“Allunaasaq pingasulik kittorajaatsuuvoq.” — OQAL 4:12.

1, 2. (a) Katerlaat pillugit qanoq isumakuluuteqartoqarsinnaava, aamma sooq? (b) Apeqqutit suut kapitalimi matumani akissutissarsissavavut?

KATITTORSIORNERMUT najuunneq nuannaraajuk? Katittorsiorneq nuanningaarsinnaammat inuppassuit najuunnissartik nuannarisarpaat. Aappariilersut assukkersorsimapput, pilluangaarnerallu kiinaasigut takuneqarsinnaavoq! Ullormi katiffimminni pilluarnerat killeqanngilaq, taakkualu siunissaat ajunngivippasippoq.

2 Taamaakkaluartorli ullumikkut aappariippassuit ajornartorsiuteqangaarlutillu pilluanngillat — allaat ilaat avittarput. * Katerlaanut ajunnginnerpaamik kissaassigaluarluni ilaatigut immaqa ima eqqarsartoqarsinnaavoq: ‘Pilluassappat? Aappariittuassappat?’ Apeqqutaavoq uiusoq nuliaasorlu Guutip aappariinnermut najoqqutassiaanut qanoq isiginnittaaseqarnersut. Guutip asanninneraniittuinnarumallutik najoqqutassianik taakkuninnga tutsuiginnillutik maleruaasariaqarput. (Ussatit 3:5, 6 atuakkit). Maanna Biibili iluaqutigalugu apeqqutit sisamat uku akissutissarsissavavut: Katinnissamut sumik pissutissaqarpa? Katikkusukkuit qanoq pitsaasumik aappartaarsinnaavit? Aappaqalernissannut qanoq piareersarsinnaavit? Aamma katissimasut qanoq aappariilluartuarsinnaappat?

 KATINNISSAMUT SUMIK PISSUTISSAQARPA?

3. Sooq eqqunngitsumik pissutiginiagaqarluni katinnissaq silatusaarnerunngila?

3 Ilaat isumaqarput aappaqanngitsut amigaateqartutut misigiuaannarlutillu pilluarsinnaanngitsut — tassa isumaqarput aatsaat aappaqaleraanni pillualivittoqarsinnaasoq. Tamannali ilumuunngilluinnarpoq! Jiisusip, nuliarsimanngitsup, aappaqannginneq tunissutaasutut eqqartorpaa, aappaqanngitsuusinnaanerlu pillugu ima oqarpoq: “Taamaaliorsinnaasoq taamaaliorli.” (NW) (Matt 19:11, 12) Aamma apustilip Paulusip aappaqannginnerup iluaqutissartai allaatigai. (1 Kor 7:32-35) Jiisusili Paulusiluunniit tamatumunnga tunngatillugu inatsisiliunngillat. ‘Aappariinnermik inerteqqutiginninneq’ allaat ‘anersaapiluit ajoqersuutaattut’ Biibilimi allaatigineqarpoq. (1 Tim 4:1-3) Aappaqanngitsulli akornusersorneqaratik Jehovamut kiffartornissaminnut periarfissarpassuaqartarput. Silatusaarnerussanngilaq eqqunngitsumik pissutiginiagaqarluni, assersuutigalugu allat kateqqusinerat pissutigiinnarlugu, katinnissaq.

4. Sooq meerartaarusukkaanni aappariilluarneq pingaaruteqarpa?

4 Katinnissamulli pissutissaqarluarpa? Aap, aappariinnermi aamma Guutimit asannittumit tunissutaavoq. (1 Mosesi 2:18 atuaruk). Aappariinneq iluaqutissartaqarpoq aappariinnullu pilluarnermik kinguneqarsinnaalluni. Assersuutigalugu meerartaarusukkaanni aappariilluarnissaq tunngaviuvoq pitsaanerpaaq. Aappariilluartut qitornamik pisariaqartitaat, soorlu toqqissisimaneq, asaneqarneq perorsarneqarnerlu, isumagilluarsinnaavaat. (Tuss 127:3; Ef 6:1-4) Meerartaarnissarli aappartaarnissamut pissutissatuaanngilaq.

5, 6. (a) Oqaluussisartup oqaasii 4:9-12 naapertorlugit ikinngutigiilluarneq qanoq iluaqutaasinnaava? (b) Aappariinneq qanoq allunaasatut pingasulittut issinnaava?

