Imarisai

Imai

Jehovap Nalunaajaasui

Oqaatsit toqqakkit Kalaallisut

 IMMIKKOORTOQ 13

Kunngit ajunngitsut ajortullu

Kunngit ajunngitsut ajortullu

Israeli avinneqarpoq. Piffissap ingerlanerani kunngit amerlasuut Israelikkunnut naalakkersuipput, taakkualu amerlanersaat ilumuunngitsuupput. Jerusalemi Babylonimiunit piuneerunneqarpoq

JEHOVAP siulittuisimaneratorluinnaq Salomop pallorfiginninnermik minguitsumik tunussinerata kingorna Israeli avinneqarpoq. Salomop ernera kingoraartaalu Rehabeami misigittaatsuummat Israelikkut naggueqatigiissortaasa ilaat qulit pikitsitsipput naalagaaffillu avannarleq Israeli pilersillugu. Naggueqatigiissortat marluk kunngimut Jerusalemimi Daavip issiavissaarsuaniittumut ilumoorfiginnittuarput, naalagaaffik kujalleq Juda pilersillugu.

Naalagaaffiit tamarmik eqqissiviilliorfiupput kunngit ilumuunngitsut naalasseriitsullu pisuunerullutik. Israeli, tassani kunngiusut aallaqqaammulli pallorfiginninneq eqqunngitsoq siuarsarmassuk, Judamit ingerlanerliorneruvoq. Pruffiitit Elia Elisalu tupinnangaartulioraluartut — allaat toqusunik makititsigaluartut — Israelikkut aqqut ajortoq uteqqiaffigiuarpaat. Naggataatigut Guutip akueraa naalagaaffiup avannarliup Assyriamiunit piuneerunneqarnissaa.

Israelip piuneerussaaneraniit ukiut 100-t sinnerlugit qaangiutereersut Juda aamma Guutimit pillarneqarluni piuneerunneqarpoq. Judakkut kunngii ikittuinnaat Guutip pruffiitiisa mianersoqqussutaat malillugit iliorput inuiaallu Jehovamut saatsinniarlugit iliuuseqarlutik. Assersuutigalugu kunngi Josija pallorfiginninneq eqqunngitsoq nungutinniarlugu Judamik minguiaalerpoq Jehovallu naalaffia iluarsalerlugu. Guutip inatsisaasa Mosesikkut tunniunneqartut allassimaqqaarfii nassaarineqarmata Josija killitsingaarpoq, taamaattumillu iluarsaaqqiiniarnini suliniutiginerulerpaa.

Ajoraluartumik Josijap maligassiuilluarnera kingoraartaanit malinneqanngilaq. Taamaattumik Jehovap akueraa Judap Babylonimiunit tiguarneqarnissaa aamma Jerusalemip naalaffiullu piuneerunneqarnissaat. Inuuinnartut Babylonimut aallarussaapput. Guutip siulittuutigaa ukiuni 70-ini aallarussaaqqassasut. Piffissami tamatumani Juda inueruteqqavoq — neriorsuutigineqartutut inuiaat nunaminnut uternissaasa tungaanut.

Daavilli kinguaavinit kunnginngortoqaqqissanngilaq aniguisitsisussaq neriorsuutigisaq, Missiarsi siulittuutigisaq, naalakkersuilertinnagu. Kunngit Jerusalemimi Daavip issiavissaarsuani issiasimasut amerlanersaannit uppernarsineqarpoq inuit naammalluinnanngitsut naalakkersuinissamut piukkunnanngitsut. Missiarsi kisimi piukkunnarluinnarpoq. Jehovap kunngit Daavip kinguaavisa taakkua kingullersaat ima oqarfigaa: ‘Niaqorussuaq [iperaruk]; . . . tamannaluunniit [kunngiussuserluunniit] atassanngilaq; kisianni piginnittussaq tikiuppat, taassumunnga tunniukkumaarpara.’ — Ezekieli 21:31, 321900.

— Tunngavigineqartut: 1 Kunngit; 2 Kunngit; 2 Nalunaarsuutit kapitalit 10-36; Jeremia 25:8-11.