Imarisai

Saqqaata tullia

Imai

Jehovap Nalunaajaasui

Kalaallisut

Biibilimi sorpiaat ajoqersuutigineqarpat?

 TAPILIUSSAQ

“Tarneq” aamma “anersaaq” – oqaatsit taakku qanoq isumaqavissut

“Tarneq” aamma “anersaaq” – oqaatsit taakku qanoq isumaqavissut

OQAATSIT “tar­neq” aam­ma “anersaaq” tusaraangak­kit suna eq­qaasar­piuk? Inup­pas­suit isumaqar­put ilutsin­ni takus­saan­ngitsoq toqusuitsorlu pineqar­toq. Isumaqar­put toqunermi inuup ilaata takus­saan­ngitsup timi qimat­taraa arlaatigul­lu uumaan­nar­tar­toq. Isuma taman­na taama nalingin­naatigim­mat, inup­pas­suit tupaal­laatigisar­paat ilin­niaraangamik­ku taman­na Biibilimi ajoqersuutigineqan­ngil­luin­nar­toq. Taavami Guutip oqaasia naaper­torlugu tar­neq aam­ma anersaaq suup­pat?

OQAATSIT UKUA BIIBILIMI ATORNEQARNERAT: NÆʹFÆSJ AAMMA PSYCHĒʹ

Sam­meq­qaariar­tigu tar­neq suunersoq. Eq­qaaneqareersutut Biibilip ilarujus­sua hebræerisut grækerisul­lu al­lan­neqaq­qaar­put. Hebræerit oqaatsimut tar­nimut oqaasiat næʹfæsj grækeril­lu oqaatsimut tamatumun­nga oqaasiat psychēʹ Biibilimi ator­neqar­tut Biibilimik nutsik­kani kalaal­lisuuni ilaatigut ima nutser­neqarsimap­put: Inuk, uumasut, inuuneq, uumas­suseqar­toq, anersaar­tor­neq aam­ma tar­neq. Næʹfæsj aam­ma psychēʹ oqaatsil­lu taak­kua al­lan­ngorar­nerat Biibilimi  800-t sin­nerlugit ator­neqar­put, tun­ngaviusumil­lu pineqar­tar­put (1) inuit, (2) uumasut, (3) inuup uumasul­luun­niit inuunera. Al­las­simaf­fiit oqaatsit næʹfæsj-ip aam­ma psychēʹ-p as­sigiin­ngitsunik pingasunik taak­kunin­nga isumaqar­til­lugit ator­neqarfiisa ilaat misis­soriar­tigit.

Inuit. “Noap nalaani ... inuit [psychēʹ] qas­sin­nguit, tas­sa arfineq-pingasut, umiarsuarmiil­lutik an­natsitaap­put imik­kut.” (1 Petrusi 3:20) Uani oqaaseq “inuit” grækerit oqaasian­nit psychēʹ-mit nutsigaavoq – pineqar­tul­lu tas­saap­put Noa taas­sumalu nulia er­nerilu pingasut taak­kualu nuliaat. Man­nanik katersuineq pil­lugu Israelik­kun­nut ilitsersuut Mosesimik al­lak­kat aap­paat 16:16-imi al­las­simavoq. Ima oqarfigineqar­put: “Inoqutis­si [næʹfæsj] amerlas­susiat naaper­torlugu katersuis­saasi tamas­si im­mik­kut tupermi inoqutis­si pisariaqagaan­nik.” Tas­sa man­nanik qanoq katersuisoqar­tiginis­saanut inoqutigiit amerlas­susiat aalajangiisuuvoq. Oqaatsit næʹfæsj aam­ma psychēʹ Biibilimi al­las­simaf­fin­ni ukunani aam­ma tas­saanerar­neqar­put inuit: Josva 11:11 (“inui”) aam­ma Romamiut 13:1 (“inuit”).

Uumasut. Biibilimi pin­ngor­titsinermik oqalut­tuami ima al­las­simasoqar­poq: “Guuti oqar­poq: ‘Imaq uumas­suseqar­tunik [næʹfæsj] ujamerialerli, tim­mis­sal­lu tim­milit nunap qulaani qilaap qaarajun­nerata ataani.’ ... Guuti oqar­poq: ‘Nunap pilersil­ligit uumas­suseqar­tut [næʹfæsj] as­sigiin­ngitsuk­kuutaat, nersutaatit, paarmor­tut nersutil­lu nujuar­tat as­sigiin­ngitsuk­kuutaarlugit.’ Taamaalivorlu.” (1 Mosesi 1:20, 24) Uani aalisak­kat, nersutaatit nersutil­lu nujuar­tat tamarmik næʹfæsj-iunerar­neqar­put. Tim­mis­sat uumasul­lu al­lat aam­ma næʹfæsj-iunerar­neqar­put al­las­simaf­fin­ni ukunani: 1 Mosesi 9:10 (“uumas­susil­lit”) aam­ma 3 Mosesi 11:10, 46 (“uumas­susil­lit”, ‘uumasut’).