5 Allassimaffik kapitalimut matumunnga najoqqutarineqartoq versillu ataqatigiinnerat eqqarsaatigeriakkit. “Marluugaanni ataasiinnaanermit pitsaaneruvoq,  suleruloornerminni akissarsilluassapput. Arlaat orluppat aappaata nikuitittarpaa. Eqqanarli kisimiittoq! Orluguni nikuititsisussaqanngilaq. Inuit marluk innangaqatigiikkaangamik uunnattarput, ataasiinnaasorli qanoq ililluni uunnassinnaava? Kisimiittoq sapilerluni aqullaartitaasarpoq; marluusulli artorsartitaanatik akiuussinnaapput. Allunaasaq pingasulik kittorajaatsuuvoq.” — Oqal 4:9-12.

6 Versini taakkunani ikinngutigiinnerup iluaqutissartai pingaarnerusumik pineqarput. Aappariilluarnermilu aappaq ikinngutinnaarineqarsinnaavoq. Soorlu allassimaffimmi allassimasoq ikinngutigiit taamaattut tapersersueqatigiillutik, imminnut qanimut attaveqatigiillutillu ikioqatigiissinnaapput. Aappariit aappariilluartuarsinnaaqqullugit marluinnaanerat naammanngilaq. Allunaasat marluk nermunneqarsimasut kittorajasuusinnaapput. Allunaasarli pingasulik kittorajaatsuuvoq, soorlu allassimaffimmi allassimasoq. Uiusup nuliaasullu Jehovamik nuannaartitsinissartik pingaarnerpaatikkunikku aappariinnerat allunaasatut pingasulittut issaaq. Jehova aappariinnerannut ilaammat aappariit aappariinnerat nukittullunilu “kittorajaatsuuvoq”.

7, 8. (a) Paulusip kristumiut aappaqanngitsut kinguaassiuutimikkut pilerissutsiminnik akiugaqartut qanoq siunnersorpai? (b) Aappaqarneq Biibilimi piviusorsiortumik qanoq allaatigineqarpa?

7 Aamma aappariit atoqatigiinnermut tunngatillugu pisariaqartitatik taamaallaat aappariinnerminni matussusersinnaavaat. Aappariit atoqatigiinnerat ‘tipaatsuutiginninnertut’ isigineqarsinnaavoq. (Uss 5:17, 18) Aappaqanngitsup inuusuttuunermini kinguaassiuutimigut pilerissutsimik sakkortunerpaaffini qaangereeraluarlugu immaqa suli kinguaassiuutimigut pilerissutsini akiorpaa. Imminut naalakkersinnaanngikkaanni minguttumik eqqunngitsumilluunniit iliuuseqartoqalersinnaavoq. Paulusip Guutimit isumassarsisitaalluni aappaqanngitsut ima siunnersorpai: “Pinaveersaarneq  saperunik aappaninniarlit; aappaninnermi pileritsassimanermit iluarneruvoq.” — 1 Kor 7:9; Jaak 1:15.

8 Inuk katinnissaminut pissutiginiagai suugaluarpataluunniit piviusorsiortuusariaqarpoq. Paulusimi allappoq aappanittut ‘ulluinnarni inuunerminni ajornartorsiorumaartut’. (1 Kor 7:28) Aappariit unamminiagassarisaattut aappaqanngitsut unamminiagassaqarneq ajorput. Katinniarlutit aalajangeruit aappariinnermi qanoq ajornartorsiutit sorujussuanngortinnaveersaarlugit pilluangaartuarsinnaavit? Kina aappartaarissanerlugu eqqarsaatiginneqqissaarnissat pingaaruteqarluinnarpoq.

QANOQ PITSAASUMIK AAPPARTAARTOQARSINNAAVA?

9, 10. (a) Paulusi uppeqatiginngisamik qanimut attaveqalernissap navianartuuneranik qanoq assersuusiorpa? (b) Guutip taamaallaat Naalakkami kateqqusineranik sumiginnaaneq qanoq kinguneqarajuppa?

