Imarisai

Saqqaata tullia

Imai

Jehovap Nalunaajaasui

Kalaallisut

“Guutip asanninneraniittuinnaritsi”

 KAPITALI 13

Nalliuttorsiornerit Guutip iluarinngisai

Nalliuttorsiornerit Guutip iluarinngisai

“Qulakkeertuartarsiuk Naalakkamut suut iluarinartuunersut.” — EF 5:10NW.

1. Kikkut Jehovap imminut kajungilersittarpai, taakkulu sooq anersaakkut eqqumasariaqarpat?

JIISUSI ima oqarpoq: “Ilumoortumik pallorfiginnittut Ataatamik [pallorfiginnissapput] anersaakkut ilumoornikkullu. Ataatarmi taamaattunut pallorfigeqquvoq.” (Joh 4:23) Jehovap inuit anersaakkut ilumoornikkullu pallorfiginnikkusuttut nanigaangamigit imminut ernerminullu kajungilersittarpai, soorlu aamma illit kajungilersinneqarsimasutit. (Joh 6:44) Tamanna immikkut pisinnaatitaaffiungaarami, ilaa? Sallusuissummilli nuannarinnittut ‘qulakkeertuartariaqarpaat Naalakkamut suut iluarinartuunersut’, Saatanimi tammartitsiniaallaqqissuummat. — Ef 5:10NW; Saqq 12:9.

2. Upperisarsiornermik eqqunngitsumik upperisarsiornermut ilumoortumut akuliussiniartut Jehovap qanoq isigai?

2 Qaqqap Sinajip eqqaani Israelikkut Aroni guutilioqqummassuk qanoq pisoqartoq eqqarsaatigeriaruk. Aroni kuultiusumik nersuteeraasaliorniarluni akuersivoq, nersuteeraasaliarli Jehovamut sinniisuunerarpaa ima oqarluni: “Aqagu ulloq Naalakkamut [Jehovamut, NW] nalliussiviussaaq.” Upperisarsiornerup eqqunngitsup upperisarsiornermut ilumoortumut taamatut akuliunneqarnera Jehovap qanoq igaa? Ajorilluinnarpaa, guutipilussiortummi 3000-t missaat toqutaatippai. (2 Mos 32:1-6, 10, 28) Tamanna qanoq ilinniutigisinnaavarput?  Guutip asanninneraniittuinnarumagutta ‘mingunnartumik attuissanatalu’ sallusuissutip mingutsinneqannginnissaa aallussilluarluta illersortariaqarparput. — Es 52:11; Ez 44:23; Gal 5:9.

3, 4. Ullumikkut nalliuttorsiutigineqartartut sammineranni sooq najoqqutassiat Biibilimiittut eqqumaffigilluinnartariaqarpavut?

3 Apustilit, tunussinermut ‘akornusiisut’, toqummata kristumiuunerartut sallusuissummik nuannarinninngitsut Guutimik nalusut ileqqupalaavi, nalliuttorsiorneri ulluilu “illernartitat” kristumiunut akuerinartunngortillugit atuutsittalerpaat. (2 Th 2:7, 10) Kapitalimi matumani nalliuttorsiornerit taakkua ilaat sammitillugit maluginiarsinnaavat taakku Guutip anersaavanik ersersitsinatik silarsuulli anersaavanik ersersitsisut. Silarsuarmi nalliuttorsiornerit amerlanerit uku assigiissutigaat: Uinngup pilerigisaanik kajumissaaripput ajoqersuutinillu eqqunngitsunik anersaarsiornermillu siuarsaallutik — taakkulu tamarmik ‘Babylonersuarmut’ ilisarnaataapput. * (Saqq 18:2-4, 23) Eqqaamajullu itsaq Guutimik nalusut ileqqupalaavi maajunnartut, ullumikkut ileqqut nuannarineqartartut ilarpassuisa aallaavigisaat, Jehovap nammineq takusimagai. Qularnanngitsumillu nalliuttorsiornerit taakku suli maajugai. Jehovap tamatumunnga isiginnittaasia pingaarnerpaatittariaqarparput, ilaa? — 2 Joh 6, 7.

