Imarisai

Saqqaata tullia

Imai

Jehovap Nalunaajaasui

Kalaallisut

“Guutip asanninneraniittuinnaritsi”

 KAPITALI 16

Diaavulu qoqassiiniutaalu akiukkit

Diaavulu qoqassiiniutaalu akiukkit

‘Diaavulu akiorsiuk, taava ilissinnit qimaassaaq.’ — JAAK 4:7NW.

1, 2. Kuisittoqaraangat kikkut nuannaartarpat?

UKIUT arlallit Jehovamut kiffartortuuit? Taamaappat qularnanngitsumik kuisittussanut oqalugiaatit amerlasuut tusarnaarnikuuatit. Qasseriarlutit najuussimagaluaruilluunniit kuisittussanik saarlerni issiasunik oqalugiaammi apeqqutit akiniarlugit nikuittoqaraangat killitsittarunarputit. Morsutsinneqareerlutik imermit qaqigaangata isiginnaartut nuannaarlutik ersaartaattarput. Jehovamik tapersersuiumallutik aalajangertut taakku takullugit killitsillutit qullilisarunarputit. Aap, kuisittoqaraangat uagutsinnut nuannaarutaangaartarpoq!

2 Sumiiffitsinni ukiumut qaqutiguinnaq kuisittoqartaraluartoq inngilit kuisittorpassuarnik qilammiit isiginnaartarnertik immikkut pisinnaatitaaffigaat. Takorloorsinnaaviuk sapaatit-akunneri tamaasa nunarsuaq tamakkerlugu inuit tuusintillit Jehovap peqatigiissortaanut ilannguttarnerat ‘qilammi qanoq nuannaarutaatigisoq’? (Luk 15:7, 10) Qularnanngilaq Jehovap ‘erlinnangaartuutaasa’ (NW) amerliartornerat inngilit nuannaarutigingaaraat. — Hagg 2:7.

“DIAAVULU LØVITUT UIANNISAARTUTUT ANGALASARPOQ”

3. Sooq Saatani ‘løvitut uiannisaartutut angalasarpa’, sunalu siunertaraa?

3 Anersaajusunilli pinngortitaqarpoq kuisittorpassuarnik kamaatiginningaartunik. Inuppassuit tuusintillit  silarsuarmik ajortunngorsimasumik tunussinerat Saatanip anersaapiluillu paamitsaatigaat. Saatanimi inunnik asanninnermik kajumississutiginnillutik Jehovamut kiffartortoqarnaviannginneraallunilu misilinneqarnermi aalajaattuartoqarnaviannginneraasimavoq. (Jobi 2:4, 5 atuakkit). Taamaattumik inummik Jehovamut tunniulluinnartoqarniarluni aalajangertoqaraangat Saatanip sallunera uppernarsarneqartarpoq. Soorlulusooq Saatani ukiumut sapaatit-akunnerit tamaasa tuusintileriarluni isanneqartartoq. Tupinnanngilaq ‘løvitut uiannisaartutut angalasarmat iisassarsiorluni’! (1 Petr 5:8) ‘Løvip’ taassuma Guutimut attaveqarnitsinnik ajoqusiilluniluunniit Guutimut attaveqarunnaarsitsiniaanermigut anersaakkut pisariniarsuataarpaatigut. — Tuss 7:2, 3; 2 Tim 3:12.

Jehovamut tunniulluinnarlunilu kuisittoqaraangat Saatanip salluneranik uppernarsaasoqartarpoq

4, 5. (a) Saatanip sunniisinnaanera sutigut marlutsigut Jehovamit killilerneqarpa? (b) Kristumiut suna qularutiginngissinnaavaat?

