“Ilisimasunik peqateqartoq ilisimassuseqalersarpoq.” — USS 13:20.

1-3. (a) Ilumoortoq assortugassaanngitsoq suna Biibilimi eqqartorneqarpa? (b) Qanoq ililluta ikinngutinik uagutsinnut ajunngitsumik sunniuteqarsinnaasunik toqqaasinnaavugut?

UAGUT inuit svampitut ippugut — avatangiisitsinnik tamanik milluaasutut eqqajaasarpugut. Qanimut ikinngutitta isumaannik, najoqqutarisaannik inuttullu pissusiinik — nalullugu nalunaguluunniit — pigiliusseriaannaasarpugut.

2 Biibilimi eqqartorneqarpoq ilumoortoq assortugassaanngitsoq manna: “Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” (Uss 13:20) Biibili pillugu qinerlerfissiami allassimavoq oqaatsip “peqateqarneq”-up isumaanut ilaasoq ‘peqatigisamik asanninneq taassumunngalu qanittumik attaveqarneq’. Asasatsinnik ilaarseqqajaasarpugut, ilaa? Asasavut qanittumik attaveqarfigalugillu misigissuseqarfigigatsigit taakku uagutsinnut — ajunngitsumik ajortumilluunniit — sunniuteqangaarsinnaapput.

3 Guutip asanninneraniittuinnassagutta pingaaruteqarluinnarpoq uagutsinnut ajunngitsumik sunniuteqartussanik ikinngutissarsiornissarput. Qanoq ililluta ajunngitsumik sunniuteqartussanik ikinngutissarsiorsinnaagatta? Oqaatigilluaannarlugu, Guutip asasaanik asanninnitsigut — taassuma ikinngutaanik ikinnguteqalernitsigut. Manna eqqarsaatigeriaruk: Jehovap ikinngutai — taassuma piumasaqaatigisaanik pissusillit — ikinngutitaarisinnaasatta  pitsaanerpaartaraat, ilaa? Taamaattumik misissoriartigu inuit taassuma asasai qanoq ittuunersut. Taassuma pissutsinut isiginnittaasia eqqaamajuarutsigu, ikinngutinik ineriartornartunik toqqaalluarnerusinnaassaagut.

GUUTIP ASASAI

4. Sooq Jehova ikinngutissaminik toqqaagaangami kikkuugaluartunilluunniit toqqaannginnissaminut pisinnaatitaava, aamma sooq Aaperaat ikinngutimisut eqqartorpaa?

4 Jehova ikinngutissaminik toqqaagaangami kikkuugaluartunilluunniit toqqaaneq ajorpoq. Tamanna pisinnaatitaaffigaa, ilaa? Tassami qilammi nunamilu kisimi oqartussaalluni Naalagaavoq, taassumunngalu ikinngutaaneq inummut ataqqinaataanerpaavoq. Taassuma ikinngutissamisut toqqartagai kikkuuppat? Jehovap imminik tatiginnilluinnartut qanillisarpai. Assersuutigeriartigu ataataanerpaaq Aaperaat, upperluarnini pillugu ilisimaneqartoq. Ernermik pilliutiginneqquneqarneq ataataasup uppernikkut misilinneqaatigisinnaasaasa sakkortunerpaartaraat. * Biibilimili allassimavoq Aaperaap ‘Iisaaq pilliutissatut sassaakkaa’ qularutiginngilluinnarlugu “Guuti ima pissaaneqartigisoq allaat toqusunit makititsisinnaalluni”. (Hebr 11:17-19) Aaperaap uppernera naalanneralu pissutigalugu Jehovap taanna ikinngutimisut asannittumik eqqartorpaa. — Es 41:8; Jaak 2:21-23.

5. Jehovap ilumoorfiginnillutik imminut naalattut qanoq isigai?

5 Jehovap ilumoorfiginninneq naalannerlu pingaartingaarpai. Imminik ilumoorfiginninnissamik allanit  tamanit pingaarnerpaatitsiumasut asavai. (Tussiaat 37:28 atuaruk). Soorlu atuakkami matumani kapitali 1-imi paasigipput, Jehovap inuit asanninnermik kajumississuteqarlutik imminut naalanniarlutik aalajangertut nuannaarutigisarpai. Ussatit 3:32-mi ima allassimavoq: ‘Jehova unneqqarissunut ikinngutaalluarpoq.’ (NW) Jehovap ilumoorfiginnillutik piumasaqaatiminik eqqortitsisut asannilluni kajumissaarpai ‘tupermini’ tikeraajoqqullugit — imminik pallorfiginneqqullugit qaqugukkulluunniillu imminut qinunikkut saaffiginnittaqqullugit. — Tuss 15:1-5.