9 Paulusip Guutimit isumassarsisitaalluni aappassarsiornermut tunngatillugu najoqqutassiaq pingaaruteqarluinnartoq una allappaa: “Uppinngitsut qamutinik uniaqatiginiaqinasigik!” (2 Kor 6:14) Paulusi uani naasorissaaneq tunngavigalugu assersuusiorpoq. Uumasut marluk assigiinngitsumik angissuseqarlutillu nukittussuseqartut uniaqatigiikkunik tamarmik naalliussapput. Taamatuttaaq kristumiu Jehovamullu kiffartortuunngitsoq katikkunik aaqqiagiinngissuteqartarumaarput. Aappaasoq Jehovap asanninneraniittuinnarumappat aappaatali tamanna pingaartippianngippagu pingaartinngilluinnarluguluunniit inuunerminni anguniagaat assigiinngitsorujussuusinnaapput. Tamannalu erloqissutigisinnaavaat. Taamaattumik Paulusip kristumiut taamaallaat “Naalakkami” kateqqullugit kajumissaarpai. — 1 Kor 7:39.

10 Kristumiut aappaqanngitsut ilaasa uppeqatiginngisamik aappaninnissaq kiserliornerminngarnit pitsaanerussasoraat.  Taakkua ilaat siunnersuut Biibilimeersoq sumiginnarlugu Jehovamut kiffartortuunngitsumik aappaninniarlutik aalajangersimapput. Tamannali alianartumik kinguneqarajuppoq. Taamatut aalajangersimasut paasilertarpaat inuunermi pingaarnerpaasut pillugit oqaloqatigisinnaanngisamik aappartaarsimallutik. Aappaqanngikkallaramik kiserliorsimanerminnit maanna kiserliornerungaarsinnaapput. Qujanartumilli kristumiut aappaqanngitsut tuusintilippassuit Jehova tatigalugu siunnersuutaa maleruaqqissaartarpaat. (Tussiaat 32:8 atuaruk). Katikkusukkaluarlutik Jehovap kiffaasa ilaannik aappassamik nassaarnissamik tungaannut aappaninneq ajorput.

11. Pitsaasumik aappartaarnissannut suut iluaqutigisinnaavigit? (Aamma takuuk ungalusaq “ Aappassiarilersinnaasanni suut pingaartippakka?”).

11 Soorunami imaanngilaq Jehovamut kiffartortuusoq kinaluunniit aappassatut tulluartuusoq. Katinnissat eqqarsaatigigukku Guutimik asanningaartumik, ilinnut tulluartuusunik pissusilimmik ilittullu anersaakkut anguniagalimmik aappassarsiussaatit. Guutimut ikioqqullutit qinunissat aamma inussiap aalajaallunilu silatuup aappassarsiorneq pillugu siunnersuutaanik Biibilimut naapertuuttunik eqqarsaatiginneqqissaarlutillu maleruaanissat silatusaarnerussaaq. * — Tussiaat 119:105 atuaruk.

12. Nunani amerlasuuni suna ileqqorineqarpa, oqaluttuarlu Biibilimeersoq sorleq ilinniarfigineqarsinnaava?

12 Nunani amerlasuuni angajoqqaat qitornaminnut aappassarsiuussisarnerat pissusissamisoorpoq. Nunanit taamatut ileqqoqarfiusuneersut isumaqartarput angajoqqaat taamatut aalajangiinermut pingaarutilimmut pisariaqartumik ilisimassuseqarlutillu misilittagaqarluartuusut. Aappassarsiuussinerat ajunngitsumik kinguneqarajuppoq, soorlu aamma Biibilip nalaani taamaassimasoq.  Angajoqqaat qitornaminnut aappassarsiuussisussat Aaperaat ilinniarfigisinnaavaat. Aaperaap kiffani aallartikkamiuk Iisaaq nuliassarsiuuteqqullugu aningaasat inuiaqatigiinniluunniit qanoq inissisimaffeqarneq pingaartinngilai. Unamminiarnaraluartoq Iisaaq Jehovamik pallorfiginnittumik nuliassarsiuukkumallugu Aaperaat iliuuseqangaarpoq. * — 1 Mos 24:3, 67.

AAPPAQALERNISSANNUT QANOQ PIAREERSARSINNAAVIT?

13-15. (a) Angutip inuusuttup katikkusuttup najoqqutassiaq Ussatit 24:27-miittoq qanoq iluaqutigisinnaavaa? (b) Arnaq inuusuttoq aappaqalernissaminut qanoq piareersarsinnaava?

