiliissanerlusi aappallu isumaqatigiissutigisussaavarsi tamatuminngalu asannittumik ilisimatillugit. Aalajangersimasumik ataqqinnipaluttumilli isummasi annittarsinnaavasi. (Ussatit 15:1) Maniguuttuuneq, saamasuuneq naammagittartuunerlu ilaquttassinnut qanilaartumik attaveqalernissassinnut ‘asaqatigiinnikkullu immissinnut kamageqatigiinnissassinnut’ iluaqutigissavasi. — Efesosimiut 4:2.

SIUNNERSUUTIT:

  • Misigiguit ilaquttasi inuunissinni akuliusimavallaartut eqqissisimanissinni tamanna aappannut eqqaajuk

  • Qanoq iliuuseqarfigissanerlugu isumaqatigiissutigisiuk