Imarisai

Saqqaata tullia

Imai

Jehovap Nalunaajaasui

Kalaallisut

Biibilimi suna tusarliunneqarpa?

 IMMIKKOORTOQ 21

Jiisusi uumavoq!

Jiisusi uumavoq!

Jiisusi ajoqersukkani ilinniartinniarlugit kajumissaarniarlugillu saqqummerpoq

JIISUSIP toqunerata kingorna ullut pingajuanni arnat ilaasa taassumunnga ajoqersugaasut paasivaat ujarak ilerrup paavanut assiunneqarsimasoq assakartillugu illuartinneqarsimasoq. Iliverlu imaqanngilaq!

Inngilit marluk saqqummerput. Aappaa ima oqarpoq: “Jiisusi Nazaretimioq . . . ujarparsi. Makissimavoq.” (Markusi 16:6; Lukasi 24:4) Arnat taakku apustilinut oqaluttuariartupallapput. Aqqutaani Jiisusi naapippaat, taannalu ima oqarpoq: “Erseqinasi, qatanngutikkalu oqarfigiartorsigit Galilæamukaqqullugit; tassani takujumaarpaannga.” — Matthæusi 28:10.

Ullormi tamatumani kingusinnerusukkut ajoqersukkat marluk pisullutik Jerusalemimiit illoqarfeeqqamut Emmausimukarput. Takornartap ingiaqatigilerpai aperalugillu suna eqqartorneraat. Taanna tassaavoq Jiisusi makititaasimasoq ajoqersukkat ilisarinngeqqaagaannik timeqarluni saqqummertoq. Aliasuppasillutik akipput Jiisusi eqqartoritsik. Takornartap Missiarsi pillugu Allakkani Illernartuni tamani allassimasunik nassuiaatilerpai. Aap, Missiarsi pillugu siulittuutigineqartut sunnguit tamarluinnarmik Jiisusimut eqquutitinneqarput. * Ajoqersukkat ilisarigaannilu Jiisusi, anersaatut makititaasimasoq, takussaajunnaarpoq.

Ajoqersukkat taakku marluk ingerlaannaq Jerusalemimut uterput. Tassani apustilit matut parnaarlugit katersuussimasut nanivaat. Taakku marluk oqaluttuartillugit Jiisusi saqqummerpoq. Ajoqersugaasa tupaallaqqasut uppererpiarsinnaanngilaat! “Sooq uummatissigut qularpisi?” Jiisusi aperivoq. “Ima allassimavoq: Kristusi anniassaaq ullullu pingajuanni toqusunit makissalluni.” — Lukasi 24:38, 46.

Jiisusi makititaanermi kingorna ullut 40-t ingerlaneranni arlaleriarluni — pisimasut ilaanni inunnut 500-nit amerlanerusunut — saqqummerpoq! Ilimanarpoq pisimasumi tamatumani suliassamik pingaarutilimmik matuminnga suliakkiisimassasoq: “Aallarlusi inuiaqatigiit tamaasa uannut ajoqersuganngortissigik . . . ajoqersorlugillu ilissinnut peqqussutikka tamaasa maleruaqqullugit. Takuallu, ullut tamaasa najorpassi silarsuup naggatissaanut allaat.” — Matthæusi 28:19, 20.

Apustilini aqqanillit aalajaatsut naggammik ilagigamigit Jiisusi ima neriorsuivoq: ‘Anersaap Illernartup tikippasi pissatsitaajumaarpusi, nalunaajaasigissavassilu nunarsuup isua tikillugu allaat.’ (Apustilit Suliaat 1:8) Taava Jiisusi qangattartitaavoq, qilaliartillunilu nuiamit iluneqarpoq ajoqersukkanut takussaajunnaarluni.

— Tunngavigineqartut: Matthæusi kapitali 28; Markusi kapitali 16; Lukasi kapitali 24; Johannesi kapitalit 20-21; 1 Korinthimiut 15:5, 6.

^ par. 6 Missiarsi pillugu siulittuutit Jiisusimut eqquutitinneqarnerannut assersuutit ilaat takukkit atuagassiaaqqami matumani immikkoortoq 14, immikkoortoq 15 immikkoortoq 16-ilu aamma atuakkami Biibilimi sorpiaat ajoqersuutigineqarpat?-mi tapiliussaq “Jiisusi Kristusi — Missiarsi neriorsuutigisaq”.