Imarisai

Imai

Jehovap Nalunaajaasui

Oqaatsit toqqakkit Kalaallisut

 KAPITALI 11

‘Aappariinneq ataqqisassaali’

‘Aappariinneq ataqqisassaali’

“Tipaatsuutigiuk inuusunninni nuliarilikkat.” — USS 5:18.

1, 2. Suna sammissavarput, aamma sooq?

AAPPAQARPIT? Aappaqaruit aappariinnissinni pilluarpit, imaluunniit aappariinnerliorpisi? Aappariittut avissaariartulersimavisi? Aappariinnersi nuannaarutiginagu naammagiinnarpiuk? Taamaappat aappariinnissi kissalaartuusimagaluartup maannakkut kissalaarunnaarsimanera aliasuutigigunarpat. Kristumiuugavit qularnanngitsumik aappariinnissi Jehovamut, Guutinnut asasannut, ataqqinaataanissaa kissaatigaat. Taamaattumik ilimanarpoq aappariinnissinni pissutsit maanna atuuttut isumakuluutigalugillu aliasuutigigitit. Isummissanngilatilli isumalluarnartoqanngivissoq.

2 Ullumikkut kristumiunik aappariittoqarpoq aappariinnerliorsimasunik. Taakkuali paasilersimavaat qanoq aappariillualersinnaallutik. Illittaaq aappariinnersi nuannersunngortissinnaavat. Qanoq?

GUUTIMUT AAPPANNULLU QANILLIARTORIT

3, 4. Sooq aappariit Guutimut qanilliniarlutik ilungersortut imminnut qanilliartortarpat? Assersuuteqarit.

3 Illit aappallu Guutimut qanillinissarsi ilungersuutigigussiuk immissinnut qanilliartussaasi. Assersuusioriarta: Qaqqarsuaq portusooq inngigissoq  takorlooriaruk. Angut qaqqap avannaata tungaaniippoq arnarlu qaqqap kujataata tungaaniilluni. Qaqqarlu majuarfigilerpaat. Sulili imminnut ungasipput, inngiali qanilliartortillugu imminnut qanilliartorput. Assersuusiaq tamanna ilinnut aappannullu qanoq kajumissaataasinnaava?

4 Jehova sapinngisannik kiffartorfiginiarlugu ilungersornerit qaqqaq majuarfiginiarlugu ilungersorninnut assersuunneqarsinnaavoq. Jehova asagakku maannakkut majuarniarsuataarniarputillusooq. Aappallu immissinnut ungasillisimagussi soorlulusooq tamassi immikkut qaqqarsuup illuatungaani majuartusi. Majuartuarussili? Ilumoorpoq aallaqqaataani immissinnut ungasittusi. Taamaakkaluartorli qaqqaq majuarfiginiarlugu ilungersornerugussi — tassa Guutimut qanilliniarlusi ilungersornerugussi — immissinnut qanilliartornerussaasi. Aap, inuup Guutimut attaveqarluarnerulernissaa aapparminut attaveqarluarnerulernissaanut pingaaruteqarluinnarpoq. Qanorli taamaaliorsinnaavit?

Biibilimik ilisimasaqarnersi naapertorlugu inuugussi aappariinnersi nakussatsinneqassaaq

5. (a) Jehovamut aapparmullu qanillinissamut suna iluaqutaasinnaava? (b) Jehovap aappariinneq qanoq isigaa?

5 Aappariittut immissinnut qanilliartornissinni siunnersuutinik aappariinnermut tunngasunik Biibilimiittunik maleruaanissarsi iluaqutigissavarsi. (Tuss 25:4; Es 48:17, 18) Paulusip siunnersuutaa una eqqarsaatigeriaruk: “Aappariinneq tamanit ataqqisassaali.” (Hebr 13:4NW) Tamanna qanoq paasisariaqarpa? ‘Ataqqisassaasoq’ erlinnartutut naleqangaartutullu isigineqartarpoq — taamatorpiarlu Jehovap aappariinneq isigaa.