6. Jiisusimik asanninnerput qanoq ililluta ersersissinnaavarput, Jehovallu ernerminik asannittut qanoq isigai?

6 Jehovap ernituaminik Jiisusimik asannittut asavai. Jiisusi ima oqarpoq: “Uannik asannittup oqaatsikka aalajangiutissavai [maleruassavai, 1936], taannalu Ataatama asassavaa.” (Joh 14:23) Jiisusimik asanninnerput qanoq ililluta ersersissinnaavarput? Taassuma inassutaanik, ilaatigut nutaarsiassamik nuannersumik oqaluussissutiginninnissamik ajoqersuganngortitsiortornissamillu peqqussutaanik, maleruaanikkut. (Matt 28:19, 20; Joh 14:15, 21) Aamma taassuminnga asanninnerput ersersissinnaavarput ‘tumaanik atuaanitsigut’, tassa naammalluinnanngitsuugaluarluta sapinngisarput tamaat oqaatsikkut iliuutsikkullu taassuminnga ilaarsiniartarnitsigut. (1 Petr 2:21) Jehovap qamannga pisumik nuannaarutigisarpai ernerminik asanninneq kajumississutigalugu taassuma maligassiaanik malinninniarlutik ilungersortut.

7. Sooq Jehovap ikinngutaanik ikinnguteqarneq silatusaarnerua?

7 Jehovap ikinngutiminut piumasaqaataasa ilagaat taakkua uppertuunissaat, ilumoorfiginnittuunissaat, naalattuunissaat, Jiisusimik asanninnissaat taassumalu  inooriaasianik nuannarinninnissaat. Tamatta immikkut imminut ima aperisariaqarpugut: ‘Ikinngutikka taamaattuuppat? Jehovap ikinngutaanik ikinnguteqarpunga?’ Taakkuninnga ikinnguteqarneq silatusaarnerussaaq. Kristumiut anersaakkut pissuserineqartussanik ajunngitsunik ineriartortitsisartut aallussilluarlutillu nutaarsiassamik nuannersumik oqaluussissutiginnittartut uagutsinnut ajunngitsumik sunniuteqarsinnaapput Guutimillu nuannaartitsinissamik aalajangiusimanninnitsinni uagutsinnik tapersersuisinnaallutik. — Takuuk ungalusaq “ Ikinngutaalluartoq qanoq ittuua?

DAAVIP JONATANILLU IKINNGUTIGIINNERAT

8. Suut maluginiartarpigit ukua ikinngutigiinnerat pillugu atuaraangavit (a) No’omip Ruthillu? (b) hebræerit inuusuttut pingasut? (c) Paulusip Timotheusillu?

8 Biibilimi oqaluttuarpassuaqarpoq ikinngutinik ineriartornartunik toqqaanerminnik iluaqutiginnissimasunik. Assersuutigalugu eqqartorneqarput No’omip ukuaatalu Ruthip ikinngutigiinnerat, hebræerit inuusuttut pingasut Babylonimi ikinngutigiillualersimasut ikinngutigiinnerat aammalu Paulusip Timotheusillu ikinngutigiinnerat. (Ruth 1:16; Dan 3:17, 18; 1 Kor 4:17; Fil 2:20-22) Taakku tamarmik immikkorluinnaq ittumik ikinngutigiissimapput. Immikkorluinnarli ittumik ikinngutigiissimasut suli allat, tassa Daavi Jonatanilu, sammeriartigit.

9, 10. Daavip Jonatanillu ikinngutigiinnerat sumik tunngaveqarpa?

9 Biibilimi oqaluttuarineqarpoq Daavip Goliatimik toqutsinerata kingorna ‘Jonatanip Daavi assut qanitarisutut misigisimaleraa immisullu asatigileraa’. (1 Sam 18:2) Taamaalillutik ukiumikkut nikingagaluaqalutik ikinngutigiilerput Jonatanillu sorsunnermi toqutaanera tikillugu  ikinngutigiittuarlutik. * (2 Sam 1:26) Ikinngutigiilluarnerat sumik tunngaveqarpa?

