Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 93: Amerlasuut nerisinneqartut

Oqaluttuaq 93: Amerlasuut nerisinneqartut

ANNILAARNARTUMIK pisoqarsimavoq. Johannes kuisisoq toqunneqaqqammerpoq. Kunngip nuliata Hero′diasip Johannes nuannarinngilaa. Taassumalu uini akuersisissimavaa Johannes niaquerteqqullugu.

Tamanna tusaramiuk Jesus aliasungaalerpoq. Qimaguppoq kisimiinniarluni. Inuilli malippaat. Inuppassuit takugamigit Jesusip naakkigilerpai. Guutip naalagaaffianik oqaluttuuppai napparsimasortaallu katsorsarlugit.

Unnukkut ajoqersugaasa oqarfigaat: ’Unnulereerpoq, asimiippugullu. Inuit uku aallartikkit eqqatsinni nunaqarfinni nerisassanik pisiniariartoqqullugit.’

Jiisusi inuppassuarnik nerisitsisoq

’Aallartariaqanngillat,’ Jesus akivoq. ’Ilissi nerisissinnaavasi.’ Maanna Jesusip Filip aperivaa: ’Inunnut taakkununnga tamanut sumi naammattunik nerisassarsisinnaavugut?’

’Tamarmilluunniit tamussilaaginnassagaluarpata aningaasarpassuarnik akeqassaaq,’ Filip akivoq. Andreas oqarpoq: ’Nukappiaraq una nerisassatsinnik nassartoq tallimanik iffiaateqarpoq marlunnillu aalisagaateqarluni. Inuppassuarnulli naammanngilluinnarput.’

’Inuit tamaasa ivikkanut ingeqqusigik,’ Jesus oqarpoq. Taava Guuti nerisassanut qutsavigaa, aggortiterlugillu. Taavalu ajoqersukkat iffiat aalisakkallu agguaappaat. Angutit 5000-iupput, arnallu meeqqallu taakkunannga amerlaneroqaat. Tamarmik naammatsingaaramik qaarsillarput. Sinneruttullu ajoqersukkat katersormatigik koorit ulikkaartut aqqaneq-marluupput!

Jesusip ajoqersukkani umiatsiamut ikitippai Galilæap tasersuagut umiartoqqullugit. Unnuakkut anorersualerpoq, mallillu umiatsiaq tamanut tamaanga naluttarpaat. Ajoqersukkat annilaangaqaat. Taavali unnuaroruttornerani inuk immap qaavatigut ornillutik pisuttoq takuaat. Ersinermit nillialeqaat, takusartik sunaasoq nalugamikku.

’Erseqinasi,’ Jesus oqarpoq. ’Uangaavunga!’ Upperisinnaanngilaalli. Peter oqarpoq: ’Naalagaq, ilumut illiuguit immap qaavatigut ilinnut aggeqqunnga.’ Jesus akivoq: ’Qaagit!’ Peterilu umiatsiamit niulluni immakkut pisulerpoq! Taava nangialerpoq kiviartulerlunilu, Jesusilli annaappaa.

Tamatuma kingorna Jesusip inuit tuusintilippassuit neriseqqippai. Taamani iffiat arfineq-marluk aalisagaaqqallu ikittunnguit atorpai. Tamanullu-aasiit naammaqaat. Jesusip inuit isumassorsinnaammagit nuanneqaaq, ilaa? Guutip kunngiutitaatut naalagaalerpat sumilluunniit isumakuluuteqartariaqassanngilagut!

Matîuse 14:1-32; 15:29-38; Juánase 6:1-21.