Imarisai

Saqqaata tullia

Imai

Jehovap Nalunaajaasui

Kalaallisut

Biibilimik oqaluttuaatikka

Oqaluttuaq 78: Iikkami allannerit

Oqaluttuaq 78: Iikkami allannerit
Assak iikkami allattoq

SUSOQARTORMITAAVAANA? Nalliuttorsiornersuaqarpoq. Babylonip kunngiata nuimasut tuusintillit qaaqqusimavai. Imertarfiit qummuattallu kuultiusut siilviusullu Jerusalemimi Jehovap naalaffianit tigusat atorpaat. Tassanngaannarli inuup assaa silaannarmi erserpoq iikkamilu allalerluni. Inuit tamarmik annilaartorujussuupput.

Belshassari qaaqqusimasanilu

Bel′sazzar, Nebukadnezarip erngutaa, maanna kunngiuvoq. Suaarpoq ilisimasortani sassarteqqullugit. ’Allannernik atuaasinnaasoq isumaannillu uannut nassuiaasinnaasoq tunissuterpassuarnik tunineqassaaq naalagaaffimmilu naalagaanerpaartamut pingajunngortinneqassaaq,’ kunngi oqarpoq. Ilisimasulli arlaannaataluunniit iikkami allannerit atuarsinnaanngilai isumaallu nassuiarsinnaanagu.

Kunngip anaanaata uiverneq tusarpaa nerisarfissuarmullu iserluni. ’Annilaangaqinak,’ kunngimut oqarpoq. ’Naalagaaffinni inoqarpoq guutinik illernartunik ilisimannittumik. Aatavit Nebukadnezarip kunngiugallarami taanna ilisimasunut pisortanngortissimavaa. Atia tassa Daniel. Qaaqquniaruk, taassumalu tamakku tamaasa nassuiassavai.’

Daniel aggertinneqarasuarpoq. Tunissutinik tigusiumanani oqareerami Danielip oqaluttuarilerpaa suna pissutigalugu Jehovap qanga Bel′sazzarip aataa Nebukadnezar kunngiujunnaarsissimagaa. ’Pingaarniarpallaarmat,’ Daniel oqarpoq. ’Jehovallu pillarpaa.’

’Illillu,’ Danielip Bel′sazzar oqarfigaa, ’pisimasut tamakku tamaasa nalunngikkaluarpatit, taamaattorli Nebukadnezaritut pingaarniartigaatit. Peqqusivutit imertarfiit qummuattallu Jehovap naalaffianit tigusat aaqqullugit imerfigeqqullugillu. Guutit qisummit ujaqqamillu sanaat unnersiutigaatit, Pinngortitsisorsuarpulli ataqqinagu. Tamanna pissutigalugu Guutip assak oqaatsinik tamakkuninnga allatsippaa.’

’Allannerit tusakkit,’ Daniel oqarpoq: ’MENÉ, MENÉ, TEKÉL aamma UFARSÍN.

MENÉ isumaqarpoq Guutip naalagaaffivit ullui kisikkai naggaserlugillu. TEKÉL isumaqarpoq oqimaalutamik oqimaalutarneqartutit atorsinnaanngitsutullu paasineqartutit. UFARSÍN isumaqarpoq naalagaaffiit Mediamiunut Persiamiunullu tunniussaasoq.’

Daniel oqalutsillugu Mediamiut Persiamiullu Babylon saassutilersimavaat. Illoqarfik tiguarpaat Bel′sazzarilu toqullugu. Iikkami allannerit unnuaq tamannarpiaq eqquupput. Maannali Israelikkut qanoq pineqassappat? Tamanna erniinnaq tusassavarput, Danielili qanoq pinersoq tusaqqaartigu.

Daniel 5:1-6:1.