Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 114: Ajussuseq peerneqassaaq

Oqaluttuaq 114: Ajussuseq peerneqassaaq

UANI sumik takusaqarpit? Sakkutoorpassuit hiistinik qaqortunik hiistersut. Malugiulli sumit pisut. Hiistit qilammit pangalipput nuissaniillutik! Ilumut qilammi hiisteqarami?

Jiisusi kunngisut qilammi

Naagga, uku hiistiviunngillat. Tamanna nalunanngilaq, hiistit nuissani pangalissinnaanngimmata, ilaa? Biibilimili hiistit qilammiittut eqqartorneqarput. Suna pissutaasoq nalunngiliuk?

Qanga hiistit sorsunnerni atorneqarajupput. Taamaattumik Biibilip hiistersut qilammit pisut oqaluttuarigamigit takutippaa Guuti nunamiittunut sorsukkumaartoq. Sorsunnissap tamatuma taaguutaa nalunngiliuk? Taaneqarpoq Harmagedon. Sorsunnermi tassani nunami ajussuseq tamarmi peerneqassaaq. Qanoq ililluni?

Sorsunnissami Harmagedonimi Jesus siulersuissaaq. Eqqaamajuk, Jehovap Jesus toqqarmagu naalakkersuisumini kunnginngortillugu. Tamanna pillugu Jesus kunngitut niaqoruteqarpoq. Panaqarporlu takutillugu Guutip akerai tamaasa toqukkumaarini. Tupigusuutigissavarput Guutip inuit ajortut tamaasa nungutikkumaarmagit? Naamik, Guutip siornatigut iliuuserisimasai eqqarsaatigigaanni tupaallannanngilaq.

Oqaluttuaq 10 uterfigeriaruk. Sumik takusaqarpit? Ulersuaq inunnik ajortunik nungutitsisoq. Kia ulersuaq pilersippaa? Jehova Guutip. Taava oqaluttuaq 15 takoriaruk. Qanoq pisoqarpa? Sodoma Gomorralu piuneerussaapput innermit Jehovamit pisumit.

Oqaluttuaq 33-mut qupperiarit. Egyptenimiut hiistii qamutaallu qanoq pisut takoriakkit. Kia imermit qarsunneqartippai? Jehovap. Taamaaliorpoq innuttani serniginiarlugit. Oqaluttuaq 76 takoriaruk. Tassani takussavat Jehovap nammineq innuttani, Israelikkut, eqqugaatikkai ajussusiat peqqutigalugu.

Taamaattumik tupigissanngilarput Jehova qilammiorpassuarnik aallartitsissammat nunami ajussuseq tamaat peersikkiartorlugu. Kingunissaalu eqqarsaatigeriaruk! Qupperneq tulleq takoriaruk.

sarĸúmersitat 16:16; 19:11-16.