 JEHOVAMIK UUMMATIKKUT ILUUNNGARLUTIT ASANNINNERIT KAJUMISSISSUTIGIUK

6. Paulusip aappariinnermut tunngatillugu oqaasiini suna maluginiarnarpa, aamma sooq tamanna eqqaamajuartariaqarparput?

6 Aappallu Guutimut kiffaagassi nalunngilluinnarparsi aappariinneq naleqangaartuusoq, aap, allaat illernartuusoq. Jehovammi aappariinnermik aaqqissuussineq pilersippaa. (Matthæusi 19:4-6 atuakkit). Aappariinnerliorussili aappariinnerup ataqqisassaaneranik ilisimanninnersi asaqatigiillusilu ataqqeqatigiinnissassinnut kajumississutaasutut immaqa naammanngilaq. Taavami suna kajumississutigisinnaavisiuk? Maluginiaruk Paulusi ima allanngimmat: ‘Aappariinneq ataqqisassaavoq.’ Imali allappoq: ‘Aappariinneq ataqqisassaali.’ Uani Paulusi kajumissaarivoq, tamannalu peqqussutit arlallit versit ataqatigiinneranniittut ilagaat. (Hebr 13:1-5) Peqqussutaasoq eqqaamajuarukku aappannik ataqqinninnerulernissamut kajumississutiginerusinnaavat. Sooq taamaappa?

7. (a) Peqqussutit Biibilimiittut suut maleruarpavut, aamma sooq? (b) Tamakkuninnga maleruaaneq qanoq kinguneqarluartarpa?

7 Apeqqut una eqqarsaatigeriaruk: Peqqussutit Biibilimiittut allat, assersuutigalugu ajoqersuganngortitsiortoqqusissut ataatsimiigiartaqqusissullu, qanoq isumaqarfigaagit? (Matt 28:19; Hebr 10:24, 25) Peqqussutit taakku ilaannikkut maleruaruminaassinnaapput. Immaqa oqaluussiffigisavit ilaat tusarliussamut tusarusunneq ajorput, sulisaravillu qasusaruit ataatsimiigiartarnissat artornartorujussuusinnaavoq.  Taamaakkaluartorli Guutip naalagaaffianik tusarliussaq oqaluussissutigiuarpat ataatsimiigiartuarlutillu. Kimilluunniit — allaat Saatanimit — akornuserneqarsinnaanngilatit! Sooq? Jehova uummatikkut iluunngarlutit asagakku peqqussutai maleruartarpatit. (1 Joh 5:3) Tamanna qanoq ajunngitsunik kinguneqartarpa? Oqaluusseqataasarlutillu ataatsimiigiartarnerit qamuuna eqqississutigalugulu nuannaarutigingaassavat ilisimagakku Guutip piumasaatut iliorlutit. Misigissutsillu nuannersut taakku nakussatsissutigingaassavatit. (Neh 8:10) Tamanna qanoq ilinniarfigisinnaavarput?

8, 9. (a) Aappariinnermik ataqqisassaatitsinermik peqqussutip maleruarnissaanut suna kajumississutigisinnaavarput, aamma sooq? (b) Suut marluk sammissavavut?

8 Soorlu Jehovamut asanningaarnerit kajumississutigalugu oqaluussisarnissamik ataatsimiigiartarnissamillu peqqussutit artornarpasissinnaagaluartut maleruaritit, taamatuttaaq ‘aappariinnermik ataqqisassaatitsineq’ pillugu peqqussut maleruaruminaappasissinnaagaluartoq Jehovamut asanninnerit kajumississutigalugu maleruarsinnaavat. (Hebr 13:4; Tuss 18:30; Oqal 5:3) Aamma soorlu oqaluusseqataajumallutit ataatsimiigiartarumallutillu ilungersornerit pissutigalugu Jehovap pilluaqqungaaraatit, taamatuttaaq aappariinnersi ataqqisassaatinniarlugu ilungersornerit Jehovap maluginiarlugulu pilluaqqussavaa. — 1 Th 1:3; Hebr 6:10.

