“Isumasioqatigeereerluni pilersaarusiat iluatsittarput.” — Ussatit 20:18

Tamatta ilaquttavut pilersorniarlugit aningaasanik pisariaqartitsivugut. (Ussatit 30:8) Biibilimi allassimavoq “aningaasat illersuutaasut”. (Oqaluussisartup oqaasii 7:12NW) Immaqa aappallu aningaasat oqaloqatigiissutiginissaat ajornakusoortittarparsi, aningaasalli aappariinnissinni akornutaalerseqinasigit. (Efesosimiut 4:32) Aappariit tatigeqatigiillutik aningaasat qanoq atorneqarnissaat isumaqatigiissutiginiartariaqarpaat.

 1 PILERSAARUSIORITSI

BIIBILIMI QANOQ ALLASSIMASOQARTOQ: “Kina arlarsi napasulialiorniaruni ingeqqaassannginnerpa naatsorsorlugillu aningaasartuutissat paasiumallugu inaarnissaanut akissaqassanerluni?” (Lukasi 14:28) Aningaasaatisi qanoq atorniarnerlugit aappallu pilersaarusiornissarsi pingaaruteqangaarpoq. (Amosi 3:3) Suna pisiariniarnerlugu annerpaamillu qanoq akeqassanersoq isumaqatigiissutigisiuk. (Ussatit 31:16) Pisiarerusutassinnut akissaqaraluarussiluunniit imaanngilaq pisiarisariaqarisi. Akiitsoqalernaveersaaritsi. Aningaasaatisi sinnerlugit atueqinasi. — Ussatit 21:5; 22:7.

SIUNNERSUUTIT:

  • Qaammatip naanerani aningaasanik sinneqartoorussi suniarnerlugit isumaqatigiissutigisiuk

  • Aningaasanik atuivallaarsimagussi aningaasartuutissi ikilisinnissaannut pilersaarusioritsi. Assersuutigalugu illoqarfimmut neriartorasi nammineq igasinnaavusi

 2 UNNEQQARIGIT PIVIUSORSIORLUTILLU

BIIBILIMI QANOQ ALLASSIMASOQARTOQ: “Immissinnut ilumoortumik oqaluffigisaritsi!” (Zakaria 8:16) Isertitatit pillugit qanorlu atuisimanerlutit aappat ammasumik oqaloqatigisaruk.

Aningaasanut tunngatillugu annertuunik aalajangiiniaraangavit aappat isumasioqqaartuartaruk. (Ussatit 13:10) Aningaasaqarnersi oqaloqatigiissutigisarussiuk tamanna aappariinnissinni toqqissisimatitsillunilu eqqissisimatitsinerussaaq. Isertitatit kisivit pigisattut isiginagit ilaqutariiullusi pigisassitut isigikkit. — 1 Timotheusi 5:8.

SIUNNERSUUTIT:

  • Aningaasat qanoq amerlatigisut immikkut atorsinnaanerlugit isumaqatigiissutigisiuk

  • Aatsaat ajornartorsiuleraangassi aningaasat oqaloqatigiissutiginiartassanngilasi