Imarisai

Imai

Jehovap Nalunaajaasui

Oqaatsit toqqakkit Kalaallisut

Oqaluttuaq 109: Peterip Kornelius tikeraaraa

Oqaluttuaq 109: Peterip Kornelius tikeraaraa

QEQARTOQ tassaavoq apustili Peter, tunuaniippullu ikinngutai. Sunali pillugu angutip Peter pallorfigaa? Taamaaliornera ajunngila? Kinaasoq nalunngiliuk?

Petrusip Corneliusi naapikkaa

Angut tassaavoq Kornelius. Romamiut sakkutuut naalagaraat. Korneliusip Peter ilisarisimanngilaa, oqarfigineqarporli illuminut qaaqqoqqullugu. Tusariartigu tamanna qanoq pisimasoq.

Jesusip ajoqersugai siulliit juutiupput, Korneliusili juutiunngilaq. Guutili asavaa, qinnuigisarpaa inoqatiminullu ajunngitsuulluni. Taava ualit ilaanni inngili taassumunnga takutippoq oqarlunilu: ’Guutip iluaraatit, qinnutitillu tusarpai. Aallartitsiniarit angut Peterimik atilik aggeqqullugu. Joppemut tikeraarpoq, Simon immap sinaani illulik najorlugu.’

Erniinnaq Kornelius aallartitsivoq Peter ujaqqullugu. Aqaguani angutit Joppe pallilermassuk Peter Simonip illuata qaliata qaavaniippoq toqqissumi. Tassani Guutip Peter takorruuisippaa annoraaminersuartut ittumik takusaqartillugu qilammit ammukartumik. Uumasut tamalaat annoraaminermiipput. Guutip inatsisai naapertorlugit uumasut taakku nerisassatut mingunnartuupput, taamaakkaluartorli nipi tutsiuppoq: ’Makigit, Peter. Toqutsigit nerillutillu.’

’Naagga!’ Peter akivoq. ’Mingunnartumik nerinngisaannarpunga.’ Nipilli tutsiulluni Peter oqarfigaa: ’Guutip mingunnanngitsuutitaa mingunnartutut taassanngilat.’ Pingasoriarluni taamaalivoq. Qanoq isumaqarsinnaanersoq Peterip eqqarsaatigileruttoraa angutit Korneliusip aallartitai illumut tikiupput Peterilu apeqqutigalugu.

Peter aterpoq oqarlunilu: ’Uangaavunga ujagarsi. Suna pillugu maannarpisi?’ Angutit nassuiaappaat inngilip Kornelius peqqusimagaa Peter illuminut qaaqqoqqullugu. Peter akuersivoq ilagissallugit. Aqaguani Peter ikinngutaalu aallarput Kornelius Kæsareamiittoq tikeraarniarlugu.

Kornelius qanigisaminik qanittumillu ikinngutiminik katersuutitsivoq. Peter tikiummat Korneliusip ilassivaa. Isigaasa saannut Peter pallorfigaa, soorlu uani takusinnaagit. Peterili oqarpoq: ’Nikuigit; uangattaaq inuinnaavunga.’ Aap, Biibilip takutippaa kukkunerusoq inuk seeqqumiarfigalugu pallorfigissallugu. Jehova kisiat pallorfigissavarput.

Peterip taava katersuussimasut oqaluussiffigai. ’Paasilerpara Guutip inuit kikkulluunniit imminut kiffartorusuttut ilassigai,’ Peter oqarpoq. Sulili oqalutsillugu Guuti anersaaminik illernartumik aallartitsivoq, inuillu oqaatsinik allanertanik oqalulerput. Ajoqersukkat juutiusut Peterip ilagisaasa tamanna tupigusuutigaat, isumaqaraluaramik Guutip juutiinnaat iluarigai. Tamatumuunalu paasivaat Guutip inuit naggueqatigiinnit aalajangersimasunit pisut inunnit naggueqatigiinnit allanit pisunit pingaarnerusutut isiginngikkai. Tamanna tamatta eqqaamasariaqarparput, ilaa?

apustilit suliait 10:1-48; 11:1-18; sarĸúmersitat 19:10.