Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 79: Daniel liivit inaanni

Oqaluttuaq 79: Daniel liivit inaanni

ARRAA! Daniel ajornartorsiulersimagunarpoq. Liivilli ajoqusinngilaat. Sooq ajoqusinngikkaat nalunngiliuk? Kia Daniel liiversuit taakkua akornannut igissimavaa? Paasiniariartigu.

Angut Dariusimik atilik maanna Babylonimi kunngiuvoq. Daniel nuannareqaa inussiarneqimmat silatoqalunilu. Dariusip Daniel naalagaaffimmi pissaanertanut ilanngutsippaa. Kisianni Danielimik sinngaginnittoqarpoq, taakkulu pilersaarusiorput.

Dareiosi

Dariusimut ornigupput oqarlutillu: ’Kunngi, isumaqatigiippugut inatsisiliussasutit ullut 30-t guutimulluunniit inummulluunniit qinusoqassanngitsoq, taamaallaat ilinnut. Naalanngitsoq liivit inaannut itersaliamut iginneqassaaq.’ Suna pillugu taamatut inatsisiliorumasut Dariusip naluaa. Ajorinngilaali, taamaattumik inatsit allanneqartippaa. Tassalu inatsit allanngortinneqarsinnaajunnaarpoq.

Inatsit tusaramiuk Daniel angerlarpoq ileqqumisullu qinulluni. Inuit ajortut nalunngilaat Daniel Jehovamut qinujuassasoq. Nuannaarput Daniel peersinniarlugu pilersaarutertik iluatsilersutut immat.

Paasileramiuk suna pillugu inuit taakku taamatut inatsisilioqqusisimasut kunngi Darius aliasoqaaq. Inatsit allanngortissinnaanngilaa, taamaattumik peqqussuteqartariaqarpoq Daniel liivit inaannut itersaliamut igeqqullugu. Kunngilli Daniel oqarfigaa: ’Neriuppunga Guutivit kiffartuussavit annaakkumaaraatit.’

Aliasoqigami unnuaq tamanna Darius sinissinnaanngilaq. Aqaguani ullaannguaq liivit inaannut itersaliamukapallappoq. Assilissap qulaaniittoq takusinnaavat. Suaarpoq: ’Daniel-iaa, Guutip uumasup kiffaa! Guutip kiffartuussavit liivinit annaassinnaasimavaatit?’

Danieli løvit inaanniittoq

’Guutip inngilini aallartippaa,’ Daniel akivoq, ’liivillu qanii matullugit ajoqusinnginniassammannga.’

Kunngi nuannaaqaaq. Peqqusivoq Daniel itersaliamit qaqinneqassasoq. Taava inuit ajortut Danielimik peersitsiniaraluartut liivinut iginneqartippai. Itersaliap naqqanut tunngitsulluunniit liivit saassuppaat saarnilu tamaasa qaqqulullugit.

Taava kunngip Dariusip naalagaaffimmini inuit tamaasa allaffigai: ’Uanga inatsisiliorpunga inuit tamarmik Danielip Guutia ataqqissagaat. Taanna angisuunik tupinnartuliortarpoq. Daniel annaappaa liivinit nerineqaqqunagu.’

Daniel 6:2-29.