Imarisai

Saqqaata tullia

Imai

Jehovap Nalunaajaasui

Kalaallisut

“Guutip asanninneraniittuinnaritsi”

 TAPILIUSSAQ

Niuernikkut isumaqatigiinngissutit qanoq aaqqinneqarsinnaasut

Niuernikkut isumaqatigiinngissutit qanoq aaqqinneqarsinnaasut

Apustilip Paulusip Guutimit isumassarsisitaalluni Korinthimiunut allakkamini siullerni kapitali 6-imi uppeqatit akornanni eqqartuussivimmut suliassanngortitsisarneq allaatigaa. (1 Kor 6:1-8) Kristumiut Korinthimiittut ilaasa ‘iluaatsut eqqartuussivianni suliassanngortitsinerat’ pakatsissutigaa. (Versi 1) Paulusi kristumiut imminnut eqqartuussivinnut suliassanngortitsinatik isumaqatigiinngissutiminnilli ilagiinni aaqqiiniartarnissaannik nassuiaalluni pingaarutilinnik tunngavilersuivoq. Sooq Paulusi taamatut siunnersuiva, aamma siunnersuut tamanna qaqugukkut atuuttanngila? Apeqqutit taakku akissutissarsiniariartigit.

Uppeqatitsinnik niuernikkut isumaqatigiinngissuteqarutta pingaarnerpaamik Jehovap periaasia naapertorlugu,  nammineq periaaserput malinnagu, aaqqiiniartassaagut. (Uss 14:12) Jiisusip oqarneratut isumaqatigiinngissut sorujussuanngortinnagu aaqqiiniapallannissaq pitsaanerusarpoq. (Matt 5:23-26) Ajoraluartumilli kristumiut ilaat assortuiumatuujupput, allaallu isumaqatigiinngissutitik eqqartuussivinnut suliassanngortissimavaat. Paulusi ima allappoq: “Akornassinni saqitsaassutinik eqqartuussisunut suliassanngortitsisarnersi tassaareerpoq sapersinneq.” Sooq taamaappa? Pissutaasut pingaarnerpaat ilagaat eqqartuussivimmut suliassanngortitsinerup ilagiinnik Guutittalu aqqanik tusaamanerlugaalersitsisinnaanera. Taamaattumik Paulusip apeqqutaa una eqqarsaatigeqqissaartariaqarparput: “Sooq pitsaanerutinnginnerpisiuk iluaatsuliorfigitinneq?” — Versi 7.

Paulusip aamma paasitippaatigut Guuti ilagiinni isumaqatigiinngissutinik assigiinngitsunik aaqqiinissamut iluaqutaasumik pilersitsisimasoq. Utoqqaanertat angutaapput kristumiut Biibilimi sallusuissutinik ilisimasaqarluarnermikkut naliliisinnaassuseqalersimasut, Paulusilu allappoq taakku “nunamut tunngasut” pillugit ‘qatanngutit akornanni eqqartuussisinnaasut’. (Versit 3-5) Jiisusi ilinniartitsivoq sualuttumik unioqqutitsisimanermut — soorlu mamarliinermut peqquserlunnermullu — tunngatillugu isumaqatigiinngissutit qanoq aaqqinneqassasut: Siullertut, isumaqatigiinngissuteqartut namminneq ajornartorsiut aaqqinniarlugu sapinngisaminnik iliuuseqartariaqarput. Aappassaattut, namminneq aaqqissinnaanngippassuk ataatsimik marlunnilluunniit ilisimannittumik ilaqarluni aaqqiiniartoqarsinnaavoq. Pingajussaattut, suli aaqqinneqanngippat utoqqaanertanut ilagiinnut sinniisunut oqaatigineqartariaqassaaq. — Matt 18:15-17.

Soorunami imaanngilaq utoqqaanertat eqqartuussissuserisuusariaqartut niuertarfiuteqartariaqarlutilluunniit, taakkunatullu siunnersuinissaq suliassarinngilaat. Qatanngutit niuernikkut isumaqatigiinngissuteqaraangata utoqqaanertat qanoq aaqqiisoqassanersoq aalajangigassarinngilaat. Utoqqaanertalli isumaqatigiinngissuteqartunik ikiuiniartarput taakku najoqqutassianik Biibilimiittunik maleruaasinnaaqqullugit  eqqisseqatigiillutillu ajornartorsiummik aaqqiisinnaaqqullugit. Aaqqikkuminaatsorujussuarmik isumaqatigiinngissuteqartillugu immaqa utoqqaanertat nakkutilliisoq angalasartoq imaluunniit Jehovap Nalunaajaasuisa immikkoortortaqarfiat siunersiorumassavaat. Taavami qaqugukkut Paulusip siunnersuutaanut akerliunngitsumik eqqartuussivimmi aaqqiisoqarsinnaava?

Namminissarsiorani eqqisseqateqarumalluni aaqqiisoqassappat ilaannikkut eqqartuussivimmut suliassanngortitsineq inatsisitigut pisariaqarsinnaavoq naammassiinnagassaasinnaalluniluunniit. Assersuutigalugu imaassinnaavoq aatsaat eqqartuussivitsigut avittoqarsinnaasoq, angajoqqaatut oqartussaassuseqartoqalersinnaasoq, aapparisimasaq akilersuitinneqarsinnaasoq, sillimmasiisarfimmiit taarsiiffigitittoqarsinnaasoq, kingornussassialiaq atortuutinneqarsinnaasoq aamma akiliisinnaajunnaarnermut tunngatillugu aningaasanik pisassalittut allatsittoqarsinnaasoq. Aamma imaassinnaavoq qatanngut imminut illersorniarluni eqqartuussivikkut suliassiinissani pisariaqarsorigaa. *

Taamaattoqartillugu eqqisseqateqarumalluni aaqqiinissaq siunertaralugu eqqartuussivitsigut suliassiineq imaattariaqanngilaq tamanna Paulusip siunnersuutaanut akerliusoq. * Kristumiup qanorluunniit ilioraluaruni Jehovap aqqata illernarsisinneqarnissaa ilagiillu eqqisseqatigiinnerat ataasiussuseqarnerallu pingaarnerpaatittariaqarpaa. Kristusip ajoqersugaasa asaqatigiinnertik pingaarnerpaamik ilisarnaatigaat, asanninnerlu “namminissarsiortarinngilaq”. — 1 Kor 13:4, 5; Joh 13:34, 35.

^ par. 7 Qaqutigooraluartoq imaassinnaavoq kristumiu uppeqatiminut ingasattumik pinerluttuliorsimasoq — assersuutigalugu imaassinnaavoq pinngitsaaliilluni atoqateqarsimasoq, saassussisimasoq, inummik toqutsisimasoq imaluunniit iluanaarniapilunneq siunertaralugu ingasattumik pinerluttuliorsimasoq. Taamatut pisoqassagaluarpat kristumiup politiinut nalunaarutiginninnissaa, eqqartuussivimmi suliassanngortitaanissamik kinguneqarsinnaagaluartoq, eqqortuliornerussaaq.

^ par. 8 Amerlanerusunik paasisaqarumallutit takukkit Vagttårnet 15. marsi 1997-imoortoq, qupp. 17-22, aamma 15. oktobari 1991-imoortoq, qupp. 25-28.