Inuup inuunera. Ilaan­nik­kut oqaatsit næʹfæsj aam­ma psychēʹ isumaqar­tar­put inuup inuunera. Jehovap Mosesi ima oqarfigaa: ‘Angutit ilin­nik [il­lit næʹfæsj-in­nik] toqutsiniar­tuugaluit tamarmik toqoreer­put.’ (2 Mosesi 4:19) Mosesip akeraasa inuunera kipitin­niarsaraat. Tamatumalu sior­na Rakeli Benjaminimik er­nereersoq oqalut­tuarineqar­poq “aner­ningilivil­luni [næʹfæsj-ini an­naalivil­lugu]” er­ner­taaminik atsiisoq. (1 Mosesi 35:16-19) Tas­sa Rakelip inuunini an­naavaa. Aam­ma Jiisusip oqaasii uku eq­qarsaatigik­kit: “Uanga tas­saavunga savanik paarsisoq ajun­ngitsoq. Paarsisup ajun­ngitsup savaatini il­lersor­niarlugit inuunini [psychēʹ] akigiumasar­paa.” (Johan­nesi 10:11) Jiisusip psychēʹ-ni, inuunini, inuiaat iluaqutis­saat­tut akigaa. Erseq­qip­poq al­las­simaf­fin­ni tamak­kunani oqaatsit næʹfæsj aam­ma  psychēʹ ator­neqaraangata inuup inuunera pineqar­tar­toq. Oqaatsit næʹfæsj aam­ma psychēʹ taama isumaqar­til­lugit al­las­simaf­fin­ni ukunani aam­ma ator­neqar­put: Eq­qar­tuus­sisut 5:18 (“inuunermin­nik”), Mat­thæusi 10:39 (‘inuunerminik’), Johan­nesi 15:13 (“inuunerminik”) aam­ma Apustilit Suliaat 20:10 (“tar­ningatami”).

Guutip oqaasia atuaq­qis­saar­neruguk­ku paasis­savat oqaatsit ‘toqusuitsoq’ aam­ma ‘naas­saan­ngitsoq’ Biibilimi sumiluun­niit oqaatsinut næʹfæsj-imut aam­ma psychēʹ-mut at­tuumas­suteqar­tin­neqan­ngitsut. Akerlianik Al­lak­kani al­las­simavoq næʹfæsj toqusuitsuunani toqusin­naasoq. (Ezekieli 18:4, 20, ‘inuk’) Taamaat­tumik Biibili naaper­torlugu toqusimasoq tas­saavoq næʹfæsj toqungasoq toqusumiil­lu arlaan­nik ingerlaq­qit­toqar­neq ajor­toq. – Oqaluus­sisar­tup oqaasii 9:5, 10.

OQAATSIT UKUA BIIBILIMI ATORNEQARNERAT: RUʹACH AAMMA PNEUʹMA

Maan­na sam­meriar­tigu anersaaq suunersoq. Ilaat isumaqar­put oqaatsit “anersaaq” aam­ma “tar­neq” as­sigiim­mik isumaqar­tut. Taamaan­ngilarli. Biibilimi ersersin­neqar­poq “anersaaq” aam­ma “tar­neq” as­sigiin­ngitsuusut. Qanoq as­sigiin­ngitsuup­pat?

