Jiisusip tupinnartuliamigut ersersippaa kunngisut pissaanini qanoq atorumaarnerlugu

GUUTIP Jiisusi inuit allat iliuuserisinnaanngisaannik iliorsinnaassusilerpaa. Jiisusi tupinnartulioqattaarpoq — amerlanertigut inuppassuit takkuanni. Tupinnartuliaanit taakkunannga erserpoq Jiisusip akeqqat akornutaasinnaasullu, inuit naammalluinnanngitsut iluatsittumik akiorsinnaasimanngisaannagaat, pissaaneqarfigigai. Assersuuteqariarta.

Nerisassaqartitsillunilu imigassaqartitsivoq. Jiisusi tupinnartulioqqaarami imermik viinninngortitsivoq. Pisimasuni marlunni allani inuit kaattut tusindillit timiusat aalisakkallu ikittuinnaat atorlugit nerisassippai. Pisimasuni marlunni taakkunani najuuttut tamarmik naammattorsuarnik nerisassaqarput.

Napparsimasunik ajorunnaarsitsivoq. Jiisusip inuit “nappaataannik anniaataannillu tamanik” ajorunnaarsittarpai. (Matthæusi 4:23) Jiisusip tappiitsut, tusilartut, pupissut, noqartartut, nukillaarsimasut, iloqiaat aqqunartitersimasullu ajorunnaarsippai. Ajorunnaarsissinnaanngisaanik nappaateqanngilaq.

Anorersuit pissaaneqarfigai. Jiisusi ajoqersugaalu Galilæap Tasersuatigut umiartortillugit anorersualeriataarpoq. Ajoqersukkat annilaangapput. Jiisusip anori saalaaginnarpaa imalu oqarluni: “Nipangerit, qatsorit!” Qatsorluinnarporlu. (Markusi 4:37-39) Pisimasumi allami anorersuartorsuutillugu immap qaavatigut pisuppoq. — Matthæusi 14:24-33.

Anersaapiluit pissaaneqarfigai. Anersaapiluit inunnit nukittunerujussuupput. Inuppassuit Guutimut akeraasunit ajortunit taakkunannga aniguisinnaasimanngillat. Jiisusili arlaleriarluni anersaanik taakkuninnga inunnit aneqqusisimavoq, eqqugaasunut pissaaneerutitillugit. Qunuginngilai. Taakkuali Jiisusi ersigaat oqartussaassusia nalunnginnamikku.

Toqu pissaaneqarfigaa. Toqu, naleqquttumik ‘akeqqat kingullersaannik’ taaneqartoq, akeraavoq inuit ajugaaffigisinnaanngisaat. (1 Korinthimiut 15:26) Jiisusili toqusimasunik makititsisarpoq, ilaatigut uillarnerup ernera angut inuusuttoq angajoqqaallu aliasoqisut paniat makitissimallugit. Pisimasumi maluginiarnarluinnartumi Jiisusip ikinngutini asasani Lazarusi aliasuttorpassuit takkuanni toqusunit makitippaa, naak taanna ullut sisamangajaat toqungasimagaluartoq! Taamatut tupinnartuliorsimanera allaat Jiisusimut akeraanerpaasut miserratiginngilaat. — Johannesi 11:38-48; 12:9-11.

Sooq Jiisusip tamakku tamaasa tupinnartuliarai? Inuimmi ikiugai tamarmik naggataatigut toqupput. Jiisusilli tupinnartuliai iluaqutaajuarput. Kunngip Missiarsiusup naalakkersuinissaanik siulittuutit pissanganartut tamarmik tunngavissaqarnerannut uppernarsaataapput. Qularutissaanngilaq kunngip Guutip toqqagaata kaanneq, nappaatit, anorersuit, anersaapiluit allaallu toqu nungutissinnaagai. Tamakkuninnga tamanik iliuuseqarnissamut Guutimit pissaanermik tunineqarsimanini ersersereerpaa.

— Tunngavigineqartut: Matthæusip, Markusip, Lukasip Johannesillu allagaat.