9 Taavami aappariinnersi qanoq ataqqisassaatissinnaaviuk? Aappariinnissinnut ajoqutaasussat ingalattariaqarpatit. Aamma aappariinnersi nakussatsikkumallugu iliuuseqartariaqarputit.

 OQALORIAATSIT PISSUSILERSORIAATSILLU AAPPARIINNERMUT NIKANARSAATAASUT INGALAKKIT

10, 11. (a) Suna aappariinnermik nikanarsaatitsisarpa? (b) Aappariit imminnut qanoq aperisariaqarpat?

10 Kristumiu nuliaasoq ima oqarpoq: “Pinertusaarsinnaaqqullunga Jehova qinnuigisarpara.” Sooq pinertusaarnissani pisariaqartippaa? Ima nassuiaavoq: “Uima oqaatsimigut nikanarsartarpaanga. Tilluusaqanngikkaluarlunga oqaasiisali sakkortuut, soorlu ‘akornutaaginnarputit!’ aamma ‘naleqanngilatit!’, qamuuna ikilertarpaannga.” Nuliaasup taassuma  ajornartorsiuterujussuaq uparuarpaa — tassa aappariinnermi oqaatsitigut nikanarsaaneq.

11 Ila alianassusia kristumiut aappariit nikanarsaataasumik, misigissutsikkut mamikkuminaatsunik ikeqalersitsisumik, oqaloriaaseqaraangata! Erseqqippoq aappariit oqaatsit annernartut atorlugit oqaloqatigiittartut aappariinnertik ataqqisassaatinngikkaat. Illimmi aappariinnissinni qanoq oqaloriaaseqarpit? Tamanna paasisinnaavat maniguullutit aappat ima aperigukku: “Oqaloriaasera ilinnut qanoq sunniuteqartarpa?” Aappat misigikulappat oqaatsitit qamuuna annernartuusut oqaloriaatsivit pitsanngorsartinnissaanut piumassuseqartariaqarputit. — Gal 5:15; Efesosimiut 4:31 atuaruk.

12. Guutisiorneq qanoq sussaanngitsutut ilersinnaava?

12 Eqqaamajuaruk aappariinnissinni illit oqaloriaatsit Jehovamut attaveqarninnut sunniuteqarmat. Biibilimi ima allassimavoq: “Guutisiortuusorisoq oqqaminilli naalatsitsinani imminik salloqittarpoq; taassuma guutisiornera sussaanngilaq.” (Jaak 1:26) Oqaloriaatsit Jehovamik pallorfiginninninnut attuumassuteqarluinnarpoq. Guutimut kiffartortuusorisoq immaqa isumaqarpoq angerlarsimaffimmini pisartut pingaaruteqanngitsut. Imminulli salloqittaqinak, Biibili naapertorlugu taakku pingaaruteqangaarput. (1 Petrusi 3:7 atuaruk). Imaassinnaavoq piginnaassuseqarlutillu sallusuissummi ulapputeqartutit, aappalli piaaralutit oqaatsit annernartut atorlugit oqarfigisarukku aappariinnersi nikanarsarpat, immaqalu Jehovap pallorfiginninnerit sussaanngitsutut isigilissavaa.

13. Aappaasup qanoq aappani qamuuna annersittoorsinnaavaa?

 13 Aappariit aamma iliuutsimikkut imminnut qamuuna annersittoorsinnaapput. Marlunnik assersuuteqariarta: Anaanaasup aappaqanngitsup siunnersorneqarumalluni qatanngut angut aappalik sianerfigeqattaartarpaa sivisuumillu oqaloqatigisarlugu; qatanngutip angutip aappaqanngitsup kristumiu arnaq uilik sapaatit-akunneri tamaasa sivisuumik oqaluusseqatigisarpaa. Aappallit marluk uani eqqaaneqartut immaqa ajunngitsumik siunertaqarput, taamaaliorneralli aapparisaannut qanoq sunniuteqarpa? Nuliaasoq taamatut atugaqartoq ima oqarpoq: “Uima qatanngummut arnamut allamut piffissarujussuaq atortaraa nalunagu aliasuutigaara. Piluarineqartutut misigivunga.”