 4 Akeqqamilli peqqarniitsumit saangerneqaraluarluta ersissutissaqanngilagut. Sooq? ‘Løvimmi uiannisaartup’ taassuma sunniisinnaanera Jehovap marlutsigut killilersimavaa. Sutigut? Siullertut, Jehovap kristumiut ilumoortut ‘inuppassuit amerlangaartut’ “annikilliortitaangaarnermit” aniguisinneqarnissaat siulittuutigaa. (Saqq 7:9, 14) Guutillu siulittuutai eqquuttuaannarput. Taamaattumik Saatanip nalusimassanngilaa Guutip innuttai ataatsimut isigalugit ajugaaffigisinnaanagit.

5 Saatanip sunniisinnaanera aamma allatigut killilerneqarpoq. Tamanna Guutip itsaq kiffaasa aalajaatsut ilaata oqaasiinit erserpoq. Pruffiiti Azarja Jehova pillugu kunngimut Asamut ima oqarpoq: “Naalakkap najorpaasi najorassinni.” (2 Nal 15:2; 1 Korinthimiut 10:13 atuaruk). Itsaq oqaluttuarpassuarnit erserpoq Saatani Guutip kiffaanik Guutimut attaveqarluartuartunik anersaakkut ajoqusiiniarluni iluatsinngisaannarsimasoq. (Hebr 11:4-40) Ullumikkut kristumiup Guutimut attaveqarluartup Diaavulu akiorsinnaavaa aamma allaat ajugaaffigisinnaallugu. Aap, Guutip oqaasiani ima qularunnaarsinneqarpugut: “[Diaavulu] akiorsiuk, taava ilissinnit qimaassaaq.” — Jaak 4:7NW.

‘AJUSSUTSIP ANERSAAVINUT PISSAASUNUT SORSUPPUGUT’

6. Saatani kristumiunik ataasiakkaanik qanoq saassussisarpa?

6 Saatani anersaakkut sorsunnermi ajugaasinnaanngilaq, mianersunngikkuttali inuttut ataasiakkaatut ajugaaffigisinnaavaatigut. Saatanip nalunngilaa Jehovamut attaveqarnerput ajoqusersinnaaguniuk ‘iisassarsiornermini’ iluatsissalluni. Qanoq taamaaliorniartarami? Sakkortuumik malersuinermigut, inunnik ataasiakkaanik  saassussinermigut aamma peqqusersusaarluni pilersaarutipiloqarnermigut. Saatanip periaaserisartagai pingasut taakku sammeriartigit.

7. Sooq Saatani Jehovap innuttaanik sakkortuumik malersuisarpa?

7 Sakkortuumik malersuinera. Apustili Johannesi allappoq silarsuaq “tamaat Ajortup pissaaneqarfigigaa”. (1 Joh 5:19NW) Allassimaffik tamanna kristumiut ilumoortut tamarmik pimooruttussaavaat. Saatanip silarsuaq guutiitsoq tamaat tammartereersimagamiuk maanna inuit pissaaneqarfiginngisani — Jehovap innuttai — eqqumaffigai taakkuninngalu malersuinini sakkortusisimallugu. (Mika 4:1; Joh 15:19NW; Saqq 12:12, 17) Kamattorujussuuvoq piffissakissutsi nalunnginnamiuk. Taamaattuminguna tatisinerulersimasoq. Naakkittaatsumik Guutimullu attaveqarnitsinnut aseruutaasinnaasumik kamangaarnerpaaffiata nalaani inuuvugut.