4 Kristumiuugatta ilumoortut nalunngilarput nalliuttorsiornerit ilaat Jehovap iluarinngikkai. Nalliuttorsiornernullu peqataanngilluinnarnissarput aalajangiusimasariaqarparput. Jehovap nalliuttorsiornernik tamakkuninnga  iluarinninnginneranut pissutaasut sammilaarutsigit Guutip asanninneraniittuinnarnissatsinnut akornutaasinnaasunik sunilluunniit ingalassiumajuarnissatsinnut nakussatsissutigisinnaavarput.

JUULLI — SEQINERMIK GUUTISIORFIGINNINNERMIT AALLAAVEQARTOQ

5. Sooq nalunngilluinnarsinnaavarput Jiisusi decembarip 24-anni 25-anniluunniit inunngorsimanavianngitsoq?

5 Jiisusip inuuia nalliuttorsiutigineqartarnersoq Biibilimi eqqartorneqanngilaq. Allaat ulloq sunarpiaq inunngornersoq ilisimaneqanngilaq. Nalunngilluinnarparpulli decembarip 24-anni 25-anniluunniit inunngorsimanavianngitsoq, tamatumami nalaani nunami Jiisusip inunngorfiani qiianarajummat. * Lukasip allaatigaa Jiisusip inunngornerata nalaani ‘savanik paarsisut narsaammiittut unnuami pigaartut savaatitik paaralugit’. (Luk 2:8-11) Decembarimi Betlehemimi qiianarlunilu siallerlunilu apisarmat savaatit ukiukkut nersutaasivimmiittarput, savanillu paarsisut unnuakkut narsaammiinnavianngillat. Aamma Josefi Marialu Betlehemimukarput kaasari Augustusi peqqusisimammat inuit tamarmik kisinneqassasut. (Luk 2:1-7) Kaasarip inuiannik Romamiut naalakkersuinerannik nuannarinninngitsunik ukiup qiianarnerpaaffiani illoqarfimmut inunngorfigisaannut angalaqqusinissaa ilimananngilluinnarpoq.

6, 7. (a) Juullimi ileqqorineqartartut ilarpassui sumik aallaaveqarpat? (b) Juullimi tunisisarneq kristumiullu ilumoortut tunisisarnerat qanoq assigiinngissuteqarpat?

 6 Juulli Biibilimit aallaaveqanngilaq. * Itsarli Guutimik nalusut nalliuttorsiornerinit — assersuutigalugu Romamiut saturnaliasiortarnerannit Saturnimik, naasorissaanermik guutiutitamik, nalliuttorsiorfiginninnermit — aallaaveqarpoq. Aamma ujarlerfissiaq naapertorlugu seqinermut guutiutitamik, Mithramik, pallorfiginnittut decembarip 25-anni “seqernup ajugaaffigineqarsinnaanngitsup inuuia” nalliuttorsiutigisarpaat. Ukiullu 300-t missaat Kristusip toqunerata kingorna “seqinermik guutisiorfiginningaarfiup nalaani juulli pilersinneqarpoq”. — New Catholic Encyclopedia.

Kristumiut ilumoortut asanninnertik kajumississutigalugu tunisisarput

7 Taamani Guutimik nalusut nalliuttorsiorneranni taakkunani tunissutinik tunioraaqatigiittarlutillu nerersuaartarput — ullumikkullu juullimi tamakku aamma ileqqorineqartarput. Taamani nalliuttorsiornerni tunisisarnerit, soorlu ullumikkut juullimi tunisisarnerit, amerlanertigut najoqqutassiamut Biibilimiittumut uunga naapertuutinngillat: “[Kinaluunniit] tunisissaaq uummammigut aalajangiisimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq!” (2 Kor 9:7) Kristumiut ilumoortut asanninneq kajumississutigalugu tunineqarnissartillu naatsorsuutiginagu tunisisarput. Misiginngillat ulluni aalajangersimasuni tunisisariaqarlutik. (Luk  14:12-14; Apustilit Suliaat 20:35 atuaruk). Aamma juullip nalaani ulapaannginnissartik tamatumunngalu atatillugu akiitsoqalinnginnissartik nuannaarutigaat. — Matt 11:28-30; Joh 8:32.