10 Daavi Jonatanilu ikinngutigiittut imminnut qanittuararsuupput anersaakkut ittunik ataatsimoorussaqaramik, tassa tamarmik Guutimik asannittuugamik taassumunngalu aalajaattuarnissartik assut kissaatigigamikku. Jonatanip Daavip pissusii nuannarai, taamatuttaaq Daavip Jonatanip pissusii nuannarai. Daavip inuusuttup qunusuilluni Jehovap aqqanik illersuinermini sapiitsuunera kajuminneralu Jonatanip ajasoorutigisimassavaa. Aamma Daavi qularnanngitsumik Jonatanimik imminit angajulliusumik ataqqinningaarsimassaaq, taannami ilumoorfiginnilluni Jehovap aaqqissuussineranik tapersersuivoq namminissarsiornanilu nammineq soqutigisani tunulliullugit Daavip soqutigisaanik pingaarnerutitsilluni. Assersuutigalugu Daavi taamani kunngimit Saulimit ajortumit, Jonatanip ataataanit, kamattumit qimaalluni inoqajuitsumi inuusariaqarnini pissutigalugu nikallungasorujussuummat pisut eqqarsaatigeriakkit. Asseqanngitsumik ilumoorfiginninnini ersersillugu ‘Jonatanip taanna ornippaa Guutimi nutaamik sapiissuseqalersillugu’. (1 Sam 23:16) Takorlooriaruk Daavi qanoq misigisimasimassanersoq ikinngutigilluakkami ornimmani tapersersorniarluni qiimmassarniarlunilu! *

11. Jonatanip Daavillu ikinngutigiinnerat ikinngutigiinnermut tunngatillugu sumik ilinniarfigaajuk?

 11 Jonatanip Daavillu ikinngutigiinnerat sumik ilinniarfigaarput? Pingaarnerpaamik, ikinngutigiittut anersaakkut ittunik pingaartitseqatigiinnissaq pingaaruteqarnerpaasoq. Uppeqatitsinnut, pingaartitatta assinginik  pingaartitalimmut uagutsitullu Guutimut aalajaattuarumasumut qanittumik attaveqaleraangatta taannalu eqqarsaatitsinnik, misigissutsitsinnik misigisimasatsinnillu avitseqatigiissinnaasarpugut tamatsinnut qiimmassaataallunilu nakussatsissutaasumik. (Romamiut 1:11, 12 atuakkit). Uppeqatitta akornanni taamatut anersaakkut ittunik pingaartitsisunik ikinngutitaarsinnaavugut. Imaappali naalagaaffilersaarfimmut ataatsimiigiartartut tamarmik ineriartornartumik ikinngutigineqarsinnaasut? Naamik, taamaattariaqanngilaq.

 QANIMUT IKINNGUTISSANIK TOQQAANEQ

12, 13. (a) Sooq ikinngutissanik toqqaassagaangatta uppeqatigigaluarutsigilluunniit narrutusariaqarpugut? (b) Ilagiit siulliit ilaat sunut tunngatillugu ajornartorsiuteqarpat, tamannalu pissutigalugu Paulusi qanoq sakkortuumik mianersoqqusiva?

12 Anersaakkut ineriartortitsisunik ikinngutitaassagutta allaat ilagiinni ikinngutissarsioraangatta narrutusariaqarpugut. Tamanna tupigissavarput? Naamik. Soorlu orpiup inerititaasa ilaat inerinniaasaartartut, taamatuttaaq ilagiinni kristumiuniittut ilaat allanit anersaakkut inersimalluartunngorniaasaarnerusarput. Taamaattumik ilagiinni tamani kristumioqarpoq anersaakkut ineriartorneq eqqarsaatigalugu assigiinngitsunik killiffilinnik. (Hebr 5:12–6:3) Soorunami nutaajusut sanngiitsullu naammagittarfigisarlugillu asannittuliorfigisarpavut anersaakkut ineriartornissaannut ikiorusukkatsigit. — Rom 14:1; 15:1.