8. Paulusip anersaapilunnut ‘sorsuttugut’ allakkami suna pivaa?

8 Inunnik ataasiakkaanik saassussinera. Apustilip Paulusip kristumioqatini ima mianersoqquai: ‘Sorsunnerput ajussutsip anersaavinut pissaasunut sorsunneruvoq.’ (Ef 6:12) Sooq Paulusip oqaaseq “sorsunnerput” atorpaa? Oqaaseq grækerisooq versimi matumani ‘sorsunnermik’ nutserneqartoq nutsiinnavillugu ‘paanermik’ isumaqarpoq. Taamaalilluni Paulusip paasitippaatigut tamatta immikkut anersaapiluit paallugillusooq akiortariaqarivut. Nunami najugaqarfitsinni anersaapilunnik upperinninneq nalinginnaagaluarpat nalinginnaanngikkaluarpalluunniit eqqaamajuartariaqarparput Jehovamut tunniulluinnarattali, immaqalu allaat tunniulluinnarnitta siorna, paanermullusooq, imaluunniit akiuunnermut, tamatumunnga peqataalersugut. Paasinarpoq Paulusip kristumiut Efesosimiut aalajaaqqullugit arlaleriarluni kajumissaarmagit! — Ef 6:11, 13, 14.

9. (a) Sooq Saatanip anersaapiluillu qoqassiiniutit assigiinngitsut atortarpaat? (b) Sooq Saatanip eqqarsartaaserput ajortunngortinniartarpaa, qanorlu Saatani akiorsinnaavarput? (Takuuk “ Saatanimit tammartinneqarnaveerit!”). (c) Maanna suna sammissavarput?

 9 Peqqusersusaarluni pilersaarutipiloqarnera. Paulusip kristumiut ‘Diaavulup qoqassiniaraangatik atajuaqqullugit’ ilungersorluni kajumissaarpai. (Ef 6:11) Maluginiaruk Paulusi allammat Diaavulu arlaleriarluni qoqassiniaasartoq. Anersaapiluit ataasiaannaratik arlaleriarlutilli peqqusersusaartarput assigiinngitsutigullu periaaseqartarlutik. Tamatumunngalu pissutissaqarluarput. Ukiut ingerlaneranni kristumiut ilaat misilitsinnermi aalajangersimasumi aalajaassimagaluarlutik misilitsinnermi allami aalajaassimanngillat. Taamaattumik sanngiissutiginerpaasarput suunersoq paasiniarlugu Diaavulup anersaapiluillu maluginiaqqissaartarpaatigut. Anersaakkut sanngiissuterput paasereeraangamikku sanngiissutigisatsinnut nakkaannaqqajaatinniartarpaatigut. Qujanartumik Diaavulup pilersaarusioriaasipiluisa amerlanersaat ilisimavavut, Biibilimimi paatsuugassaanngitsumik allaatigineqarput. (2 Kor 2:11) Atuakkami matumani Saatanip qoqassiiniutaasa ilaat, assersuutigalugit pigisalerituneq, ikinngutipalaaqarneq kinguaassiuutitigullu assuarnartuliorneq, sammereerpavut. Maanna Saatanip qoqassiiniutaasa ilaat alla sammeriartigu — anersaarsiorneq.

ANERSAARSIORNEQ — JEHOVAMIK ILUMOORFIGIN­NINNGIT­SULIOR­NERUVOQ

10. (a) Anersaarsiornermut suut ilaappat? (b) Jehovap anersaarsiorneq qanoq isumaqarfigaa? Illimmi?

10 Anersaarsiornikkut anersaapiluit attaveqarfigineqartarput. Anersaarsioriaatsit ilaat tassaapput ullorissat allalluunniit najoqqutaralugit siulittuineq, angakkuarneq, serraneq, toqoreersunik siunersiuineq aarnuanillu atuineq. Nalunngisatsitut Jehovap anersaarsiorneq  ‘maajugaa’. (5 Mos 18:10-12; Saqq 21:8) Uaguttaaq ‘ajussuseq maajugigatsigu’ qanorluunniit pisoqaraluarpat ajussutsip anersaavi pissaasut attaveqarfiginianngisaannassavavut. (Rom 12:9) Anersaapilunnik attaveqaraluarutta Ataatarput qilammiusoq, Jehova, ilumoorfiginninngitsuliorfigingaassavarput!