8. Jiisusi inuuimmini ‘ilisimasunit’ tunissutisiaqarpa? Nassuiaagit.

8 Immaqali inuit ilaat ima uparuaassapput: “Kisiannimi Jiisusip inuuianut atatillugu ‘ilisimasut’ Jiisusimut tunissuteqarput!” Tamannali ilumuunngilaq. Ataqqinninnertik ersersinniarlugu inunnut nuimasunut tunisineq Biibilip nalaani ileqqorineqartoq iliuuseriinnarpaat. (1 Kng 10:1, 2, 10, 13; Matt 2:2, 11) Aamma unnuami Jiisusip inunngorfiani ‘ilisimasut’ takkutinngillat. Tikiummatami Jiisusi naalungiarsuunani qaammaterpaalunnik utoqqaassuseqarpoq, nersutaatillu nerisarfianniinnani illumiippoq.

 INUUISSIORNERMUT ATATILLUGU BIIBILIMI QANOQ ALLASSIMASOQARTOQ

9. Inuuissiornerni Biibilimi allaatigineqartuni qanoq pisoqarpa?

9 Naalungiarsummik inunngortoqarnera nuannaarutaasaraluartoq Biibilimi Guutip kiffaasa inuuimminnik nalliussisarsimanerannik allassimasoqanngilaq. (Tuss 127:3) Allanneqanngitsoorsimagami? Naamik, inuuissiornerimmi marluk allaatigineqarput — tassa Egyptenimi faraot ilaata aamma Herodesip Antipasip inuuissiornerat. (1 Mosesi 40:20-22; Markusi 6:21-29 atuakkit). Inuuissiortitsinerit taakku marluk nuanniitsumik pisoqarfiusimapput, ingammik Herodesip Antipasip inuuissiornera, pisumimi tamatumani Johannesi Kuisisoq niaquerneqarmat.

10, 11. Kristumiut siulliit inuuissiortarneq qanoq isigaat, aamma sooq?

10 Inuuissiortarneq pillugu Den Store Danske Encyklopædi-mi  ima allassimavoq: “Ilagiinni siullerni ileqqoq taanna Guutimik nalusut ileqquattut isigineqarpoq.” Assersuutigalugu itsaq grækerit upperaat inuit tamarmik ullormit inunngorfimminniilli namminneq anersaamik illersorteqartartut. Anersaaq taanna pillugu allassimasoqarpoq ‘guutimut inunngortup inuueqataanut paasissaangitsumik attuumassuteqartoq’. (The Lore of Birthdays) Inuuissiortarnerlu aamma ullorissat najoqqutaralugit siulittuisarnermut horoskopimullu ukiorpassuarni attuumassuteqartarsimavoq.

11 Itsaq Guutip kiffai inuuissiornermi ileqqut Guutimik nalusunit anersaarsiornermillu aallaaveqarnerat pissutigiinnarnagu aammali upperisartik pissutigalugu inuuissiorneq ajorput. Sooq? Inuit maniguuttut anneruniajuitsullu taakkua inunngornermik nalliuttorsiutigineqarnissaat kissaatigineq ajorpaat. * (Mika 6:8; Luk 9:48) Jehovali naalannartittarpaat inuunermillu tunissut naleqangaartoq taassumunnga qujassutigisarlugu. * — Tuss 8:4, 5; 36:10; Saqq 4:11.