13 Ilaannikkut imaassinnaasarpoq ilagiinni pissutsit pissutigalugit kikkut ilagisarnerlugit mianersuutigisariaqaripput. Ilaat immaqa ippinnartunik iliuuseqartarput. Allat saammarsagassaanngitsuusinnaallutilluunniit naammagittaalliorajuttuusinnaapput. Kristumiut siulliit nalaanni ilagiit ilaat tamakkununnga tunngatillugu ajornartorsiuteqartarput. Kristumiut amerlanersaat aalajaatsuupput, ataasiakkaalli eqqunngitsuliortarput. Korinthimi ilagiinniittut ilaat kristumiunit ajoqersuutigineqartut ilaannik aalajangiusimanninngimmata Paulusip ilagiit taakku ima mianersoqquai: “Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.” (1 Kor 15:12, 33) Aamma Paulusip Timotheusi mianersoqquaa allaat uppeqataasa kristumiut eqqunngitsuliortartunik ilaqarsinnaanerat pillugu. Timotheusi kajumissaarneqarpoq inunnut taama ittunut ilaaqqunagu,  tassa taakkuninnga qanimut ikinnguteqalerniaqqunagu. — 2 Timotheusi 2:20-22NW, atuakkit. *

14. Najoqqutassiaq Paulusip ikinngutinik toqqaanermut tunngatillugu mianersoqqussutaanut tunngaviusoq qanoq atorsinnaavarput?

14 Najoqqutassiaq Paulusip mianersoqqussutaanut tunngaviusoq qanoq atorsinnaavarput? Inuit uagutsinnut ajortumik sunniuteqarsinnaasut qanittumik attaveqarfiginaveersaarlugit — taakku ilagiit iluanniikkaluarpata avataanniikkaluarpataluunniit. (2 Th 3:6, 7, 14) Jehovamut attaveqarnerput paarilluartariaqarparput. Eqqaamajuk svampitut milluaasutut illuta qanimut ikinngutitta isumaannik pissusiinillu pigiliusseqqajaasartugut. Soorlu svampi seernartumut misukkaanni naatsorsuutigineqarsinnaanngitsoq imermik ulikkaassasoq, taamatuttaaq inuit uagutsinnut ajortumik sunniuteqartut ilagisarutsigit naatsorsuutigisinnaanngilarput tamanna uagutsinnut iluaqutaassasoq. — 1 Kor 5:6.

Uppeqatitta akornanni ineriartornartunik ikinngutitaarsinnaavugut

15. Ilagiinni anersaakkut ittunik pingaartitsisunik ikinngutitaarumallutit susinnaavit?

15 Qujanartumik uppeqatitta akornanni ineriartornartunik ikinngutitaarnissamut periarfissarpassuaqarpoq. (Tuss 133:1) Qanoq ilillutit ilagiinni anersaakkut ittunik pingaartitsisunik ikinngutitaarsinnaavit? Pissuserineqartussanik ileqqunillu Guutip iluarisaanik ineriartortitsinerujartortillutit  taamatut iliortut allat qularnanngitsumik ilisarisimanerulerusussavaatsit. Tamatuma saniatigut imaassinnaavoq ikinngutitaartorumallutit illit siulliullutit iliuuseqartariaqartutit. (Takuuk ungalusaq “ Ikinngutaalluartunik ima ikinngutitaarpugut”). Illit nammineq pissusererusutattut pissusilinnik ikinngutissarsiorit. Ilagisartakkavit saniatigut allanik ilagisartagaqalernissamik siunnersuut Biibilimiittoq maliguk, immaqa uppeqatinik ikinngutitaartornikkut taakkua amiisa qalipaataat, inuiaassusiat kulturiallu apeqqutaatinnagit. (2 Kor 6:12, 13; 1 Petrusi 2:17 atuaruk). Ilutipajaatit kisiisa ilagisarnagit. Eqqaamajuk Jonatani Daavimit angajulliunerungaatsiartoq. Utoqqaat ilarpassuisa misigisimasarpassui ilisimassuseqangaarnerallu ikinngutigiinnermut pisuunnguallaataasinnaapput.

 AJORNARTORSIUTEQALERAANGAT

16, 17. Sooq uppeqatitta misigissutsitigut annersillutaluunniit pakatsisippatigut ilagiinnut attaveqarunnaassanngilagut?

16 Ilagiinni kristumiuniittut inuttut pissusii tunuliaqutaallu assigiinngilluinnartuummata ilaannikkut ajornartorsiuteqartoqalersinnaavoq. Uppeqaterput immaqa qamuuna anniutigisatsinnik oqarluniluunniit iliuuseqartoorsinnaavoq. (Uss 12:18) Ilaannikkut ajornartorsiutit pilertarput paatsoornerit, isumaqatigiinngissutit inuttulluunniit assigiinngissutit pissutigalugit. Tamakku mamiatsassutigalugit ilagiinnik tunussissaagut? Jehovamik taassumalu asasaanik ilumoortumik asannikkutta taamaaliornavianngilagut.

