Imarisai

Imai

Jehovap Nalunaajaasui

Oqaatsit toqqakkit Kalaallisut

Oqaluttuaq 87: Jesus naalaffimmi

Oqaluttuaq 87: Jesus naalaffimmi

NUKAPPIAQQAP issialluni angutit utoqqasaat oqaloqatigai. Angutit Guutip naalaffiani Jerusalemimiittumi ajoqersuisuupput. Nukappiararlu tassaavoq Jesus. Allisimavoq. Aqqaneq-marlunnik ukioqarpoq.

Ajoqersuisut tupigusupput Jesus taama ilisimasaqartigimmat Guuti Biibilimilu allassimasut pillugit. Sunali pillugu Josef Marialu tamaaniinngillat? Sumiippat? Tusariassagit.

Nukappiaqqap Jiisusip ajoqersuisut oqaloqatigigai

Ukiut tamaasa Josefip ilani Jerusalemimukaattarpai poorskimik taaneqartumik nalliuttorsioqatigiartorlugit. Nazaretimit Jerusalem ungasippoq. Taamanikkut biileqanngilaq qimuttuitsoqarnanilu. Inuit amerlanersaat pisuinnartarput, Jerusalemimullu aqqutaa minnerpaamik ullunik pingasunik sivisussuseqartarpoq.

Josefip ilaqutai amerlisimapput. Taamaattumik Jesus nukaqarpoq najaqarlunilu paarisassaminik. Ukioq manna Josef Marialu qitornatik ilagalugit Nazaretimut angerlamut aallarput. Jesus ingerlaqatiminnut ilaasoraat. Unnukkulli unikkallarnerminni tammaavaat. Eqqarliminni ikinngutiminnilu ujarpaat, peqanngilarli! Taava Jerusalemimut utertariaqarput ujarlugu.

Kiisami Jesus maani ajoqersuisut akornanniittoq nanivaat. Tamaani sulerisoq? Tusarnaarpoq apersortarlunilu. Tamarmillu ilisimassusiagut tupigeqaat. Mariali oqarpoq: ’Ernera-aa, sooq taamaaliorpit? Ataatat uangalu ernumaqaagut nanisinnaannginnatsigit.’

’Sooq ujarpisinga?’ Jesus akivoq. ’Naluisiuk ataatama illuaniittussaasunga?’

Aap, Jesus Guutimik ilinniarfissamiikkusuppoq. Uaguttaaq taamaaliortariaqarpugut, ilaa? Nazaretimi sapaatit-akunneri tamaasa Jesus ataatsimiinnernut guutisiorfiusunut najuuttarpoq. Biibilimit ilikkagaqaqaaq, tusarnaartuaannarami. Jesusip maligassiaa malinniartigu.

Lúkarse 2:41-52; Matîuse 13:53-56.