12. Ulloq toquffik ullormit inunngorfimmit qanoq pitsaanerusinnaava?

12 Oqaluussisartup oqaasii 7:1-imi ima allassimavoq: “Ajunngitsumik tusaamaneqarneq pitsaaneruvoq tarnummit uuliamit akisuumit; ulloq toquffik pitsaaneruvoq ullormit inunngorfimmit.” Sooq taamatut  allassimava? Aalajaalluta Guutip suliareqqusai suliarigutsigit Guutimit ‘ajunngitsumik tusaamaneqassaagut’. Soorunami Guutip imminut aalajaatsut tamaasa eqqaamassavai, allaallu toqugaluarpata siunissami toqusunit makitikkumaarpai. (Job 14:14, 151900) Taamaattuminguna Biibilimi allassimasoq ‘ulloq toquffik ullormit inunngorfimmit pitsaanerusoq’. Maluginiarnarpoq ulloq kristumiunut eqqaaniartaqquneqartutuaq inunngorfimmut tunnganani ullormut toquffimmut tunngammat — tassa ulloq Jiisusip toquffia. Jiisusi Guutimit ‘ajunngitsumik tusaamaneqarmat’ tamatta annaanneqarnissatsinnik periarfissinneqarpugut. — Luk 22:17-20; Hebr 1:3, 4.

POORSKIMI ILEQQORINEQARTARTUT — QITORNIGAJUSSUTSIMIK GUUTISIORFIGINNINNERMUT TUNNGAPPUT

13, 14. Poorskimi ileqqorineqartartut ilarpassui sumit aallaaveqarpat?

13 Kristumiuuneraqatigiit poorskimi Kristusip makititaanera nalliuttorsiutigisarpaat, poorskimili ileqqorineqartartut pallorfiginninnermit eqqunngitsumit aallaaveqarput. Assersuutigalugu manniit ukallillu poorskisiornermi atorneqartarnerat sumit aallaaveqarpa? Ujarlerfissiaq naapertorlugu manniit “inuunermut nutaamut makititaanermullu assersuutaasimapput pingaarutillit,” ukalerlu kaniinalu ukiorpassuarni qitornigajussutsimut assersuutaasimallutik. (Encyclopædia Britannica) Atuakkamilu Højtider og fester-imi Kristian Jensenip atuakkiaani ima allassimavoq: “Poorskimi assigiinngitsorpassuarnik ileqqoqartoqartarpoq. Poorskimi mannik ilisimaneqarnerpaajugunarpoq. ... Kristumiussuseq sioqqullugu mannik qitornigajussuseqartitsinermut, peqqissuseqartitsinermut ajussuseqatsaaliinermullu assersuunneqartarunarpoq.” Taamaattumik poorski Kristusip makititaaneranut nalliuttorsiutaanerarneqaraluartoq  poorskimi ileqqut qitornigajussutsimik guutisiorfiginninnermut tunngapput. *

14 Ileqqut qitornigajussutsimik guutisiorfiginninnermut tunngasut maajunnartut atorlugit ernermi makititaaneranik eqqaaniaaneq Jehovap akuererusussavaa? Naamerluinnaq! (2 Kor 6:17, 18) Biibilimilu Jiisusip makititaanerata nalliuttorsiutiginissaanut peqquneqanngilagut, aap, tamatuma nalliuttorsiutiginissaanut tunngavissaqanngilaq. Taamaattumik Guutimik nalusut poorskimi ileqqui ileqquliullugit Jiisusip makititaaneranik nalliuttorsiutiginnittut Guutimut ilumoorfiginninngitsuliungaarput.