17 Jehova Pinngortitsisigigatsigu inuunermillu atatitsisuummat asasariaqarlugulu tunniusimaffigilluinnartariaqarparput. (Saqq 4:11) Aamma ilagiit taassuma atussallugit iluarisai ilumoorfiginnilluta tapersersortariaqarpavut. (Hebr 13:17) Taamaammat uppeqatitta misigissutsitigut annersillutaluunniit pakatsisippatigut qanoq iluarinninngitsiginerput takutinniarlugu ilagiinnut attaveqarunnaarnavianngilagut. Aamma sooq ilagiinnut attaveqarunnaassagatta? Ajuallatsitsisormi tassaanngilaq Jehova. Jehova asagatsigu taanna taassumalu innuttai tununngisaannassavavut! — Tussiaat 119:165 atuaruk.

18. (a) Ilagiinni eqqissineq siuarsarniarlugu iliuuserisinnaasavut suuppat? (b) Isumakkeerfiginninnissamut pissutissaqaraangat isumakkeerfiginnittarutta tamanna qanoq kinguneqarluartassava?

18 Uppeqatitsinnik asanninnerput ilagiinni eqqissinermik siuarsaanissamut kajumississutigaarput. Jehovap asasani naammalluinnartuunissaannik piumaffigineq ajorpai, aamma uagut allat naammalluinnartuunissaannik piumaffigissanngilavut. Asanninneq allat kukkuluttornerisa isiginngitsuusaarnissaannut aamma tamatta naammalluinnanngitsuullutalu kukkusarnitta eqqaamanissaanut  iluaqutigaarput. (1 Petr 4:8) ‘Isumakkeerfigeqatigiittarnissatsinnut’ iluaqutigaarput. (Kol 3:13) Siunnersuummik tamatuminnga malinninnissaq ajornaatsuujuaannanngilaq. Nikallornartut eqqarsaatigivallaartarutsigit puttarseqqajaalersinnaavugut immaqalu eqqarsalersinnaalluta uagutsinnut ajortumik iliortoq kamannitsigut pillarsinnaallugu. Taamaalioruttali ilumoortumik imminut ajoqusiinnassaagut. Isumakkeerfiginninnissamulli pissutissaqaraangat isumakkeerfiginninniarluta aalajangertarutta tamanna kinguneqarluarsinnaavoq. (Luk 17:3, 4) Qamuuna eqqississaagut, ilagiinni eqqissinermut siuarsaataassaaq, pingaarnerpaamillu Jehovamut attaveqarnitsinnut illersuutaassaaq. — Matt 6:14, 15; Rom 14:19.

IKINNGUT IKINNGUTIGIUN­NAARNEQAR­TARIAQARAANGAT

19. Pissutsit suut pissutigalugit ilagiinnut ilaasortaasimasup ilagisarunnaarnissaa pisariaqalertarpa?

19 Ilaannikkut ilagiinnut ilaasortaasimasup ilagisarunnaarnissaa pisariaqartarpoq. Tamanna pisariaqalertarpoq inuk allamik isumataarnani Guutip inatsisaanik unioqqutitsisimasoq ilaajunnaarsitaagaangat imaluunniit eqqunngitsumik ajoqersuuteqarnermigut imminulluunniit ilagiinnut ilaasortaajunnaarsinnermigut uppernerminik tunussigaangat. Guutip oqaasiani erseqqissumik allassimavoq inuit taamaattut ‘ilagisassanngikkivut’. * (1 Korinthimiut 5:11-13 atuakkit; 2 Joh 9-11) Ikinngutigisimasatta ilaquttattaluunniit ilaginaveersaarnissaat sapernartorujussuusinnaavoq. Imminut ima aperigit: ‘Aalajangersimalluinnassaanga taamaalillungalu ersersillugu Jehovamik taassumalu inatsisaanik naapertuilluartunik  ilumoorfiginninnera allanit tamanit pingaarnerpaatillugu?’ Eqqaamajuk Jehovap ilumoorfiginninneq naalannerlu pingaartingaarai.

20, 21. (a) Sooq unioqqutitsisimasunik ilaajunnaarsitsisarneq asannittumik aaqqissuussinerua? (b) Sooq ikinngutissatsinnik toqqaaniarnitsinni silatusaarnissarput pingaaruteqarpa?