11. Saatanip anersaarsioqataatissinnaagunisigut sooq tamanna ajugaasimaarutigersuataassavaa? Assersuusiorit.

11 Anersaarsiorneq Jehovamik ilumoorfiginninngitsuliornerummat Saatanip anersaarsioqataanissamut ussernartorsiortinniarsuataartarpaatigut. Saatani kristumiumik anersaarsioqataatitsigaangami ajugaasimaarsuataartarpoq. Sooq? Assersuuteqariarta: Sakkutuup ilini qimallugit akeqqaminut ililiuteqquneqarnini akuerippagu sakkutuut akeraasut naalagaanerata tamanna nuannaarutigissavaa. Immaqa allaat ililiuttup naalagarisimasaa narrutsatsinniarlugu sakkutooq ililiuttoq ajugaasimaarutitut pingaakujuutigissavaa. Tamatumunnga assingusumik kristumiup anersaarsiornermut tunngasumik sammisaqaruni piaaraluni Jehova qimassavaa Saatanimullu ililiulluni. Takorlooriaruk Saatanip Jehovamik ilumoorfiginninngitsumik ajugaasimaarutitut pingaakujuutiginninnissani qanoq nuannaarutigitigissagaa! Soorunami arlaannattaluunniit Diaavulup ajugaasimaarnissaa periarfissilluinnarumanavianngilaa! Jehovami ilumoorfigiuarusupparput, ilaa?

QULALERSITSIUMALLUNI APEQQUSIISARPOQ

12. Saatanip anersaarsiornermut isiginnittaaserput qanoq allanngortinniartarpaa?

12 Anersaarsiorneq maajugigutsigu Saatanip uagutsinnik anersaarsiortitsiniarnera iluatsinnavianngilaq. Taamaattumik eqqarsartaaserput allanngortinniarsarissavaa. Qanoq? Assigiinngitsutigut paatsiveerutitinniarsuataartarpaatigut  ‘ajortumik ajunnginneraanissarput ajunngitsumillu ajorneraanissarput’ siunertaralugu. (Es 5:20) Tamanna anguniarlugu Saatanip periaatsit atorluapiluttakkami ilaat atukulasarpaa — qulalersitsiumalluni apeqqusiineq.

13. Saatani qanoq qulalersitsiumalluni apeqqusiisimava?

13 Maluginiaruk Saatani itsaq qanoq qulalersitsiumalluni apeqqusiisartoq. Edenimi Eva ima aperaa: “Ilumut Guuti oqarpa naatsiiviup orpii neriffigissanngikkisi?” Saatanilu inngilit najuutsillugit Jobi pillugu ima aperivoq: ‘Asuliinnaq Guuti mianerinerpaa?’ (1900) Jiisusilu nunarsuarmi kiffartulermat Saatanip ussernartorsiortinniarpaa ima oqarluni: “Guutip ernerippatit ujaqqat makku timiusanngoqqukkit.” Eqqarsaatigeriaruk. Saatanip taama oqarnermigut allaat Jehova nikanarsarpaa, Jehovami sapaatit-akunnerisa arfinillit missaata tamatuma siorna Jiisusi pillugu ima oqarsimavoq: “Tassa ernera asasara, nuannarisara.” — 1 Mos 3:1; Job 1:9; Matt 3:17; 4:3.

14. (a) Saatani anersaarsiornermut tunngatillugu qanoq qulalersitsisarpa? (b) Maanna suut sammissavavut?

14 Ullumikkuttaaq Diaavulu anersaarsiornerup ajoqutaaneranik qulalersitsiumalluni taamatut periaaseqartarpoq. Alianaraluartumik kristumiunik qulalersitsiniaanermini ilaannikkut iluatsitsisarsimavoq. Qulalersut anersaarsioriaatsit ilaasa navianartuunerannik apeqqusiisimapput. (2 Kor 11:3) Taakku allamik eqqarsartaaseqalersinnaaqqullugit qanoq ikiorsinnaavavut? Saatanip qoqassiiniutaanit uukapaatinneqarnaveersaarnissarput qanoq qulakkeersinnaavarput? Apeqqutit taakku akiumallugit Saatanip anersaarsiornermut tunngasunit peqqusersusaarluni mingutsisimasai marluk sammeriartigit — tassa aliikkutassat katsorsaariaatsillu.