HALLOWEENI SUMIT AALLAAVEQARTOQ

15. Halloweeni sumit aallaaveqarpa?

15 Oqaaseq “halloweeni” oqaatsinit tuluttuunit (All Hallowsʹ Eve) ‘illernartut tamarmik unnuannik’ imaluunniit ‘iluartuutitat tamarmik unnuannik’ isumaqartunit aallaaveqarpoq. Nalliuttorsiornermilu ilisiitsut, torullit ersinartullu allat atorneqartarnerat ilisimaneqarpoq. Halloweeni itsaq kelterinit Tuluit Nunaanneersunit Irlandimeersunillu aallaaveqarpoq. Novembarip aallaqqaataata missaani qaammat imissigaangat samain, ‘aasap naaneranik’ isumalik, nalliuttorsiutigisarpaat. Kelterit upperaat samainip nalaani inuit silarsuaata anersaallu silarsuaata avissaaqqassutaat peerneqartartoq anersaallu ajunngitsut ajortullu nunarsuarmi angalaartartut. Upperaat toqusimasut tarningi nunami angerlarsimaffigisimasaminnut  uteqqittartut ilaqutaalu anersaanit iluarineqarumallutik nerisassanik imigassanillu taakkununnga sassaalliisassasut. Taamaattumik ullumikkut meeqqat aliortugaasuusaarlutik ilisiitsuusuusaarlutillu atisalersorlutik mamakujuttunik piumallutik pinngikkunillu perulluliortitsiniarlutik illumiit illumut angalaaraangamik ilisimanagu itsaq kelterit ileqqui ingerlateqqittarpaat.

ULLOQ KATIFFIIT MINGUITSUUTIGUK

16, 17. (a) Sooq kristumiut katittussat Biibili najoqqutaralugu sumiiffimminni katinnermi ileqqorineqartartut misissortariaqarpaat? (b) Ileqqunut, assersuutigalugu katerlaanut qaqorteqqasunik allanilluunniit naloriussinermut, tunngatillugu kristumiut suna eqqarsaatigisariaqarpaat?

16 Katittorsiornerit ileqqunit anersaarsiornermut tunngasunit Babylonersuarmeersunit mingutsinneqartut Guutip iluarinngilai. (Mark 10:6-9) Taamaattumik Saqqummersitani 18:23-mi allassimammat ‘uissap nuliassallu nipaat [Babylonersuarmi] tutsiutissaassasoq’ paasinarpoq.

17 Katittorsiornermi ileqqorineqartartut nunamiit nunamut assigiinngitsuusinnaapput. Ileqqut ilaat ajoqutaarpasinngikkaluarlutik ileqqunit ajoqersuinerluutimeersunit katerlaat taakkualu qaaqqusaat iluatsitsinissaannik kinguneqarsorineqartunit aallaaveqarsinnaapput. Ileqqut taakkua ilagaat katerlaanut qaqorteqqasunik allanilluunniit naloriussineq. Tamanna katerlaat anersaanit ajoquserneqaqqunagit nerisassat anersaapilunnik saammarsaaniarluni atorneqartarnerannik upperisapalaaqarnermit aallaaveqarsinnaavoq. Qaqorteqqasullu qitornigajussutsimut, pilluarnermut inuunertunermullu ukiorpassuarni atassuserneqartarput. Kialuunniit Guutip asanninneraniittuinnarumasup soorunami ileqqut minguttuut taakku ileqqorilernaveersaarluinnarusussavai. — 2 Korinthimiut 6:14-18 atuakkit.

18. Katinnermik pilersaarusiortut katittorsiornermullu qaaqqusaasut najoqqutassiat Biibilimeersut suut maleruartariaqarpaat?

 18 Jehovamut kiffaasut kristumiunut naleqquttuunngitsunik pissuseqarnavianngillat katinnermik katittorsiornermillu ataqqinartorsiorpalaarunnaarsitsisunik allalluunniit nalunngeqatiginnissutaannik mamiatsatsitsisinnaasunik. Assersuutigalugu ajoqutaasunik atoqatigiinnermulluunniit tunngasunik tusangiasaarerpaluttumik oqalugiarnaveersaartarput, katerlaanillu qaaqqusanilluunniit kanngusulersitsisunik quiasaarutipalaanik oqaaseqarnaveersaartarlutillu iliuuseqarnaveersaartarput. (Uss 26:18, 19; Luk 6:31; 10:27) Aamma ‘nunap piinik usorsisimaarutaasunik’ katittorsiornersuaqartitsinaveersaarnermikkut pilimaniannginnertik ersersittarpaat. (1 Joh 2:16) Katinnissat pilersaarusiorukku puiunngisaannaruk Jehovap ullup katiffippit nuannaarutaasutut eqqaamaneqartuarnissaa kissaatigigaa. *

SKÅLEERNEQ UPPERISARSIORNERMUT TUNNGAVA?

