Imarisai

Imai

Jehovap Nalunaajaasui

Oqaatsit toqqakkit Kalaallisut

 IMMIKKOORTOQ 2

Paratiisi annaaneqarpoq

Paratiisi annaaneqarpoq

Inngilimit pikitsitsisumit sunnerneqarlutik angutip siulliup arnallu siulliup, Adamip Evallu, Guutip naalakkersuinera itigartippaat. Tamatuma kingunerisaanik ajorti toqulu silarsuarmi atugaalerput

INUNNIK pinngortitsinini sioqquterujussuarlugu Guutip pinngortippai pinngortitarpassuit takussaanngitsut — inngilit. Inngilip pikitsitsiumatuup, Saatanitut Diaavulutut ilisimaneqalersup, Naatsiivimmi Edenimi Eva orpiup ataatsip Guutip neriffigeqqunngisatuaata paarnaanik neritinniarlugu peqqusersusaarluni usserniarsuataarpaa.

Pulateriaarsuk oqalutsittuusaarlugu Saatanip Guuti arnamut taassumalu uianut ajunngitsumik erliguussinerarpaa. Inngili Evamut oqarpoq uinilu paarnamik nereqqusaanngitsumik nerigunik toqunavianngitsut. Saatanip Guuti qitornaminut nunamiusunut taama sallunerarpaa. Peqquserluttup taassuma Guutimut naalannginneq nuannerunartutut, qaammarsagaanermik kiffaanngissuseqalernermillu kinguneqartartutut, isikkoqartinniarpaa. Tamannali salluneruvoq — aap, nunarsuarmi sallunerit siullersaat. Apeqquserneqartoq tassaavoq Guutip qilammi nunamilu kisimi oqartussaanera, imaluunniit qutsinnerpaatut naalakkersuisuunera — tassa Guuti naalakkersuisinnaatitaanersoq, aamma naapertuilluartumik innuttaminullu iluaqutaanerpaamik naalakkersuinersoq.

Evap Saatanip salluliaa upperaa. Orpiup paarnaa pileritsaappaa, taava neriffigaa. Kingusinnerusukkut uini paarnamik tunivaa, taannalu aamma nerivoq. Taamaalillutik ajortilinngorput. Iliuuseq soqutaarpasinngitsoq ilumut pikitsitsineruvoq. Guutip peqqussutaanut piaaralutik naalannginnermikkut Adami Evalu Pinngortitsisoq, sunik tamanik, aamma inuunermik naammalluinnartumik tunisisertik, tunuppaat.

Kinguaassap “niaqqut aserortissavaa, illillu taassuma kimmia aserortissavat”.— 1 Mosesi 3:15, NV

Guutip pikitsitsisut taakkua iliuusiinut akisussaatippai. Siulittuutigaa kinguaassaq neriorsuutigisaq imaluunniit aniguisitsisussaq, Saatanimik pulateriaarsuttut eqqartorneqartumik suujunnaarsitsisussaq, tikiukkumaartoq. Guutip Adamimut Evamullu toqumut eqqartuussutini naammassinngikkallarpaa, taamaalillunilu taakkua kinguaassaannik suli inunngunngitsunik nallittuinini ersersippaa. Qitornat taakku neriuuteqarnissamut tunngavissaqarput, Guutimmi aallartitassaata Edenimi pikitsitsinerup kingunipilui alianartut aaqqissavai. Annaassisussamut taassumunnga tunngatillugu Guutip siunertaata qanorpiaq naammassineqarumaarnera — kialu aallartitaajumaarnera — Biibilip allanneqarnerata naammassiartuaarnerani paasinarsiartorpoq.

Guutip Adami Evalu Paratiisimit anisippai. Naatsiiviup avataani imminnut pilersorniarlutik nunamik naggorissaaniarlutik suleruloortariaqarput. Eva naartulerpoq Kainilu, angajulliliartik, ernertaaralugu. Adami Evalu aamma allanik erneqarlutillu paneqarput, ilaatigut Abeli aamma Seti, Noap siuaasaa.

— Tunngavigineqartut: 1 Mosesi kapitalit 3-5; Saqqummersitat 12:9.