13 Katinnissat eqqarsaatigigukku silatusaassaatit imminut ima aperiguit: ‘Aappaqalernissannut ilumut piareersimavunga?’ Illit asanninnermut, atoqateqarnermut, attaveqatigiinnermut meeraqalernermulluunniit misigissutsitit apeqqutaaginnanngillat. Katikkusuttummi uiusutut nuliaasutullu akisussaaffiusussat eqqarsaatigeqqissaartussaavaat.

14 Angutip inuusuttup nuliassarsiortup najoqqutassiaq una eqqarsaatigeqqissaartariaqarpaa: “Silami suliatit naammassereerukkit narsaativillu suliarinera isumannaareerlugu taava imminut illuliuussinnaalissaatit.” (Uss 24:27) Sunaana allassimaffimmi pineqartoq? Biibilip nalaani angut nuliartaarusukkuni silatusaassaaq imminut ima aperiguni: ‘Nuliassara qitornartaassaguttalu qitornakka pilersorsinnaassavakka?’ Suleqqaartariaqarpoq, tassa narsaatini narsaatimilu inerittui suliareqqaartariaqarpai. Ullumikkuttaaq najoqqutassiaq tamanna atuuppoq. Angut katikkusuttoq akisussaaffigiumaakkaminut piareersartariaqarpoq.  Uiusoq timikkut peqqissuutilluni suliuartariaqarpoq. Guutip oqaasia naapertorlugu uiusoq ilaquttami timikkut, misigissutsikkut anersaakkullu pisariaqartitaannik isumaginninngitsoq uppinngitsumit ajorneruvoq! — 1 Timotheusi 5:8 atuaruk.

15 Aamma arnaq katikkusuttoq assigiinngitsutigut nuliaasutut akisussaaffeqalernissaminut piareersartariaqarpoq. Nuliaasup uimi tapersersornissaanut inoqutimilu isumaginissaannut pissuserisassaasa piginnaanerisassaasalu ilaat Biibilimi ajunngitsumik allaatigineqarput. (Uss 31:10-31) Angutit arnallu aappariittut akisussaaffigiumaakkaminnut piareersimanatik katipallattut namminissarsiortuupput. Eqqarsaatiginngilaammi aappami pisariaqartitai qanoq isumagisinnaassallugit. Katikkusuttulli anersaakkut piareersarnissaat pingaaruteqarnerpaavoq.

16, 17. Aappaqalernissaminnut piareersartut najoqqutassiat Biibilimeersut suut eqqarsaatigeqqissaartariaqarpaat?

16 Aappaqalernissamut piareersarnermut ilaavoq Guutip uiusumut nuliaasumullu akisussaaffigititaanik eqqarsaatiginneqqissaarneq. Angutip kristumiup ilaqutariinni ittuuneq qanoq paasisariaqartoq ilisimasariaqarpaa. Uiusup ilaqutariinni ittuusutut oqartussaassutsini qunutitsiniutitut atortussaanngilaa. Jiisusilli oqartussaassutsiminik atueriaasianik ilaarsisariaqarpoq. (Ef 5:23) Aamma arnap kristumiup paasisariaqarpaa nuliaasup pingaarutilimmik inissisimaffeqarnera. Katissaguni ‘uiminut naalatsigitikkumassava’? (Ef 5:22) Nuliaasup Jehova Jiisusilu ‘niaqorereerpai’. (1 Kor 11:3) Taamaattumik uini ilaqutariinni oqartussaassuseqarmat aamma taanna naalakkumasariaqarpaa. Nuliaasoq uimi naammalluinnanngitsup oqartussaassusianik maniguulluni tapersersuiumassava? Taamaaliorumanngikkuni uitaannginnissaa pitsaanerussaaq.

17 Aamma aappaasup aappami immikkut pisariaqartitai isumagiumasariaqarpai. (Filippimiut 2:4 atuaruk).  Paulusi ima allappoq: “Tamassi immikkut nuliasi immissisut asasussaavasi, nuliaasullu uini mianerisussaavaa.” Paulusip Guutimit isumassarsisitaalluni paasivaa uiusup nuliaminit mianerineqarnissani, imaluunniit ataqqineqangaarnissani, pisariaqartinnerugaa. Nuliaasullu uiminit asaneqarnissani pisariaqartinneruaa. — Ef 5:21-33.