19, 20. Ujarlerfissiat marluk naapertorlugit skåleerneq sumit aallaaveqarpa, kristumiullu ilumoortut sooq skåleerneq ajorpat?

19 Katittorsiornerni katerisimaaqatigiinnernilu allani ileqqorineqartartut ilagaat najuuttut skåleernerat, imaluunniit kasuunnerat. Ujarlerfissiami Den Store Danske Encyklopædi-mi skåleerneq pillugu ima allassimavoq: “Skåleerneq grækerit ernguteqatigiinnerminni (symposion) nereqatigeereerlutik guutinut pilliinerannit aallaaveqarpoq, aamma nunani avannarlerni Guutimik nalusut guutinut katerisimaaqatigiittarnerannut attuumassuteqarpoq.” Ujarlerfissiami allami ima allassimavoq:  ‘Skåleerneq itsaq Guutimik nalusut pilliinerminni ileqqorineqartarnerannit aallaaveqarunarpoq, taamanilu inuummersornissamik peqqissilluarnissamilluunniit kissaat piumallugu imigassaq illernartoq guutinut pilliutigineqartarpoq.’ — International Handbook on Alcohol and Culture, 1995-imeersoq.

20 Ullumikkut inuppassuit skåleerneq upperisarsiornermut upperisapalaanulluunniit tunngasutut isiginngilaat. Taamaakkaluartorli immiartorfimmik kivitsineq “qilammut” — tupinnartumik pissaanilimmut — pilluaqquneqarnissamik qinnuteqarnertut isigineqarsinnaavoq, taamaaliornerlu Biibilimut naapertuutinngilaq. — Joh 14:6; 16:23. *

‘ILISSI JEHOVAMIK ASANNITTUSI AJORTOQ UUMIGISSAVARSI’

21. Nalliuttorsiornerit upperisarsiornermut tunnganngikkaluartut suut kristumiut ingalakkumavaat, aamma sooq?

21 Ullumikkut silarsuup ileqqorissaarneq pillugu najoqqutassiai qasukkariartuinnarput Babylonersuarmit toqqaannartumik toqqaannanngitsumilluunniit siuarsarneqarlutik. Nunat ilaanni ukiut tamaasa ingerlaaqatigiittoqartarpoq, assersuutigalugu karnevalertoqartarpoq. Amerlanertigullu taakkununnga peqataasut kanngunartumik qiteriaaseqartarput immaqalu anguteqatiminnoortartunik arnaqatiminnoortartunillu inooriaaseqarnermik nersorinnittarlutik. Jehovamik asannittut taakkununnga peqataanissaat isiginnaaqataanissaalluunniit silatusaarnerussava? Taamaalioraluarpata oqartoqarsinnaava ajortumik uumiginnilluinnartut? (Tuss 1:1, 2; 97:10) Tussiaasiortup isiginnittaasiatut isiginnittaaseqarnissaq silatusaarnerungaassaaq. Taanna ima qinuvoq: “Isikka alartikkit sallunermit [naleqanngitsunit, NW].” — Tuss 119:37.

22. Qaqugukkut kristumiu nalunngeqatiginnissutini tunngavigalugu nalliuttorsiornermut aalajangersimasumut peqataaniarluni nammineq aalajangersinnaava?