14. (a) Aappariinnermi pisussaaffik suna Mosesimik allakkani siullerni 2:24-mi eqqartorneqarpa? (b) Imminut qanoq aperisariaqarpugut?

14 Paasinarpoq nuliaasoq taanna allallu assingusumik atugallit ajuallatsinneqartutut misigisartut. Taakkua aappaasa Guutip aappariinnermut najoqqutassiaa tunngaviusoq una sumiginnarpaat: “Angutip ataatani anaananilu qimallugit nuliani attavigissavaa.” (1 Mos 2:24) Soorunami imaanngilaq aappariilersut angajoqqaatik ataqqiunnaassagaat, Guutilli aaqqissuussinera naapertorlugu pingaarnerpaamik aappartik pisussaaffigisussaavaat. Tamatumunnga assingusumik aappariit uppeqatitik asangaaraluarlugit pingaarnerpaamik aappartik isumagisussaavaat. Taamaattumik kristumiut aappallit aappariinnertik ajoqusissavaat uppeqatiminnut, ingammik arnaagunik angummut angutaagunillu arnamut, piffissarujussuaq  atorunikku taannalu qanittumik attaveqarfigilerunikku. Aappariinnissinni taama pisoqarpa? Imminut ima aperigit: ‘Aappara piffisaqarfigineqartariaqarneratut piffissaqarfigisarlugulu asaneqartariaqarneratut asavara?’

15. Matthæusip allagaa 5:28 naapertorlugu sooq Kristumiut aappallit aapparinngisaminnik soqutiginnippallaarnaveersaartussaappat?

15 Kristumiut aappallit aapparinngisaminnik soqutiginnippallaalersut navianartorsiungaarput. Alianaraluartumik kristumiut aappallit ilaasa aapparinngisartik qanittumik attaveqarfigivallaagartik asannilersoorfigisimavaat. (Matt 5:28) Tamatumalu kingunerisaanik aappariinnerminnik nikanarsaatitsingaartumik iliuuseqarsimapput. Tamatumunnga tunngatillugu apustili Paulusi qanoq allannersoq maluginiariaruk.

‘AAPPARIIT SINIFFIAT MINGUITSUUSSAAQ’

16. Aappariinnermut tunngatillugu Paulusi qanoq peqqusiva?

16 Paulusi aappariinnerup ataqqisassaatinneqarnissaanik kajumissaarereerluni ima mianersoqqusivoq: “[Aappariit] siniffiat minguitsuussaaq. Guutimmi eqqartuukkumaarpai kinguaassiuutitigut inuunerluttut allasiortullu.” (Hebr 13:4) Paulusip ‘aappariit siniffiat’ eqqaagamiuk pivaa aappariit atoqatigiittarnerat. Aatsaat katissimagaanni atoqatigiinneq ileqqussatigut ‘minguitsuuvoq’. Taamaattumik kristumiut oqaatsit uku isumassarsiarititaasut pingaartippaat: “Tipaatsuutigiuk inuusunninni nuliarilikkat.” — Uss 5:18.

17. (a) Sooq inuit allat allasiornermut isiginnittaasiat sunnerneqaatigissanngilarput? (b) Jobi qanoq ilaarsinnaavarput?

