Imarisai

Imai

Jehovap Nalunaajaasui

Oqaatsit toqqakkit Kalaallisut

 TAPILIUSSAQ

Imminut inertittarneq qanoq ileqqoriunnaarneqarsinnaasoq

Imminut inertittarneq qanoq ileqqoriunnaarneqarsinnaasoq

Imminut inertittarneq ileqquuvoq anersaakkut isumakkullu ajoqutaasoq namminissarsiulersitsisartorlu. Imminut inertittartut allat atoqatissaannartut isigilersinnaasarpaat. Atoqatigiinneq asanninnermut ersiutaasutut isigiunnaarlugu iliuusissaannartut sivikitsumik nuannaarniutaasutut kinguaassiuutitigullu pilerissutsiminnik naammassinninniutitut isigilertarpaat. Inernerli sivikitsuinnarmik nalerisimaartitsisarpoq. Sooq? Timip avatai ‘kinguaassiuutitigut assuarnartuliornermut, minguttuunermut,  tiinngartunermut, pilerissusermullu ajoqutaasumut’ tunngatillugu toqulersinnagit uummarissartaramikkit. — Kol 3:5NW.

Apustili Paulusi ima allappoq: “Asasakka, ... immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.” (2 Kor 7:1) Siunnersuutaa maleruaruminaatsikkukku nikalloqinak. Jehova ‘isumakkeerfiginnikkumasarlunilu’ tamatigut ikiuiumavoq. (Tuss 86:5; Luk 11:9-13) Ilaannikkut imminut inertittoortaraluarlutit ileqqupalaaqarunnaarumallutit ilungersorninnit peqqissimininnillu erserpoq eqqortumik isiginnittaaseqartutit. Eqqaamajullu Guuti ‘uummatitsinnit annerusoq suullu tamaasa ilisimagai’. (1 Joh 3:20) Guutip nalunngilluinnaramisigut ajortuliavut kisiisa isiginngilai. Uagutsinnik ilisarisimannilluinnarami unneqqarilluta nallittorneqaqqulluta qinnutivut paasinnittuulluni tusarnaarumavai. Taamaattumik soorlu meeraq ajornartorsiuteqaraangami ataataminut saaffiginnikulasartoq, illittaaq maniguullutit unneqqarillutillu Guutimut saaffiginnittarnerit qatsuteqinagu. Jehovap ilerasuuteqarunnaarsinnaaqqullutit ikiussavaatit. (Tuss 51:3-14, 19; Es 1:18) Soorunami qinnutitit naapertorlugit pisariaqartunik iliuuseqartariaqarputit. Assersuutigalugu ikinngutipalaaqarnaveersaartariaqarlutillu pornografiimut tunngasut suulluunniit ingalassimalluinnartariaqarpatit. *

Imminut inertittarneq qaangeruminaatsikkukku tamanna pillugu anaanavit ataatavilluunniit kristumiup imaluunniit ikinngutaasup anersaakkut inersimalluartup isumassuisullu oqaloqatiginissaanik nangaassuteqassanngilatit. * — Uss 1:8, 9; 1 Th 5:14; Tit 2:3-5.

^ par. 4 Ilaqutariippassuit qarasaasiaq inimi ilaqutariit tamarmik isersimaarfigisartagaanniitittarpaat qarasaasiamik atuisarneq nakkutigineqaqqullugu. Ilaasa aamma qarasaasiamut programmit aalajangersimasunik nuisitsinaveersaartartut pisiarisarpaat. Eqqaamajulli mobilit qarasaasiaaqqallu tigumiartakkat atorlugit internetertoqarsinnaallunilu programmit tamakkiisumik tutsuigineqarsinnaannginnerat.

^ par. 5 Imminut inertittarunnaarnissamut siunnersuutitsialaat ilaat ukuupput: Imminut pinngitsaalillutit allanik eqqarsaateqalerit. (Fil 4:8) Eqqunngitsunik pilerissuseqalersitsisinnaasut isiginaveersaakkit. (Tuss 119:37) “Pissaaneq asseqanngitsoq” qinnutigiuk. (2 Kor 4:7) Kristumiutut sammisassanik ulapputeqartuarit. — 1 Kor 15:58; takuuk Unge spørger — Svar der duer, atuagaq 1, qupp. 178-182.