 22 Ulluni Biibilimut naapertuutinngitsumik nalliuttorsiorfiusuni kristumiup iliuutsimigut allat isumaqalersikkusunngilai nalliuttorsioqataalluni. Paulusi ima allappoq: “Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.” (1 Kor 10:31; takuuk “ Silatusaartumik aalajangiisarit”). Nalliuttorsiornerulli ileqqulluunniit aalajangersimasup upperisarsiornermut eqqunngitsumut, nunagisamik pingaartitsinermut politikkimulluunniit attuumassuteqannginnera erseqqilluinnarpat najoqqutassiallu Biibilimeersut unioqqutinneqanngippata kristumiut tamarmik immikkut aalajangersinnaapput peqataaniarlutik peqataaniarnatilluunniit. Kristumiup aamma allat misigissusii innimigiumavai taakku mamiatsatseqqunagit.

OQAATSIKKUT ILIUUTSIKKULLU GUUTI ATAQQINARTIGUK

23, 24. Jehovap najoqqutassiai naapertuilluartut qanoq periaaserilluta nassuiarsinnaavavut?

23 Inuppassuit nalliuttorsiornerit nuannarineqartartut ilaquttaminnik ikinngutiminnillu peqateqarnissaminnut periarfissatut isiginerusarpaat. Biibilimut tunngasumik isiginnittaatsitsinnik asannittuliunnginnermut ersiutaaneraasoqarpat ingasaassiniartuuneraasoqarpalluunniit inussiarnersumik nassuiaasinnaavugut Jehovap Nalunaajaasuisa ilaqutariittut ikinngutigiittullu nuannaarlutik katerisimaarnerit pingaartittaraat. (Uss 11:25; Oqal 3:12, 13; 2 Kor 9:7) Ukiup ingerlanerani qaqugukkulluunniit katerisimaaqatigiittarneq nuannaarutigaarput. Guutimilli asanninnerput taassumalu najoqqutassiaanik naapertuilluartunik maleruaajumanerput kajumississutigalugit ileqqunik Jehovap iluarinngisaanik ileqquliussinikkut nuannersumik  katerisimaaqatigiinneq mingutsikkusunngilarput. — Takuuk ungalusaq “ Pallorfiginninneq ilumoortoq nuannaartitsisarnerpaajuvoq”.

24 Jehovap Nalunaajaasuisa ilaasa inunnut paasinnikkumasunut kinguneqarluartumik takutittarsimavaat paasissutissat arlallit atuakkami Biibilimi sorpiaat ajoqersuutigineqarpat?-mi kapitali 16-imeersut. * Eqqaamajulli taakkua kukkunerannik uppernarsaanissarput anguniarnagu uummataasa killinnissaat anguniagarigipput. Taamaattumik tamatigut saamallutit ataqqinnillutillu “inussiarnersumik tarajulimmillu” oqaluttarit. — Kol 4:6.

25, 26. Angajoqqaat meeqqatik upperluarnerulersinnaaqqullugit Jehovamillu asanninnerulersinnaaqqullugit qanoq ikiorsinnaavaat?

25 Jehovap Nalunaajaasui paasisimasaqarluarput. Ajoqersuutit ileqqullu ilaat sooq eqqortuunerarlutigit allalli sooq eqqunngitsuunerarlutigit ilisimavarput. (Hebr 5:14) Taamaattumik ilissi angajoqqaajususi, meeqqasi najoqqutassianit Biibilimeersunit tunngavilersuisinnaanerannik ilinniartissigit. Taamaaliornissigut taakku upperluarnerulersinnaaqqullugit upperisartillu pillugu aperineqaraangata Biibili tunngavigalugu akisinnaaqqullugit ikiortarpasi, aamma Jehovap taakkuninnga asanninneranik qularunnaarsittarpasi. — Es 48:17, 18; 1 Petr 3:15, 16.

