Imarisai

Imai

Jehovap Nalunaajaasui

Oqaatsit toqqakkit Kalaallisut

 IMMIKKOORTOQ 12

Ilisimassuseq Guutimeersoq inuunermi iluaqutaasoq

Ilisimassuseq Guutimeersoq inuunermi iluaqutaasoq

Ussatit siunnersuutinit isumassarsiarititaasunit ulluinnarni iluaqutaasunit katersugaapput. Taakkua amerlanersaat Salomop allatarai

JEHOVA naalakkersuisuua silatooq? Tamanna tutsuiginartumik akissutissarsineqarsinnaavoq ilaatigut taassuma siunnersuutaanik misissuinikkut. Atorsinnaappat? Taakkuninnga malinninneq inuunermik pitsaanerulersitsisarpa siunertaqarnerulersitsisarlunilu? Kunngip Salomop silatuup ussatit hundredelikkuutaat allappai. Taakkunani inuunermut tunngasut tamangajammik eqqartorneqarput. Ilaat misissoriartigik.

Guutimik tatiginninneq. Tatiginninneq Jehovamut attaveqarluarnissamut pingaaruteqarluinnarpoq. Salomo ima allappoq: “[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” (Ussatit 3:5, 6) Guutimut siunnersortissarsiornikkut naalannikkullu taassuminnga tatiginninneq inuunermik siunertaqarlualersitsisarpoq. Inuk taamatut inooriaaseqarnini pissutigalugu Jehovap uummataanik nuannaartitsisinnaanngortarpoq akerlilersortaatalu Saatanip unnerluussutaanut akissutissaqartitsisarluni. — Ussatit 27:11.

Allanut attaveqarnermi silatusaarneq. Guutip uiusunut, nuliaasunut meeqqanullu siunnersuutai ullumikkut aatsaat taama atorluarsinnaatigipput. Guuti uiusumut ima oqarpoq: “Tipaatsuutigiuk inuusunninni nuliarilikkat,” tamannalu ilaatigut paasisariaqarpoq nuliaminut ilumoorfiginnittuarnissaatut. (Ussatit 5:18-20) Arnat aappallit Ussatini atuarsinnaavaat nuliaasup pikkorissup uiminit qitornaminillu nersorneqartup nuannersumik allaatigineqarnera. (Ussatit, kapitali 31) Meeqqallu siunnersorneqarput angajoqqaaminnut naalaqqullugit. (Ussatit 6:20) Ussatini aamma ersersinneqarpoq ikinnguteqarneq pingaaruteqarluinnartoq immikkoorniartuuneq namminissarsiortunngortitsisarmat. (Ussatit 18:1) Ikinngutit ajunngitsumik ajortumilluunniit sunnersinnaammatigut ikinngutissatsinnik isumatusaartumik toqqaasariaqarpugut. — Ussatit 13:20; 17:17.

Imminut paarilluarneq. Ussatini nalissaqanngitsunik siunnersuuteqarpoq imigassamik atornerluinnginnissaq, misigissutsinik peqqissutsimut iluaqutaasunik ineriartortitsinissaq ajoqutaasunillu akiuinissaq aamma eqiasuilluni sulinissaq pillugit. (Ussatit 6:6; 14:30; 20:1) Mianersoqqussutigineqarpoq inuup naliliisinnaassusianik siunnersuutinut Guutimeersunut naapertuutinngitsumik tutsuiginninneq ajunaarutaasartoq. (Ussatit 14:12) Kajumissaarneqarpugut ilorlikkut pissuserput, uummaterput, ajortumik sunnerneqaqqunagu illersussagipput eqqaasinneqarlutalu ‘inuuneq uummammit aallaaveqartoq’. — Ussatit 4:23.

Silarsuaq tamakkerlugu inuit millionillit paasisimavaat siunnersuutinik tamakkuninnga malinninneq inuunermik pitsaanerulersitsisartoq. Taamaattumik Jehovap naalakkamissut akuerinissaanut pissutissaqarluarput.

— Tunngavigineqartut: Ussatit.