 17 Aapparinngisaminnik atoqateqartut Guutip ileqqorissaarneq pillugu inatsisaanut ataqqinninngitsuliungaarput. Ullumikkut inuppassuit allasiorneq pissusissamisoortutut isigisarpaat. Taamaakkaluartorli inuit allasiornermut isiginnittaasiat kristumiut isiginnittaasiannut sunniuteqartussaanngilaq. Kristumiummi nalunngilaat Guutip ‘eqqartuukkumaarai kinguaassiuutitigut inuunerluttut allasiortullu’. (Hebr 10:31; 12:29) Taamaattumik kristumiut ilumoortut Jehovap isiginnittaasiatut isiginnittaaseqarput. (Romamiut 12:9 atuaruk). Ataataanerpaap Jobip oqaasii uku eqqaamajuakkit: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Job 31:1) Aap, kristumiut ilumoortut imminut naalakkersinnaassuseqarlutik aapparinngisartik pileritsaallugu isigineq ajorpaat, tamannami iliuusiuvoq siulleq allasiornermik kinguneqarsinnaasoq. — Tapiliussaq takuuk “Guutip avinnermut averusernermullu isiginnittaasia”.

18. (a) Jehovap allasiorneq qanoq isumaqarfigaa? (b) Allasiorneq guutipilussiornerlu qanoq assigiissuteqarpat?

18 Jehovap allasiorneq qanoq isumaqarfigaa? Mosesip inatsisai iluaqutigalugit paasisinnaavarput allasiorneq Jehovap isaani qanoq ajortigisoq. Itsaq Israelimi unioqqutitsinerit toqumut pillarneqarnissamik kinguneqartut ilagaat allasiorneq guutipilussiornerlu. (3 Mos 20:2, 10) Allasiorneq guutipilussiornerlu qanoq assigiissuteqarpat? Israelikkuusoq guutipilussiortoq Jehovamut angerutsiminik, imaluunniit isumaqatigiissutiminik, unioqqutitsivoq. Taamatuttaaq Israelikkuusoq allasiortoq aapparminut neriorsuutiminik  unioqqutitsivoq. Guutipilussiortoq allasiortorlu marluullutik ilumoorfiginninngillat. (2 Mos 19:5, 6; 5 Mos 5:9; Malaki 2:14 atuaruk). Taamaattumik Jehovap unneqqarissuullunilu aalajaatsuusup taakku iluariunnaarpai. — Tuss 33:4.

19. Suna allasiornaveersaarnissamik aalajangiusimanninnerulissutigisinnaavarput, aamma sooq?

 19 Mosesip inatsisai kristumiunut atuutinngillat. Taamaakkaluartorli kristumiup itsaq Israelimi allasiornerup ingasattumik unioqqutitsisutut isigineqarneranik eqqarsaatiginneqqissaarnini allasiornaveersaarnissaminik aalajangiusimanninnerulissutigisinnaavaa. Sooq? Ima assersuuteqariarta: Oqaluffimmut iserlutit qiperukkap assilissalluunniit saavani seeqqumiarlutit qinujumassavit? ‘Naamerluinnaq!’ Taama eqqarsarputit, ilaa? Taavami aningaasarpassuarnik neqeroorfigineqaruit taamaaliornissannut ussernartorsiussavit? Ima akissagunarputit: ‘Naamik, taamaaliunngisaannassaanga!’ Aap, kristumiup ilumoortup guutipilussiornikkut Jehovamut ilumoorunnaarneq maajugingaaramiuk taamaaliornissaniluunniit eqqarsaatiginngilluinnarpaa. Taamatuttaaq allasiornissamut qanorluunniit utoqqatsissutissarsioraluaruni kristumiup allasiornikkut Jehovamik, aamma aapparminik, ilumoorunnaarneq assingusumik maajugingaassavaa. (Tuss 51:3, 6; Kol 3:5) Iliuuseqanngisaannarisa Saatanimik nuannaartitsisumik aamma Jehovamut aappariinnerullu aaqqissuussaaneranut illernartumut nikanarsaataasumik.