26 Guutimik “anersaakkut ilumoornikkullu” pallorfiginnittut tamarmik Biibilimut naapertuutinngitsumik nalliuttorsiornaveersaaginnaratik aammali sutigut tamatigut unneqqarissuunissartik ilungersuutigisarpaat. (Joh 4:23) Ullumikkut inuppassuit isumaqarput unneqqarissuujuarneq sapernartuusoq, Guutilli unneqqarissuunissamut peqqussutaanik maleruaaneq iluaqutaajuaannarpoq. Tamannalu kapitalimi tulliuttumi sammissavarput.

^ par. 3 Takuuk ungalusaq “ Nalliuttorsioqataassaanga?Register til Vagttårnets publikationer aamma Jehovap Nalunaajaasuisa ujarliutaat aqqutigalugit nalliuttorsiornerit assigiinngitsut pillugit paasissutissarsiorsinnaavutit.

^ par. 5 Biibilimi ukiunik qaammatinillu naatsorsueriaaseq inuillu oqaluttuarisaanerat naapertorlugit ilimanarpoq juutit qaammataanni etanimimik taaneqartumi, qaammatisiutit ullumikkut atuuttut naapertorlugit septembarip oktobarillu nalaanni, Jiisusi inunngorsimasoq. — Takukkit Indsigt i Den Hellige Skrift, atuagaq 1, qupp. 1115 aamma Napasuliaq Alapernaarsuiffik 1. novembari 1999-imoortoq, qupp. 4-5, Jehovap Nalunaajaasuinit saqqummersinneqartut.

^ par. 6 Oqaaseq “juulli” itsaq Europap avannaamiuisa oqaasiannit Jól-imit qitornigajussutsimik eqqissinermillu nalliuttorsiornerup taaguutaanit aallaaveqarunarpoq. Taamani guutit pillugit skåleerlutillu imertarput pilliisarlutillu ukiumilu nutaami eqqissinissaq qinnutigisarlugu. Iørn Piø atuakkiamini Bogen om julen-imi ima allappoq: “Oqaatsip juullip aallaaveqarnera kristumiussusermut attuumassuteqanngilluinnarpoq. Oqaaseq Guutimik nalusunit aallaaveqarluinnarpoq, isumaqarporlu ‘festinik’.”

^ par. 11 Mosesip inatsisai naapertorlugit arnaq ernisoq ajortaaruteqqussutitut pilliuteqartussaavoq. (3 Mos 12:1-8) Inatsisitigut piumasaqaat taanna iluaqutigalugu Israelikkunnut erseqqissarneqarpoq inuit meeqqaminnut ajortimik kingornussisitsisartut, tamannalu Israelikkut meeqqap inunngorneranut oqimaaqatigiissaartumik isiginnittaaseqalernissaminnut Guutimillu nalusut inuuissiornermi ileqquinik ileqquliussinnginnissaminnut iluaqutigisinnaavaat. — Tuss 51:7.

^ par. 13 Oqaaseq tuluttooq Easter, poorskimut atorneqartartoq, itsaq tuluit qaammariartulernermut upernalernermullu guutiutitaannit arnamit Eostremik, imaluunniit Ostaramik, atilimmit aallaaveqarunarpoq. Aamma qitornigajussutsimut guutiutitaavoq arnaq. Ujarlerfissiaq naapertorlugu guutiutitaq arnaq taanna “qaammammi ukaliuteqarpoq manninnik mamarisalimmik, ilaannikkullu ukallip niaquanik niaqulerneqarluni assilialiarineqartarpoq”. — The Dictionary of Mythology.

^ par. 18 Katittorsiornerit katerisimaartarnerillu allat pillugit allaaserisat pingasut ukunaniittut takukkit: Napasuliaq Alapernaarsuiffik 1. novembari 2006-imoortoq, qupp. 23-32, aamma Vagttårnet 15. oktobari 2006-imoortoq, qupp. 28-31.

^ par. 20 Takuuk Vagttårnet 15. februaari 2007-imoortoq, qupp. 30-31.

^ par. 24 Jehovap Nalunaajaasuinit saqqummersinneqartoq.