 KISSAATIGISAVUT PISARIAQARTITAVULLU ATORNERLUTTARPAI

15. (a) Inuppassuit anersaarsiorneq qanoq isumaqarfigaat? (b) Kristumiut ilaat silarsuup anersaarsiornermut isiginnittaasianit qanoq sunnertissimappat?

15 Ingammik Europami aamma Amerikami Avannarlermi anersaarsiorneq angakkuersaarnerlu navianaateqanngitsutut isigineqaleraluttuinnarput. Filmini, atuakkani, fjernsynimi aallakaatitassiani qarasaasiakkullu pinnguaatini anersaarsiorneq nuannersutut, alutornartutut ajoqutaanngitsutullu allaatigineqarlunilu takutinneqartarpoq. Filmit atuakkallu ilaat anersaarsiornermut tunngasortallit nuannarineqangaarput. Erseqqippoq anersaapiluit anersaarsiornermik navianartuunnginneraanerminni iluatsitsisimasut. Guutip kiffaasa ilaasa eqqarsartariaasiat tamatumannga sunnertissimava? Aap. Assersuutigalugu kristumiu filmi pingaarnerpaamik anersaarsiornermut tunngasunik imalik isiginnaareerlugu ima oqarpoq: “Filmi isiginnaaraluarlugu imaanngilaq uanga anersaarsiornermut peqataasunga.” Sooq taamatut eqqarsarneq navianartuua?

16. Sooq anersaarsiornermik sammisaqarnerusunik aliikkutarisaqarneq navianartuua?

16 Nammineq anersaarsiornermut peqataaneq allallu anersaarsiornerannik isiginnaarneq assigiinngitsuugaluartut soorunami imaanngilaq isiginnaaginnarneq navianaateqanngitsoq. Sooq? Una eqqarsaatigeriaruk: Guutip oqaasiani allassimasut naapertorlugit isummersinnaavugut Saatanip anersaapiluisalu nalugaat qanoq eqqarsartarnersugut. * Taamaattumik qanoq eqqarsartarnersugut  sutigullu anersaakkut sanngiissuteqarnersugut paasiniarlugu anersaapiluit iliuutsivut — aliikkutassanik toqqaanerput ilanngullugu — maluginiaqqissaarniartariaqarpaat. Kristumiup iliuutsimigut ersersikkuniuk filmit atuakkallu anersaarsiornermut tunngasortallit nuannaralugit, assersuutigalugu toqoreersunik siunersiuinermik, angakkuersaarnermik anersaapilulinnillu sammisallit nuannaralugit, anersaapilunnut kalerriisarporlusooq. Aap, qanoq sanngiissuteqarnerluni nammineq anersaapilunnut ersersittarpaa! Taamaattumik anersaapiluit kristumiup sanngiissutaanik saassussinissamut periarfissinneqartarput, kristumiulu anersaakkut paasaqattaassavaallusooq ajugaanissamik tungaannut. Kristumiut ilaat anersaarsiornermik sammisaqarnerusunik aliikkutaqarnermikkut anersaarsiornermik soqutiginnilersimasut piffissap ingerlanerani namminneq anersaarsioqataalersimapput. — Galatiamiut 6:7 atuaruk.