20 Unioqqutitsisunik ilaajunnaarsitsisarneq ilumut Jehovap asannittumik aaqqissuussaraa. Sooq? Ajortuliortumik allamik isumataarsimanngitsumik ilaajunnaarsitsisarneq Jehovamik asanninnitsinnut taassumalu aqqanik najoqqutassiaanillu ataqqinninnitsinnut ersiutaavoq. (1 Petr 1:15, 16) Aamma ilagiinnut illersuutaasarpoq. Aalajaatsut ilagiinniittut piaaralutik ajortuliortunit ajortumik sunnerneqannginnissaminnut illersorneqartarput, toqqissisimallutillu pallorfiginninnertik ingerlatiinnarsinnaasarpaat, nalunagu ilagiit silarsuarmi ajortumi matumani inoqajuitsumi puilasutullusooq ittut. (1 Kor 5:7; Hebr 12:15, 16) Aamma ilaajunnaarsitsinikkut sukannersumik perorsaatissiineq unioqqutitsisumut namminermut asanninnermut ersiutaavoq. Immaqa ilaajunnaarsitaasimasup silattuallassaguni Jehovamullu uterniarluni iliuuserineqartariaqartunik iliuuseqassaguni tamannarpiaq pisariaqartippaa. — Hebr 12:11.

21 Qanimut ikinngutitta uagutsinnik sakkortuumik sunniisinnaanerat inuttullu pissutsitsinnik ilusilersuisinnaanerat miserratigineqarsinnaanngilaq. Taamaattuminguna ikinngutissatsinnik toqqaaniarnitsinni silatusaarnissarput taama pingaaruteqartigisoq. Jehovap ikinngutaanik ikinnguteqalernitsigut taassumalu asasaanik asanninnitsigut pitsaanerpaanik ikinngutitaassaagut. Taakkua ajunngitsumik sunniuteqarnerat Jehovamik nuannaartitsinissamik aalajangiusimanninnissatsinnut iluaqutigisinnaavarput.

^ par. 4 Jehovap Aaperaamut tamatuminnga piumasaqarnermigut paasinarsisippaa qanoq pilliuteqartigiumaarnerluni, tassa ernituani pilliutigisussaallugu. (Joh 3:16) Aaperaamut tunngatillugu Jehova akuliuppoq savalu angutiviaq, Iisaajunngitsoq, pilliutigineqartussanngortillugu. — 1 Mos 22:1, 2, 9-13.

^ par. 9 Daavi Goliatimik toqutsigami allassimaqqaarfiit naapertorlugit nukappiaraannaavoq Jonatanilu toqummat 30-t missaanni ukioqarluni. (1 Sam 17:33; 31:2; 2 Sam 5:4) Jonatani 60-it missaanni ukioqarluni toquvoq, tassa Daavimit ukiut 30-t missiliorlugit angajulliuvoq.

^ par. 10 Soorlu Samuelimik allakkat siulliit 23:17-imi allassimasunit ersertoq, Jonatani Daavimik qiimmassaaniarluni tallimanik eqqaasaqarpoq: (1) Daavi erseqqunngilaa. (2) Qularunnaarsinniarpaa Saulip iliuuseriniagai iluatsinnavianngitsut. (3) Eqqaasippaa Guutip neriorsuisimaneratut kunnginngorumaarneranik. (4) Ilumoorfiginiarlugu neriorsorpaa. (5) Oqaluttuuppaa ilumoorfiginninnini allaat Saulip nalunngikkaa.

^ par. 13 2 Tim 2:20-22NW: “Illorujussuarmimi kuultinik sølvinillu puugutaqaannanngilaq, aammattaarli qisunnik marrarnillu puugutaqarpoq, ilaat siunertamut ataqqinartumut allalli siunertamut ataqqinanngitsumut atugassat. Taamaammat taaneqartunut kingullernut ilaanngitsoq puugutaassaaq siunertamut ataqqinartumut atugassaq, illernartitaasoq, naalakkaminut iluaqutaasoq, ajunngitsuliornissanut tamanut piareersimasoq. Taamaattumik inuusuttut kajungerisaat qimarratigikkit, noqqaassutigikkillu naapertuilluassuseq, upperneq, asanninneq, eqqissineq uummatimikkut minguillutik Naalakkamik torlorfiginnittut peqatigalugit.”

^ par. 19 Ilaajunnaarsitaasimasup imminulluunniit ilaasortaajunnaarsissimasup qanoq periaaseqarfiginissaa pillugu amerlanerusunik paasissutissaqarpoq tapiliussami “Ilaajunnaarsitaasimasoq qanoq periaaseqarfigissagipput”.