Imarisai

Saqqaata tullia

Imai

Jehovap Nalunaajaasui

Kalaallisut

Ilaqutariittut pilluarsinnaavusi

 IMMIKKOORTOQ 7

Meeqqamik perorsaaneq

Meeqqamik perorsaaneq

“Oqaatsit taakku peqqussutillu ullumi ilinnut tunniussakka aalajangiutissavatit. Erninnut nangeqqittuartassavatit.” — 5 Mosesi 6:6, 7

Jehovap ilaqutariittut aaqqissuussaq pilersikkamiuk angajoqqaat meeqqaminnut akisussaasunngortippai. (Kolossemiut 3:20) Meeqqasi Jehovamut asannilernissaannik inersimasutullu akisussaassuseqalernissaannik ilinniartitsinissaq ilissi angajoqqaatut akisussaaffigaarsi. (2 Timotheusi 1:5; 3:15) Aamma panippit imaluunniit ernerpit uummammiugisai paasiniartariaqarpatit. Soorunami illit nammineq maligassiuinerit pingaaruteqangaarpoq. Jehovap oqaasii meeqqannut ilinniartitsissutigilluarnerussagukkit illit nammineq uummammiuliuteqqaarsimasariaqarpatit. — Tussiaat 40:9.

 1 MEEQQANNUT OQALOQATIKKUMINARTUUGIT

BIIBILIMI QANOQ ALLASSIMASOQARTOQ: “Kinaluunniit tusarasuartarli, kisianni oqalukkumaataartuulluni.” (Jaaku 1:19) Meeqqavit ilisimalissuk oqalukkusuleraangamik tusarnaarnissannut piareersimasartutit. Meeqqatit toqqissisimasutut misigitikkukkit sunaluunniit pillugu uummammiuminnik annissuinissaminnut kajumissuseqarnerulissapput. (Jaaku 3:18) Isumaqarunik sakkortuumik qisuariassasutit assuarineqassallutilluunniit ammarfigiumanavianngilaatsit. Meeqqatit kamagittarfigikkit asanerartuartarlugillu. — Matthæusi 3:17; 1 Korinthimiut 8:1.

SIUNNERSUUTIT:

  • Meeqqatit oqalukkusukkaangata piffissaqarfigisakkit

  • Meeqqavit ajornartorsiulernissaat utaqqinagu oqaloqatigikulasakkit

2 SUNARPIAQ PINERAAT PAASINIARTARUK

BIIBILIMI QANOQ ALLASSIMASOQARTOQ: “Silatussusermik aalajangiussisoq pilluaatissarsissaaq.” (Ussatit 19:8) Meeqqatit qanorpiaq misiginersut paasiumallugu sunarpiaq pineraat ilaannikkut paasiniaqqaartariaqartassavat. Inuusuttunut nalinginnaavoq ingasattajaartumik ilumoorutinngisaminilluunniit oqaluttarneq. “Oqaaserineqartut naalaarluaqqaarnagit akissuteqarneq sianiitsorpallanneruvoq.” (Ussatit 18:13) Kamaammernaversaartarit. — Ussatit 19:11.

SIUNNERSUUTIT:

  • Meeqqat qanorluunniit oqaraluarpat qisuariapiloornaveersaarlutit oqalutsiinnaruk

  • Eqqaajuk illit taamatut ukioqarallaravit qanoq misigisartutit sunalu pingaartittarit

 3 PERORSAANISSINNIK ISUMAQATIGIIGITSI

BIIBILIMI QANOQ ALLASSIMASOQARTOQ: “Ernera, ataatavit oqaaqqissaarutai naalaartarniakkit anaanavillu ajoqersuussutai sumiginnarnagit.” (Ussatit 1:8) Jehovap ataataasoq anaanaasorlu meeqqaminnut oqartussaasunngortippai. Meeqqasi ilissinnut ataqqinnillutillu naalannissaannik ilinniartittariaqarpasi. (Efesosimiut 6:1-3) Angajoqqaat ‘assigiimmik isumaliunngikkunik’ meeqqat malugipallassavaat. (1 Korinthimiut 1:10) Meeqqat ilissinnik ataqqinninnerat innarlerneqaqqunagu isumaqatigiinngissuteqarussi tusaatinnagit eqqartorsiuk.

SIUNNERSUUTIT:

  • Meeqqassinnik qanoq perorsaaniarnerlusi isumaqatigiissutigisiuk

  • Perorsaanissamik assigiinngitsunik isumaqarussi aappavit isiginnittaasia paasiniarsariuk

 4 PERORSAANISSINNIK PILERSAARUTEQARITSI

BIIBILIMI QANOQ ALLASSIMASOQARTOQ: “Nukappiaraq ingerlavissamigut ingerlaannarnissaanut kajumissaaruk.” (Ussatit 22:6) Meerarsi nalaatsornikkut perorsarsimallualernavianngilaq. Meeqqassinnik perorsaariaasissarsi perorsaatissiisarnissarsilu pillugit najoqqutassiortariaqarpusi. (Tussiaat 127:4; Ussatit 29:17) Perorsaatissiineq pillaaneriinnaanngilaq, meeqqamulli paasititsiniaaneruvoq sooq taamatut najoqqutaqarnerlusi. (Ussatit 28:7) Meeqqat Jehovap oqaasiinik nuannarisaqalernissaannik najoqqutassiaanillu maleruaanissaannik ilinniartissigit. (Tussiaat 1:2) Tamanna malussarissumik nalunngeqatiginnissuteqalernissaminnut iluaqutigissavaat. — Hebræerit 5:14.

SIUNNERSUUTIT:

  • Meeqqatit paasitinniarsarikkit Guuti kinaassusiliviusoq tatigisassaq

  • Ileqqussatigut navianartorsiortitsisinnaasut, soorlu internetimi nittartakkat aalajangersimasut attaveqaqatigiittarfiillu, kiisalu kinguaassiuutitigut kannguttaatsuliorniartut atornerluiniartullu eqqumaffigeqqullugit ingalassimaqqullugillu ilinniartissigit

“Nukappiaraq ingerlavissamigut ingerlaannarnissaanut kajumissaaruk”