Jiisusip ajoqersukkani assigiinngitsorpassuarnik ilinniartippai, Guutilli naalagaaffia tusarliussamini pingaarnerpaatippaa

JIISUSIP nunarsuarmi suna suliassaraa? Nammineq ima oqarpoq: ‘Guutip naalagaaffianik iivangkiiliu [nutaarsiassaq nuannersoq, NV] tusarliussassaraara; tamanna pillugu aallartitaavunga.’ (Lukasi 4:43) Naalagaaffik taanna, oqaluussissutaani pingaarnersaasoq, pillugu Jiisusip ilinniartitsissutigisai sisamat sammeriartigit.

1. Jiisusi tassani kunngiussaaq. Jiisusi nammineq oqarpoq Missiarsiulluni siulittuutigisaq. (Johannesi 4:25, 26) Aamma ersersippaa kunngiulluni pruffiitip Danielip takorruukkamini takusaa. Jiisusip apustilini oqaluttuuppai ‘naalannassutsip issiavissaarsuani’ issialerumaarluni aamma taakkuttaaq issiavissaarsuarni allat peqatigalugit issialerumaartut. (Matthæusi 19:28) Naalakkersueqataasussat taakku ‘savarpannguusutut’ eqqartorpai, aamma oqarpoq taakkua ilaginngisaannik ‘allanik savaateqarluni’.— Lukasi 12:32; Johannesi 10:16.

2. Guutip naalagaaffia naapertuilluarnermik piviusumik siuarsaassaaq. Jiisusip oqaatigimisaarpaa Guutip naalagaaffiata naapertuilluanngitsulianit tamanit annerpaap kingunerinik atuukkunnaarsitsiumaarnera Jehovap Guutip aqqanik illernarsisitsinikkut aqqanullu Edenimi pikitsitsisoqarneraniilli Saatanip mitalliissutaanik tamanik piiaanikkut. (Matthæusi 6:9, 10) Jiisusip aamma kinaassusersiortuunnginnini ullut tamaasa ersersippaa angutinik arnanillu, pisuunik piitsunillu immikkoortitsinani ilinniartitsinermigut. Israelikkunnik ilinniartitsinissaq pingaarnertut suliassarigaluarlugu aamma Samariamiunik guutimillu nalusunik, imaluunniit juutiunngitsunik, ikiuisarpoq. Taamanikkut upperisarsiornikkut siuttut pisarnerattut pinnani illuinnaasiortuunanilu paqumisuttuunngilaq.

3. Guutip naalagaaffia silarsuarmit matumannga pissanngilaq. Jiisusi allanngorujussuartoqarnerata nalaani inuuvoq. Nuna inunngorfia allamiunit naalagaaffigineqarpoq. Inuilli politikkikkut akuliutsinniarsarilermanni qimaavoq. (Johannesi 6:14, 15) Politikeri ima oqarfigaa: “Uanga naalagaaffiga silarsuarmit matumannga pinngilaq.” (Johannesi 18:36) Malinnitsini ima oqarfigai: ‘Silarsuarmit pisuunngilasi.’ (Johannesi 15:19) Taakku sakkunik sorsuutinik atueqqunngilai, imminik illersuinissamut atorniaraluarpatigilluunniit.— Matthæusi 26:51, 52.

“Angalaarpoq illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu.” — Lukasi 8:1

4. Kristusip naalakkersuinera asanninnermik tunngaveqassaaq. Jiisusi neriorsuivoq inuit qasuertikkumaarlugit, artorsaataannik oqilisaanniarlugit. (Matthæusi 11:28-30) Oqaatsini piviusunngortippai. Isumakulukkaanni qanoq iliortoqarsinnaanera, allanut qanoq attaveqarlualertoqarsinnaanera, pigisaleritunermik qanoq akiuisoqarsinnaanera qanorlu pillualertoqarsinnaanera pillugit asannilluni atoriaannaasunik siunnersuuteqarpoq. (Matthæusi, kapitalit 5-7) Asannittuummat inuit innuttaaqatigiinni qanorluunniit inissisimaffillit nuannaraat. Allaat naqisimaneqarnerpaat ornigartarpaat, taassumannga inussiarnisaarfigineqarlutillu ataqqineqarnissartik qularutiginagu. Jiisusi naalakkersuisoralugu qanoq nuannertigissava!

Jiisusi aamma Guutip naalagaaffia pillugu sunniuteqarluartumik allatut ilinniartitseriaaseqarpoq. Tupinnartuliarpassuaqarpoq. Sooq tupinnartuliortarpa? Tamanna misissoriartigu.

— Tunngavigineqartut: Matthæusip, Markusip, Lukasip Johannesillu allagaat.