Naalagaaffik Kristusimit aqunneqartoq aqqutigalugu Jehovap aqqi illernarsisippaa, kisimi oqartussaanini akitsisillugu ajortullu tamaasa suujunnaarsillugit

BIIBILIMI allakkat kingullersaat, Johannesimut Saqqummersitanik taaneqartut, inuiannut neriuutissiipput. Allakkani apustilimit Johannesimit allanneqartuni takorruukkat, Jehovap siunertaata naammassineqarnerani tamakkiisumik eqquuttussat, allaatigineqarput.

Takorruukkami siullermi Jiisusip makititaasimasup ilageerpaaluit nersualaarlugillu naqqissorpai. Takorruukkami tulliuttumi takutinneqarpoq Guutip issiavissaarsua qilammiittoq, pinngortitat anersaajusut taassuminnga unnersiutiginniffiat.

Guutip siunertaa naammassiartortillugu Savaaraq, Jiisusi Kristusi, mappersakkamik arfineq-marlunnik naqissutilimmik tunineqarpoq. Naqissutit sisamat siulliit peerneqarmata hestersut assersuutaasut saqqummerput. Siulleq tassaavoq Jiisusi hestimi qaqortumi hestersoq kunngisullu niaqoruserneqarsimasoq. Hestersut tulliuttut hestit allanik qalipaatillit hesterfigaat, taakkulu sorsunnernut, kaannersuarnut nappaassuarnullu — tamarmik pissutsit aaqqissuussaanerata matuma ulluini kingullerni pisussanut — siulittuutitut assersuutaapput. Naqissutit arfineq-aappaata peerneqarnerata kingorna qarlortaatit assersuutaasut arfineq-marluk supineqarput, Jehovap eqqartuussutaasa nalunaarutigineqarnerannut assersuutaasumik. Tamatuma kingunerisaanik perluit assersuutaasut, imaluunniit Guutip kamanneranut ersiutaasut, arfineq-marluk atuutilerput.

Guutip naalagaaffia, ernertut inoorlaatut assersuutaasumik allaatigineqartoq, qilammi pilersinneqarpoq. Sorsuttoqalerpoq, Saatanilu taassumalu inngilipilui nunamut igitaapput. Nipi nipituumik ima tutsiuppoq: ‘Eqqanaq nuna.’ Diaavulu kamattorsuuvoq piffissakissutsi nalunnginnamiuk. — Saqqummersitat 12:12.

Johannesip takuaa Jiisusi savaaqqamut assersuunneqartoq aamma ilagigai 144.000-it inuiannit immikkoortinneqarsimasut. Taakkua Jiisusi ‘kunngioqatigissavaat’. Taamaalilluni Saqqummersitani paasinarsisinneqarpoq kinguaassap pingaannginnerusortai katillutik 144.000-iussasut. — Saqqummersitat 14:1; 20:6.

Nunarsuarmi naalakkersuisut Harmagedonimut, “Guutip Ajugaqanngitsup ullussarsuani sorsunnissamut”, katersuupput. Taakkua hestimi qaqortumi hestersoq — Jiisusi sakkutuunik qilammiusunik siulersuisoq — sorsuffigaat. Silarsuarmi matumani naalakkersuisut tamarmik piuneerussaapput. Saatani qilersorneqarpoq, Jiisusilu 144.000-illu nunamut naalakkersuipput “ukiuni 1.000-ini”. Ukiut tusindit taakkua naaneranni Saatani suujunnaarsinneqarpoq. — Saqqummersitat 16:14; 20:4.

Kristusip naalakkersueqataasalu ukiuni tusindini naalakkersuinerat inunnut Guutimut naalattunut qanoq sunniuteqassava? Johannesi ima allappoq: ‘[Jehovap] qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.’ (Saqqummersitat 21:4) Nunarsuaq paratiisinngorpoq!

Tusarliussaq Biibilimiittoq Saqqummersitani taamaalilluni naggaserneqarpoq. Naalagaaffik Missiarsikkoortoq aqqutigalugu Jehovap aqqa illernarsisinneqarpoq kisimilu oqartussaanera akitsisilluinnarneqarluni naassaanngitsumut!

— Tunngavigineqartut: Johannesimut Saqqummersitat.