Biibilimik al­lat­tut ‘anersaaq’ pigaangamik­ku hebræerit oqaasiat ruʹach aam­ma grækerit oqaasiat pneuʹma ator­tar­paat. Oqaatsit taak­ku Biibilimik nutsik­kat ilaan­ni ima nutser­neqar­tarsimap­put: inuuneq, anersaartorneq imaluun­niit anersaaq. Biibilimi ersersin­neqar­poq ruʹach aam­ma pneuʹma qanoq paasisariaqar­nersut. As­sersuutigalugu Tus­siaat 104:29-mi al­las­simavoq inuit Jehovamit ‘aner­nermin­nik [ruʹach] arsaar­neqarunik toqus­sasut pujualaanermin­nul­lu uterlutik’. Aam­ma Jaakup al­lagai 2:26-mi al­las­simavoq “timi anersaar­tun­ngitsoq [pneuʹma] toqungasoq”. Versini tamak­kunani oqaatsit ruʹach-ip aam­ma pneuʹma-p ator­neqar­neran­ni pineqar­poq timimik uumas­suseqar­titsisoq. Taan­naqar­nani timi toqungavoq. Taamaat­tumik oqaaseq ruʹach aam­ma ‘nukim­mik’ aam­ma ‘uumas­sum­mik’ nutser­neqar­tar­poq. As­sersuutigalugu Noap nalaani ulersuaq pil­lugu Guuti ima oqar­poq: “Nunarsuarmi ulersuar­titsiumaar­punga anersaar­tor­nermik uumas­sutaasumik [ruʹach] peqar­tut qilaap ataaniit­tut tamaasa nungutil­lugit.” (1 Mosesi 6:17; 7:15, 22) Ruʹach, imaluun­niit pneuʹma, tas­saavoq nukik takus­saan­ngitsoq, uumas­sut, pin­ngor­titanik uumas­suseqar­tunik tamanik uumas­suseqar­titsisoq.

Timip pisatai sulisin­naas­sagunik uumas­sut [ruʹach imaluun­niit pneuʹma] pisariaqar­tip­paat – radiop tusar­naar­neqarsin­naas­saguni  in­naal­lagis­samut ataneqar­tariaqar­neratul­li. Radio bat­teriitor­toq aam­ma erseq­qis­saatigineqarsin­naavoq. Bat­teriileraan­ni ikil­lugulu ‘uum­mar­tar­poq’. Radioli bat­tereeqan­ngitsoq ‘toqungavoq’. Aam­ma taamaap­poq radio in­naal­lagis­samut atanilik in­naal­lagis­samut ataneerul­lugu ik­kut­tar­tua amugaan­ni. Taamatut­taaq timit­ta uumaan­nas­saguni uumas­sut pisariaqar­tip­paa. Soorlu in­naal­lagiaq misigis­suseqan­ngitsoq uumas­sut [ruʹach imaluun­niit pneuʹma] misigis­suseqan­ngilaq, aam­ma eq­qarsarsin­naan­ngilaq. Tas­saavoq nukik kinaas­susiliun­ngitsoq. Tus­siaasior­tup al­lan­neratut ruʹach, tas­sa uumas­sut, taman­na uumas­sutigin­ngik­kutsigu ‘toqus­saagut pujualaanitsin­nul­lu utis­sal­luta’.

Inuk toqugaangat qanoq pisoqar­tar­nersoq pil­lugu Oqaluus­sisar­tup oqaasii 12:7-imi ima al­las­simavoq: ‘Pujualaat [timip sananeqaatai] nunami inigisamin­nut uter­put, anersaar­tor­nerlu uumas­sutaasoq [ruʹach] Guutimut tun­nius­sisiminut uter­poq.’ Ruʹach, tas­sa uumas­sut, timimiik­kun­naar­pat timi toqus­saaq sananeqaatigisaminul­lu – nunamut – utis­sal­luni. Taamatut­taaq uumas­sut pilerfim­minut – Guutimut – utis­saaq. (Jobi 34:14, 15, “anersaar­ninilu uumas­suseqar­titsisoq”; Tus­siaat 36:10) Imaan­ngilaq uumas­sut qilam­mut pisar­toq. Imaap­porli toqungasup siunis­sami inooq­qis­sin­naanis­saanut Guuti aalajangiisuusoq. Inuunera Guutip as­saaniip­porlusooq. Taas­suma pis­saaneratiguin­naq anersaaq, tas­sa uumas­sut, uter­tin­neqarsin­naavoq toqungasoq uum­mar­teq­qil­lugu.

Guuti toqungasunut eq­qaamasaminut tamanut taamator­piaq ilior­niar­toq nalunagu tup­pal­ler­naqaaq! (Johan­nesi 5:28, 29) Jehovap toqumi sinit­tut makititaaf­fim­mi nutaanik timiliuutis­savai uum­mar­teq­qil­lugil­lu anersaamik, tas­sa uumas­sum­mik, tuninerisigut. Ilumut nuan­nerunas­susia!

Oqaatsit næʹfæsj aam­ma psychēʹ aam­mat­taaq ruʹach aam­ma pneuʹma Biibilimi ator­neqar­nerat pil­lugu ukunani paasisaqar­nerusin­naavutit: Quppersagaq Toqugutta qanoq pissaagut? aamma atuagaq Lad os ræsonnere ud fra Skrifterne, qupp. 340-344 aamma 429-433. Jehovap Nalunaajaasuinit saqqummersinneqartut.