Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 116: Qanoq ililluta naassaanngitsumik inuulersinnaasugut

Oqaluttuaq 116: Qanoq ililluta naassaanngitsumik inuulersinnaasugut

NIVIARSIARANNGUUP ikinngutaasalu suna atuaraat nalunngiliuk? Tassaavoq atuagaq una illit atuakkat — Biibilimik oqaluttuaatikka. Oqaluttuarlu illit maanna atuakkat atuarpaat — "Qanoq ililluta naassaanngitsumik inuulersinnaasugut.“

Nukappiaraq atuartoq

Suut-uku ilinniaraat? Naassaanngitsumik inuulissagutta siullermik Jehova erneralu Jesus pillugit ilinniartariaqarpugut. Biibilimi allassimavoq: ’Inuunermut naassaanngitsumut una aqqutissaavoq: Guuti ilumoortutuaq erneralu nunamut aallartitaa, Jesus Kristus, ilisarissallugit.’

Qanoq ililluta Jehova Guuti erneralu Jesus pillugit ilinniarsinnaavugut? Ilaatigut Biibilimik oqaluttuaatikka tamarluinnaat atuarlugu. Tassani Jehova Jesusilu amerlasuunik oqaluttuarineqarput, ilaa? Iliuusiisalu iliuuseriumaagassaasalu ilarpassui oqaluttuarineqarput. Atuagarli una atuarlugu naammanngilaq.

Biibili

Atuagaq alla natermiittoq takuiuk? Tassaavoq Biibili. Biibilimi allassimaffinnik atuakkami uani oqaluttuat tunngavigisaannik arlaat atuffasseqqujuk. Jehova eqqortumik kiffartuussinnaaqqullugu inuunerlu naassaanngitsoq pisinnaaqqullugu Biibilip tamanik ilisimatippaatigut. Taamaattumik Biibilimik akulikitsumik atuaqqissaarneq ileqquliuttariaqarparput.

Kisianni Jehova Guuti Jesus Kristusilu ilisarissallugit naammanngilaq. Taakku pillugit annertuumik ilisimasaqarsinnaagaluarpugut, taamaattorli inuuneq naassaanngitsoq pissanagu. Suna alla pisariaqartoq nalunngiliuk?

Aammattaaq ilikkakkavut malillugit inuusariaqarpugut. Judas Iskariot eqqaamaviuk? Angutit aqqaneq-marluk imminut apustilinngortikkamigit Jesusip toqqagaasa taanna ilagaat. Jehova Jesusilu pillugit Judas assut ilisimasaqarsimagaluarpoq. Qanorli piva? Namminissarsiortunngoriartuaarsimavoq, Jesusilu akeraanut killuutigaa siilvinut 30-nut. Taava Judasip inuuneq naassaanngitsoq pissanngilaa.

Gehazi, oqaluttuami 69-imi oqaluttuarineqartoq, eqqaamaviuk? Atisat aningaasallu piginngisani perusuppai. Taava salluvoq taakku piniarlugit. Jehovalli pillarpaa. Uaguttaaq pillassavaatigut inatsisai naalanngikkutsigik.

Inuppassuaqarporli ajunngitsunik Jehovamik ilumoortumik kiffartuussiuartunik. Taakku malikkumavavut, ilaa? Samueliaraq maligassaalluarpoq. Eqqaamajuk, soorlu oqaluttuami 55-imi atuaripput, taanna sisamaanngikkunik tallimaannarnik ukioqarluni Jehova illernartuummi kiffartuutilersimavaa. Taava qanorluunniit mikitigigaluaruit Jehova kiffartuussinnaavat.

Soorunami tamatta Jesus Kristus malikkumassavarput. Suli nukappiaraalluni, soorlu oqaluttuami 87-imi takutinneqartoq, naalaffimmiissimavoq ataatani qilammiusoq pillugu inuit allat oqaloqatigalugit. Taanna malinniartigu. Inuit sapinngisamik amerlasuut oqaluttuutsigik Guuterput nuanningaartoq Jehova erneralu, Jesus Kristus, pillugit. Taamaaliorutta taava Guutip paratiisissaani nutaami nunami naassaanngitsumik inuusinnaalissaagut.

Juánase 17:3; Tussiaat 145:1-21.