UANI Jesusip meerannguaq pakkussimavaa. Malunnarpoq Jesusip meeqqat assut nuannarigai. Angutit uku isiginnaartut tassa apustilii. Jesusip qanoq oqarfigai? Paaseriassagit.

Jesus apustiliilu angalallutik ungasissumit tikeqqammerput. Ingerlatillutik apustilit isumaqatigiinngissuteqarsimapput. Angalanerup kingornagut Jesusip aperivai: ’Ingerlatillusi-una suna assortuussutigigissi?’ Jesusip sunaasoq nalunngikkaluarpaa. Aperivorli paasiniarlugu apustilit namminneq tamatuminnga oqaluttuutissaneraanni.

Jiisusi meerarlu

Apustilit akinngillat, assortuussutigigamikku kina arlartik annerusoq. Apustilit ilaat ilaminnit annerujumagaluarput. Jesusip qanoq ililluni ilinniartissavai allanit anneruniarneq kukkusuusoq?

Nukappiarannguaq qaaqquaa taakkulu saavannut inissillugu. Taava ajoqersukkani oqarfigai: ’Oqaatsikka malugisigik. Allanngunngikkussi meerannguatut ilillusi, Guutip naalagaaffianut isinngisaannassaasi. Naalagaaffimmi annerusoq tassaavoq meerannguatut uumatut ilisoq.’ Nalunngiliuk suna pillugu Jesus taamatut oqartoq?

Aap, meerannguit allanit pingaarneruniarneq ajorput. Apustilit tassuunakkut meerannguatut iliniarsarissapput, kinalu arlartik annerusoq imaluunniit pingaarnersaasoq assortuussutiginagu.

Allatiguttaaq Jesusip takutittarpaa meerannguit qanoq asatigalugit. Ilaanni inuit ilaasa meeqqatik Jesusimut aggiuppaat. Apustilit meeqqat nigortinniaraluarpaat, Jesusili oqarpoq: ’Meerannguit uannut qaaginnarlit. Akornuseqinasigik, inuimmi taamaattut Guutip naalagaaffia pigimmassuk.’ Taava Jesusip meeqqat pakkuppai pilluaqqullugillu. Nuanneqaaq nalunnginnatsigu Jesusip meerannguit nuannarigai, ilaa?

Matîuse 18:1-4; 19:13-15; Mákorse 9:33-37; 10:13-16.