Napparsimatillutit Jehova annertoqqutigisaruk

17. Saatanip napparsimasut qanoq qoqassiniarsinnaavai?

17 Saatanip aliikkutaqarusunnitsinnik atornerluiniarnermi saniatigut aamma katsorsarneqarnissamik pisariaqartitaqarnerput atornerlunniartarpaa. Qanoq? Kristumiu assigiinngitsutigut katsorsarneqaqattaaraluarluni peqqiillioraluttuinnartoq nikallungalersinnaavoq. (Mark 5:25, 26) Tamanna Saatanip anersaapiluillu periarfissatut isigisarpaat. Anersaapiluimmi kristumiu peqqiilliortoq neriuutissaarussorisoq katsorsaariaatsinik ‘ajorsusermut’, imaluunniit anersaarsiornermut, tunngasunik misiliinissaanut immaqa ussernartorsiortissavaat. (Es 1:13) * Anersaapiluit qoqassiiniarnerminni iluatsippata  napparsimasoq Guutimut attaveqarluarunnaarsinnaavoq. Qanoq?

18. Kristumiut katsorsaariaatsimut tunngasut suut akuerinavianngilaat, aamma sooq?

18 Jehovap Israelikkut ‘pissaanermik eqqumiitsumik nassuiarneqarsinnaanngitsumillu’ ujartuisut ima mianersoqquai: “Assasi isaakkaluarussigit isikka matussavakka, qanorluunniit qinutigigaluarussi tusassanngilassi.” (Es 1:15) Soorunami qinnutitsinnut Jehovallu annertoqqusiinissaanut akornutaasinnaasut suulluunniit ingalassimalluinnarusuppavut — ingammik napparsimagaangatta. (Tuss 41:4; aamma takuuk nutsigaq 1900-meersoq). Taamaattumik nappaatinik suussusersioriaatsit nakorsaariaatsillu anersaarsiornermut attuumassuteqarpasippata kristumiut ilumoortut taakku akuerinavianngilaat. * (Matt 6:13) Taamaaliornermikkut Jehovap annertoqqusiiuarnera qularutiginngilluinnarsinnaavaat. — Takuuk ungalusaq “ Anersaarsiornermut attuumassuteqarpa?

ANERSAAPILUIT PILLUGIT OQALUALAARUTIT MIANERSUUTIGIKKIT

19. (a) Diaavulup pissaanini pillugu inuppassuit salloqittarlugit sumik isumaqartippai? (b) Kristumiut ilumoortut oqaluttuat suut ingalassavaat?

19 Europami aamma Amerikami Avannarlermi anersaarsiorneq angakkuersaarnerlu navianaateqanngitsutut isigineqaraluartut nunani allani pimoorunneqartorujussuupput. Nunani taakkunani Diaavulup inuppassuit salloqittarlugit isumaqartippai pissaaneqarnerungaarluni  uffa taama pissaaneqartiginani. Inuit ilaat ullut tamaasa makinnerminniit innarnerminnut, allaallu sininnerminni, anersaapiluit siooragisarpaat. Anersaapiluit pissaaneqangaarnerat aliortukkallu pillugit oqalualaaruterpassuaqarpoq. Inuppassuit taakku oqaluttuarissallugit nuannarisarpaat; aamma inuppassuit oqalualaarutit taakkununnga tunngasut tusarnaassallugit pissanganartittarpaat. Uagummi taakku pillugit oqalualaarnissamik peqataasassaagut? Naamik. Guutip ilumoortup kiffai peqataannginnissamut pingaarutilinnik marlunnik pissutissaqarput.

20. Qanoq Saatanip tusarliussaanik siammakaatitseqataasoorsinnaavugut?

20 Siullertut, anersaapiluit iliuuserisimasaat pillugit oqaluttuaqattaartassagutta Saatani tapersersussavarput. Qanoq? Guutip oqaasiani uppernarsarneqarpoq Saatani pissaanersuaqarluni iliuuseqartartoq, aammali ‘salluliuutaasunik nalunaaqutiliaqarlunilu peqquserluffiginninnera’ pillugu mianersoqquneqarpugut. (2 Th 2:9, 10) Saatani salloqittaasuunerugami nalunngilaa anersaarsiornermik nuannarinnittut isumaat qanoq sunnersinnaallugu ilumoortuunngitsullu qanoq ilumoortuunerarneqartissinnaallugit. Immaqa taakku isumaqarput piviusunik takusaqarlutillu tusaasaqarsimallutik, piviusuusorisatillu misigisatut ilumoortutut ingerlateqqittarpaat. Piffissap  ingerlanerani oqaluttuaat oqaluttuarineqaqqinnerminni ilallattaarneqartarput. Kristumiu oqaluttuat taakku ingerlateqqittarunigit Diaavulup, ‘sallumut ataataasup’, piumasaatut iliussaaq. Saatanillu tusarliussaanik siammakaatitseqataassaaq. — Joh 8:44; 2 Tim 2:16.

