Imarisai

Saqqaata tullia

Imai

Jehovap Nalunaajaasui

Kalaallisut

Biibilimi suna tusarliunneqarpa?

 IMMIKKOORTOQ 9

Israelikkut kunngeqalerumapput

Israelikkut kunngeqalerumapput

Israelikkut kunngiat siulleq, Sauli, naalanngippoq. Daavimit kingoraarneqarpoq, Guutillu taanna naalagaaffimmik soraajuitsumik atasussamik angerfigeqatigaa

SAMSONIP kingorna Samueli Israelimi pruffiitiullunilu eqqartuussisuuvoq. Israelikkut taanna oqarfigisaqattaarpaat inuiaat allat assigalugit inummik kunngeqalerusullutik. Piumasaat Jehovap ajuallaatigigaluarlugu Samueli piumasaannut akuersiinnaqquaa. Guutip angut maniguuttoq Saulimik atilik kunngissatut toqqarpaa. Piffissalli ingerlanerani kunngi Sauli makitasuunngorpoq naalanngitsunngorlunilu. Jehovap taanna kunngitut akueriunnaarpaa, Samuelilu peqquaa alla — angut inuusuttoq Daavimik atilik — toqqaqqullugu. Ukiulli arlallit qaangiuppata aatsaat kunnginngussaaq.

Daavip suli inuusuttuaraagunarluni qatanngutini Saulimut sakkutuujusut ornippai. Sakkutuut tamarmik akeqqat sorsuttartuat ataaseq, inorujussuaq Goliatimik atilik, imminnik Guutiminnillu mitalliiuartoq, qunugersuataarpaat. Daavi kamangaarluni inorujussuup akiuuteqatiginissaanut akuersivoq. Illusaatini ujaraalunnguillu kisiisa sakkugalugit inuusuttup taassuma akerartortini, 3 meterisungajak angitigisoq, naapigiarpaa. Goliatip mitaatigimmani Daavi akivoq taassumannga sakkugissaarnerulluni, nammineq Jehovap aqqani akiuukkami! Daavip Goliati toquppaa ujarak ataasiinnavik atorlugu inorujussuarlu taassuma nammineq panaanik niaquerlugu. Filisterit annilaarujussuarlutik qimaapput.

Saulip Daavip sapiitsuliornera ajasoorutigeqqaarpaa inuusuttorlu taanna sakkutuuminut naalaganngortillugu. Daavili ingerlalluarmat sinngagingaalerpaa. Daavi inuunini annaakkumallugu qimaasariaqarpoq ukiorpassuarnilu qimaasutut inuusariaqarluni. Taamaattoq Daavi kunngimut imminik toqutsiniartumut ilumoorfiginnittuarpoq, nalunnginnamiuk Jehovap kunngi Sauli toqqagarigaa. Naggataatigut Sauli sorsunnermi toquvoq. Tamatuma kinguninngua Daavi Jehovap neriorsuineratut kunnginngorpoq.

‘Kunngisut issiavissaarsua soraajuitsumik aalajaallisikkumaarpara.’ — 2 Samueli 7:13

Kunngip Daavip kissaatigingaarpaa Jehovap naalaffiliuunnissaa. Jehovalli Daavi nalunaarfigaa kinguaavi taamaaliorumaartut. Paasinarsivoq Daavip ernera Salomo sanasussaasoq. Guutilli Daavi akissarsisippaa nuanningaartumik matuminnga angerfigeqatigalugu: Kinguaavi tassaalissapput kunngit kinguaariit allatut inngitsut. Naggataatigut aniguisitsisussaq, imaluunniit kinguaassaq, Edenimi neriorsuutigineqartoq kinguaariinni taakkunani saqqummissaaq. Tassaassaaq Missiarsi, “Tanitaq”-mik isumaqartoq, Guutimit toqqagaq. Jehova neriorsuivoq Missiarsi naalagaaffimmi naassaanngitsumik atasussami naalakkersuisuussasoq.

Daavi qujamasungaarluni naalaffimmut sanaartuutissanik saffiugassanillu erlinnartunik amerlangaartunik katersuivoq. Aamma tussiaaterpassuit isumassarsiarititaasut taalliaralugillu erinniarai. Daavi toqungajalerluni ima oqarpoq: “Uakkut oqaluppoq [Jehovap] anersaava, oqaasii oqqanniipput.” — 2 Samueli 23:2.

— Tunngavigineqartut: 1 Samueli; 2 Samueli; 1 Nalunaarsuutit; Esaja 9:6; Matthæusi 21:9; Lukasi 1:32; Johannesi 7:42.