Katikkusuttut marluinnaa­naveer­saarunik silatusaas­sapput

18. Sooq kristumiut marluk imminnut katikkusuttut imminut naalakkersinnaassuseqartariaqarpat?

18 Angut arnarlu katikkusuttut inuttut imminnut tulluttuunerlutik paasiniarlugu peqatigiittarput. Tamannali asuli nuannisaaqatigiinnerinnaassanngilaq. Peqatigiittarnerminni imminnut ajunngitsumik qanoq pisassanerlutik ilinniarsinnaallugulu katinnissartik silatusaarnerussanersoq paasisinnaavaat. Peqatigiitsillutik imminut naalakkersinnaassuseqartariaqarput! Arnap angutillu kajungereqatigiinnerat pissusissamisuuinnarmat attuualaaqatigiinnissartik ussernartorsiorfigisinnaavaat. Inuilli marluk ilumoorlutik asaqatigiittut aappaasumut anersaakkut ajoqutaasinnaasumik sumilluunniit iliuuseqarnaveersaarusupput. (1 Th 4:6) Taamaattumik aappassiaqaruit imminut naalakkersinnaassuseqarit. Pissuserlu tamanna inuunerit tamaat, katissanngikkaluaruit katissagaluaruilluunniit, iluaqutigissavat.

QANOQ AAPPARIILLUARTUARSINNAAVISI?

19, 20. Sooq kristumiut aappariinnermut isiginnittaasiat inuppassuit isiginnittaasiannit allaanerusariaqarpa? Assersuuteqarit.

19 Katissimasut aappariilluartuarumallutik katinnermi neriorsoqatigiinnermut eqqortumik isiginnittaaseqartariaqarput. Oqaluttualiat filmillu amerlanerit naggataanni inuttaasut pilluarlutik katittarput, taamatummi naggaserneqarnerat inuit nuannarisarpaat. Inuunermili piviusumi katinneq naggataajunani aallarniutaavoq Jehovap ataavartuusussatut pilersitaa. (1 Mos 2:24) Ajoraluartumik  ullumikkut inuit amerlanerit taamatut isiginnittaaseqanngillat. Inuit ilaasa aappariinneq allunaasat marluusut qilerneqarnerannut assersuuttarpaat. Assersuusiaq tamanna inuppassuit aappariinnermut isiginnittaasiannik ersersitsingaarpoq. Qanoq? Qilerneq pisariaqartillugu qilersorsimanera sukassimassaaq, aammali qilersoruminarlunilu qilerussaajaruminartuussaaq.

20 Ullumikkut inuppassuit aappariinneq ataavartussaanngitsutut isigisarpaat. Eqqarsaatigeqqissaarnagu  katittarput isumaqaramik pisariaqartitatik matussuserneqarumaartut unamminiagassaqaleraangamillu aviinnarsinnaallutik naatsorsuutigisarlugu. Eqqaamajulli Biibilimi ikinngutigiilluarneq, assersuutigalugu aappariinneq, allunaasamut pingasulimmut assersuunneqartoq. Allunaasat pituutallu umiarsuarni tingerlaatilinni atortakkat amuullajaruminaatsuusariaqarput, allaat anorersuarmi. Taamatuttaaq aappariinneq ataavartuusussaavoq. Jiisusimi ima oqarpoq: “[Guutip] ataqatigiilersitai inuup avissaartissanngilai.” (Matt 19:6) Katikkuit illittaaq aappariinnermut taamatut isiginnittaaseqartariaqarputit. Aappariinnerup ataavartuunissaa aappariinnut artorsaatissiiva? Naamik.