21. Suut eqqartorusunnerussavavut?

21 Kristumiup anersaapiluit pillugit piviusunik misigisaqarnikuusimagaluarluni uppeqatini taakkuninnga oqaluttuunnavianngilai. Sooq? Ima kajumissaarneqaratta: ‘Jiisusi uppernerup aqqutissiuussisua naammassisitsisualu tunaaritigu [aarlorfigisigu, 1936].’ (Hebr 12:2) Aap, anersaapiluit pillugit oqaluttuannginnissatsinnut pissutaasut aappaat unaavoq: Saatani pinnagu Jiisusi soqutiginerussavarput. Maluginiarnarpoq Jiisusi nunarsuarmiikkallarami Saatanip anersaapiluillu susinnaaneri susinnaannginnerilu pillugit oqaluttuarsinnaagaluarluni tamakku ajoqersukkaminut oqaluttuarineq ajorai. Guutip naalagaaffianik tusarliussinissani pingaartinneruaa.  Taamaattumik Jiisusi apustilillu ilaarlugit oqaloqatigiikkaangatta “Guutip tupinnangaartuliai” eqqartorusuttarpavut. — ApS 2:11; Luk 8:1; Rom 1:11, 12.

22. Qilammi qanoq nuannaartitseqataasinnaavugut?

22 Saatanip Jehovamut attaveqarnitsinnik ajoqusiiniarluni qoqassiiniutit assigiinngitsut, assersuutigalugu anersaarsiorneq, sakkugisarpai. Taamaakkaluartorli ajussuseq maajugigutsigu ajunngitsorlu aalajangiukkutsigu Diaavulu qanorluunniit uagutsinnik anersaarsioqataatitsiniaraluarpat ‘inissaqartinnavianngilarput’. (Efesosimiut 4:27 atuaruk). Takorlooriaruk ‘Diaavulumit qoqassiniarneqaraluarluta’ piuneerussaanissaata tungaanut aalajaattuarutta qilammi qanoq nuannaarutaatigissanersoq! — Ef 6:11; Luk 15:7.

^ par. 16 Saatanip taaguutai (Akerlilersuisoq, Mamarliisoq, Salloqittaasoq, Ussiisoq, Sallutooq) tunngavigalugit isummersinnaavugut uummaterput isumarpullu assersuutaasut Saatanip misissorsinnaanngikkai. Jehovali Jiisusilu ‘uummatinik tartunillu’ misissuisutut allaatigineqarput. — Tuss 26:2; Saqq 2:23.

^ par. 17 Esajap allagaani 1:13-imi oqaaseq hebræerisooq ‘ajorsusermik’ nutserneqartoq aamma ‘pissaanermik eqqumiitsumik nassuiarneqarsinnaanngitsumillu’ nutserneqarsinnaavoq. Anersaarsiornermut tunngasunik iliuuseqarneq pineqarpoq.

^ par. 18 Paasisaqarnerorusukkuit allaaserisat uku atuarsinnaavatit: “Peqqissuseq nappaatinillu katsorsaaneq Biibilimut naapertuuttumik isumaqarfigiuakkit”, Napasuliaq Alapernaarsuiffik 1. decembari 2008-moortoq, qupp. 23-27; “En helbredstest for dig?”, Vagttårnet 15. decembari 1994-imoortoq, qupp. 19-22.