AAPPARIINNERSI QANOQ NAKUSSATSINNEQARSINNAASOQ

20. Assersuuteqarlutit aappariit ilaasa qanoq misigisimanerat nassuiaruk.

20 Aappariinnermut nikanarsaataasumik iliuuseqarnaveersaaruit soorunami aappariinnissinnut iluaqutaassaaq. Aappalli ataqqinerulerumallugu qanoq  iliorsinnaavit? Tamanna akiumallugu aappariinneq illumut assersuussinnaavarput. Takorlooriaruk inussiarnersumik oqaaserisat, ajunngitsuliornerit aapparmillu ataqqinnittuliornerit allat illumi pinnersaataasutut ittut. Aappallu qanittumik attaveqatigiikkussi aappariinnersi illutut qalipaatigissaartunik pinnersaatilittut issaaq. Immissinnulli ungasilliartuaarsimagussi ‘pinnersaatit’ tammariartussapput, aappariinnersilu illutut pinnersaateqanngitsutut nuannersortaqanngitsutullu ilissaaq. Guutip aappariinnermik ataqqisassaatitseqqusinera maleruarumagakku qularnanngitsumik aappariinnersi pitsanngortikkumavat. Erlinnartuutimmi naleqangaartup iluarsarneqarnissaa imminut akilersinnaavoq. Qanoq taamaaliorsinnaavit? Guutip oqaasiani ima allassimavoq: “Ilisimassuseq atorlugu illu sananeqartarpoq, silaqassuseq atorlugu tunngavilerneqartarpoq. Ilisimasaqarnikkut init ulikkaartarput pinik tamalaanik akisuunik kusanartunillu.” (Uss 24:3, 4) Allassimaffik tamanna qanoq aappariinnermut tunngatinneqarsinnaasoq sammeriartigu.

21. Aappariit aappariinnertik qanoq nakussatsikkiartuaarsinnaavaat? (Aamma ungalusaq “ Aappariinnerput qanoq pitsanngorsarsinnaavara?” takuuk).

21 Ilaqutariit pilluartut ‘pigisaasa  akisuut’ ilagaat asanninneq ilumoortoq, Guutimik mianerinninneq upperluarnerlu. (Uss 15:16, 17; 1 Petr 1:7) Taakku pissuserineqarpata aappariilluartoqarsinnaavoq. Maluginiarpiulli init allassimaffimmi eqqaaneqartut pinik akisuunik qanoq ulikkaarneqarsinnaasut? “Ilisimasaqarnikkut.” Aap, aappariit Biibilimik ilisimasaqarnertik naapertorlugu iliuuseqarunik eqqarsartaatsiminnik allannguisinnaallutillu asaqatigiinnerulersinnaapput. (Rom 12:2; Fil 1:9) Taamaattumik aappallu allassimaffik Biibilimeersoq, assersuutigalugu ullormut allassimaffik, allaaserisarluunniit aappariinneq pillugu atuagassiaatitsinniittoq oqaloqatigiissutigigaangassiuk illussinnik kusassaataasinnaasoq misissortarparsilusooq. Jehovamik asanninnersi kajumississutigalugu siunnersuut oqaloqatigiissutigisarsi ingerlaannaq maleruarussiuk kusassaataasoq ataaseq ‘inimut’ eqqutissavarsilusooq. Taamaaliorussilu aappariinnersi qalipaateqanngitsutut ilersimasoq qalipaasersoqqilissavarsi.

22. Aappariinnerput nakussatsinniarlugu ilungersornerput qanoq iluaqutigisinnaavarput?

22 Soorunami “init” kusassaatinik ‘ulikkaarneqaqqissappata’ piffissarujussuaq atorneqartariaqarpoq. Illilli iliuuserisariaqakkatit iliuuseriumallugit ilungersoruit nuannaangaassaatit peqqussut Biibilimeersoq una maleruarakku: “[Ataqqeqatigiigitsi] immissinnut akimorniullusi.” (Rom 12:10; Tuss 147:11) Pingaarnerpaamillu aappariinnissinnik ataqqisassaatitsininnik ilungersornerit Guutip asanninneraniittuinnarnissannut iluaqutaassaaq.