21. Aappaasoq aapparminut qanoq isiginnittaaseqartariaqarpa, sunalu iluaqutigisinnaavaa?

21 Uiusoq nuliaasorlu imminnut eqqortumik isiginnittaaseqartuartariaqarput. Aappaasup aappami pissusii ajunngitsut ajunngitsuliornerilu maluginiarnerusarunigit aappariittut pilluarsinnaallutillu nukittorsaqatigiissinnaapput. Aapparminut naammalluinnanngitsumut taamatut isumalluartumik isiginnittaaseqarnera piviusorsiornerussava? Jehova piviusorsiortuuvoq, taamaakkaluartorli uagutsinnut isumalluartumik isiginnittaaseqartuarnissaa ilimagaarput. Tussiaasiortoq ima aperivoq: “Illit Naalagaq, ajortuliat naatsorsuutigissagaluarukkit kina atassagaluarpa taava, Naalagaq?” (Tuss 130:3) Jehova ilaarlugu uiusoq nuliaasorlu imminnut isumalluartumik isiginnittaaseqartariaqarlutillu isumakkeerfiginneriaannaasariaqarput. — Kolossemiut 3:13 atuaruk.

22, 23. Aaperaat Saralu ullumikkut aappariinnut qanoq maligassiuilluarpat?

22 Aappariit ukiut ingerlaneranni aappariinnertik pilluarnarnerujartuinnartissinnaavaat. Biibilimi Aaperaat Saralu aappariit utoqqalisut oqaluttuarineqarput. Taakku  unamminiagaqarlutillu ajornartorsiuteqartarput. Takorlooriaruk Sara — 60-it missaannik ukioqarunartoq — angerlarsimaffini ilorrisimaarnartoq illoqarfimmi pigissaarfiusumi Urimiittoq qimallugu tuperni inuunermi sinnerani najugaqalersoq qanoq misigisimassanersoq. Taamaakkaluartorli uimi siulersuineranut naalatsigitippoq. Sara ikiortaalluni Aaperaamut tulluartoq uimi aalajangigai piviusunngortinniarlugit ataqqinnilluni taassuminnga tapersersuivoq. Naalatsigitittuusaanngilaq. Allaat eqqarsaatimigut uini naalakkamisut taasarpaa. (1 Mos 18:12; 1 Petr 3:6) Aap, Sarap Aaperaat qamannga pisumik ataqqivaa.

23 Soorunami imaanngilaq Aaperaat Saralu isumaqatigiittuaannartut. Ilaanni Sara siunnersuuteqarpoq Aaperaap ‘ajuusaarutigeqisaanik’. Taamaakkaluartorli Aaperaap Jehovamit siunnersorneqarluni maniguulluni nuliami oqaasii naalappai, tamannalu pissutigalugu ilaqutai pilluaqquneqarput. (1 Mos 21:9-13) Ullumikkut uiusut nuliaasullu, allaat ukiorpassuarni aappareereersimasut, aappariit anersaakkut ittunik pingaartitsisut taakku ilinniarfigilluarsinnaavaat.

24. Aappariit aappariinnerat qanoq Jehovamut ataqqinaataasinnaava?

24 Kristumiut ilagiivini tuusintilinnik aappariippassuaqarpoq pilluartunik. Aappariit taakkua Jehovap piumasaa inuunerminni salliuttuarpaat, nuliaasup uini ataqqingaarpaa, uiusullu nuliani asallugulu ataqqivaa. Katinniarlutit aalajangeruit kina aappartaarissanerlugu eqqarsaatigeqqissaartariaqarpat, aappaqalernissannullu piareersarluartariaqarputit. Katereeruit aappariinnersi Jehovamut ataqqinaataasinnaaqqullugu aappariittut pilluartuarnissarsi toqqissisimajuarnissarsilu sulissutigiuassavat. Taamaalioruit qularnanngitsumik aappariinnersi Guutip asanninneraniittuinnarnissannut iluaqutigissavat.

^ par. 2 Atuakkami matumani oqaaseq “aappariit” atorneqaraangat angut arnarlu katissimasut pineqartarput.

^ par. 11 Aamma atuakkami Ilaqutariittut pilluarneq isertugaateqarpoq-mi kapitali 2 takuuk. Jehovap Nalunaajaasuinit saqqummersinneqartoq.

^ par. 12 Itsaq ataataanerpaat ilaat arlalinnik nuliaqarput. Taamani Jehovap tamanna ataataanerpaat Israelikkullu akornanni akueraa. Arlalinnik nuliaqarneq pilersinngilaa, tamatumunngali tunngatillugu inatsisiliorpoq. Kristumiulli nalunngilaat Jehovap kiffami arlalinnik nuliaqarnissaat akueriunnaarnikuugaa. — Matt 19:9; 1 Tim 3:2.